الشهر التاسع والنفسة الزفت والتعب ...حياكم نسولف ؟؟

[نور الدنيا 88]

ام خدود وردية
انا بنص السادس و لا تشوفين نفسيتي على اي شي اتناجر مع ريلي صرت اكرهه حيل امس تناجرت معاه و انا ما صارلي اسبوع من رديت عنده لاني هم تناجرت معاه و سويت سالفة
و رحت بيت اهلي

ابسط شي على الغرفة اللي راح اولد فيها انا ابي الملكية و اهو مو راضي
شكو يبخل علي
صج وقت الولادة بتهاوش معاه اذا ما سوالي اللي ابيه و باخذ البيبي و بروح بيت اهلي لوع جبدي لانه

 

[نور الدنيا 88]

انا اخر موعد 21/10 ريضه استغفر الله
يعني قلت اذا ولدت صج بتفرغ حق المشاكل

 

[ام خدود ورديه]

نور الدنيا
ماتنلامين حاسه فيج انا من اول شهر وانا نفسيتي تعبانه وكله ودي اتهاوش وكله بجي وحاله يارب نولد وانرد طبيعيين ياااارب
وعالغرفه تو الناس ياقلبي
حاولي معاه باللين مو بهالواش وترى الرياييل مايعرفون حق الغرف عدل ما يستوعبون السالفه خخخ ماينلامون
الله كريم
وادعولي اليوم بدش طلق صناعي

 

[نور الدنيا 88]

ام خدود وردية
ايي اهو تو الناس بس لازم اعرف شبسوي
و الله يسهل عليج ادعيلي اني اشوف ولدي بصحة و سلامة

 

[ام سلطانوه]

بنات انا بالشهر الثامن نصه وانا من متابعينكم الله يسهل عليكم بالولاده السهله اعتبروني ضيفه ان شاء الله خفيفه عليكم
بغيت اسئلكم انا اليوم موعدي مع الدكتور ولفلي راس البيبي بس احس بعوار مو طبيعي جنه طلوق يجي ويروح ماادري عادي ولا لا
طمنوني الله يخليكم

 

[ToTa 1990]

باركولي بنات دشيت التاسع صارلي يومين .. وحايشني عوااار بظهري من 5 ايام مو راضي يرووح ادعوولي اولد هالاسبوع لاني صج تعبت

 

[om la6ofa]

ام سلطان الله يسهل عليج
ام خدود الله يسهل عليج ولادته اللهم امييم

 

[Jna3iya]

ام سلطانو شلون يعني لف راس الياهل ؟؟

 

[الفنانه79]

مسااااكم الله بالخير

والله يهووون علينا يارب

انا حدددي تعبانه وثقيله استغفر الله كل مره حمالي تعب بس هالمره اكثثثثثر النفسيه زفت وترجيع النساااااااة والاشهر اللي بالنص كله هبوووط حاد وزلاااال والحين الحمدلله دخلت التاسع

ودكتورتي راح اتولدني خلال هالاسبوع او الاسبوع الياي الارجح لان البيبي صغير وتبيه يكبر وانا ولاداااتي قيصريه

وماتتخيلووون النفسيه تحت الصفر كل ماافكر فذ العمليه وفي ابرة الظهر

مع ان ماخذتها في ولادتي الثانيه الحمدلله زينه بس هم خاااايفه ولان انا فيني حساسيه بخشمي وقالتلي الدكتووورخ افضلج ابرة الظهر

وادري قرقت واااااايد بس من التعب ابي افضفض

وبعد قاعده اجهز شغلي للولااااده بس اللي ابيه ان الله يقومني ويقومكم بالسلامه يارب

ادعووووووووووووولي

 

[بيرلا ستور]

انا بعد ما دشيت التاسع واحس خلااااااااااااااص بولد

وااااي اسلي نفسي واضيع وقت بالسوق والنت وبجابل ابني البكر بس ابي الايام تمر

يارب اولد اول التاسع وناسة بقضيها عند اهلي برمضان ا ن شاء الله واقعد اتدلل

 

