تجمع للي تربي عيالها بروحها single mothers

[عود ومسك]

unapproachable
لا من قالج تسكتين عن حق ولدج؟
بالعكس لازم تاخذين حق ولدج منه لكن عاد لا تدورون الشاره ومن يطوف عالمعاشات جم يوم تضايقون روحكم وتقولون بنرفع قضيه
لابد ان طليقج يستحي من احد او يستحي من ابوج
فا تقدرون تكلمونه تخلونه يجيب معاش ولدج الله يخليه لج
واذا ما يبي ذيج الساعه العني خيره
--
جم شهر صارله ما عطاكم معاش الولد ياماله الضربه؟

 

[unapproachable]

عود ومسك .. اهو للامانه صارله سنه ملتزم بالخمسين مالت الحكومه طبعا مو من جيبه ولا دفع بولده فلس واحد غير الهدوم اللي بربع او نص دينار اللي يشترليه من تايلاند او مصر عقب كل 6 اشهر يشتريله جم بدله واذا راح لاهله كله يزف الخدامه ويقولها وين هدوم انا شاريهم

صارله شهرين مره طوف شهر والمره اللي عقبها كل مااروح البنك تطلعلي العمليه مرفوضه يعني مادري شسالفه الكرت وكلمه ابوي عنه وسواه بس هم هالشهر العمليه مرفوضه ونظام االبنك في رقم سري لمكينه السحب ورقم سري اذا بدقين تلفون اتجيكين على الحساب ودقيت بجيك وقالي الموظف ممنوع نعطيج او نقولج اي شي اذا مو انتي اللي مبطله الحساب... بنطر جم يوم اجيك لاني نسيت كرته عقب مانزل معاشي الحمدلله وخاشه ال50 لمعاش الخدامه

 

[BABY MASTER]

:wqedqw:

 

[unapproachable]

شلونج بيبي ماستر وشلون البيبي ماعرفتي الجنس ... عاد احلى لحظه بالدنيا اذا حطت وتبين تعرفين الجنس تحسين صج صج معجزه سبحان الله
عسى الله يسهل عليج ويرزقج

 

[ام الرضا]

رد : تجمع للي تربي عيالها بروحها single mothers

صباح معطر بذكر الله وجمعه مباركه
شخباركم خواتي
بنتي مشاالله في اول اعدادي وتعرفين الاعداديه همهم التكشخ وبس وانا سعيده ان بنتي بدات تكبر الله يخليها لي ويصلحها
وبنتي ما يجيها من ابوها الا 250 ريال من المحكمه وهي اللي جابرته وهذا اقل مبلغ بالنسبه للنفقه ،،ومن طلقني ما عمره ارسل لابنتي فلوس ولا هدايا
وانا ولله الحمد مش مقصره على بنتي ،بالعكس هي احسن البنات في اللبس

 

[unapproachable]

ام الرضا عسى الله يخليلج بنتج ويعوضج يارب انتي والبنت

 

[طيفوف]

رد : رد: تجمع للي تربي عيالها بروحها single mothers

انا ما انصح بهالشي
كل شي بالطيب يجي
حلات الناس يذكرونج بالطيب
وحلات الابو مهما كان حقير بكره يقول لبنتج جعل امج للجنه
والا يتفشل من طيبج
ترحال اذا ابوج يبي يسوي شي كيفه وبصره رجال لراس رجال
انا ما رفعت قضيه مو خوفا منه
لا والله يخسي لو ابي حقي والله لاخذه من ورا خشمه واخليه يحب قاعة رجلي بعد
لكن الطيب ساعات يغلب وخصوصا ان الرجال لابد تجيه صحوه في يوم من الايام
انا ماني بعازته وبنتي تبجي تقول ابي خمسينتي هذي الحكومه صارفتها لي
ومثل ما قالت طيفوف زقوم في بطنه لكن انا افكر في بكره من بعد عيني
افكر في بنتي ما ندري شيصير بالدنيا .. اهم شي ان طيبي هذا يكون من صالح بنتي ومهما صار انا متأكده لما تكبر بنتي بتكون اغلى من عياله اللي عنده

انا مو قاعده ادافع عن الرجال مثل ما قلتلكم وما اقولكم ان ما راح يجيني يوم وادخله محكمه
لابد بيجي يوم لكن هم القضيه بتكون بالطيب

