تجمع اولياء امور مدرسة الخليج الانجليزية في السالمية

[عزيزتى]

انا الويك اند لازم اطلعهم بس الجمعة والسبت الضحى اقعد ادرسهم اواذا في شى يحلونة واقولهم خلصو علشان نروح المكان الفلاني تدرون في اشياء مايمدينا نسويها خلال الاسبوع
واحنا زوارتنا غدا يمديني العصر او عقب المغرب نطلع والخميس دايما ربعهم يزورونهم وبعضهم من الساعة 4عندنا تحسين ويك لند بيطلعون حرتهم اصلا انا اشوفهم بالمدرسة يروحون مع بعص من الهدة وناسة
انا ولدي مرة سواها بس الام ثقة واعرفها ولا جان ماخليتة تقول ربعهم وربع اخوة ميمعتهم غدا عندها وايد استانسو

 

[زهر وردي]

عزيزتي الله وناسه
يروحون بيوت بعض ولا على الغدا ماشا الله صج وناسه
حلو جذي تعطين الولد الثقه فتزيد ثقته بنفسه
الله يخليهم لج ويحفظهم من كل شر يااارب

 

[الفرسان الثلاثة]

برسيبشن سيلفر وصاجه تيجر الفويلت غثيثه ودمها ثقيل بس جنه الاستينس حليوه صح ؟
ايه ولدي كان عند مس ليلى واي عسل اتهبل انا احبها ووايد وحدها تسمعلج و تساعد عكس الحين مادري شسوي بس اللي امطمنني ان ولدي مستانس مادري عشان نفس اصدقائه اللي قبل معاه أو التيشر مالها خلق الامهات في نهاية الدوام ؟؟؟

 

[زهر وردي]

هلا الفرسان الثلاثه
ماشفتي تيجر وليدج بالاجتماع اللي كان الخميس اللي قبل اللي فات
ماخذيتي وعطيتي وياها ؟؟

 

[ملكة بيتها]

شلونكم أمهات الويك إند بالنسبه لي الخميس نرجع من المدرسه وأشوف جنطتها إذا في عندها هوم وورك أو طلبات أو حفظ إذا كان في هوم وورك أخليها تحله ويكون عندنا زواره على العشاء الجمعه الصبح طبعا نقعد مبجر شوي عشان ما تنعفس النومه فيكون الصبح دراسه وبعدين زواره الغداء ما نرجع إلا متأخر بالليل والسبت الصبح دراسه ومراجعه وهو يوم طلعتنا العائليه فنطلع للغداء ونرجع على المغرب تتعشى وتنام .

 

[الفرسان الثلاثة]

زهر وردي ....بلا شفتها بس كان ولدي مداوم بس 4 أيام معاها فماكان عندها انطباع واضع عنه لان كان توا مندمج مع الصف للاسف كان غايب من قبل عشان سالفة الانفلونزا ابوه ماكان راضي انه يروح عاد بعدين حده اتحسفت لان أحس ماكان لا زم انه يغيب لأنه الحمدلله من النوع اللي ملتزمه معاه بالحضور و ما اخليه يغيب إلا إذا كان تعبان وبس اللي قالت لي انه ما يرفع ايده عشان يجاوب عاد و عليه على وليدي مايدري توه بالريسيبشن انا ما وصيته ارفع ايدك و شارك بس التيشر قالت شي عادي انه توا في اليدايه و انا هم بعد كلمتها يوم الخميس اللي فات قلت لها شلونه هالاسبوع؟ تقول انه اسألته عن الارقام و الاحرف يعرفهم يعني على قولتها أكاديميا يعرف المادة و يجاوب على اسئلتها... بس مادري ليش دمها ثقيل مادري ودي أكلم وحده من امهات الكلاس بشوف اهيا اتحس بنفس الشي وللا لأ؟؟؟؟

 

[عزيزتى]

