تجمع اللي راح يولدون بمستشفى الصباح ...

[السكرتيرة النشيطة]

سؤال متى تفتح العيادة الخارجية للمراجعات تهقون اخلص الساعه 8 الصبح مبجر وراي دوام مااقدر حتى العصر اروح

 

[ام اغلى الناس]

جزاكم الله خير بنات

ام نواف
قبل ينزل الدم بيوم رحت النقره مع ولدي واختي
قلت اخلص شويه من التجهيزات
وولدي الله يهديه كل شوي يرافسني
يمكن هذا اللي نزل الدم وجاب طلق والله اعلم
وانا بعد قبلها بيومين رحت الافنيوز تعبت بالمشي
مو مريحه نفسي ودي اخلص
بس الحين صار حبس اجباري
والحمدلله على كل حال

اهم شي انه الرحم مسكر
و الربط زين
والرحم مو ضاغط عالربط
بالولاده قالت لي لو ضاغط عليه بافتح الربط
بس الحمدلله

 

[ام اغلى الناس]

بنات
باقولكم على سالفه غريبه بجناح ١١

من جيت اشوف ولد حلو صغير بايد الممرضات
ينادونه حمود
قلت للسستر هذا ولدج
قالت لا امه مو هني

بعدها بفتره السوريه قالتلي قصته
لاحول ولا قوة الا بالله
امه اندونيسيه
ولدته وتوفت على طول
مايعرفون ابوه منو
ولا احد سال عنه
قاموا يربونه السسترات
حاطيله غرفه وملابس والعاب
مو مقصرين معاه
بس كل ما اشوفه قلبي يعورني ويكسر خاطري
قلت ليش مايودونه رعاية ايتام
قالت فيه دكتوره تبي تتبناه بس تسوي اجراءات
شلون والولد يمشي وعمره اكبر من سنه
عاد السسترات يخافون عليه حيل
مايخلونه يلعب او يروح مع احد
ولا ياكل كاكاو لايرجع
يعور القلب

ومدري يرضون احد يجيبله ملابس والعاب ولالا
وشلون ادارة المستشفى ساكته؟
الدكاتره وكل المرضى والزوار يعرفون قصته

 

[ام نواااف]

ام اغلى الناس

ديربالج احنا حالتنا الربط مايسمح لنا انتسوق ونطلع ونيي اللهم عالخفيف مراجعات زوارة اهلج
حبيبتي انا شلي فتح رحمي بحمالي الاول غير الافنيوز والطلعااات

هذا تنبيه لج ديربالج
لاحقييييييييييييييييين عالتجهيزات والبيبي تقدرين باخر شهرج تجهزين ليش تستعجلين
لان اخر الشهر لازم الوحده تتمشى وتطلع عشان تتسهل ولادتها

والله يقومج بالسلامه هانت ريحي هالفتره

 

[ام اغلى الناس]

الله يسلمج حبيبتي
اي خلاص بدا الحبس
الا اذا سنتر بوينت سوا تنزيلات
بانط سور المستشفى واروح له ركض ههههههه

 

[جمانه وحنين]

الله يقومكم بالسلامه كلكم
سمعت ان في جناح جديد مفتوح بالصباح وخاص للكويتيات فقط
صج هالكلام ؟
واي جناح؟

 

[Amlly Ent]

بنات عندي سؤال
انا يوم السبت ادخل التاسع و يوم الاثنين مراجعتي بالعيادة الخارجية
سؤالي
انا سمعت انه بالتاسع الدكتور يفحص و يوسع الرحم هالشي بالمراجعات ؟
واذا صج يصير ارفض ؟ انا بجرية و متوهقه و ماعرف شي 

 

[yoyo"s mam]

ياليت اقدر افيدك
بس حبيت ارفع الموضوع

 

[ام اغلى الناس]

شلونكم بنات
الحمدلله طلعت امس من المستشفى
يعني قعدت ٨ أيام
ماقدر اتحمل اكثر
العنايه وكل شي زين
بس المشكله بان الزياره وقتها قصير
بس من ٣ ل٧ او مرات ٨ الا ربع
اما الجمعه والسبت تصير من الصبح من ١٠ ل٧ ونص

عكس الجهرا والفروانيه بكيفهم

و ممنوع مرافقين

والحمامات مرات تلوع الجبد من قرف المريضات

واشتقت حيل لولدي

طبعا اتعرفت على حريم واجد
او الصراحه هم تعرفوا علي هههههه
لاني كله نايمه عالسرير واستحي انا ابدا تعارف
المهم اني شفت قصص واجد و عوروا قلبي
لان الجناح كله امراض نسا

