تجمع لأولياء امور طلبه مدرسه الرساله ثنائيه اللغه

[ريماس الحلوه]

رفع بنات شنو اتوقعون يعطون اوله روضه

 

[سر القلوب]

سديم مشكورة بعد عمري على تجاوبج معاي وابدائج لروح المساعدة والتعاون

وهههههاااااااااي طلبات رسم مادري اول مرة اسمع فيهم الظاهر انا اللي ظايعة بالطوشة مو ولدي خخخخ
بس الورقة اللي فيها كل الطلبات اللي اخذتها منهم فيها الوان خشبية وشمعية وصمغ يوهو ومقص واتوقع هذي طلبات الرسم
اذا في غيرها علميني يالحبيبة

 

[sadeem yam yam]

سر امبله في غيرهم لوووووول .. واعذريني مادزيت لج تقسيم الدرجات .. اذا خلصت من الكبير بسم الله عليه قعد يبجي الصغير .. مافضيت سامحيني ياقلبي بس ان شاء الله اليوم عندج حتى لو اقساط لوووووول

ريماس اتوقع اولى يعطونهم الاحرف والاعداد ويحفظونهم جم سوره < مجرد توقعات بس الي اذكره ابله الانجليزي مالت الروضه تكلمت باول اجتماع الي صار بشهر ثمانيه .. وااايد عجبتني افكارها حق الروضه بس الحين نسيت ..مفعول البنج والعمليه عقب الولاده انمسحت الذاكره

 

[ريماس الحلوه]

رفع

 

[سر القلوب]

مشكورة سديم عندي رسالة خاصة اتوقع منج بجيك عليها الحين
وبالنسبة للاغراض تقولين في غيرهم عاد علميني اشدعوة ! والا شكلج مثلي ظايعة لوووول

 

[سر القلوب]

اشلونكم امهات
ترى ماصارت الموقع مثل مااهو ماتغير لي متى كل يوم اجيك عليه واهو لاحس ولاخبر

 

[sadeem yam yam]

سر لوووول اجل شرايج نخطط مع بعض بخصوص البنوته خخخ
الطلبات مالت الرسم ياسر عطيت الورقه الي يشتغل بالمكتبه وقلت عطني ياهم مكتوبين بالانجليزي .. مع اني الحمدلله ووااايد زينه بالانجليزي بس استغربت طلباتهم قلت يمكن غلطانه .. طلبو دفتر رسم صغير .. مثل طريقه الكشكول .. وكراسه رسم اي 3 وكراسه رسم عااديه .. عاد انا شكيت قلت مو معقوله السالفه كلها كراسات رسم وعطيتها الي بالمكتبه وعطاني اياهم وارسلتهم مع ولدي ويضحكوون عليه ربعه عشان الكراسه اي 3 شكبرررها ورا ظهره خخخخخخخ
ولا اتفاجا رجعتهم الابله كلهم معاه .. مادري تبيهم ولا لا عشان ارجعهم بيصير لنا اسبوع وبعدين ماراح يرضون ياخذونهم

بنات امبيه مصدووومه ومتضااايقه هذا اولها .. متعشمه بوليدي وراسمه احلام ورديه خصوصا ان ولدي ماشاء الله بالانجليزي .. جان اتفاجا الابله مالت العلوم دازه معاه الورقه وماخذ d وااايد تضااايقت .. مع اني عارفه ان هالشئ مو من ولدي مني انا من داوم مادري شنو قاعد ياخذ بالعلوم .. فشي طبيعي دام ماكو مراجعه معاه اول باول اكيد مااراح يفهم لازم الي ياخذه بالمدرسه اعززه بالبيت .. بس الكتاب مايدزونه مع الولد ولاقاعدين ندري شنو اخذ .. وهم الانجليزي نفس الشئ .. حدي تضااايقت ..
بس والله ماننلام بما ان احنا ماعندنا الكتب عشان نعرف اهما شنو خذوا شئ طبيعي مانقدر نراجع معاهم بالبيت .. خصوصا المواد الي يخلون كتبها بالمدرسه
والله مادري شقول انتوا شرايكم ؟ كنتوا تراجعون مع عيالكم العلوم ؟ ياليت على الاقل مانبي الكتاب بس يصورونه لنا ويعطونا النسخ عشان نراجع معاهم بالبيت

