اللي تبي تصير اقتصادية وتوفر ادش .....

[الدروازه]

جزاكم الله خير على المشاركه

وانشاء الله الكل يستفيد من الموضوع

 

[الدنيا دواره]

ان شاء الله ببتدي اوفر ها الشهر
واقولكم ان شاء الله شنو صار معاي ادعولي اني انجح
وانا بالنسبة للتوفير صفر ولا كل شهر اطلع مديونه حق اختي على الاقل خمسين دينار واختي طالبه وتاخر مصروفها من ابوي بس اتعرف اشلون تصرف
وانا معاشي الحمدالله مو اشويه وما عندي التزامات ولا اقساط ولا يهال وهم ما يظل وجان زين على شي يسوى ما ادري وين يروح
ما اي واحد الشهر الا الحساب صفر
بخاطري مره وحدة بحياتي ايظل معاشي ليه اخر الشهر على الاقل :cxxxp:

 

[dnyay_mll]

انا حاولت اقتصد ماكو فايده
مااقدر ايمع شي
والحين خو كلش كلش
كل شي صايـر غالي والله تعبـنا
الله يعين بس

 

[عسولة ودلوعة]

ما شاء الله عليك
بالفعل لما انثبر في البت اقلل مصروفي

 

[نور الحب]

والله خوش فكرة

يارب نقدر نوفر شويه للمستقبل وللضروف

 

[ام وهابي]

مشكوره اختي دروازه علي الموضوع القيم
طبعا انا العكس تماما
اول كنت ماشا الله عليه اشتري كل اللي في خاطري من ملابس ومكياج وعطور والله ان خواتي بجمعتنا دايما يفتحون شنطتي يشوفون شنو اخر انواع العطور اللي شريتها والمكياج الجديد ويتسلفون لبسي وحتى اشناطي مع انا مو موظفه اخذ مصروفي من زوجي تدرون كم 100 دينار خواتي كلهم مدرسات بس للاسف مثلكم ما يبقى من معاشهم ولا دينار وما عندهم حتي مرات اللي يترس سييايرهم بنزين تدرون ليش انا اقولكم
طبعا الكلام هذا قبل لا زوجي يشتريلي سياره علشان اوصل العيال المدرسه وفتحلي حساب بالبنك علشان مصروفات البيت والمكتبه للمدارس زوجي مسكين دوامه ما يقدر يحك راسه منه الصبح والعصر كله دوام علشان جذي ما يبي يقصر بطلبات البيت خلاني اقوم بالمهمه هذي لاني مثل ما قلت قاعده بالبيت لا شغله ولا مشغله
تدرون شنو لاحظت من تغير بحياتي
اول شي المصروف ما يلحق نص الشهر والسبب كثرت الروحه للجمعيه والاسواق ولا صرت مصرفه درجه اولى
ما يقعد عندي فلس حمر
والسبب كثرت الروحه للسوق والتسوق بدون داعي ولا ازيدكم من الشعر بيت
صرت بعد ما كنت الكشخه في العايله ما عندي حتى فلش اشتري حقي شي جديد ولبسي من سنة جدي ما غيرته
حتى عيالي الصيف كله ما شريت لهم شي جديد من ملابس وغيره
قبل كنت موفره 3000 دينار من مصروفي قبل لا اسوق السياره والله العظيم انهم هم انفعوني في عرس اخوي لان ابوي ما عنده احد يساعده في المصاريف العرس كله عنده بنات واخواني صغار بالعمر ما توظفو وتبرعت لهم بالمصاريف انا وخواتي سوينا قطيه كل وحده واللي تقدر عليه وكنت انا اكثر وحده قطت لاني موفره مبلغ لليوم هذا كان عندي هدف اني اجمع لعرس اخوي كل شهر والحمد الله قدرنا انا خواتي نغطي مصارف العرس تقولون وين اخوك المعرس والله مو مقصر كافي عليه تاثيث شقه الزوجيه
يعني بالعربي مسكي نفسج عن روحات السوق والجمعيهه ولا تروحين الا اذا كان عندك شي ضروري تبين تشترينه
انا قاعده اللحين اعيد احساباتي بالمصروفات مو معقوله الوضع هذا وخاصه اني راح انتقل بعون الله لبيت جديد اكبر ومصاريف اكثر من قبل وحتى بنتي بعد اسنتين راح تكون بالثانويه العامه ولازم اجمع لها فلوس حق المدرسين
وعندي بعد ولدي ودي ادخله مدرسه خاصه وطبعا تحتاج لمصاريف زياده
يعني لازم يكون عندك هدف اتحققينه ببتوفيرك للفلوس
واتمنى اني ارجع مثل قبل اعرف اتصرفبالفلوس وما اضيعها ترى مرات الفلوس الوايد باليد اتخبل الواحد وما تخليه يعرف ايتصرف فيهم
الله يعيني واقدر اوفر

 

[الكرملين]

ماشالله ام وهابي كلامج عين العقل

 

[<> إيلاف الكويت <>]