يمكن تتضايقون وتقولون انتي ما شفتي اللي شفناه
لا والله يمكن شفت اللي شفتوه واكثر من اللي شفتوه
بس كل اللي اسويه عشان بنتي مو عشانه

بنات لا تاخذكم الحره وتحسسوني ان عمركم ما شفتو يوم حلو مع رياجييلكم
يكفي شعوركم وانتو تجهزون للعرس والا بالزفه هذا كان يوم حلو لان ماظنتي وحده فيكم تزوجت غصب
انا عارفه احساسكم كنت احسه اول ما انفصلت لكن الحين وكلتي امري لله هو ياخذ بحقي
يا بنات لاتشوفون عيوبهم وتقولون ان مافيهم شي حلو ابد
لا تخلون الحقد يترس قلبكم مو عشانه عشان عيالكم بس
واذا فكرتو بالقضايا اخذو حقكم لا تاخذون زياده
والله العظيم ان في يوم انعرض علي عرض ان يرفعون لي قضيه ويعطوني مهر كامل تخيلو يا بنات قالولي من القضيه هذي بنطلعلج 7 الاف بتقولون شلون بقولكم الوسايط والظلم
وانا قلت مابي هالشي انا اذا جيت برفع قضيه مابي غير حق بنتي وانا مابي منه شي

عود ومسك

أشلونج حبيبتى انا بصراحه عبرت عن رايى والريايل هالزمن مايمشون عدل ألا بالمخافر والمحاكم ولا ماتاخذين
حقج وحق عيالج منهم
والله يخلى لنا عيالنا طالما احنا قاعدين نحسن بتربيتهم
ومو مقصرين معاهم وماردهم راح يكبرون ويعرفون شنو الابو وشنو الام
والرسول عليه الصلاة والسلام وصى ( أمك ثم أمك ثم أمك )
ولا تقولين ان الريايل مافيهم عيوب الا امطفحين عيوب بس احنا الحريم نتقاضا ونتحمل ونصبر بس ترى نوصل
ليحد خلاص يطفح الكيل وينفذ الصبر فينا
لعلمج انا طلعت من بيتى بالشتا شهر2 عز البرد انا وبنتى ولا ماخذة من اغراضى ولا ملابسى ولا شى علشان
اليوم الثانى اخذ لى اغراض تدرين شنو امسوى مغير المفتاح لما دقبت عليه علشان يفتح الباب قالى روحى المخفر
قدمى بلاغ على فعلا رحت وقدمت البلاغ علشان يفتح الباب قال لهم مالها ولاشى عندى ماخذه كل اغراضها ها
أشرايج ورديت من جديد اشترى ملابس لى ولبنتى حتى مافكر بالبنت وقتها كانت بنتى ليلحين تشرب حليب وتدرين
بمصرف الحليب وهنى بديت معاه بالمحاكم علشان اخذ حقى وحق بنتى​

:eshrab: :eshrab:

 

[طيفوف]

رد : تجمع للي تربي عيالها بروحها single mothers

منوووووووووووول أم الرضا

اشلونكم شخباركم ام الرضا غطيتى لهيتى بالمدرسه الله يخلى أبنيتج لج وشوفى عاد الحين طلبات هالمدارس ماتخلص ليلاخر السنه
وانتى اتشرين الله يعينج​

:33_1185028183:

 

[unapproachable]

صاجه طيفوف وكلامج واقعي ومنطقي .. وعسى الله يستر علينا ويفكنا منهم صج عيوبهم ماتخلص واليوم شفت الطبطبائي الحلقه كانت عن الطلاق ويقول لازم المطلقه والمطلق يسترون على بعض وانا الحمدلله محد يدري بمشاكلي معاه الا امي وخواتي واذا تحجيت عنه تكلمت بشي بسيط وان شاءالله ماراح اتكلم فيه مره ثانيه عشان مااخذ اثم على انسان منتهي وطلع من حياتي من زمان

 

[unapproachable]

ودي اسولف بس ذابحني النوم واشوفكم على خير يا امهات عازبات لوول يعني ترجمه حرفيه

 

[عود ومسك]

