اللي ريلها مو كويتي ..تتفضل تدش

[supermarket]

بنت الكويت العسل -- كلامج صح 100% :eh_s(15):

و احب ارد على البنات اللي يقولون لازم ما نساوي المرأة بالرجل !!! المساواة بالحقوق المدنية و الإنسانية شي و في الحياة الزوجية شي ثاني ... انا كويتية الجنسية و من حقي اني اتساوى بالرجل في جميع الحقوق و هذا حق كفلة لي الدستور الكويتي في المادة 29 (الناس سواسية في الكرامة الانسانية ، وهم متساوون لدى القانون في الحقوق والواجبات العامة ، لا تمييز بينهم في ذلك بسبب الجنس او الاصل او اللغة او الدين .) لكن للأسف اللي حاصل في الكويت انهم يميزون بين الجنسين و خصوصاً إذا تزوجت غير كويتي تكون كأنها مسويه جريمة !! و يعاقبونها بطريقة غير مباشرة و الشي اللي يحر كلام الأخوات في المنتدى ( انتي تزوجتي غير كويتي تحملي ) عيييب عليكم تقولون لها جذي !! هذا نصيبها و لو كنتي انتي مكانها ترضين هالكلام لنفسج ؟؟

احنا بس لو الله يفكنا من هالقبلية و الطائفية اللي منتشرة بالديرة أحنا بخير .. للأسف أعضاء مجلس الأمة و اللي المفروض يمثلون الشعب يتم انتخابهم لأنهم من نفس القبيلة و لا الطائفة ولا ولد فلان و كل شي بالديرة واسطة بواسطة و اللي ما عنده واسطة يضيع ... و يقولون الله لا يغير علينا !! لأ انا اقول الله يغير علينا هالوضع اللي كل ماله وبالنازل ...

الدول الثانية كانت أقل منا بكل النواحي و شوفوا وين وصلوا ليش ما نصير مثل الدول المتطورة ؟؟؟ دول أوروبا تكفل الحق لمواطناتها سواء من بيت أو وظيفة أو حتى راتب لما تكون بطالية بدون ما يقولون لها والله تزوجي من ولد ديرتج !! يعني كل حقوقها مكفولة من غير زواااااااج .. و حتى لما تتزوج حقها مكفول في البيت و المعاش و اذا تبي تقدر تجنس زوجها و عيالها ... و كاهي دولهم ما شاء الله متطورة و وين واصلة !!
و أحنا بس همنا نحارب بناتنا الكويتيات بسبب زواجهم من أجنبي !!!!!! شبابنا نصهم ما يبون يتزوجون بسبب حياة الفساد اللي عايشينها و النص الثاني ياخذون أجنبيات أو يكونون أصلا متزوجين كويتيات ... ما تقولون لي البنات شيسون بهالحالة و انتو تدرون ان نسبة الإناث أكثر من الذكور بالكويت ؟؟؟ يعني البنت تروح تنحرف لان ما يالها نصيب كويتي ؟؟؟ ولا الأحسن إنها تتزوج و تستقر باللي ترضى فيه بدينه و خلقه ؟؟

صج اللي ايده بالنار مو نفس اللي ايده بالماي

كويتيات عايشين برا الكويت و شايفين الويل وانتو اهني تستهزؤن فيهم !!!

تدرون ان الكويتية عيالها مالهم حق التعليم بالمدارس الحكومية إلا إذا كانوا عيالها مواليد الكويت !!!!!!! يعني اذا سافرت و ولدت برا الديرة ولدها ماله حق يتعلم بالمدارس الحكومية ؟؟؟

و كويتية أبناءها عايشين بالخارج طالبت فيهم إنهم يدخلونهم الكويت منعوهم بحجة أن أبوهم اللي مطلق امهم عليه قيد أمني !!! شتسوي الأم يعني ما تشوف عيالها ؟؟ وين الإنسانية ؟؟؟ شنو جريمتها عشان يعاقبونها هالعقاب ؟؟ كل هذا لأنها تزوجت (غير كويتي) .....

حسبي الله و نعم الوكيل

والله ان كلامج 100 %

انتو تدرون ان نسبة الإناث أكثر من الذكور بالكويت ؟؟؟ يعني البنت تروح تنحرف لان ما يالها نصيب كويتي ؟؟؟ ولا الأحسن إنها تتزوج و تستقر باللي ترضى فيه بدينه و خلقه ؟؟

وياريت اللي تلوم الكويتية انها تزوجت من بره ترضى ان ريلها ياخذ الثانية ( كويتية)... عندج الاستعداد!!!