 

[sadeem yam yam]

سر بخصوص الموقع كلمت الوكليه بيوم الاجتماع قالت لي كاهو الفني تحت قاعد يشتغل على الموقع .. وان شاء الله على الاسبوع الجاي يشتغل .. وهذا الاسبوع الجاي خلص وماتغير شئ بالموقع ..
يمكن عندهم مشكله بالسيرفر اول شغله جذي الله يعين ..
انا وايد متضايقه ومحبطه وولدي مايدري عني يركض ويلعب خخخخ الي هذا اوله ينعاف تاليه .. حرام احس اني انا السبب بس والله مو بيدي < بدا تانيب الضمير وااعليه يااامك من اولتها دييييي

 

[<< هيونه >>]

سديم انا مثلج بالضبط انصدمت من ولدي ماخذ بالعلوم d وحدي تضايقت بس صااجه انا حيل متوهقه وياه موعارفه شنو وشلون ادرسه والمشكله انه ولدي مايتكلم ولا يسوولف وا يقولي شي وحدي ضايعه وياه

 

[bdora]

منو بتروح اجتماع اولى روضه؟؟؟؟

 

[دانة الدنيا@]

مرحبا امهات ...........عفيه منو راحت اليوم اجتماع اولى روضه تقولي شنو قالو؟ ومتى دوامهم؟ وبالنسبه للاقصاد شلون عليها جم بياخون؟

 

[sadeem yam yam]

هيونه عندي وعندج خير ... ولدج بأي قريد ؟
تصدقين عاد دازه معاهم الابله ورقه الدرس الثالث لسن ثري .. واصلا انا ماكنت اعرف شنو منهجهم وشنو ياخذون .. بس لمن شفت الورقه وشفت ورقه الاختبار عرفت وبلشت معاه .. على الكائنات الحيه والغير حيه .. واهميه الشمس والاكل حقهم .. بس لان الماده تدرس باللغه الانجليزيه تحسينه يلخبط شوي لاني اشرح له مكس .. بس بسم الله عليه يعرف بس انه يلخبط .. يعني لو عارفين ان عندهم تست وعارفين المنهج وشنو خذوا ماكان خذوا هالدرجات الي تفشل .. وبعدين المعلمه بالصف تشرح حق 24 طالب تقريبا وبتضيع بينهم .. لكن بالبيت انتي تركزين على ولدج وشئ طبيعي بيفهم منج اكثر . وبيترسخ بمخه هالشئ ان شاء الله
بس شلون على باقي الدروس؟ الدرس الثاني مادري شنو ؟ والي عقبهم ؟ شلون يعني ؟
وحده منكم تتكرم وتكلمهم يدزون معاهم الكتب .. انا كلمتهم بخصوص كتاب الرياضيات وماقصروا صاروا يدزونه فترات معاهم .. مع انه قبل ممنوع .. وكلمتهم بخصوص القران وجنه خففوا الحفظ .. عاد تفشلت حفظوني احس صايره حنانه وكله اتحلطم خخخخخخخخ مع اني مو جذي والله
وحده منكم تتبرع وتقول دزوا كتاب العلوم على الاقل يوم بالاسبوع عشان نعرف شنو خذوا ونهيئهم حق الدروس الي بياخذونها

لا والمصيبه بروح ادق بعد ولدي مضيع كتبه لووووووول

 

[سر القلوب]

