بنتي شالعه قلبي 3>

[ملك الكويت]

مساء الخير يا احلى كويتيات

انا تزوجت صغيرة كان عمري 19 والله ماوفق بيني وبين الريال الله يهداه
صار عندي بنت الله يخليها واهي محور حياتي لدرجه اني طلعت الاولى
في الكليه واستحقيت بعثه على حساب الحكومه بس رفضتها عشان بنتي
مابيها تتغرب معاي وتكبر على غير عاداتنا وبعيد عن اهلي ( طبعا طليقي
ناسي ان عنده بنت )
الموضوع الحين انا عمري 24 ولله الحمد تقدملي شخص زين واهله خوش
ناس بس دايما خايفه اهضم حق بنتي .. اخاف تكبر وتقول انتي ظلمتها
خصوصا وان الريال يبي مجابل وشهر عسل واهو يزيد بايام شهر العسل
وانا انقص .. مادري حايشتني حساسيه من الموضوع .. اخاف ايي يوم
يغار منها ولا يصرخ عليها اذا تشيطنت وانا اتضايق .. ! :eh_s(2):

ف اللي ابي اعرفه شلون الوحده المطلقه توفق بين عيالها وزوجها اللي مو ابوهم
ياريت تفيدوني لان الموضوع صج ماكل قلبي ( علما ان بنتي عمرها 4 سنوات
ومتعلقه فيني )

يعطيكم العافيه والله يوفقكم كلكم يارب :eh_s(7):

 

[ام فواازي]

استخيري والله يوفقج وترى بنتج تحتاج رجال بحياتها يعوضها ابوها و انتي تفاهمي مع اللي خاطب شوفي شنو بخاطره اذا راضي فيها كل الرضى او متردد فيها
ومثل مابنتج تحتاج انتي تحتاجين العاطفه بحياتج لا تهملين هالشي
والله يوفقج

 

[رق رق]

اتوكلي علي الله لو الريال ماريحب اليهال جان ما وافق عليج ، واذا انتي بتقولين ضحيت وضحيت باجر بنتج تتزوج و بتروح بيت ريلها . وانتي بتظلين ابروحج

 

[رنيم الروح]

حبيبتي استخيري واذا فكرتي بالعقل بكره البنت ياخذها ابوها ولا اذا كبرت اتزوجت وراحت ادور سعادتها وانشغلت بالدنيا ماراح تقول امي بروحها
حبيبتي لا توقفين حياتك عادي شرطي عليه بنتك مايرفض وجودها معك بس طبعا الفتره الاولى اتكون عند اهلك وبعدها اخذيها وماااتدرين يمكن يطلع ابن حلال ويعوض بنتك عن ابوها

 

[*Manoush*]

يابعدعمري
بالعكس الريال يدري انه عندج بنت ومتقبل انها بتكون حسبة بنته
لاتخافين عليها انتي قادرة توفقين بين زوجج وعنايتج ببنتج ماراح تهملينها لانج امها
وهم اهوا زوجج مستقبلا وماراح تقصرين وياه ،، راح تقدرين توفقين بينهم واهوا بيساعدج بعد لاتحاتين
استخيري والله يوفقج ويخليلج بنتج

 

[الجوهرا]

مدام ابوها ناسي ان عنده بنت ماتدرين لو يكون حنون عليها ويمكن رحمه لج انتي وبنتج وجود هالانسان بحياتكم الله يوفقج يارب

 

[فلنتينو]

صحيح ان الامر صعب

ولكن انتي بنت صغيره توج بعز شبابج ماعندج غير هالبنت
معقوول ماتبين ذريه وعيال

مصير الايام بتمشي وبتكبر بنتج وبتزوج
بتظلين بروحج لازوج ولا عيال

انا اقوولج توكلي علئ الله وتزوجي
مادام اذا الريال راضي بنتج

تزووجي

 

[Tom ♥ Jerry]

.

حياتي استخيري اولا و سوي الي يريح قلبج
و ما خاب من استخار ..
بعدين اذا الريال زين يصلي و يصوم و يعرف الله و يخاف من ربه
ليش تطوفينه ، ادري موضوع حساس لو بحط نفسي مكانج
بقول صج مابي اتزوج بنتي اهم و من هالكلام ..
بس فكري فيها بعد 10 سنين !
بنتج راح تتعود على ريلج ان شاء الله و تحبه و يحبها و تكونون اسره يديده حلوة
تطلعون و تستانسون ويا بعض و يكون عندها جم اخو واخت بعد
بس لو طوفتي الريال شوفي بعد 10 سنين بتظلين تطوفين رياييل زينين و انتي و بنتج بتقعدون بروحكم
مو بس انتي بتحسين بالوحدة هم بنتج بتحس بالوحدة !