ودي اسولف لكم عن القصص اللي شفتها
بس مو الحين
الرد الجاي باذن الله

 

[ام اغلى الناس]

املي
اكثر البنات والحريم الكبار يقولون لاتفحصين الا لما تتمين التاسع

بس انا افحصوني ثلاث مرات وانا بالسابع والحمدلله ما صار شي
يعني مو شرط اول مايفحصج تولدين

خلاص انطري لاخر اسبوع بالتاسع

 

[yoyo"s mam]

الحمدلله على سلامتك ام اغلى الناس
والله موضوع وقت الزيارات مزعج
بس الله يعين

 

[ام اغلى الناس]

ام يويو
الله يسلمج حبيبتي

هههههه ماحد يدش هالنوضوع غيرنا

 

[yoyo"s mam]

ههههه والله انك صادقه
بس ماننلام نبي نعرف تفاصيل المشفى
وانت وايد فدتيني
ربي يجزاك ألف خير
شكلك عندك سوالف كثير سمعتيها بهالمستشفى
ألف ليله وليله
ناطره اسمع منك هالقصص

 

[ام اغلى الناس]

تسلمين حبيبتي
الله يتمم عليج ويقومنا كلنا بالسلامه
باكتب قصص اللي مروا علي بالجناح عشان تتعلمون وتستفيدون
يمكن تصدف وحده منكم حالتها نفس حالة وحده من المريضات اللي باذكرهم؛؛

اول حاله؛

هي ع من سوريا
مسكينه تزحلقت وطاحت وهي قاعده تتسبح
حامل بالشهر الرابع
اكثر وحده قعدت معاي لانها طولت
يوميا نسولف انا وياها
كانت تحاتي عيالها الاربعه منو يطبخ لهم ويشوفهم ويقعد معاهم
كانت اكبر بناتها يمكن ب اولى ابتدائي هي اللي تطبخ لهم بيض وترتب الشقه وتروح الامتحان مو دارسه بسبة اهتمامها باخوانها
عورت قلبي مسكينه
وكان زوجها من الصبح لليل دوام بس له يمكن ساعه راحه باليوم يزور فيها ع
كانت تجيب لي سوالف المريضات الثانيات وقصصهم
كانت من النوع اللي ماتحب تقعد
تتمشى وتتعرف ع الناس
حبوبه وعلى نياتها
قعدنا مع بعض تقريبا خمس ايام وراحت الله يوفقها
كانت معاي بنفس الغرفه

الحاله الثانيه؛
مصريه ماعرفت اسمها
مدرسة معاقين
قعدت معانا بالغرفه يوم واحد
كانت ولاده بس مافيها طلق
بالليل عطوها تحميله طلق
وقعدت طول الليل تتألم
انا ما حسيت فيها بس ع بالسرير اللي جنبها تقول ما قدرت انام رجت المكان من اهتزازها وحركتها ههههه ما شاء الله طويله وعريضه
المهم قعدت الصبح لقيتهم اخذوها على غرفة الولاده
اللي عرفته انه تحميلة الطلق تذبح

الحاله الثالثه؛
أ كويتيه
قعدت معانا يوم ونص
سوت اطفال انابيب بوحدة طفل الانبوب عملية سحب
و تعبت واعتقد صار معاها نزيف
بسرعه تعرفنا لانها بالسرير اللي جنبي
حبوبه
مسقطه من قبل مرتين حملت فيهم طبيعي
الله يرزقها بالذريه الصالحه
ب هاليوم كانت احلى ليله قعدتها بالجناح
سهرنا انا و أ و ع نسولف طول الليل
وانضمت لنا حاله ٣
لين جت السستر طردتنا هههههه قالت ماما لازم تنامون

الحاله ٤؛

عراقيه متزوجه كويتي
بالغرفه اللي جدامنا
كان ينزل عليها دم بس قالولها خارج المشيمه وعطوها مثبتات
كانت هما تحاتي عيالها الاثنين صغار
وطلعت معاي بنفس اليوم

الحاله٥؛
سوريه معاي بالغرفه
سقطت بالشهر الرابع
و سوا لها عمليه يشيلون البيبي
عندها بنت وولد
قعدت يومين تقريبا

