تجمع صيف ماليزيا 2012

[سمرq8]

كولا
حياتي انتي واي تكفون طمنووو قلبي
كولا سفرتج بدا العد التنازلي لهااا شنو شعورج وشنو حطيتي بالجنطه وشنو لي الحين ماحطيتي

 

[كوكا كولا]

هذي فلوسي حولناها لي الرنجت الماليزي تراهم وايد لا تغركم الربطتين
هذول 750 دينار كويتي حولناها ربطة 5 آلاف رنجت والربطة الثانية 3 آلاف وشوي رنجت
غير فلوس ريلي اكيد بس فلوسهم تشوق حيل

 

[سمرq8]

وشلون طلع الصرف معاج

 

[كوكا كولا]

سمرq8

الصرف تمااااام بالمحلات خذوا زيادة عن سعر الصررف دينارين لكل 1000 رنجت يعني حسبو الألف رنجت ب 90 دينار
دينارين معقولة في محلات وايد ماخذين 4 دنانير و 5


شعوري...... ممممممممممممم.... مادري هههههههههههههه
احس وقت فرااااااااغ فراااااااااغ فراااااااااااااغ
كل شغلي خلصته ونص اغراضي حطيتها بالجنطة بس للحين ما حطيت باقي الأغراض
لأن هدومي ما ابيهم يتعفسون من الحين وبعدين عندي طريقة بعلمكم عليها
علمتني عليها رفيجتي

تقول خدامتها الفلبينية علمتها على حركة تخلي الجنطة تشيل اكثر
وهدومج ما تتعفس بالجنطة

الحركة هي................

كل هدومج وملابسج الداخليه وفوطج وكل شي بنلبس لفيه مثل الرول
لفي واضغطي وانتي تلفين وصفيهم مثل الرولات
تقول والله بس وصلت من السفر فتحت الرول ولا الهدوم مو معفسه كلللللللللش
عاد بجرب هالحركة ليله سفرتي وبشوف شلون تطلع معاي
وبوافيكم بتصوير للأحداث لووووول

 

[كوكا كولا]

شعوري الله يسلمج

خليط بين (الفرحة + عامل التشويق + اعد الأيام والليالي) هههههههه

 

[سمرq8]

جم جنطه بتاخذين انتو ريلج
انا كل سفره انا جنطتي غير وريلي غير بس الكل قاعد يقول لي اشدعوه انتي وريلج بوحده وهاند باقي بس ماعمري سويتهااا كل سفره انا جنطه واهوو جنطه

 

[سمرq8]

كولا جم باجي على سفرتج امبيه ونااسه احب هالشعور
شلون الهنوف ما حطيت يوميات لهااا

 

[كوكا كولا]

سمرq8

شوفي انا كنت بشتري جنطة بس هونت كافي علي الصغيره وريلي حطيت له الجنطة الكبيرة
وهناك بشتري حقي جنطة كبيرة لأن جناط السفر عندهم روعه وحدها رخيصه ارخص من الكويت الوحده من 20 وطالع الزينات

بس ريلي مصرّ إلا ياخذ جنطة سودة صغيره سحب مثل حجم الي انا حاطه فيها اغراضي بس فاضيه يقول بحطها معاي بالطيارة
علشان هناك نحط اغراضنا فيها بس بحاول ادعسها ببطن الكبيرة اخاف يفشلني هناك وما يدخلونها الطيارة واهي فاضيه ههههههههههههه

 

[كوكا كولا]

سمرq8

اي ونااااااااسه شعور حلو
باقي يومين على سفرتي
سفرتي يوم الاثنين العصر ان شاء الله لازم نكون بالمطار الساعه 3 ونطير الساعة 5 ونص ان شاء الله

 

[كوكا كولا]

لا للحين ما حطت موضوع لها
تقول قاعدة تجمع معلومات الموضوع ولي ردت راح تنزل موضوعها
جذي احسن علشان يكون موضوعها متكامل مو متقطع وناقص

 

[سمرq8]