ياقلبي يا طيفوف الله ياخذ حقج وحق بنتج
حبيبتي انتي انا ما اقولج مافيهم عيوب لا بالعكس كلنا فينا
انا اقصد ان لا تعمينا العيوب لابد كان في شي حلو
بالنسبه لحالتج انتي اللي كان عندج ما فيه دم واهو اللي يبي المخافر والمحاكم
لكن انا يوم اتكلم تكلمت عن ترحال لان الرجال تأخر شهر فا ما بغيت البنت من الضيقه تسوي شي تندم عليه
مثلاً هي تضايقت يوم كلمت الشايب وفعلاً ابوه ماله شغل
والله دايم ابو الزوج احسن منه واحسن من ام الزوج
انا اذكر بأول شهر من عرسي كليت طقه يااااااااا الله كل ما اتذكرها اضحك مع اني تألمت منها حيل
والله يا بنات لولا الله ثم ابوه يمكن ما اكون موجوده الحين لانه فقد الرجال وهو يطقني..وياليت كان في سبب!!!
طيفوف انا حاسه فيج صدقيني والله يعينج بصراحه وياخذ حقج وزود لو تبين بعد
بس في حالات ما تستاهل اننا ندخلهم مخافر ومحاكم
صدقيني انا لو قايلي روحي اشتكي بالمخفر ما كان رديته هههههههههههههه راح انفذ طلبه وانتي زين سويتي فيه
وترا احنا كلنا نعاني نفس المعاناه<<الود ودها تسب بس للاسف الرقابه تمنع هالشي
فا انا اقولج هونيها وتهون لا تحرقين اعصابج وتحترين على شخص طلع من حياتج من زمان وتأكدي على كثر اللي تسوينه فيه تراه ينام متهني
هذول الرياجييل دايم المره تشيب قبل الرجال وتجيها امراض اكثر من الرجال لان الرياجييل مامن قلب هههههههههههه

 

[تـــرحـــال]

اختي عود ومسك

بالنسبه لوضعي حبيت اوضح لج هو ما تاخر شهر

اهو اصلا ما يطرش لنا فلوس لين اخوي يدق عليه ويساله عن فلوس بنتي


عقبها باسبوع يطرش لي معاش الخدامه وفلوس بنته ومرات ما يطرش نفقتي وندق عليه ويطرشها عقب حب خشوم

يعني طراره بس خليها على الله

وتقولين اكيد في يوم حلو بالزفه او الجهاز

بدون مبالغه والله والله والله كرهت كل شي يذكرني فيه كرهت عرسي وزفتي نفنوفي اللي قطيته مكياجي

الشي الوحيد اللي يونسني بنتي اللي ما شافها لين صارت 3 شهور وقعدت عنده 3 شهور عقب

طلبت الطلاق يعني حتى بنته مامداها تعرفه

بس ربكم كريم يفرجها ويبرد قلوبنا ان شاء الله

 

[miss_heathrow]

عندي وعندكم خير




بالنسبه لي انا بنتي عمرها 4 سنوات عمرها ما شافت ابوها ولا يدري عنها ولا صرف عليها ولا يعرفها يعني لو يشوفها بالشارع ما يدري ان هذي بنته

وسكتنا عن المصرف طبعا لا نفقه لا حقي ولا حقها ولا خدامه ولا شي نهائيا

وابوي قال خل يولي ما نبي منه شي احنا نصرف عليها

توه الحين بنته بدش الروضه ولازم التسجيل الاب يسجلها مو الام جان يرررررررفض يته بالطيب رفض ييته بالتهديد رفض تسجيل الطفله بالمدرسه وتعليمها



قمت رفعت عليه جميع القضايا من نفقه لي ولها مال 4سنوات وحق الخدامه ومعاشاتها وطالبت باغراضي وملابسي وذهبي وتعويض عنهم
والحين قاعده تطلع الاحكام


طلع حكم النفقه مال 3 سنوات اكثر شي يعطونج مال سنتين بس انا ثبت حق القاضي لعانته وان انا اصرف حتى على ولادتي انا واهو متبري منها

حكم عليه حكم الاستئناف 7 الاف نفقه للطفله هذا حكم بروحه

حكم استقدام الخدامه مع معاشاتها اللي طافو 2000 دينار

وانا نفقه مالت الطلاق 700 دينار

هذا حق السنين اللي طافت بسسس


حق بنته الحين والخدامه دفعته 250 دينار شهريا




ولي الحين ما طلع حكم التعويض مال اغراضي وذهبي اسمهم المنقولات ولا حكم الحضانه التعليميه
بااااقي خير ان شاء اطلعهم من خشم حتى شقه اطلع لي من عينه ابن اللذين شكو يرفض تعليم بنته هذا حقير ويستااااهل

