اللي كارهه زوجها وكارهه ترجع بيت اهلها شنو حلها ؟؟

[* بنت المطر *]

بسم الله الرحمن الرحيم

حبيباتي فيه وحده معاي بالدوام ارتحت لها وارتاحت لي ف قمنا ع طول مع بعض عاد قامت

تفضفض لي !! جد جد تعور قلبي عليها هانت علي مشاكلي والله وقمت اتمنى لوبيدي شي اسويه

لها ::::

نكون قاعدين نسولف ونضحك فجاه يدق عليها زوجها تتبلعم واهي تتكلم معاه ينقلب لونها

ينعفس مزاجها تقوم تتكلم بسرعه بسرعه وتخبط احسها تصير موطبيعيه والله وتعصب على اتفه

شي !!! المهم مره عصبت عليها نرفزتني تصرفاتها جان تقوم تبجي قالت كله منه شكلي بصير

مجنونهوقامت تخربط اااااااااااااخ سالفتها تقطع القلب ! خن ندخل بالسالفه ::

البنت اوصلت لي ال30 ماتزوجت .. امها موكويتيه ف ماتختلط بالناس .. البنت حلوه وشاطره

وموظفه من قبل لاتتزوج .. امها يوم ايست من زواجها حطت اسمها عند خطابه جاها زوج الندامه

وملج عليها _ اتصلت حرمه على امها وقالتلها ان مجنون وعنده كرت احمر وهاجات منه حرمتين

الام اسكتت ( الله يسامحها )الظاهر تبي الفكه من بنتها ف ماقالتلها ...

تزوجت البنت واشبعت ضيم وقهر من هالرجال ..الفاظه اوصخ منها مافيه سب وشتم ومعاير كل

لفظ وصخ عنده لدرجة ان يغلط على الذات الالهيه استغفرالله وعلى امه وعلى ابوه(على فكره ابوه متوفي ) تقول عنده صيدليه كامله كلها حبوب ماتدري شنو بس يلط من هالحبوب الله لايبلانا

ويطق ويدور الزله .. صبرت عليه وتحملته كل هذا كرها ابيت اهلها وكرها للرده لهم ..

تحلفلي انها قبل لاتتزوج يوم كانت تداوم وتجي حزت الرجعه للبيت كانت تبجي ماتبي بيتهم كارهه

وضعها عند اهلها ومعاملتهم لها !!

احملت منه وجابت ولد قالت عساه يتغير_ ماتغير الا زاد كان يعطيها طراقات بالجوتي ( تكرمون)

يتصيد عليها اي شي مايناديها الا باوصخ الالفاظ يالقــ........ يام العـــ.......... استغفرالله

لم تقوله الله يسامحك تتوقعون شيرد !! استغفرالله يارب لاتواخذني على هالكلام بس تعيشون

معاناتها والله يابنات يقولها "" الله لو فيه خير مابلاني فيج "" عمى بعينه والله

بنات لم يدشبالليل عليها ويلقى الولد طالعه طرف رجوله من الكنبل تخيلوا بدال مايلحفه يقعدها من نومها

ويزفها ويهزاها باوصخ كلام تتوقعونه !! الاسبوع اللي طاف جايه جلدها ازرق ورتني ايدينها تقول طاقني بهوز

عشان قالتله لاتنبش تلفوني !!

بنات قام يحن عليها تاخذله قرض بيغير سيارته ع قولته سيارته اهي سبب نفسيته ! والا يبي

موديل معين ! قامت خذتله قرض قالت يمكن يتغير يمكن نفسيته ترتاح !! بس مع الاسف ماكو

فايده الا هذي الفاظه وهذي لعانته

الله يعينها والله معوره قلبي وحبيت اسدح سالفتها لكم __ لاتقولون خل تتطلق انا قبلكم قلتلها

مليون مره : ماتبي بنات تقول يذبحني ولاارد لهلي اخوانها مافيهم خير ومايحبونها والبنت صايره

نفسيه وانفعاليه صج صج مالها حل مااقول الا الله يكون بعونها ويلطف بحالها جد وضعها صعب

الله لايبيلكم بواحد جذي !