وصج لي قالوا البنات اللي ايدهم بالماي مو مثل اللي ايدهم بالنار

 

[Filakawyia]

صح الموضوع حساس و مهم

بس هذا رايي و لا تزعلون مني

مثل ما قاعدين نتحلطم على الريال اللي ماخذ غير كويتيه ( سواء فلبينيه ولا هنديه ولا ايطاليه ولا ولا ولا ) . . . لا تنسون ان ممكن احد يتحلطم على البنت اللي تاخذ غير كويتي ( ممكن السعوديات او الايطاليات او غيرهم يقولون هالريال هاد بنات الديره و ماخذ الكويتيه ) . . . و الديره تعرض عليها الجنسية و اهيا ماتبي و تتعزز و اعيالها ماخذين كل حقوقهم بديرتنا و و و . . . . الخ

مايصير نذم في الريال و نخلي البنت على كيفها

يا اثنينهم غلط يا اثنينهم صح

المهم . . .

انا ارد اقول اللي خذت غير كويتي . . . اهيا كانت تدري ان اعيالها بيصيرون غير كويتيين . . . و ان ما راح يكون لها بيت و ما و ما و ما . . . فليش اسوي هالشغله و بعدين اقول ليش مايعطوني بيت . . . !!!!

و حتى لو تقولون قيسيها على نفسج . . . اووووكي . . . اذا باخذ غير كويتي . . . مثل ما اقتنعت بجنسيته بقتنع و اقنع اعيالي بجناسيهم . . .

يعني الكويتي اذا خذا غير كويتيه ما راح يروح ديرة البنت و يقول عطونا بيت !!!!! و نفس الشي قيسوها على الكويتية . . .

لو كل وحده ماخذه غير كويتي عطوها بيت . . . !!! اشحقه اخذ كويتي و البيت يكون له . . لا والله اخذ غير كويتي و اخذلي بيت حقي و باسمي صح !!!!!

و اذا على قولتكم السعودية و غيرها و غيرها مو قاعدين يشغلونكم او يخلونكم تكملون دراستكم او او او . . . فهالشي الكويت مالها شغل فيه . . . هذيل قوانين السعودية . . . ناقشوا السعوديين فيها

و حددوا على شنو بتقيسون هالسالفه . . . مو اذا يازلكم الشرع قلتوا شرعا . . . و اذا يازلكم المنطق قلتوا منطقيا . . و اذا يازتلكم السياسه قلتوا سياسيا . . .

تبون الشرع . . . المرة تتبع ريلها . . . دامج رضيتي ابهالريال . . . اذا عنده بيت بتقعدين في بيت و اذا عنده ياخور بتقعدين وياه و اذا عنده شقه بتقعدين وياه و وين مايروح تروحين وياه

و اذا بتقولون اشمعنه الغير كويتيه اذا تزوجت كويتي تاخذ الجنسيه . . . انا مو مع هالقرار بالعكس

انا برايي كل من على جنسيته . . . العيال يتبعون ابوهم سواء كويتي او غير كويتي و البنت لها جنسيتها من الاساس مالا داعي نقلب الجناسي على كيفنا​

 

[عالي مستواها]

والله مع إحترامي للخوات اللي عرضوا مشكلتهم - هذا إن وجدت مشكلة بالأساس - أنا من رايي الشخصية أنه الزوجة والأبناء يتبعون الزوج في الجنسية فمو معقول الكويت بتجنس مواطنين يحملون جناسي ثانية بس عشان أمهم كويتية
أنا هذا من رايي ونقيس عليه بعد قضية البدون - على الرغم من أنها مو موضوعنا -
حنا مو ضد زواج الكويتية من أجنبي بس نتكلم بالمنطق بما أنها رضت تاخذ أجنبي فهي راضيه بأنها تتبع جنسيته وهذا مو بس قانون الكويت لكن قانون دولي وما نقيس هالشي بالدول الأوروبية لأنه بالأساس شعوبهم مختلطة...

أنا أعرف شكثر بنات من الأهل متزوجين أجانب ( سعوديين ) ومرتاحين ولا عندهم مشاكل ..
والحمد لله حنا بديرة خير الكويت ما منعت الكويتيات من الزواج من أجنبي ولا سحبت جناسيهم عشان تقولون ظلم بالعكس هي كفلت حقوقهم بحال تطلقت أو مات زوجها لأنه ما تكون على ذمة رجلها فبالحالة هذي الدولة تعطيها كامل حقوقها ..