خوووش فكره

الله يرزقج ان شاءالله من فضله

ويتمم عليج يارب

 

[^^نـــواره^^]

خووووووووووش فكرة

 

[لوباساج]

مشكوره ياالدروازه على نصايحج ورح اقولكم تجربتى اللى خلت رصيدى مكون من 4 اصفار والله العظيم لا ورث ورثته ولا هم يحزنون انا كان معاشى على قدى تدرون احنا الكويتين ملوت اول قاصين علينا كنت باشمهندسه قد الدنيا معاشى 600 دك وكنت صريفه رقم واحد ودايما حسابى بالناقص ليمن نصحنى مدير فرع احد البنوك ان افتح حساب غير المعاش واجرب نفسى يوم 22 قبل لاينزل المعاش اشوف شبقى واحطه فى الحساب التوفير.................. شنو ضاق خلقى لما مر شهرين والحساب صفر بالتوفير قمت اراجع سلوكى الاستهلاكى لقيت الكروت هى اللى ناهبتنى وانا مسميتها (باب الفقر) فقررت انى اسددهم والغيهم ولان نفسى ضعيفه قمت قصيتهم بالمقص واحتجت تقريبا 4 شهور عشان اغطيهم وقللت من سفراتى وروحاتى للسوق وطبقت المثل اللى يقول اللى( ماعندوش مايلزموش) وفعلا زاد من المعاش مره 20دك ومره 200 واستمرت الحال هكذا لغاية ماتعدلت المعاشات وصارت حلوه .....الا السلوك الشرائى تغير عندى فصرت ماشترى الا اللى احتاجه وصرت اشتري القليل الثمين لان اكتشفت ان الهراديس والشغلات اللى نسترخصها اهى اللى تاكل المدخرات والحين عندى كرت واحد اللى اهو الفيزا واحطته بالتجوري مااطلعه الا للسفر وصدقونى التوفير سلووووك ...........سلامتكم تعبت

 

[الدروازه]

اقول للبنات لما يتعودون على الاقتصاد .....يتغير مصروفهم ....

ومشكوره على المشاركه

 

[البيداء_77]

وااااااااااااااااااااااااااااي نفس حالتي بحاول بس كل ساعه يطلعلي شي

 

[الدروازه]

مشكورة البيداء على مشاركتج ....


:tek:
والله يساعدنا على المظاهر ....!!!!

:klhfl:

 

[كيوت_25]

خليني اعطيج بعض الأمثلة :
- مطاعم وخرابيط وفاست فود ووجبات وعروض وهدايا اللي مسوينها ماتهمني
بالعكس كل ماشفت دعاية قاطينها عند باب بيتنا او مع الجريده آخذها واشققها وتكرمون بالزبالة .

- احاول اخلص اللي عندي من اقلام مثلا ولزاق وتعرفين سوالف القرطاسية هذي ..احافظ عليها عدل ولا اشتتها بكل مكان وتضيع علي .. يعني عندي اقلام ناشفة ورصاص مثلا ليش اشتري زيادة !!!
وتعالي شوفي الدثرة بعدين بكل صوب .. أنا وحده ماحب الدثرة كلش
ونفس الشي العطور والميك اب .. اخلص اللي عندي وبعدين اروح اشتري اللي أبيه ..
والحمدلله الجمعيات مليانة عطورات والعروض ماتخلص كل فترة والثانية مسوين عروض.
محد يدري عنج ان مكياجج يديد ومحد يدري عنج ان العطر قديم مثلا والقلم اللي تكتبين فيه رايح موديله أو يفشل .

- اذا رحت الجمعية اشوف اللي أبيه واللي مسجلته عندي وبس ..
يعني ماتهزني مندوبة تقص علي بعرض اخذي 2 والثالث مجاني !!! طيب اذا كان عندي ال2 شامبو وبلسم بالبيت اشتري العرض كامل ليش ؟! على الاقل اخذ الي مو موجود عندي بقيمة أقل ولا اسبب دثرة عندي وفوضى شرائية بحياتي .. يعني مو كل عرض يستاهل اني اقط عليه .. في عروض تسوى وفي عروض مقصه على المستهلك

- عجبني ميلونير امريكي نسيت اسمه بس ذكر شغلة عن توفيره وهي .. يشتري كل شي بحجم التوفير مثل معجون الاسنان .. شامبو وحتى رول القصدير للمطبخ ----> قاعده اطبق مثله في بيتي ولاحظت الفرق

- بوكي: ما اخليه فيه الا 10 او 20 بالكثير

ادري هذرت وايد سوري بس حبيت احط لكم طريقتي

يا زينج و يا زين هذرتج

مشكوره حبيبتي على نقل طريقتج و افكارج الحلوه :tek:​

 

[الدروازه]

مشكورة كيوت على نقلج التجربه من موزه

خوووووووووووووش تجربه ....