اللي يتقول خل تتطلق وتسكن بروحها اقولها البنت بدويه

والبدو مايرضون على بناتهم هالشي الا يمكن يذبحونها والا

هي ودها !!

بنات انتوا لومكانها ( اسم الله عليكم ) شتسوون ؟؟؟؟؟

انا عن نفسي صراحه ارد بيت اهلي لوشنو ماكانوا ولوشنو

ماسووا فيني ؟؟


يالله ابي مشاركاتكم حبايبي ​

 

[وافرر]

لاحول ولاقوة الا بالله كسرت خاطرى الله يعينها
صراحة لومكانها ماتحمل عيشته اخذ ولدى واربيه هذا موصاحى الى يبلع بالحبوب ويسب الله استغفر الله
حبوووب وطق وسب وبعد كفر اعووذبالله مادرى شقول والله !!!!!!!!!
ماينعاش معاه
ماااااااااااااااافيه خير

 

[كليـ دلعـ]

رايي من رايج لان ماكو حل

 

[الحياة تجربه]

رايي انه تلجا لرب الرحمن ان قال كن فيكون
كلامي مختصر وايد
بس رحمه رب العباد واسعه

 

[ياليتهم يشعرون]

الله يكون بعونها حوبتها ورى امهاً

 

[سمر شمر]

عسى الله يكتب لها الخير بهالولد اللي يايبته

جود لاكبر تطلق من هالمريض وتاجر اهيا وولدهاا وترتاح

منهم

 

[روح مغليهاM]

الله يكون بعونها

 

[*E.B.D.A.3*]

شوفي حبيبتي
مسكي رفيجتج هاذي عددددل ..
قوليلها هالحجي بالحرف الواحد

"
انتي عيشتي تجربه ابيتكم وكرهتي اهلج
هل تبين ولدج يعيش نفس تجربتج ويكره بيت اهله ؟؟؟؟
انتي جربتي مراره الاهل وقسوتهم!
هل تبين ولدج يعاني مراره قسوة الاهل ؟؟؟
انتي تبين تحطين ولدج بنفس تجربتج وتظلمينه معاج؟؟؟؟
تبينه يتعقد ولي طق عمره 17 سنة، ينحاش من البيت ومايرد؟؟؟
تبين ولدج يمر بنفس الي مريتي فيه؟؟؟؟
"

الابو مبين عليه قاااااضي ! والي مد ايده عليها
راح يمد ايده على ولده في يوم من الايام!!
وراح اينن الولد مثل ما ينن امه !!

عشان خاطر هالياهل المسكين خل ترد بيت اهلها
ولا تصير انانية وتفكر بمشاعرها اهيه وبس!!
وبااجر، لي تفككت الاسرة ، تقعد تندب على حظها وتقول ياريت وياريت،
بوقت الي هالياريت مراح تصلح المنكسر!

 

[رورو 88]

تنحاش منه

خل تقب بعمرها ! من صجها

مبين مينون وياخذ حبوب عشان يهدى

والدليل ان محذرينهم منه ان مو صاحي انا انصدمت من الام شلون سكتت

ممكن واهيا نايمه يذبحها ! والا يسوي فيها عاهه مستديمه من الطق

لا ويكفر بالله بعد اشكره !؟ حتى بالشرع ما يجوز تقعد عنده

اذا مو مهتمه من ناحيه الشرع خل تهتم على سلامتها !

وحرام الولد يعيش ببيئه جذي

احنا انعرف وحده متقدملها مينون بس ما قالوا اهله ويوكلونه حبوب عشان يسكت

يوم قعدوا بغرفه وحده حست ان في شي ويناقز عالسرير

واليوم الثاني طلع سلط ملط يسقي الزرع بالحديقه

طبعا قبت بعمرها مسكينه

نصيحه هذا ما يتعاشر كفر بالله وطق وهم قواه العقليه مشكوك فيها

اهلها حتى لو مو زينين جنه بالنسبه لهذا

 

[DaLoo3t BaBaTii]

،





استغفر آلله ! ريلهآ شكله منتهي ! مآله حــل !

