تجمع اولياء امور مدرسة الخليج الانجليزية في السالمية

[طيبة الكويتية]

سلام بنات اشلونكم
وينكم طاخين, جم يوم الحين مالكم حس
بغيت اسأل عن مناهج كي جي 2 ( ريسيبشن)
و جريد 1
شنو يعطونهم بالعربي, الانجليزي, الرياضيات,
عندهم كتب للفونكس ولا لأ؟
ابي بالتفصيل ما عليكم امر

وينكم
ليش ما رديتوا علي؟؟؟؟؟؟؟؟؟

 

[ملكة بيتها]

طيبه الكويتيه حبيبتي ما انتبهت على طلبج السموحه حياتي ..بالنسبه لجريد 1العربي نفس كتاب الحكومه والإنجليزي يركزون على القراءه والكتابه وايد مثل قراءه القصه وإعاده سردها وكتابه قصص ولكتاب الفونكس مافيه بس من ضمن القصص يركزون على الفونكس والماث أخذو الجمع والطرح والعد لحد 100 والسكيب كاونتنج والنمبر بوندز لحد 10 والباجي إن شاء الله الأمهات يطلون على الموضوع ويردون عليج

 

[ملكة بيتها]

سلام أمهات الخليج كل عام وإنتوا بخير

 

[lyale]

كل عام وانتو بخير امهات الخليج

 

[mr000]

سلام أمهات الخليج.. اشلونكم شخباركم.. كل عام وانتوا بخير ..خلصت العطله حسافه...ملكه اشلون بنيتج .. عسى عدلتي نومتها حق قعدة الصبح مبجر؟

 

[ملكة بيتها]

هلا فيكم صديقاتي ليال ومروو شكرا على سؤالكم حبايبي ..مروو لحد الحين النومه خرابيط بس باجر بقعدها مبجر عشان تنام مبجر الله يعينا باجر بيصير يوم عسر ...

 

[طيبة الكويتية]

سلام امهات اشلونكم
ادري اذيتكم ليش اني داشه عرض. بس و الله محتاره بالمدارس حق عيالي و خايفه حيل ساعدوني و ردوا علي.
عندكم جم سؤال فوق و عندي بعد اسئله زود.

اشلون القبول عندكم بالمدرسه؟ يعني سهالات ان شاءالله و بيسوون اختبار حق الياهل و علطول يعطوني النتيجه ولا لأ؟
احنا يايين الكويت شهر واحد علشان بقدم حق عيالي على المدارس و يسوون لهم امتحان. الله كريم و يسهل امورهم يارب.

 

[الفرسان الثلاثة]

هلا فيج طيبة سامحيننا عالتأخير ولدي بالريسبشن الحين و بقولج باختصار عن اللي ياخذونه
بالنسبة حق الانجليزي يبدا يتعلمون الفونكس ومعاها كلمات من ثلاث حروف مثل fat cat mat قراءة و كتابة و بعدين شوي شوي يكتبون جمل و طبعا من البداية لازم يتعلمون كتاية اسمهم
و يعطونهم قصص لازم يسردون القصة من الصور ويعبرون عنها
يكتبون الارقام من 1-10 وفيه جمع و طرح و ضرب بس حاليا ما خلصوا إلا الجمع
العربي ياخذون خبرة معينه و يتعلمون الكلمات اللي فيها يكتبونها و يحفظون الحرف الاول من الكلمة
الاسلامية يحفظون سور الفاتحة - الاخلاص- الكوثر.... - أدعية مختلفة قبل الاكل بعد الاكل ....
بالنسبة للهمو ووركات حق الانجليزي خفيفة حيل حق الويك اند لان ماشاء الله بالمدرسة التدريب عندهم يعني سهالات الياهل يمسكوونه يركزون عليه انا شايفتهم اللي مو حافظين يجمعونهم مع بعض و يعطونهم زيادة والتيشر تاخذ كل طالب بروح و تخليه يقص لها القصة وبعد يعطونج اوراق عشان اتتابعين معاهم ان يعرف يركب الكلمات و يقراهم و تقدرين كل يوم و انتي ماخذه عيالج تسألين التيشر عنه
والعربي يعطون هوم ووركعلى طول عشان يحتاج تدريب على كتابة الكلمات لان حصة العربي قصيرة و الواجب فيه تلوين عشان ما يملون التيشر مالت العربي حبوبة اليهال يحبونها و متعاونه
و مادري إذا عندج اي استفسار انا حاضرة

 

[mr000]

السلام عليكم اشلونكم أمهات الخليج ...الفرسان اشلونج واشلون ولدج.. وشنو قررتي حق السنه اليايه بديتي تدورين له مدرسه وألا بتخلينه؟؟

 

[الفرسان الثلاثة]