الفرسان الثلاث=== يمكن هذا طبعها اهيا جافة ومالها خلق بس اهم شي ولدج مستانس الله يتمم علية الوناسة
زهر وردي ===الله يسلمج ويخليلج عيالج تصدقين اليوم الي ايون في ربعهم ولا يروحون لهم يستانسون اكثر من الطلعة لا والحين هابين كل واحد اييب لاب توبة معاه ولا السونى ويلعبون اون لاين واهما في البيت يحليلهم مسوين لهم جو "العام كانو pspهالسنة تطورو
روحي تحب=== وينج ولهنا عليج
ملكة == زين تسوين ماتخربين برنامجهم بالعطلة خاصة السبت لان اذا تاخرو بالنوم يخترب برنامجهم انا اقص عليهم اقول لهم قومو مبجر لا يخلص الويك اند عليكم وما تلعبون سوني والي يقوم اول اهو يلعب قبل

 

[زوزو الحلوه]

السلام عليكم ممكن اشارك معاكم بالملتقى الحلو هذا انا ولدي بyear 1

 

[زوزو الحلوه]

ابي شوي مساعده مادري شسوي ولدي شوي ضعيف بكتابه جمل ف التيشر وايد تخرعني مادري شسوي وياه مابي اضغط عليه وهم مابي يكون ضعيف يعني اذا شاف صور يكون الجمله محدوده مادري شسوي :0bee2e8d89:

 

[الفرسان الثلاثة]

صاجه يا عزيزتي شكلها التيشر طبعها جاف شوي مع الامهات اليوم الحمدلله برد قلبي رحت سألتها عن ولدي اشوه مجاوب على اسئلتها صح وانا سالته اللي خذوه مع التيشر مستوعب منها و مستانس بالكلاس الله يدوم عليه ان شاء الله
و ياريت تقولون وين اتطلعون عيالكم في الويك اند ؟؟ عفيه مكان غير سوق السالميه و الافنيوز كله زحمه و لويه

 

[الفرسان الثلاثة]

ابي شوي مساعده مادري شسوي ولدي شوي ضعيف بكتابه جمل ف التيشر وايد تخرعني مادري شسوي وياه مابي اضغط عليه وهم مابي يكون ضعيف يعني اذا شاف صور يكون الجمله محدوده مادري شسوي :0bee2e8d89:

انا ولدي البجر في الريسبشن يمكن ما اقدر افيدج بس اتوقع ممكن تقرين له قصص في لبيت و في قصص حلوة اتحصلينها في مكتبة جرير معاها سي دي يقدر يسمع و يشوف الصور فيحفظها اسرع ... الله يوفقه ويسهل عليه ان شاء الله لا تحات
ين

 

[ملكة بيتها]

زوزو الحلوه ..حياج الله معانا في التجمع وبالنسبه لتكوين الجمل أنا ملاحظه بنتي نفس الشي ما تعرف تطلع جمل وايد بس هذا أنا أحاول لما تقرأ القصه دايما أحاول أخليها تخمن وتقولي الحدث حتى لو بالعربي وبعدين أخليها ترجمها إنجليزي ,,وبعد طرت على بالي فكره إني أخليها تكتب جمله بالليل عن شي صار خلال اليوم بس يكون شي حلو ومستانسه منه في دايري عشان ما تحس إنه فرض ...
الفرسان الثلاث ...حبيبتي في أماكن وايد حلوه حق اليهال والتنويع مهم يعني مثل سينما \ ديسكفري \ كارتون نت وورك \ بروي \ حديقه \ سيرك ............أترك مجال لغيري إذا عنده مكان بعد يفيدنا
عزيزتي ....شلونج يالغاليه وصج وايد مهم ما تغيرين روتين الطفل
روحي تحب ...وينج ؟ ترى ولهنا عليج
أنا فاقده وحده بعد .....وينج أم ناصر من زمان عنج ؟ عسى المانع خير

 

[روحي تحب]

شلونكم امهات وشخباركم حبايبي ....ههههه صرت ماما انيسه على قولتها يحليلها "حبايبي"

تووله عليكم العافيه يارب.....عزيزتي , وملوكه خلاص من هني ورايح بدلعكم بس خل اضبط الدلع وآنا بعد والله اشتقتلكم وولهت عليكم وايد