كولا اذا الجنطه اللي بدخلهاا صغيره عادي يدخلونهااا بالطيااره وخليه ياخذهاا احسن عشان حق التشري هنااك

 

[كوكا كولا]

لا مو صغيره حيل باجر اصورها وتشوفين حجمها احسن
اخاف نتوهق

 

[كوكا كولا]

انا بنام الحين.... تصبحين على خير ياحياتي.... خوش سهره
الملتقى باجر ان شاء الله تالي الليل لووووووول بنسميه قروب الخفافيش هههههههه

 

[حظ من عنده انا]

تروحون وتردون بالسسلامه يارب


عقبالي ان شاء الله قريب اقولكم اني بسافر لماليزيا ادعوا لي اروح لها

 

[fdeet_shosho]

مرحبا بنات وناسه توني اشوف التجمع

انا ان شالله هذي ثاني سفره لي لماليزيا سافرت قبل خمس سنين بس اكيد تغيرت حييل

هالمرة ويا عيالي ثنين الله يستر علينا حدي خايفه ماجربتهم بالسفر ومادري شاخذ وياي محتارة

سفرتي 11/6/2012 الى 26/6/2012 طيارتي الاماراتيه الساعه 10 بالليل نطير وياج كولا بنفس اليوم
ننزل ترانزيت بدبي ساعتين وعقب نطير لكوالا( سافرت قبل على القطريه وع لوعه بصراحه تاذينا حيل برحلتنا من السكارى دشوا اجانب سكارى وقعدوا جدامنا وريحتهم خايسه وع وع تخيلي سبع ساعات والريحه علينا ريلي عصب وتنرفز وكان بيتهاوش وياهم وطول الرحله مغطين خشومنا ولا بعد يوزعون المشروبات عادي )

اول 3 ايام بسيلانجور بفندق صن واي لاقون عشان يكون الاكوابارك قريب لليهال يستانسون فيه
وبروح لبروميد الالعاب والتسوق هناك وهم بنروح للاحصنه الذهبيه

وعقب نطير طيران داخلي اسيا بس ديروا بالكم ( سفرتنا القديمه واحنا ناطرين الطياره وقفوا الاوادم دوور عند البوابه وعقبه راحوا يركضون احنا قعدنا نضحك عليهم شالسالفه اثارى عندهم من سبق لبق مايعتمدون على رقم الحجز عرفنا لطريقتهم وبالرده راح ريلي يسابقهم عشان يحجزلنا يم بعض )

بننزل بفندق رويال حسافه كنت ابي الرمال الذهبيه بس مالقينا حجز شحلاته هالفندق يهبل ونظيف واكله عجيب وجدامه المطاعم العربيه الحلوة انا احب هالجزيره لانها هاديه واحب السوق الليلي وناسه من الساعه 9 افتر فيه للساعه 12 وايد شغلات تونس
واحلا شي بالجزيرة الانشطه البحريه برشوت وبقيات وجت سكي وعقب بنروح رحله صيد نصيد سمج وعقب يودونا جزيرة القرده يشوون لنا السمج وناكله ونرد عياللي بيستانسون هناك ليش قرده ووناسه
بنقعد بالجزيره 5 ايام

وعقب بنروح كوالا 3 ايام بتايمز سكوير عشان الاعاب اللى بالمجمع لليهال يستانسون
و3 ايام بفندق بشارع العرب يم السوق الالكترونيات والكمبيوترات ريلي يحب سوالفهم واغراضهم وفيه السوق الصيني يصير عندنا بشارع العرب

كولا عفيه شنو خذيتي للسفر التجهيزات قولي يمكن اكون ناسيه شي
خذيت 3 جنزات نظام ليقنز و2 تريننج خفيف واربع قمصان طوال
ومفكره اخذ عطرين من المطار باخذ سكادا الورديه حلوة حيل وباخذ وحدة ثانيه شتنصحوني فيه ؟
ماخذيت مايوه اسلامي واخاف اتحسف انا مافكر اسبح ويا اليهال بس مادري تهقون اخذ ؟؟