[ريف العين]

انا بكرية وتوني داخلة التااسع وحااااسة نفسي تعبااااانة وحساسة وثقيييلة صدق اتمنى الولادة اليوم قبل باجر اووووووف
حتى زوجي واهلي صااارو مايعرفوني من نفسياتي واحس لايعة جبدي من نفسي وثقتي زيييييروووو
الله يسهل علي وعليكم ويرزقنا بطفل سليم معافاة اللهم اميييييييييييييين

 

[درر النصرالله]

اليوم رحت الطبيب وقالتلي مفتوح الرحم وفيني طلق
والفير نزل علي نقط دم وقالولي لازم ادخل ولاده
بس وقعت وطلعت على مسؤوليتي قلت بتحمل شوي وامشي وارجع باجر ادعولي يابنات

 

[نور الدنيا 88]

درة حبيبتي الله يسهل عليج ان شاء الله

 

[شيــوخه]

الله يسهل علينا يارررررررررب

كلنا كلنا يارب

 

[زوجة عثمان]

الله يعين ويسهل علينا

 

[ام سلطانوه]

ام سلطانو شلون يعني لف راس الياهل ؟؟

الله بسهل عليج وماتشوفين شلون لف البيبي طبعا اهو بايده الثنتيين ومن الصوبين يدز شوي شوي لما يتاكد انها لفت يحط السونار علي بطني لقيتها صار راسها تحت بقدره قادر اهو شاطر الدكتور​

​

​

​

 

[ام سلطانوه]

الله يسلمج ام لطوف انت تقريبا وياي صح

 

[منى العنزي]

قووه كويتيات
توني طالعه من المستشفى انا اخر موعد ولاده لي ٧/١٧ اللي اهو الاحد ، اول ما وصلت المستشفى نزلت تحت السرداب عشان اسوي سونار واطمن طبعاً كنت ابي دكتوره وماحصلت الا دكتور فاقلت يلا بدخل دخلت وتو حط الجل ع بطني وطالع الجهاز ولا يفز من مكانه انا اهني اخترعت دكتور شفيك شسالفه البيبي فيه شي يقولي لا بس وين اخر سونار لج قلت له مو عندي عند دكتورتي ولا يروح يطلع من الغغرفه انا اهني من الخوف بطني وظهري قاموا يعوروني ولا شوي ويرد مرا ثانيه واسأله دكتور تكفى قولي شسالفه چان يقول والله ماكو شي بس كنت بتابع السونار اللي قبله وهذا الله يسسسسامحه خرعني الحمدالله البيبي تمام بس ضيق خلقي يوم قال من المقاسلت طالع له بالجهاز اني راح اولد٧/٣١ انا اهني والله شوي وابجي يوم مو متحمله شلون ٢٠ يوم المهم خذيت السونار ودخلت ع دكتورتي قالت شافت السونار وقالت كل شي تمااام وبعدها سوتلي فحص داخلي بغيييييييت اموووت تقولي شفيج باحر البيبي يطلع من اهني تحملي عاد خلصت سألتها بشششري متى اولد چان تفول يوم الاحد 7/17 تعالي الصبح بدون اكل عشششان تدخلين ولاده استانست ان خلاص راح افتك وميته خوف لاني بجر وحسسسيت ان الصجيه قربت الله يسسستر ويارب انك تهونها علي يااااارب
وان شاء الله كلكم تولدون بالسلامه

سووووري قرقرت عليكم وايد 

 

[om la6ofa]

الله يقومج بالسلامة منى

 

[Jna3iya]

منى العنزي الله يسهل عليج انشالله وتولدين ابموعدج بالسلامه
ام سلطان انا اول مره اسنع انه يلفون راس البيبي ليش ؟؟ شالفايده ؟