السلام عليكم اشلونكم أمهات الخليج ...الفرسان اشلونج واشلون ولدج.. وشنو قررتي حق السنه اليايه بديتي تدورين له مدرسه وألا بتخلينه؟؟

الحمد لله انا بخير انت شخبارج والله لي الحين ما قررت بس لو الظروف المالية تسمح جان خليته في نفس المدرسة بس المشكلة رسومها وايد خاصة ان ماراح يكون بروحه اخوه معاه بروح كي جي 1 .. شفت الاكاديمية الانجليزية رسومها معقولة بس مكانها خطير جدا يمها مدرسة و سفارة و مستشفى و بيوت يعني بالصبح مادري شلون بكون الوضع و شفت القطوف يمدحونها بس التسجيل بالواسطة و ماعندي واسطه بالله شسوي الله يفرجها يارب ادعولي

 

[mr000]

الله كريم ان شاءالله تحصلين له مدرسه زينه ويتوفق فيها هالسنه رفيجتي نقلت عيالها من روض الصالحين ودتهم مدرسة كيمبردج تقول عنها أحسن من هذيك جربي شوفيها وشوفي أسعارها!!

 

[ملكة بيتها]

سلام أمهات شلونكم مع أول يوم بعد العطله ؟؟ ردينا ندرس وودي وييب من المدرسه الله يسهل علينا وعلى عيالنا ويوفقهم بالهكورس آمين يارب
الفرسان الثلاثه شلونج حبيبتي وربي يوفقج بمدرسه زينه حق عيالج
مروو شلونج حياتي وشلون ولدج بلشت الدراسه مع امتحانت الله يعطيكم العافيه

 

[طيبة الكويتية]

سؤال اخير ميخالف
بجريد 1 عندهم كتب ولا اوراق عمل؟؟؟؟؟؟
لأنه فيه مدارس مايكون عندهم كتب و كله اوراق عمل مو اكثر. مدرستكم اشلون عليها؟؟؟؟؟؟

 

[الفرسان الثلاثة]

السلام عليكم اشلونكم أمهات الخليج ...الفرسان اشلونج واشلون ولدج.. وشنو قررتي حق السنه اليايه بديتي تدورين له مدرسه وألا بتخلينه؟؟

قاعدة افكر بالكاديمية الانجليزية اللي بالجابرية اسعارها معقولة و فيها خصم حق الاخوان اشرايج فيها اتعرفين احد دارس فيها؟؟

 

[طيبة الكويتية]

سلام امهات
اشلونكم كلكم؟؟؟؟؟
ممكن رقم المدرسه, دقيت على كل الأرقام الموجوده بالانترنت طلها طلعت غير موجوده بالخدمه و موقع المدرسه مو شغال ما ادري ليش؟
بغيت اراسلهم علشان اطرش لهم الأبلكيشن و اوراق عيالي.

 

[ملكة بيتها]

هلا طيبه الكويتيه بالنسبه لسؤالج عن الكتب للأسف ما عندهم كتب الإعتماد على الوورك شيتس ..ورقم المدرسه هو 25757952

 

[طيبة الكويتية]

ملكة بيتها
ما تقصرين الغاليه و يعطيج العافيه يارب

 

[mr000]

سلام أمهات اشلونكم ! الفرسان آنا ماأعرف أحد شخصيا بس لما كنت أدور مدرسه حق ولدي مرت حماي قالتلي أنه معاها مرسه عيالها دارسين فيها وتمدحها ولما رحت قدمت حق ولدي فيها وكنت أنطره يقدم اختبار القبول كلمت كم أم شفتهم يايين المدرسه وقالولي أنهم مرتاحين منها ومستواها زين ووحده قالتلي أنها دكتوره وان عيالها كلهم بالمدرسه بالثانويه والمتوسطه ومرتاحه من مستوى المدرسه! بس آنا ولدي مانجح باختبارهم ومن الأول قالتلي اللي قابلته وامتحنته ان راح يكون صعب عليه يتعود عالنظام لأنه ياي من مدرسه أمريكيه ومتعود على نظامها وواصل المتوسط يعني بيروح 7 لو قبل كان أحسن... بس تصدقين ردت دقت علي عقبها بفتره قالتلي ليش ماتخلينه يحاول مره ثانيه قلتلها لاخلاص قدمتله بأمريكيه... ويمكن خيره كلشي على الله كاتبه...

 

[ملكة بيتها]

السلام أمهات الخليج شلونكم حبايبي عساكم بخير ؟؟
ترى والله لكم وحشه إن شاء الله المانع خير
باجر إجتماع أولياء الأمور مع المدرسين مو تنسون

 

[mr000]

سلام امهات الخليج اشلونكم! ماعندكم امتحانات هالفتره؟