عفيه اول مرة اخذ عيالي شنو تنصحوني اخذ وياي فكرت اخذ دوا حرارة احتياط ومادرى شاخذ بعد
​

 

[fdeet_shosho]

اي صج نسيت اقولكم كنت باخذ جنطه وياي بالطياره بحط فيها اكل كرتون عصير لعيالي وكرتون حليب كاكاو وجبن وتوست بس ضحك علي ريلي وقال شفيج ترا رايحين لديره فيها اكل شدعوة مو صحرا هههه احرجني قال بس نوصل اييبلكم كل اللي تبونه من اكل لاتخافون الخير وايد هناك عاد ماني ماخذه اكل وياي يمكن اخذ كبتشينو لاني ماستغني عنها وحليب مثل كولا وجاي وباخذ كرفت ماستغني عنه انا احاتي الاكل لان عيالي مو اى شي ياكلونه

 

[كوكا كولا]

حظ من عنده انا

ان شاء الله ربي يكتبها لج

 

[كوكا كولا]

fdeet_shosho

الله وناااااااااسه سفرتج معاي بس حسافه مو نفس الطياره ولا جان شفنا بعض لوووووول
مادري يمكن صادفت معاج شي مو زين بالقطرية بس خالي دايما يسافر عليها ووايد يمدحها
راح عليها اكثر من مكان لندن وفرنسا وأمريكا وايد يمدح طيرانهم

بخصوص السباحة انا شلتها من راسي مالي خلق شبعانه سباحة من الكويت لوووول
وبخصوص العطور ديري بالج لا تاخذين من المطار اكثر من 50 مل يقولون ما يدخلونها الطيارة
اخذي واحد بس وهناك اشتري احسن
صج عاد على طيران اسيا ماكو حجز مقاعد من سبق لبق؟؟؟؟
صدمتيني بقول حق ريلي خل يركض وانا وراه ههههههههههههه
وبخصوص الأكل وااااااايد كرتون لوووول اخذي جم حبه حق الدرب بس وجبن علبتين كافي وهناك اشتري
واخذي سكر ونسكافية وشاي وكرنيشن واحد او 2 بس لحد ما توصلون وتشترون هناك انا خذين واحد بس
وبخصوص اللبس انا خذيت 2 جينز خامتهم مريحه وبنطلون خام خفيف و 4 قمصان طوال كافي و3 جواتي عزج الله
واحد سبورت والثاني تومز وايد مريح وخفيف حيل
اشوف هاليومين بحط صور تجهيزي ان شاء الله لي سكرت الجنطة
بس احتمال الأحد اشطب على اغراضي واسكرها احسن

عاد بسوي طريقة لف الهدوم مثل الرولات تقول رفيجتي ما تعفس الهدوم بجربها عاد لي سويت جنطتي

 

[** آية من الجمال **]

هلا بنات صبحكم الله ومساكم بالخير

شخباركم؟

من الصبح رحت وصلت رفيجتي المطار ... ما نمت عدل طول الليل أتفزز أخاف يفوت الوقت

والجمعة يوم راحتي من رجعت طقيتها نومة لي الظهر قمت سبحت وتغديت وقريت كل إللي فاتني أمس >>> قلت قصة حياتي ههههههه
وعندي بعض التعليقات برجع تالي

بس خل أقولكم أخباري

تخيلو امس رحنا مكتب سفريات ثاني لأن الأول أسعاره تغيرت

المهم قال بشوف الحجوزات ويرد علينا السبت إن شاءالله

وحجزت الطيران الداخلي على الماليزية يقول ممتازة أفضل من آسيا اير

والحمدالله ... وحشتوني كلكم

 

[** آية من الجمال **]

كولا بسألك حذائك تومز العادي؟ لأني شاريه الكعب المستوي بس أحس ماله داعي آخذه معاي!

الله يعيني ع التجهيز ويسهله ماسويت شي بس إن شاءالله يمدي

مادري آخذ جم يوم بعد إجازة غير السفرة شرآيكم بنات قلت مابي أخلص أيامي لأن بآخذ برمضان بعد إن شاءالله