سديم بعد عمري مشكورة توني اكتشفت الطلبات اللي بالاجليزي بس شرايج اشتريهم والا انطر ؟ وبالنسبة للعلوم امبيه ماعطوني الورقة ولا ادري شمخبص ولدي انا راجعت معاه اللي يحتاجونه النباتات والحيوانات بس اما درجته مادري وبعدين ماقالوا ان في اختبار امبيه انا كل مااتواصل معاكم احس اني ضايعة بزود والله هذا التجمع نعمة الله يجزاها كل خير صاحبة الموضوع ويجزا ربي كل خير البنات اللي مواصلين ويحطولنا افكارهم وهواجسهم عشان الكل يستفيد بارك الله بالجميع

اما الرياضيات انا من رايي انهم فعلا مايعطونا الكتاب احسن لان التحضير للدرس راح يكون خربطة للمعلومات عند التلميذ لانه طريقتج بالشسرح غير عن المدرسة فخلونا نعتمد على اوراق العمل بس ونفس الشي للعلوم وهذا متبع مع المواد العلمية عمرها مايتحضرلها لا من المراحل الاولى ولا من المراحل العليان هذي وجهة نظري

والله انا مع النفاس ولاني عند امي موعارفة اسيطر على الوضع ولا عارفة اضبط الولد تصدقون اليوم نام الساعة 12 الا ربع بالليل اقصد الفير !!! الله يعين ان شاء الله بس بشكل عام انا مرتاحة من المدرسة ومن الوضع واحس انه طبيعي نكون ضايعين خصوصا ان اغلبنا اولياء امور جدد .... تهون على نفسها لووووووول
طولت عليييكم
والسلام ختام

 

[سر القلوب]

سديم اتصدقين من قريت ردج وانا موفاهمة شنو سالفة نخطط بخصوص البنوتة وكل اشوي اقرى الجملة اقول يمكن افهمها وتوني فهمتها لوووووول صج فاصلة

 

[sadeem yam yam]

سر حبيبتي مو منج من السهرر < ترقع لج

خلاص ياسر على قولتج مانبي نحضرهم حق الدروس الي بياخذونها .. نبي نراجع معاهم الي خذوا .. مرات احس اوراق العمل ماتكفي خصوصا اذا ولي الامر نفسه موفاهم الدرس .. مثل النمط .. لمن شفته بالكتاب فهمت السالفه ولا ورقه العمل مادري شلون نحلها .. لازم نستخدم الكتاب كمرجع على الاقل حقنا كاولياء امور عشان نكون بالصوره ..
يعني عندج العلوم صارلهم 3 اسابيع تووني امس دريت شنو خذوا ..
والانجليزي الله يستر ماشوف معاه اوراق عمل .. خير شر .. ولا ادري شنو ياخذون وشلون مستوى ولدي معاهم
والمصيبه لمن اسئله يقوم يخبص الابله الفلانيه تقولي شاطر وحطت لي نجمه .. انزين يابابا ابله منو ؟ يقعد يوصف لي شكلها خخخخخخخ
اقوله مادتها شنو ؟ مايعرف ,, شسمها ؟ مايعرف .. ؟ شنو تتحجى بالصف عربي ولا انجليزي ؟ هااااه هني عاد الخط الفاصل ياتطلع تدرس عربي ولا انجليزي وفيج خير طلعي هالابله منو نص المواد يتحجون عربي ونصهم انجليزي لووووول
والله ياسر صاجه احنا ضايعين لاننا اولياء امور جدد وهذي اول تجربه لنا .. مساكين عيالنا .. دايم البجر مسكين وضحيه اهو فار التجارب

 

[ام مانع]

يعطيكم العافيه على التجمع الحلو انا عندى انا عيال فى المدرسه واحد 1aوالثانى اول روضه بصراحه فعلا ضايعه بالنسبه للى بالصف الاول ابتدائى مادرى شنو ياخد بالانجليزى والقران بسرعه المفروظ ايه وحده فى الاسبوع وكررونها وشحقه دافعين فلوس ادا انا بحفظه الايات و3فى الاسبوع وبالنسبه للعلوم ماتدرين شنو ياخدون واليوم جاب معاه ورقه وحاطتله b ولما اسئله مايدرى وين الله حاطه اما بالنسبه للرياضيات انا مدرسه وخديت من مدرستى كتاب رياضيات وقعدت اراجعله كل يوم .اما بالنسبه للعربى حيل سريعين مايعطون الكلمه حقها علشان يحفظها الطالب ,.بعدين متى سوى اجتماع حق الروضه انا ماطرشولى مسج وبينى وبينكم احتمال مااخليه يداوم لانه فيه ربو .مع تحيات ام مانع [/B]