خلاني اسجل بنته بمدرسه مو ذاك الزود بلاي قروب اهي الوحيده اللي عاددي التسجيل بدون ابو

 

[miss_heathrow]

خلوها على الله انا بعيش حقي وحق بنتي وبسسس

لان طلع قانون يديد حق الحضانه للاطفال اذا الام تزوجت الياهل يروح حق الجده الغير مريظه وصغيره بالعمر

يعني حتى ضغط وسكر ما فيها لي هالدرجه وسليمه جدا من الامراض حتى العيون يفحصونها صعبوها وايد
او الاخت الكبيره اللي مو متزوجه بس ما ادري من اي عمر

عقب تروح حق الاب


هذا انا سمعته بصباح الوطن قبل جم يوم



عقب انا نسيت شي اسمه زواج خلاص وماراح افكر فيه وسديت بابه اريح لي من التفكير واللويه اللي كنت فيها


والله يا بنات لا يضيق خلقكم محد يستاهل نبجي عشانه او نتضايق عشانه رياييل هالوقت كلهم يلوعون الجبد

خل نعيش حق عيالنا وبسسسس

صج اني اصاادف مشكله في بيتنا عشان اني مطلقه وغيره بين الياهل وبنتي قامت تعرف كبرت هالاشياء صج صج تضايقني حيل

 

[lovely jojo]

miss heathrow زين ما سويتي ..
طليقج شكله لعين استغفر الله ,, عسى الله يرزقج باللي يستاهلج ويقدرج ..
بس اول مرة اسمع عن هالقانون اقروه ؟؟

 

[unapproachable]

miss heathrow زين تسوين وانا لو ابوي يرضى جان رفعت قضايا شقيت ويها فيهم ... ولا تياسين اذا الابو شايل ايده من بنته ليش تمنعين زواجج؟؟ وغصبن عليه البنت لامج اول وبعدين اختج وبعدين خاله او عمه متفرغه او حتى يدتج عقب يروح للابو يعني طليقج اخر شخص يقدر ياخذها
انا اقول اذا تقدملج ريال زين لا ترفضين يمكن تعيشين معاه انتي وبنتج ويكون لج الزوج ولبنتج الابو اللي انحرمت منه

انا متاكده ان اللي احنا فيه بلاء وان شاءالله اجر عند رب العالمين ومو معقوله بنعيش طول عمرنا على هالوضع اكيد بيصير شي يغير حياتنا ويغير نظره هالمجتمع الخايس فينا

 

[تـــرحـــال]

زين تسوين مس هيثرو

بردتي قلبي صرراحه فوق كل اللي سويتيه له وسكوتج عنه يرفض يعلم بنته

استغفر الله من ابو هذا البنت شعليها بالمشاكل اللي بينكم

بس شسالفه هالقرار ما حطوه بالجرايد ولا سمعت فيه ؟

عفيه دام عندج محامي تاكدي منه ورديلنا خبر

 

[عود ومسك]

ترحال الله يعينج ونفس شعورج انج كرهتي كل شي حسيت فيه بس عاد سبحان الله ربي معطينا نعمة النسيان
وانا ما كنت ادري انه حضرته ما يجي الا بحب خشوم .. وجهه مغسول بمرق
على كذا العني جدفه هههههههههههه
---
مس هيثرو الله يخليلج بنتج ان شاء الله وزين تسوين فيه انا قاعده اقول للبنات عن طليقي اني ماشيه معاه بالطيب مع انه لا صرف ولا شي
لا معاش البنت مال الحكومه ولا معاش خدامه ولا حتى ربع دينار ولا يشوف بنته بس حاسه انه بيجيله يوم مني نفس اللي صار معاج هههههههههه

بس طليقج ....... ليش يمنع بنته من الدراسه مالت عليه اتمنى انج قلتي للقاضي عن هالشي
عاد هني مصيبه اذا درو ان الطفل ما تعلم او منعوه من التدريس يحاكمون ابوه على هالشي

