أنا أول يوم حطيت ريولي فيه بالمدرسة بكل براءة ماسكة ورقة التعيين اليديد >> الحبيبه عبالها بالجامعة تدور قاعات المحاضرات
المهم كان يومتها 5-4-2010 جنه الاثنين او الثلاثا كان فيه حفلة بمسرح المدرسة والادارة كلهم بالمسرح وفيه ابلات بدنية واقفين
بالساحة يمنعون الطالبات من انهم يقربون صوب المسرح.. المهم شفت أقرب ابلة عندي قلتلها:
السلام عليكم أنا بصير مدرسة عربي وين أروح ؟ >>> ههههههههههه حدي حدي تحسون تايهة
بعدها دخلتني على السكرتارية وعبيت النموذج
اسمي - تاريخ الميلاد - التوقيع - العنوان - رقم التلفون بعدها قالولي استريحي بغرفة الناظرة كلمتني شوي
وعطتني شوية نصائح من طقة التعليم وفيه كذا وكذا وانها مهنة الأنبياء والرسل وكلمتني باختصار عن نظام المدرسة
بعدها اتصلت على المدرسة الأولى لقسم العربي ويات وخذتني وودتني القسم
وبس رحت مالقيت الا ابلة وحدة قاعدة.. الباجي يا مسأذنين أو ماخذين حصص احتياط كون ان اغلب المعلمات بالمسرح وماكو
حصص كان اشبه بيوم مفتوح..
المهم قعدت تسولف وياي هالأبلة اي تخصص ومن هالكلام.. لحد نهاية الدوام وبنفس اليوم يابولي طاولة فيها درج واحد + كرسي
فرار يهبل الكرسي أحلى من الطاولة هههههههههه
وبس هذا كان يومي.. وان شالله يومكم الأول يكون أحلى يوم
بس نصيحة.. وانتي داشة المدرسة
دشي بريولج اليمين وقبل لا تحطين ريولج بالمدرسة
اقري المعوذات + آية الكرسي
واقري 3 مرات ورا بعض:
" وجعلنا من بين أيديهم سدًا ومن خلفهم سدًا فأغشيناهم فهم لا يبصرون "
صدقوني هالاية تسوي هواااايل وخاصة لي قريتيها بويه وحدة عندج وياها شغل
وهالوحدة عسرة بتنفرج الأمور ببركة هالأية..
وبعدها عاد حطوا ريولكم بالمدرسة وتوكلوا على الله..
====
بس صدقوني أول يوم بالمدرسة غير غير غير احلى شعور
تحسين صج انج خلاص كبرتي وصرتي موظفة وابلة..
طبعا رجعت البيت وانا مثل المسجل أتكلم واتكلم حق أهلي الي يقول صرت وزيرة مو معلمة
وطبعا بما اني توظفت على الكورس الثاني مو الأول ف الطالبات كانوا موجودين بالمدرسة
عاد اسمعهم لما امر صوبهم واطوفهم:
اوه هذي أبلة يديدة؟
شنو تدرس؟
هههه حسيت اني ممثلة مشهورة، حتى الابلات لما بوقع حق الانصراف يشوفوني ويسألون منو هذي اليديدة..
وانا من داخل قمة في الضحك والله اتذكر ايام الدوام
وفوق هذا وهذا المدرسة الي تعينت فيها كانت مدرستي المتوسطة
ما أقدر اوصفلكم شعوري وقتها شنو كان..
وأغلب المدرسات الي درسوني موجودين وبعضهم عرفوني وبعضهم لأ
كانت قمة في السعادة لما شفت بالورقة انهم قطوني بمدرستي ما صدقت خبر وطييييران
=======
الله يوفقكم بنات جد من كل قلبي طالعة
الله يوفقكم ويسهل اموركم ويبعد عنكم اذى الادارة والطالبات بمدارسكم
الله يسخر لكم معلمات زينين داخل قسمكم وبرا قسمكم
الله يمسح على قلوبكم ويبعد عنكم القتة آمين آمين آمين..
=====
عاد اول يوم ما كنت مودية ولااااا شي وياي لأن من المنطقة التعليمية سيدة لي المدرسة وماكنت ادري اني راح أباشر نفس اليوم
ومن ثاني يوم قاعدة من صباح الله خير وقبل الخدم ولابسة ومتزينةوماسكة هالجنطة وهالنظارة
بو اطار اسود واوقف جدام مرايتي لووووووول حدي عايشة الدور وصج مو مصدقة صرت معلمة >>> مقلدة فيلم
======
ذكريات عشاق
موضوع جدا مميز
وللأمام... يعطيج العافية
واب لعيونج..