شخباركم وشلون عيالكم عساكم بخير يارب ..... شرايج فيني عزيزتي انفع اصير ماما انيسه اقصد ماما روحي ؟؟

تدرون بشبك مره ثانيه ابجر علشان يصيير مو تجمع الا نخليه يصيير تشات بعد وبعطي خبر حق ليال خلنا نسحبها شويه عندنا هههه

زوزو الحلوه .....حياج الله ويانا وآنا بعد بنوتي بyear 1 يعني كلنا بالهوا سوا آنا بنتي كانت جذيه وبعد كانت عندها مشكله ماتعرف كويتي عدل يعني المشكله مشكلتين لدرجه انه يبتلها اخصائي متخصص بهالسوالف وعلمني شلون اتعامل معاها ....دايما سولفي وياه وخليه يوصفلج جذيه تقوين عنده مهارة التعبير والله كنت اسحب الكلام تسحب ودايما خليه يتعرف على اشياء يديده اللي حواليه وتناقشوا فيها شنو استخدامها من شنو اصنعوها مثلا صور الاعلانات خل يوصفلج هالاعلان مال شنو من خلال شرحه تنمين مهارة التعبير والله يسهل عليج يارب الحمد الله آنا بنتي تلاحقتها شوي ابجر والحين كل اهلي يتكلمون عن الفرق وين كانت ووين صارت تبارك الرحمن ...والقصص وايد مفيده ترى وانشاء الله تكون مشكلتج سهله وبسيطه وماتحتاج كل هذا

 

[زوزو الحلوه]

مشكورين يعطيكم العافيه والله انا دايم احاول اتحجى وياه اقرا وياه قصص المدرسه وقصص من بره وانشاالله خير

 

[عزيزتى]

اهلين امهات كيفكم
ماما روحي == اشتأنالك
امس كان اجتماع year8احس كل ما يكبرون عيالنا الامور تتغير لان من 7لازم يكون الطالب معاج في الاجتماع واغلب الكلام موجة لة بصراحة يحسسون هم بالمسؤلية وايد اعجبتني طريقتهم ومن 8يبدي الجد يعني كيمياء وفيزياء وبيولجي غير الهستوري والماث والحيوغرافي وبعد وايد مواد واللة يعينهم الكتب مستواها صعب مو وايد بس يبيلة مجابل اول باول
امهات year5مستعدين حق امتحان الساينس؟؟؟
انا احس الاسبوع الي غاب في ولدي اثر علية بس قاعدة ادرسة علشان يلحق معاهم
زوزو== الامهات ماقصرو بس صج تري القراءة اهيا المفتاح الي بيزيد حصيلتهم اللغوية وتصير عندها تجميع للكلمات

 

[زوزو الحلوه]

مشكوره عزيزتي

 

[الفرسان الثلاثة]

شلونكم يا بنات شخباركم الله يوفق عيالكم بالدراسة والامتحانات

روحي تحب شلونج قطعتي جم يوم مكانج كبير لا تغطين وايد
ياريت تقولون لنا باختصار شنو أهم شي الياهل لازم يعرفه قبل لا يروح year 1 a? عشان ما نواجه صعوبه مع عيالنا

 

[زوزو الحلوه]

والله انا عندي ولدي بyear1 توه بس والله لازم يكون يعرف يكتب جمل لأن انا الحين شوي اعاني معاه بس الله كريم يبيله مجابل الله المستعان

 

[عزيزتى]

زوزو لاتحاتين بيتعلم تو الناس صدقيني ماتخلص السنة الا وهو يكتب جمل بعدين عندم مدرسات مساعدات اذا في طالب ضعيف في شي معين ياخذونهم من الحصة ويمرنونهم اعتقد عند مس بوكستون عيوز بس ممتازة تاخذ مجموعة من كل صف للتقوية

 

[عزيزتى]

اهما يعطونا ورقة فيها الاشياء الي لازم يكون يعرفها ادورها واحط لج المعلومات