بالنسبه للقرار هذا من زمان يا بنات ترا
ان الام اذا بتتزوج البنت تروح لأمها لكن بشرط ان امها تكون بصحه ممتازه
اذا حالة الام ما تسمح تروح لأختها مو متزوجه ولائقه صحياً
بعدين الخاله او العمه
بنات ترا عادي اذا الاخت غير لائقه صحياً والام عادي تروح لعمتها يعني حماتج <<جعل عيني ما تشوفهم..هالشي انا سمعت عنه من زماااااااااااان لما كنت احوس عن القرارات..هذا اذا كان الابو متزوج.
الله يلعن الرجال اللي باخذه واخلي بنتي تروح لحمواتي والا تنام بعيد عني
شنو شفت منه عشان اخلي ضناي
بوجوده وعدمه انا عايشه وبعدمه افضل عيشه

 

[طيفوف]

رد : رد: تجمع للي تربي عيالها بروحها single mothers

لسلام عليكم يا أمهات
واى صار لى جم يوم مو داشه المنتدى من لويه المدرسه وشقى
قاعدة اقرا الردود امبيه صج صج الله يعينا احنا الامهات أشكثر نعانى وكلا أعصابنا متوتره
من هالريايل هالزمن ؟ وياليت فى ريايل وقد المسئوليه
والله كل من فى قلبه شقى وأحنا كلنا نفس الوضع والمعاناه والله يعينا بس لازم نكون على
قلب ولازم كل وحدا فينا تساعد الثانيه من خبراتها واذا فى اى مشكله تواجهنا لازم نشوف
لها حل
والحمد لله على كل حال والله يخلى لنا عيالنا وان شاء الله احنا مو بعازتهم وطريج المحاكم
للريال للتأديب ويمشى على الصلاة المستقيم علشان مانذل روحنا عليه بالاتصالات ماله الا
العين الحمرا
واحنا والحمد لله من دونهم عايشين أحسن عيشه وكريمه بعد​

:lolo:​

 

[طيفوف]

رد : رد: تجمع للي تربي عيالها بروحها single mothers

ياقلبي يا طيفوف الله ياخذ حقج وحق بنتج
حبيبتي انتي انا ما اقولج مافيهم عيوب لا بالعكس كلنا فينا
انا اقصد ان لا تعمينا العيوب لابد كان في شي حلو
بالنسبه لحالتج انتي اللي كان عندج ما فيه دم واهو اللي يبي المخافر والمحاكم
لكن انا يوم اتكلم تكلمت عن ترحال لان الرجال تأخر شهر فا ما بغيت البنت من الضيقه تسوي شي تندم عليه
مثلاً هي تضايقت يوم كلمت الشايب وفعلاً ابوه ماله شغل
والله دايم ابو الزوج احسن منه واحسن من ام الزوج
انا اذكر بأول شهر من عرسي كليت طقه يااااااااا الله كل ما اتذكرها اضحك مع اني تألمت منها حيل
والله يا بنات لولا الله ثم ابوه يمكن ما اكون موجوده الحين لانه فقد الرجال وهو يطقني..وياليت كان في سبب!!!
طيفوف انا حاسه فيج صدقيني والله يعينج بصراحه وياخذ حقج وزود لو تبين بعد
بس في حالات ما تستاهل اننا ندخلهم مخافر ومحاكم
صدقيني انا لو قايلي روحي اشتكي بالمخفر ما كان رديته هههههههههههههه راح انفذ طلبه وانتي زين سويتي فيه
وترا احنا كلنا نعاني نفس المعاناه<<الود ودها تسب بس للاسف الرقابه تمنع هالشي
فا انا اقولج هونيها وتهون لا تحرقين اعصابج وتحترين على شخص طلع من حياتج من زمان وتأكدي على كثر اللي تسوينه فيه تراه ينام متهني
هذول الرياجييل دايم المره تشيب قبل الرجال وتجيها امراض اكثر من الرجال لان الرياجييل مامن قلب هههههههههههه

حبيبتى عود ومسك
والله لانى حاره روحى ولا شى والحمدلله عايشه احسن عيشه بين اهلى
وهى دنيتى وعفيا على منول حطت لنا هالتجمع علشان انفضفض فيه
ونتحلطم على الرايل
خعخعخعخع لووووووووووول​

:sfg: