الله يحفظ الكويت بعد ساعتين راح يحتلونها

[Mshael]

اسم الله عليكم من الخرعه والله يحفظ كويتنا من كل شر
باجر اغلب البرامج كلها عن الغزو سواء انا كتبت الموضوع اولا وانا ماحبيت اجيب تفاصيل صداموه واللي سواه ونضيق خلوقنا بس لازم ماننسى ذكرى الغزو ونذكرها لاجيالنا واجيال اجيالنا
ويله كل وحده تكتبلنا خرعتها

 

[jojowa]

انا من قريت العنوان جان أطالع الساعه واسنوعب صج باجر ذكرى الغزو الله لا يعيدها من ايام و يحفظ ديرتنا من كل مكروه يا رب ,,,
بالنسبح حق سؤالج انا كان عمري 9 سنوات و كنا وقتها بمصر و أبوي الله يرحمه اهو الي قالنا الخبر وكنا قاعد نطالع التلفزيون و نشوف الأخبار على كل القنوات و أذكر شفت صورة الأبراج و شلون يطلع منها الدخان و قلت حق أبوي الله يرحمه يعني شلون الأبراج طاحت لا مابي انا أحب ابراجنا و قمت ابجي خايفة عالابراج

 

[تاج الغرور]

أنا بصراح عمري عمر الغزو فما أذكر شي

 

[HeR HiGHNeSs 90]

كان عمري 7 شهور وكنت في بطن امي لوووول بعد شهرين انولد

 

[حلاتي بحركاتي..]

الله يحفظ ديرتنا من كل مكروووه ويرحم بابا جابر وبابا سعد عنوان الموضوع صج موحلوو ولاتزعلين احس جنج تفاولين أكيييد وادري ان موقصدج بس لاتضايقين من البنات لما يقولون خرعتينا وعنوانج يخرع من خوفهم على ديرتنا الغاليه
بس موضوعج حلو وتسلم ايدج أكيد ماراح نسسى وراح نتذكر ونعلم عيالنا وعيال عيالنا عشان ماتنمحي هالذكرى من كل كويتي...

أنا بالغزو كان عمري 2 وجم شهر يعني ماذكر شي أبد أبد
بس أمي تقول كان ابوي بالدوام يعني امي حياتي كانت بروحهاا واااي صج الله يعينها مادري شلون صبرت لين وصلها ابوي
الله يحفظ الكويت واهل الكويت من كل مكرووه
والله يرحم شهداء الكويت ويسكنهم فسيح جناته

 

[Mshael]

حبيبتي حلاتي بحركاتي ابدا انا موزعلانه لان انا نفس شعور البنات وضايق خلقي بهالذكرى بس لازم نتذكرها والعنوان انا كنت اقصد سنة 1990
يعني تقريبا بنات المنتدى اغلبهم صغار الحين جى دور الكبار وينهم نبي ذكرياتهم

 

[ضحكه مستعاره]

بقولكم سالفه صارت بالغزو عشان البنات اللي ماعاشوا هالفتره يعرفون شنو اللي صار لنا

في الاسبوع الاول من الغزو تقريبا الظهر طق الباب علينا ولد جيرانا وكانت اخته بتولد فقال حق ابوي خلووووو اهلي عندكم لانه مايقدر يخليهم بروحهم دخلت امه وخواته الصغار عندنا وطلع هو واخته اللي بتولد وزوجته راحوو المستشفى وقفتهم نقطة تفتيش كاوليه وقالهم انه رايح المستشفى حاله طارئه قالوا له مايصير ماكو روحه وقعد يترجاهم ساعه واخته تتلوى من الالم اخر شي قالوا له خلاص بنخلي واحد يركب معاك طبعا ماجادلهم لانه اخته تعبانه حييل ركب واحد معاه وراح قط اخته المستشفى ودخلوها الولاده جان يقوله الجندي الكاولي يالله امش معانا قال خل اودي اهلي البيت مارضووو قالوا لا نبيك انت واهلك وخذوه هو وزوجته للمدرسه اللي قبال بيتنا اللي حولوها لمعتقل حسبي الله عليهم ودخلوه غرفه وخذووووو زوجته طبعا انهار وقام يسبهم ورفس واحد فيهم جان يرحون يجيبون زوجته ويدخلونها عنده ويتحرشون فيها قدامه واهووو مربط وكانوا بيعتدون عليها قدام عيون تدرون شنو سوى