هذا رايي الشخصي ولاشك الحديث يطول بهالموضوع .. الموضوع ذكرني بحلقة لبرنامج اليوم السابع لمحمود سعد كان عنوان الحلقة " هل يعقل أن يكون إبن الخليجية غير خليجي ؟ " وسؤاله نرفزني حيل ليش يعني يحدد " الخليجية " كل هذا طمع ؟

 

[Smarties]

والله كلامكم شي بالأحلااااااااااااااااااااااااام
و واقع الكويتية شي ثاااااااااااااني

ما رديتو علي هالنقطة أكيد ما تدرون عنها---> ليش كويتية يمنعونها اتييب عيالها الكويت لأن طليقها عليه قيد أمني ؟؟؟؟؟؟؟؟؟
بعد قولو انها كانت تدري قبل الزواج بيصير جذي !!! أم و تبي تشوف عيالها بديرتها ليش يمنعونهااااااااا ؟؟؟!!!

انتو قاعدين ببيوتكم و مرتاحين و مو حاسين بغيركم و تقولون الكويت مو ملزومه و مادري شنو !!! ... قاعدين نقولكم دام اني كويــــــــــتية لي حقــــــــــــوق مثل حقــــــوق الرجل و حقي كفلة الدستور الكويتي لكن بسبب الوضع السياسي المتردي بالديرة محد قادر يردلنا حقوقنا اللي ضاعت !!! حق المرأة السياسي و بالغصب عطونا اياه و من أول ما اخذت المرأة حقوقها السياسية إبتدت تتغير حملات المرشحين لمجلس الأمة الكل زاد اهتمامه بالمرأة و بقضاياها و منها قضية زواجها من غير كويتي و حقوقها من سكن و رعاية صحية و تعليمية لعيالها !!! لو كانت هالقضية برايكم مالها أهمية و الدولة مو مسؤولة عنها و مو ملزومة فيها ... جان ما تكلموا فيها نواب المجلس و صارت من إهتماماتهم و على راس حملاتهم الإنتخابية ...


و على فكرة ---> الكويتي يقدر يتزوج أجنبية و يقعد بديرتها و يطالب الحكومة تعطيه بيت و إذا يبي يعطونه جنسية له و لعيالة و تأمين صحي و معاشات و اهو مرتاح .... طبعا هذا بالدول المتطورة مو الدول النامية !!!

بعدين شاللي ضاركم لي خذت الكويتية حقوقها المسلوبة ؟؟؟ ترا احنا الكويتيين كلنا عددنا مليون !!! و الحمدلله ديرتنا ديرة خير و عز ... شوفو الدول المتطورة لا عندهم نفط ولا ثروات مثل الكويت و عددهم بالملايين 30 - 40 - 90 مليون ... و قاعدين يجنسون و يعاملون مواطناتهم أحسن معاملة و عادي و شوفوهم وين واصلين بتطورهم و تقدمهم و احنا كل ماله و نرجع ورا للأسف ....

خير ديرتنا يروح بالبلايين حق دول ثانية و بناتنا الكويتيات محرومين من أبسط حقوقهم

----------------

لا تظلمن إذا ما كنت مقتدراً *** فالظلم آخره يفضي إلى الندم

تنام عيناك والمظلوم منتبه *** يدعو عليك وعين الله لم تنم

 

[ريفيل]

انا اشوف ان فعلا الوحدة لما تاخذ قرار الزواج من اي شخص تحط باعتبارها المستقبل ..عيالها .. وضعها الاجتماعي ..كل شي مو بس زوج واخذه من ديرته اشلعة من عرجه واخذه لديرتي ... بعدين الدوله مو ملزومه باي شكل من الاشكال بعيال الكويتيه لهم دوله مسؤله عنهم ومتكفلة فيهم شي ثاني اذا الابو ترك ديرته وتنكر لها شلون العيال شبيسون لديرة امهم ما راح يكونون احسن من ابوهم)

 

[سما الكويت]

بقول لكم سالفه صارت..

كويتيه تزوجت سعودى..وعلشان تتوظف وتقدر تمتلك لهاعقارات باسمها((القانون وقتها بالسعوديه ما يسمح لغير السعودى يمتلك عقار باسمه..))..