لا تطوفين الريال اذا زين و بتقعدرين ان شاء الله توفقين بين زوجج و بيتج و بنتج
بس اهم شي تشوفين شنو نظره الريال لبنتج .. اهم شي يعتبرها نفس بناته :*

 

[ولهـ مطير]

استخيري الله سبحانه ... واذا حسيتي براحه ما يمنع انج تقعدين معاه وتقولين له يا ابن الحلال انا عندي بنت وبنتي غاليه علي حييييل فإذا انت متقبل من البدايه هالوضع انا ما عندي مانع بالموافقه ... واذا عندك ملاحظه بلغني من الحين ( تفاهمي معاه من البدايه واللي اوله شرط آخرة نور )
الله يوفقكم ويجمعكم بالحلال يا رب *

 

[*آسوومه*]

صح تفاهموا من البدايه و شوفي شنو انطباعه عن هالشي ..
لان موو سهله عليج ولا عليها يعني الامور بتتلخبط لو هو يبيج بس متحسس من بنتج او او او
بس بإذن الله بيكون كل شي تمام :*
و كل حرمه و بنت تحتاج ريال يوقف معاها و يحميها

 

[ديانا سبنسر]

تزوجي وتوكلي على الله كلها وسوسة شيطان

 

[برنسس كاتي]

انا من رايي تزوجيه مدام انه زين ، ليش تضيعين الفرصة
كلها كم سنه وبنتج تكبر وتتزوج وتمين انتي بروحج ،،
وان شاء الله حقها مو مهضون
انا اعرف وحده خل أقولج قصتها
هل وحده تزوجت وهي عمرها 15 سنه !! وجابت بنت وولد ولمن وصلت ال 18 ريلها تزوج رفيجتها وطلقها !!
تمت بنت ال 18 مع أطفال وعادي تزوجت واحد ثاني وعاشو عيالها عندها احسن عيشة وعادي وحابين ريل ابوهم
والبنت معاي بالجامعه ما علامها شي لا وهل بنت تخطط تنتقم من مرت ابوها قاعدة تدور له مره لوووول

بالتووفيييق

 

[فوفو22]

اللي يغلي الزوجه

يغلي عيالها واهلها وكل طوايفها

لا تحاتين

عيشي حياتك

فوفو

 

[كويتية خجولة]

الله يوفقج انشالله تزوجي واهي عند امج .

 

[ام الدرر]

استخيري وعسى الله يسخره لج ولبنيتج
و يكتب لج اللي فيه الخير ​

 

[ga6wa90]

حبيبتي استخيري أول شي و إذا ارتحتي توكلي على الله

خصوصا ان بنتج صغيره فا انشالله سهل تتعود عليه عكس إذا كانت كبيره

إذا الريال زين توكلي على الله

 

[بولندية]

البنات كفووو وفووو استخيري وكلمي الريال عن بنتج خلكم واضحين مع بعض بخصوص بنتج انج تبينها معاج و اذا اهو يرضى فيها ولا لآ ؟ ؟

 

[الحــــــلا كله]

حرام توقفين حياتج علشان بنتج
بنتج موضايعه وايد حريم تزوجو وبناتهم معاهم اول الايام خليها عند امج تالي اخذيها واربع سنين مو صغيره وتحتاج رعايه وابو بحياتها

 

[ملك الكويت]

الله يعطيكم العافية على هالردود الطيبه ... صج عطيتوني دفعة للأمام و شوّقتوني على الحياة اليديدة
وبإذن الله الله يكتب اللي فيه الخير ويعطيني الحكمه انشالله اني اعدل بينهم ...

الله يوفّقكم انشالله ويعطي كل وحدة فيكم اللي في بالها آمين

 

[om-3azo-83z]

كلام البنات 100% صح لا تحاتين و اذا خايفه استخيري اول و بعدين تفاهمي معاه شرطي عليه ان بنتج ما تبتعد عنج كلش الا بشهر العسل طبعا و انتي سولفي معاه شوفي وضعه شلون متقبل البنت تحسين ان يحبها ولا يجامل؟ بس شيلي الوسواس من بالج و يمكن يعوضها عن ابوها و انتي و ريلج تحتاجون ريال تشدون الظهر فيه هذي دنيا ماتدرين شيصير و مهما كان انتو حريم وين تقدرون تسون كثر ما يسوي االريال