خنق نفسه بالحبل اللي رابطينه فيه الله يرحمه وزوجته بعد الغزو بجم شهر توفت
هذا شي م اشياء تخفاكم بس حبيت اذكر هالسالفه لانها حيييييل ماثره فيني

 

[الغاليه نونو]

ياعل هذيك الايام ماتنعااد ولا نشووفها يااااااااااارب تحفظ هالديره واهلها من كل مكروه اللهم آمين
" انا يومها كنت ساكنه بحولي بعماره كلها فلسطن وسوريين وعايله كويتيه وحده وصارت الساعه 7 رن التلفون الا امي فديتها تقول لي قومي ييبيي عيالج بسرعه وتعالي وانا نايمه رديت عليها مادري اشقلت احس جني حلمانه رديت وكملت نوووووومتي وشوي قحصت قلت هااااااااااه شسالفه وادق علي امي قلت يماااااااااااااه اشفيج انتي شقلتي من شوي قالت قوووووومي يااااااااابنت وتعالي انتي وعياالج الكويت كلها عراقييييييييييييين تارسين الشوارع وغزونا حسبي الله عليهم

وقووووووووووم افتر عاليهال واحد واحد والخدامه مومستوعبه اشفيها ماما تصارخ وتصيح قلت بسرعه حطي بهالجنطه هدوم حق اليهال بنروح بيت ماماعوده:/(


وعالسريع لميت اغراضي وزخيت جنطتي اللي فيها اوراقي الرسميه والجنطه مالت الهدوم ودقيت سيارتي سلف وعلي دووسه وحده وطوووول الطريج اليهال يبجون ميتين من الخوف وصلت بيت امي واناااااااااااا بآخر نفس من الخرعه


سالفتي مااااااااااااااااااااااتنقال بالغزو يبيلها مجلدات علشان ننترس من اللي صارلي مع عيالي بس ربي سبحااااااانه خير حافظ الحمدلله علي نعمة التحرير عساها سالمه من الشر ديرتنا اليوم ودوووووم ويعز بوناصر ويطول بعمره وكل شيوخنا قووووولوا امين يمه

 

[ام _خلودي]

الله لايعوودها من اياام صج انى كنت ياهل حزن الغزوو

بس الاشفنهااا كبرنا

ضحكه مستعاره

عورتى قلبي حسبي الله عليهم ونعم الوكيل

 

[دموووع عرباويه]

الله لايعوده

والله يارب يخلي الكويت لنا ويخلينا للكويت

عاشت الكويت حره أبيه

 

[shaQshoQa]

انا ما كنت مولوده

,,

الي صار هز الكبير و الصغير .. بس الحمدلله


الكويت اليوم حره

:q8:

 

[A3'LA ELNAS]

ضيقتي خلقنا بالعنوان
الله لا يعيد هالأيام
وحزتها انا ما نولدت
ومشكوره على موضوعج

 

[Mshael]

شكرا لمروركم يااحلى كويتيات
صدقوني ذكرى الغزو حيل مؤلمه وان لازم على كل ام تعلم عيالها هالذكرى وماينسونها ابد هذا دم الكويت اغلى من الدنيا واللي فيها وان الطيه ماتنفع مع بعض الناس وان الجيره مو اي جار يستاهلها ولازم نعلمهم انها حييييييييييييييييييل مؤلمه والحلو فيها طيبة اهل الكويت ووقفتهم مع بعض مافي فرق بين حضري وبدوي ولاغني ولافقير ولاكبير ولاصغير والا اللي صمد داخل الديره والا اللي برا الديره يناشد ويحرر
الله يحفظ الكويت الحبيبه ويديم عزه علينا ويحفظ اميرنا وولي عهده وال الصباح ويرحم اميرنا وحبيبنا امير القلوب الامير بابا جابر والشيخ سعد
قولو امييييييييييييييييييييييييييييييييييييييييييييييييييين