 

[كيوت_25]

انا راح انقلكم تجربتي الي كتبتها بموضوع ثاني بس بما اني ما اعرف اسوي اقتباس من موضوع ثاني لي هالموضوع فراح اسوي لكم كوبي على الي كتبته بالموضوع الثاني

--------------------------------------------

بقولكم قصتي مع التوفير


انا مو ظفه صار لي 4 سنوات عمري ما وفرت فلس

و توظفت بشركه اغلبها وافدين و خاصه الفلسطينين

امبيه ما تصدقون اشكثر يوفرون!!!!!

معاشاتهم ربع معاشاتنا ويوفرون بالالاف !!!!!

و الله يجزاها خير كانت معاي موظفه فلسطينيه حرمه عوده ناقشتني بهالامور

و قالت لي انتو يا الكويتين ما تعرفون توفرون ((و اهي صاجه))


و تقول ان راتبها 300 تصرف 100 و توفر 200 !!!

ادري بتقولون هم مصاريفهم غير عنا مو مثل مصاريفنا

بس الفكره انه التوفير عندهم شي اساسي و بمبالغ كبيره مو صغيره و تقول انها حاطه خطه معينه يعني مثلا بالشهر تروح مره السينما و مره تاكل بمطعم مع رفيجاتها تستانس وتصرف بحدود ال100 فقط لاغير


و الحين شوفوا الودايع الي عندها و شوفوا البيوت والاراضي ما شاء الله

و انا خلف الله علي

تصدقون ان معاشي

850 د ك


مو موفره ولا ربع دينار


المهم يا محفوظين السلامه


اول شي تسوينه عشان توفرين انج تحطين فبالج مبلغ معين تبين توصلين له بنهايه مده معينه او يكون فبالج هدف يعني مشروع معين او شغله غاليه بتشترينها عشان و انتي تيمعين هالشي يشجعج انه كل فتره لما تحسين انج مليتي و ودح تفسفسينهم !!

بس لما تشوفين جم يمعتي و جم باقي عشان توصلين حق المبلغ الي حاطته فبالج فتتحسفين انج تصرفينه الين تكملين المبلغ كله

<<< وااااي هالفقره مو جنها لغز ..... لوووووووووول


شوفوا انا عن نفسي هدفي الرئيسي اني



اشتري شقه بالكويت


و طبعا عشان اوصل حق الهدف الرئيسي لازم احقق اهداف ثانويه خطوه بخطوه توصلني لهدفي الرئيسي بإذن الله


الاهداف الفرعيه


الهدف الاول

كان هدفي ايمع اول ألف دينار و احطها ....




(( وديعه )) ...





إي إي وديعه علامكم تخزوني .....


إي يبا في وديعه في بنك التمويل تبدأ من الف دينار الى 4900 دك حق صغار المستثمرين الي نفسنا

و اخترت احطها وديعه عشان لو تنقلب الدنيا ما اقدر اجيسها :jumpon:

الهدف الثاني :

اكمل توفير بحساب توفير وكل ما انتهت سنه الوديعه الماليه ازيد عليها المبلغ الي وفرته بهالسنه و اجدد الوديعه مره ثانيه
يعني مثلا عندي وديعه 1000 دك و خلال السنه يمعت 700 دك فلما يجي وقت تجديد الوديعه اروح زايده عليها ال700 الي وفرتها و تصير وديعتي 1700دك ((عشان ما اجيسهم لو اموت )) و ارد اوفر من اول و جديد و هلم جرا ....

ألـيـن أوصل الهدف الثالث

لما يصير عندي تقريبا 5 الالاف اشتري فيهم ارض بعمان او براس الخيمه يقولون بعد سنه تيبلج دبل سعرها و انساها جم سنه و طبعا ارد اسوي الخطوه الاولى توفير و أحط بوديعه ثانيه ألين يرتفع سعر الارض و ابيعها (( بس بالوقت الحالي يقولون بيوت الخفجي على 6 الاف ))


و الهدف الرابع

بعد ما اخذ قيمه الارض و ازيد عليها من الي وفرته اشتريلي شقه بالكويت و أجرها و يكون اجارها جنه معاش ثاني لي

هاااااااااااااااااااا

اشرايكم بخطتي المتواضعه _03BA:​

 

[الدروازه]

ما شاء الله عليج كيوت ...... فعلا فكرة الوديعه ......

بس لازم الوحده يكون عندها عزيمه .............وما تضعف .....وإذا تعودت ..... راح تحس إنها تتحسف تسحب المبلغ على أي شي ......................

 

[بنت القيصومه]

خووووووووووووووش فكرة وانشالله اسويها

 

[هنادي المزيونة]

:nbvppw:الدروازة .... محد مثلي .... موزة أم فارس
بارك الله فيكم خواتي على هالأفكار
وان شاءالله نتبع خُطاكم
وجزاكم الله ألف خير :nbvppw:

 

[ذويقه و انيقه]

عفيه عليج كيوت و ما شاء الله عليج . آنا مثلج الحمد لله طموحه و أفكر في باجر . و ياريت كل البنات اللي متوظفين حديثا يسوون مثلج . الله يعطيج العافية .