 

[حور الجنان]

مرحبا امهات شلونكم مع نظام المدرسه وغفيه منو عيالها او بناتها قريد 2

 

[أم عبووووود]

ربي يوفق عيالي وعيالكم يارب

 

[سر القلوب]

سديم حبيبتي اي والله من السهر يالله شورانا انرقع لبعض

فعلا انا اشوف الطريقة الصحيحة للمواد العلمية اهي المراجعة موالتحضير ورايج عجبني ان تكون الكتب او نسخ منها ندنا عشان تكون مرجع لنا عند المراجعة خصوصا ان النمط وعياله موفاهمينها من زمان تخرجنا والمخ احسة بدا يصدي لوووووول
والانجليزي هذا الضاهر امخفر مايبين والله يستر منه ومن نتايج الحبايب

واي والله البجر محط تجارب الله يعين عاد الحين دورنا انا وياج نعدل اخطائنا وتجاربنا الفاشلة بعيالنا البجر نحاول نعدلها باليدد الله يخلهم ان شاء الله اهم وخوانهم


ام مانع حياج الله معانا بالتجمع نورتينا والله
وانا ولدي مع ولدج بقريد ون ايه وفعلا الانجليزي ماندري عنه كلششششش والقرآن فعلا سريع بس انا اتذكر باللقاء التنويري قالوا كل واحد وقدراته ومايندرا عنهم
والعربي فعلا سريعين المعلومة ماتركز عدل

واسم الله عليج ولدج مايشوف شر ان شاء الله


حور الجنان وام عبود نورتونا وعسى الله يوفج عيالنا اجمعين آمين

 

[sadeem yam yam]

صراحه انا مادري شقول .. ماده القران مسببه لي ضغط نفسي يعني قاعده اسابق الوقت عشان احفظ الولد وهالشئ مخليني على طول متوتره لاني ابيه يحفظ ومايتاخر والولد بدا يمل .. اليوم يقولي بروح الجمعيه ابي حلاو .. قلت مااافيه تحفظ الكافرون عقب تروح جان يقولي حبيبي
سمعي سمعي بطني شيقول (ويقلد صوت البطن لمن يقرقر) .. يقولج بطني مااابي قراان ابي حلااو .. والله على اني مااالي خلق بس مت من الضحك
خايفه الولد يكره القران .. جان اقرر قرار مادري بيفشل ولاينجح خصوصا على قوله سر القلوب امهات جدد وعيالنا مساكين .. قررت التالي:
قلت لابوه جيب الكمبيوتر الي فيه قران وادعيه واخليه اهو بروحه يسمعه احسن من طريقه المسجل ..
ثاني شئ خذيت منهج العلوم والرياضيات والعربي وسويت له شرح على الباوربوينت باسلوب جذاااب لاني خبره الحمدلله وبهالطريقه جذبت اطفالي الي ادرسهم بالروضه .. واستااانس واااااااايد وقعد يجاوب معاي وعرف العلوم والرياضيات بسم الله عليه بس العربي شوي ماعرف يقرا امل وكله يسناها ويخربط لانه بسررعه الكلمات ماخذت حقها ..
عاد سويت لنا قعده نا وياه طفيت الليت وحطيت الداتا شو وصار جنه عرض سينما على الطوفه واستانسنا بدال الصراخ والمطاقق بحط لكم نبذه من الاسلوب الي اتبعته مع ولدي هذا اذا عرفت لوووووووول
وان شاء الله يجيب نتيجه ياارب يبين مع الايام