 

[مـرمـر]

فعلاً شي مرعب


الله يديم النعمه ويحفظ المسلمين وبلاد المسلمين في كل مكان

الله يرضا عنا دنيا واخره ولايورينا شي نكرهه

أختكم من السعوديه

 

[زهرااا]

الله يحفظ ديرتنا يا رب

 

[GoLdeN~$~LaDy]

اي والله العنوان يعور القلب

تدرون اني مشغله الراديو الحين وفريت على محطات الكويت

اللي ماكو طاري كلش!!!!!!!

انا كان عمري 9 سنين

وكان ابوي مسافر وكنا بالبيت بروحنا مع امي والخدامه

وتذكر لمن يا خالي الساعه 9 واخذنا كلنا بسرعه حتى قال لأمي لا تاخذين ولاشي معاج يلا بسرعه

ورحنا بيت يدتي بهديه

واللي يعرف شنو كانت هديه ايام الغزو!!!

حدث ولا حرج ماكانو ابطال المقاومه يقربون منها لأنها كانت نقطه تمركز لهالهكره الله ياخذهم

وبيت يدتي كان يم مدرسه وانتو تعرفون شنو كانو يستخدمون المدارس ذيج الأيام

والبيت اللي يمنا كانوا مسوينه مركز لهم !!!!!!!!!!!!!!!!!!!!!!!!

يعنو بس تخيلو شلون كان وضعنا

وكنت أشوف بعيني المدافع اللي حاطينها فوق السطح!!!!!!!!!!

وكنا مستغربين شلون صعدوهم فوق بس البيت كان فيه لفت (كان فيلا كبيره)

كان عددنا كبير معظمنا حريم ويهال وعدد الريايل كان بس 3!!!!!!!!!!!

الله رحمنا برحمته

والله بتظل هالأيام محفوره في قلوبنا ليوم الدين

وماراح ننسى ابدا ابدا بدا

والله لا يسامح اي عراقي دخل الكويت ولعب فيها ودمرها ودمر شرفها

وحسبي الله ونعم الوكيل

اكرههم

 

[صب القفشه]

الله يحفظج ياا كويتناااا

 

[GoLdeN~$~LaDy]

حطوا عالبرنامج العام

اخيراااااااا

عايشه اليحي قاعده تتحجى عن الغزو

 

[روقاء]

انا كان عمري ايام الغزو 13 سنه وكنا مسافرين وما دريت الا الجمعه الفجر هههه حدنا كنا لاهين ومستانسين بسفره بس من درينا قاعدين نبجي لان ابوي الله يرحمه واخواني بالكويت وبدال ما تكون سفره وناسه صارت مناحه وتعاسه الله يتعس وجه كل عراقي دخل الكويت بظلم واعتقل عيالنا اكرهكم يا جعيبريه وما احبكم.
يسلموووووووو ع موضوع هذا
تشكرات

 

[خاتون الجهرا]

الله لا يعودها من ساعه كان عمري10سنين وقعدت الساعه 4الفجر على صراخ جارتنا وأمي وأقوم أشوف الدنيا معفوسه وجييراننا كلهم بالشارع ما ندري شالسالفه وصوت القصف عالي والعسكريين لبسوا لبسهم ينطرون الأوامر وندور على الراديو إلا كله أغاني وطنيه قلنا أكيد غزو بس ماصدقنا....وإلا أبوي يجينا مسرع ويقول .....إِشششششششش لكويت راحت ونقعد نصيح ونبجي وجارتنا عجوز تصيح تقول هو ماإستحى واقفين معاه 8سنين ويغزينا.....بس ما أبي أكمل ضاق صدري