آلله يعينهآ و يصبرهآ و يهديه ..


قولي لهآ خل تتطلق و ترد حق آهلهآ .. ع آلآقل لمن كآنت عند آهلهآ مآ كآنوا يسوون فيهآ آللي آهو يسويه .. حتى لو معآملتهم مو حلوة معآهآ بس مآ توصل لـ آلذل و الطق !

مهمآ كآن هذول آهلهآ .. و بعدين اهي ليش مآ تقولهم عنه ، شيسووي فيهآ !؟

عذآب هآذي مو حيآة !

آلله يعينهآ ..

 

[love love]

اهلي يطقوني واصير تحت رحمتهم ولا ريال جذيه

 

[-فلانة-]

مريض نفسي و مينون شيقعدني عنده؟؟؟!!!!
أكيد بهج منه و أروح بيت أهلي،،
هذا ماله أمان،، عادي تموت على إيده،،
ترجع بيت أهلها و تتحمل ضيمهم ولا تقعد عنده دقيقة وحدة و تضيع عمرها و عمر ولدها معاه..
​

 

[اميره1980]

هذا انحاش منه و ارفع عليه قضية طلاق للضرر و اقول بالمحكمة ان مو صاحي و اخذ كل حقوقي و حقوق ولدي منه
المحكمة تعطيها ترا بدل ايجار و نفقة و خدامة و سايق و سيارة بعد
شلها فيه
هذا غش بالزواج
الله يسامح امها و اهلها

 

[sh_mashael]

انا بعد مع البنات
يعني لو مجنون بس جان انقول تصبر عليه
بس هاذا قليل ادب و يطق

الله يعينها على اهلها ماكو الا اهم

 

[ام كوثر2007]

المشكله كنت برد نفس ردود البنات واقولج خليها ترد بيت اهلها


لكن انتي تقولين انه لبنت ما تبي تطلق ..


يعني انا اقول من رائي .. انها تتحاشااه . يعني علي قولت عادل امام تكبر الدي وتروق الجي ..


خليها تكبر راسها لا تناشبه لا تحاجيه وتستفزه لا تلعب بتلفوني لا تسوي لا تحط

خليها تتحاشاااه وتمشي معاه علي مووده اهووو ..


يعني خليه دام اهو اللى شاد اهي ترخي .. خليها تبرد اعصابها اشوي

مو معقوله عايشه مع واحد مخه خرطي واهي بعد تصير مخها خرطي وتشد وهو يشد .


الحين الريايييل الصاحين اللى مافيهم الا العافيه الوحده غصب ملقصه روحها فيه وتعابل فيه معابل


فما بالج واحد عنده كرت حمر ؟؟؟؟؟


دام ما تبي تطلق هذا اهو الحل اللى عندي

انها تبرد من اعصابها وتخلي حياتها كلها ولدها

وخليها تعامله جنها تعامل ياهل

شنو ما يقول لها خليها تمشيه وتعدي

تحاول قد ما تقدر ما تستفزه وتنرفزه

جود ينصلح حاله

واذا ما انصلح حاله . علي الاقل تتحاشا النجره معاه .

 

[Patcholli]

دامها ماتبي الطلاق حلها انها تتحمل اهي حطت روحها بين هالخيارين فقط ..ومافي حل اعجازي لمشكلتها الحل اهو الطلاق واهي رافضه للاسف .. مثل ماقالت ام كوثر خل تظل معاه وتسكت وتسوي روحها ماتشوف ولا تسمع ولا تتكلم

 

[Nmnoum]

وااااي الله يفك عوووقها =(

 

[sosowaty]

ااااااب

 

[شادن33]

اعوووذ بالله شنو هذا !!!
لا مو لهاالدرجه بايعه عمرها بعد هذا مينون شلون اتامن على روحها
الله المستعان

 

[sKntyny]

حتى لو تتحاشاه وتبعد عنه اهوا راح يتعرض لها
راح يدور الشاره عليها
الطلااااق فقط