كنسلت الجنسيه الكويتيه واخذت السعوديه على زوجها..

وعاشت حياتها طبيعى..احسبتها قالت انا شنو لى بالكويت!! اكيد انا تابعه زوجى وعيالى عمرى كله!!

لكن اللى ما توقعته..طلقها بعد 18 سنه زواج وبدون علمها..

وبعد كل هالسنوات..رجعت للكويت .لاجنسيه ولا معاش ولاهم يحزنون..

كانت السعوديه وقتها تصرف راتب للمطلقه 4000ريال مره بالسنه!!!

هالسالفه صارت قبل تقريبا12 سنه بالرياض..

بالمقابل..

اللى ما تعرفونه ان السعوديه اذا تزوجت كويتى وتجنست..تظل جنسيتها محفوظه لها ترجع تاخذها باى وقت تسقط فيه الكويتيه..

وطبعا ماراح تسقطها لاى سبب..

ليش الكويت ما تصير نفس السعوديه بهالنقطه..جان مشاكلنا كلها انحلت..

مانبى معاشات ولا بيوت ولا جناسي لعيالنا وازواجنا..

نبى نكمل دراستنا ونتوظف حالنا حال الناس..

ودمتم يا الغاليات..

 

[ونات فطوطه]

يا بنات تدرون لو الأجنبي لا تزوج كويتية عطوه الجنسية
جان صاارت صج سمردحه وبترووح الديره فيها تدرون لييييييش؟؟؟
لأن أي واحد فلسطيني والا مصري والا والا والا طمعان بالجنسية الكويتية
بيدورله وحده من بنات الديره اليهالوه اللي مهيتات بالمجمعات مع السايق
بدون لا رقيب ولا حسيب بيقص عليها وبيلعب بمخها ولا تزوجها وخذا
الجنسية وصار كويتي أول شي بيطلقها أو يخليها عنده مثل الخدامه
وبيسرح ويمرح صج عساس انه كويتي وشوف النسل عاد باجر الديره
والمجتمع يخرب من عيال هالاشكال هذيل وأكيد بيريون عيالهم على تربيتهم
يعني الفلسطيني أو الأردني بيربي عياله على طيعه وطبع أهله وعياله
لا كبروا بيكونون كويتيين بس بياخذ من فلسطينيه من أهله وتلقاهم يكونون
عايله كويتية بالاوراق عشان العيشة المريحة وشفط فلوس الكويت بس الولاء
وحب الديره مستحيل يعيش بقلوبهم مثل حب أهل الكويت الأصيلين اللي
من سنين وأجدادهم وأهلهم عمروا هالديره وعاشوا فيها يوم كانت بررر
والعيشة فيها صععععبه ..

آنا أقول الحمدلله ما يعطون زوج الكويتية الجنسية والا جان ضاعت الديره
وضاعوا بنات الديره اليهالوه اللي من كلمه وكلمتين ينقص عليها ..
بس هم المفروض الخليجي اذا تزوج الكويتية يعامل معاملة الكويتي ..
أما غير الخليجي لأأأأأأأأأأأأأأأ وألف لأأأأأأأأأأأ
وحلاة الثوب رقعته منه وفيه ....​

 

[دمعة فرح]

مستحيل اتزووج واحد غير عن بلادي

 

[norema-sarto]

مساكم الله بالخير يا بنات الخير والوجوه السمحه....
أعتذر لكم على غيابي في الرد ..لأني كنت مشغوله جدا جدا

ولــــــــــــــــــكن...رساله أوجها لكل من أدخلت علينا ..

كل الشكر لكل من ساهمت وأبدت برايها( ما أبي أخصص) على الموضوع اللي بعضهم يعتبره حساس والبعض الآخر أنه عادي .... وما شاء الله عليكم يا بنات شاددين الحيل معاي...بس يواش يواش

أحب أخبركم ...أن الموضوع فقط للنقاش وإبداء الرأي فيه ...ولن نستطيع تغيير شيء فيه ... ولكن نستطيع تبادل وجهات النظر ...

مع تحياتيييييييييييي،،،،

 

[انا كويتية]

انا بنت عمي ماخذه سعودي وعايشة معاه بالسعودية ومارضت تتنازل عن الجنسية والجواز الكويتي مع ان زوجها جوازه دبلوماسي وماعليه قاصر ..... وما قعدت بالبيت كاهي تشتغل وتداوم عادي وهي كويتية ....