الحاله٦؛
كويتيه مره كبيره ما صار بينا كلام
بس بنتها جت تعرفت علي
وقالت لي امها معاها التهاب بالحوض
قعدت يومين معاي بالغرفه

الحاله ٦ ؛
باكستانيه
كسرت خاطري حيل
اول بيبي لها
مسقطه من قبل
و البيبي هذا حيل صغير بس جابوها ولاده لانه شهرها
مسكينه ماتتكلم لاعربي ولا انجليزي
كانت دايم ساكته وتبتسم لي
ودها تسولف
ثاني يوم جت قعدت جنبي و قامت تأشر لي تبي تسولف لي
وفهمت انه البيبي صغير وخايفه عليه
قعدت يمكن يومين واخذوها
حطوها عالسرير وهم يدزونها ماتعرف تقولهم انطروا بأسلم
شدت الستاره وأشرت لي يعني انا رايحه اولد بفتح بطن
اشرت لها اقولها ان شاء الله بيبي يصير زين
اشرت يعني ادعي لي
ودعيتلها الله يقومهم بالسلامه

الحاله٨؛

هنديه جابوها قبل اطلع بيومين
جت من العمليات تبجي
واول ما شافت اهلها قاموا كلهم يبجون
عوروا قلبي
عاد بعدين تسولف معاي
تقول ٨ سنين اعالج بحبوب وما حملت والحين اول حمل بس سقطت بالرابع وشالوه بالعمليه
قلب انا يعور عشان من زمان ينطر بيبي
قلت الله يعوضج ويرزقج

حاله ٩؛
جت ب اخر ليله لي بالمستشفى
جابوها يمكن الفجر واحنا نايمين
بس ب هالليله مانمت
المسكينه طول الليل تصيح وتتألم والسسترات حواليها
عبالي ولاده
ثاني يوم اللي هو يوم طلعتي قلت للسستر شفيها؟ ماقدرت انام منها طول الليل الله يعينها
هي ولاده؟
قالت لا هذي ضلوعها مكسره
الله يشفيها

الحاله ١٠؛ والاخيره؛
سوريه او فلسطينيه مدري
جت اليوم اللي اطلع فيه
جت تشيل رحمها فيه تليفات
تقول اسبوعين ادش اتنوم ووقت العمليه يردوني تبهذلت



وبس
هذول هم القصص
غير اللي سمعت عنهم وما شفتهم
وحده رحمها ذو القرنين
لازم يولدونها بالسادس او السابع قبل يكبر البيبي وتسقط
و وحده حامل ب توام واحد توفى والثاني ببطنها
قالت لي عنهم ع


الله يشفيهم
ويقومكم بالسلامه

 

[yoyo"s mam]

والله شكلك تعرفت على كل المستشفى ياأم اغلى الناس
الله يعينهم حرام ويشافيهم
بس بغيت اسألك كيف السسترات هناك وصحيح هما اللي يولدون ؟

 

[ام اغلى الناس]

ههههه هلا ام يويو
هالحالات بس صادفتهم بغرفتي فيها ٤ سراير
ما عدا وحده بس بالغرفه اللي جدامنا

والله السسترات حبوبات وماقصروا
بس ما يغيرون الفراشات الا لما تطلع المريضه
مره قلت لها غيري فراشي توصخ من الاكل عصبت حيل
ومره ثانيه قلت غيريه طنشتني
قمت احن عليها لين غيرته
مايحبون احد يقولهم غيري الفراش نفس البرنسيسه خدامة اهلي هههههه

 

[yoyo"s mam]

هههههه والله ضحكتيني
نفسيات يعني
الله يعيننا المهم تعدي هالكم يوم اللي
نقعدهم بالمستشفى عل خير ونولد بالسلامه
وانشالله تكون ولاداتنا طبيعيه ومانطول سمعت انها 3 ايام

 

[ام اغلى الناس]

الله كريم
انا سمعت انه الطبيعي يومين
والقيصري ٤ ايام
بس مو متاكده

 

[yoyo"s mam]

والله شكله ماحدا يراجع بهالمستشفى غير انا وانت ياام اغلى الناس
امرنا ل الله
رفع رفع

 

[ام اغلى الناس]

هههههه

توني قريت موضوع وحده والده بالصباح
تقول خياطهم مو شي


الصراحه خرعتني
يعني لرد اسوي تجميلي بعد الولاده؟
و اتالم من اول وجديد؟
الله يستر