 

[ليالي الكويت]

معانـا وحدة بالدوام اردنية من أصل فلسطينـــي وبدون مبالغة دايما لما تتكلم أحس فيها كره للكويت دايما ضدنا ان سبينا اي دولة أو تناقشنا بالسياسـة تزوجت كويتي ويابت منه 3 وطلقها وطبعا خذت الجنسيـة وبعدهاا تزوجت ولـد خالهاا << تخيلوا لو هذا ياخذ الجنسيـة شنو بيكوووووووون



كان كل وحدة من أمثالها اخذت كويتي وطلقها بعدين اخذت ولد ديرتها وجنستـه بنقوول على الديرة السلااااااااام


الله لا يغير علينا بديرتنا اللي كل من عايش فيهااا

 

[سما الكويت]

انا كويتيه ..حياتى بنت عمك وين تشتغل ومن متى؟؟؟

انا فريت المملكه طول وعرض وما حصلت الا ان امى تكون سعوديه...

والوالده كويتيه..

قالولى بهالحاله تنظافين على زوجك وتتنازلين عن الكويتيه..وتتوظفين..

يمكن بنت عمك لان زوجها دبلوماسي له وضع خاص!!!

ياريت تسألين لى وتردين على ..

لان هذى مشكلتى الرئيسيه..

وتسلمين يا الغاليه..

 

[norema-sarto]

معانـا وحدة بالدوام اردنية من أصل فلسطينـــي وبدون مبالغة دايما لما تتكلم أحس فيها كره للكويت دايما ضدنا ان سبينا اي دولة أو تناقشنا بالسياسـة تزوجت كويتي ويابت منه 3 وطلقها وطبعا خذت الجنسيـة وبعدهاا تزوجت ولـد خالهاا << تخيلوا لو هذا ياخذ الجنسيـة شنو بيكوووووووون



كان كل وحدة من أمثالها اخذت كويتي وطلقها بعدين اخذت ولد ديرتها وجنستـه بنقوول على الديرة السلااااااااام


الله لا يغير علينا بديرتنا اللي كل من عايش فيهااا

مشكورة على تعليقج.....
يا حياتي .... أنا معاج في كل اللي قلتيه... أكيد بنقهر وأموت من الحرة ... لو تردين بأول الصفحة وتقرين أنا شنو كاتبة...
أنا ما أبي الجنسية لريلي... أبيها لعيالي اللي ربيتهم عندي وبديرتي وما يعرفون غير بلدهم الكويت بس ... والله أني كل ما أييب سيرت بلدهم... يبجون ويقولون لا تقولين جذيه ...وحاولت أني أفهمهم عدل أنهم مو كويتيين وأني لازم أضمن حياتهم بديرتهم ....
وعلى فكرة ريللي رافض فكرة أنه ياخذ جنسيه غير جنسيته ...بس نبيها للعيال بس ... وأنا شي اللي حادني أتنازل عن جنسيتي ... إنولدت فيها وأموت عليها ... وإنشالله كل شي يتغير ونصير مثل الدول المتطور ...

تحياتي لكل المشاركين،،،،،​

 

[عديلة روح]

كان عندنا خدامه هنديه تشترط انها تروح بيت قريبتها كل اسبوع مره.انا مره وديتها وانصدمت.
تدرون طلعت قريبتها الهنديه متزوجه كويتي وماخذه الجنسيه وعندها ولد وزوجها متوفي وتعالوا شوفوا البيت الله وكيلكم سفاره هنديه حتى الولد اللي المفروض انه كويتي ما يعرف عربي عدل كلامه مكسر
وسلمولي على الكويتيات

 

[pain]

آآآآآآآآآآآآآنا بنضم لكم يا قافلة المتزوجات غير كويتين

ريلي "بدون"..

مدرس وصحفي

معاشه 1500

آنا كان معاشي 600 وطلعت من وظيفتي لأنه مو معتازه

يمعنا وأخذنا لنا شقه تمليك الحمدلله وشكر يارب بس باجي نكمل أثاثها

حمولة ريلي حموله سنعه وطيبه بالمقابل أبوه بدون وأمه كويتيه بالتأسيس

وما شالله خلفوا بنات وصبيان وعاشوا بسبات ونبات

وآنا من بعدهم

أبداً مافيشش مشاكل

عيالي أقدر أدرسهم حكوومه

بس مابيهم يحسون بفرق بينهم وبين عيال خوالهم درسناهم مدرسه خاصه الروضه بس قيمتها 900 دينار

وآنا اعرف ناس أم وأبو كويتي مايقدرون يدخلون اعيالهم هالمدارس

سيارتين سافطين عند البيت

كل يمعه مرزوزين بمطعم

بذمتكم من اللي قريتوا فيه فيه شي ناقصني؟؟

حشى والله مو ناقصني شي

بما أني كويتيه الحمدلله والشكر يارب اعيالي عندهم ملاديات

ادرسهم اقدر حكومه

اوكي بطاقتهم بدون بس هذا مو عار
ولا عيب

ولدي يقولي ماما ليش بدوري"ولد خالته"بطاقته مو مثلي

قلت له حبيبي عادي باجر بتكون مثله ان شالله

وعلى أمل باجر

مادري ماحس المووضوع فيه أي صعوبه

الحمد والشكر لك يارب

 

[makeup story]

اختي الله يعينكم صج وردااا ع حجيج هذااا

بس والله كل شي مصعبينه علينا..

ابيلى بيت يضفنى انا وعيالى اذا جيت بالصيف..


مو معقوله عايله وهالله هالله وساكنه ببيت ابوى..

ويقولون القانون ما يعطيكم بيت الا بشرط السكن!!!

وزوجى ووظيفته؟؟وعيالى ودراستهم!!!

الله يرضى بجذيه؟؟؟




اختي انا متزوجه كويتي وانا كويتيه وناطرين بييت من فترة ماعطوونا انتوا تبووون لمااتيووون اجازة تراا هم مايصير ويين بيلقوون مناطق حق اللي عايش برا وبالكوييت ع جذي ماراح تكفي الكويت


وبصراحه اللي تتزوج مو كويتي تتحمل لانها عارفه اولا واخيرا العيال يتبعون الابوو

 

[ام الكتكوته]

انا كويتيه وريلي بعد كويتي انا اقول مثل مايجنسون المره على زوجها يجنسون الريال على زوجته بس بشرط

لو الزوجه الغير كويتيه تتطلق تنسحب جنسيتها على شان ما تتمتع بخير الكويت من بعده وعشان ما ترفس النعمه كثل الي قاعد يصير هاليومين واقرب مثال الي قالته عديلة الروح

ونفس الشي الزوج لما يتجنس على زوجته ويطلقها تنسحب جنسيته اهو فقط من غير الابناء على شان ما تصير السالفه خرابيط

والابناء جنسياتهم عندهم لان قانونا الكويتي يجنس ابناء المطلقة والارمله
واتمنى اتكون وجهة نظري عادله
واسفه على الاطاله

 

[norema-sarto]

يعطيكم ألف عافية يا بنات.... على الردود
سواء اللي متزوجة غير كويتي أو الكويتي أو حتى اللي مو متزوجة...
سوالفكم أسعدتني ... وبينتللي إن الموضوع يبيله صج نقاش .. وورتنا بمعانات الكويتية حتى خارج بلدها ( الله يعينها)
لكن ... بهالموضوع ..شوي شوي راح ينشرح صدرنا بمشاركة الكل بركم على موضوعنا الحساس....
ويسلموا الأيادي ... وخلونا على إتصال

 

[norema-sarto]

شدعوة بناااااااااااااااااااااات
محد داش؟؟؟؟
شدعوة؟؟؟
خلص الحجييييييييييييييييي
ياالله زتات.... ناطره تعليقاتكم على الموضوع

 

[jasmine_flower]

تجنيس ابناء الغير الكويتيه هذا حق من حقوقها لانها بنت هالبلد وما اييصير انعاقب البنت الكويتيه لانها اختارت تتزوج غير كويتى وانقول لها تحملى اهيا ما غلطت و اختارات هالزوج لانه الدين سمح لها وكلنا اعيال ادم وحوا والام الى ربت اعيالها على حب الكويت اكيد ماراح يجحدون وينكرون فضلها ومثل ما المواطنين مسئولين جدام ديرتهم ان يدافعون عنها ويعمرونها الدوله مسئوله ان ترعى مواطنيها للكويتيه و الكويتى ومن حقهم يتجنسون على جنسيه امهم لان دمهم دم كويتى بتقولون احنا احسن من الدول الباجيه ندرى انها احسن بس الانسان يطلع على الافضل والاحسن واحنا فى عصر التقدم لازم نعطى زايده حقوق وهالشى الله سبحانه وتعالى راح يبارك فيه لانه فيه خير