تجمع مواليد ( مارس & ابريل ) 2014 الله يحفظهم

[fofowa_q8]

بنات منو مجربه شفاط الخشم اللي على كهربا او بطارية

مو اليدوي؟

اللي مجربته ياليت تفيدني ينفع؟ والبيبي يتعور ولا لا؟

وشنو احسن ماركة؟

 

[baa6aa]

سلامتهم عيالكم من الشر يارب

انا ماستخدم شفاط احط لها قطرة ماي وملح من المستوصف والحمدلله فايد مع بنتي

بس الدكتور يقول في نوعين في ماي وملح و في قطرة ثانيه معاها ماده نسيت اسمها تسبب رقعه بالقلب

فديري بالكم

 

[fofowa_q8]

بطه انا دكتوره عطاني الماي والملح حق خشمه

احط له وبعدين اشفطه

بس الشفاط اليدوي العادي وايد يأذيه يبجي مسكين

لين يكح ويستفرغ

عشان جذي امس طلبت شفاط على بطارية

يقولون مايعور الخشم وفيه سرعات ان شاالله ينفع معاه

اللي مضيق خلقي انه قاعد ينزل على صدره وبادي يكح

واخاف يتنك ولازم كمام حرام توه صغير

اليوم بوديه مرة ثانية الطبيب يشوف صدره معور قلبي

 

[baa6aa]

اذا ما شفتي شنو يصير ؟ انا هذا اللي كنت خايفه منه عشان جذي ما سويته و ماشيه امورها مع الماي وملح بروحهم

جربي خليه و شوفي شنو النتيجة و بعد روحة الاطبة وايد تخرع خوفج يلعبون فيه كل شوي معطينه شي حرام

الله يشافيه و يعافيه يارب

 

[fofowa_q8]

بطه لازم ينشفط الخشم عشان ماينزل عالصدر ويبدي يكح

اذا نشله عاديه اوكي ينفع الماي والملح لانه يبطل

الخشم على طول بس ولدي ماينفع معاه بس الماي والملح

يسكر خشمه اكثر لازم اشفطه ولا يختنق لانه حساسية

خصوصا وقت النوم واول مايقوم.. وهم مااقدر اسكت

عنه مااوديه لان احنا فينا حساسية انا وابوه واخته

فلازم اراجع عند دكتوره على طول عشان ماينتكس


امين يارب يشافي كل مريض

 

[لما ضاقت]

الله يشافيه يا رب حرام توه صغير وين وين الحساسية ما يشوف شر فديته

 

[لما ضاقت]

بطة جربت الكيك بالمايكرويف و ضبط معاي سويت الخليط الجاهز و حطيته بصينية الكب كيك و خليته ١٢ دقيقة ملاحظة الباور على ٦٠ و الصينية اللي استخدمها صينية سيليكون ما ادري اذا عرفتيها استخدمها بكل شي لانها ما تلزق و يطلع الشكل مثل القالب بالضبط بس الجلي اللي حاولت اسويه فيها و ما ضبط يلزق و ما يطلع نفس شكل القالب اللي تعرف تسوي الجلي بقوالب تفيدنا رجاء

 

[glby7sas]

فوفوه حبيبتي ولدج نفس بنتي انتبهي انا بنتي مره نزل على صدرها وشفطولها بسفاطهم يخرع يشفطون من الخشم والحلج
عشان تتفادين هالمشكله اول شي كل دخلت حمام اخذي معاج عود اذون وشفاط انا استخدم اليدوي بس راسه وايد ضعيف يدخل لي داخل حيل كأنه انبوب الموهم وقطاره ماي وملح اول شي لعبي مع الياهل ونظفي خشمه بعود اذون عشان اطلعين الوصخ اللي حجمه كبير ولمه اطلعينه سويه على لعبه يعني انا دايمه الفت انتباه بنتي لما اطلعه اقولها كخ واضحك اهي قامت تضحك معاي
الموهم بعد ماتنظفينه بعود الاذون غيري حفاظه الياهل عشان ينسه ولما تسكرين اهدومه خلاص قبل لا تشيلينه شفطي بالشفاطه اول خليه يشوف الشفاطه بره وضغطي عليها وردي على طريقه جنه لعبه بعدها شفطي خشمه لما تخلصين قطري بخشمه اخر شي التقطير مو يعني تضغطين وينزل وايد هذا غلط مجرد انج تنزلين علبه القطار بتلاحظينه انه ينقط بروحه حطي هالنقط عند فتحه الخشم والياهل راح يسحبه بتلاحظين انه مايبجي
اما قبل النوم كل هالاشياء سويها بس بدال القطاره حطيله بخاخ الخشم بتلاحظين الفرق

 

[fofowa_q8]

مشكورة قلبي انا اسوي نفس طريقتج

توني راده من الدكتور قالي اللي فيه حساسية مونشله

ولازم بخاخ كورتيزون عسان مايزيد عليه صدره واضطر

استخدم الكمام

بنات خرعني الدكتور على قياس راسه يقول محيط

راسه كبير لازم سونار نتاكد ان مافيه شي

بنات طمنوني اللي تعرف قياس محيط راس ولدها او بنتها

قالي المفروض كل شهر يزيد سانتي واهو زايد من

الولادة لحد الحين ١٠ سانتي

 

[MOOON&M]

عسى الله يشفي عيالكم يارب

لما بخصوص الجلي سويه وحطيه بقوالب السيلكون وجمديه وطلعيه من القالب واهو مجمد


فوفو اول مره اسمع عن محيط الراس

شلون اقيسه

انا برايي استشيري دكتور ثاني وان شاءالله مافيه الا العافيه


ام منوعي شخبارج

حمره غاطه عسى المانع خير

قلبي حساس بنتي بدت تقعد بس ما تثبت والحبي لي الحين مافي اي بادره

اذكر بحري حبت لما صار عمرها 9 شهور

 

[fofowa_q8]

مون يقيسونه بالمتر العادي مال الخياط

وتشوفين جم محيط راس البيبي عند الولادة

المفروض كل شهر يزيد سانتي يعني الحين

اهم عمرهم تقريبا ٥ شهور المفروض يكون زاد ٥ سانتي

واذا اكثر او اقل بسانتي عادي

 

[fofowa_q8]

انا بعد فاقده حمره عسى المانع خير

 

[حمرة الورد]

ماتفقدون غالي ياقلبي المدارس تأخذ الوقت والتدريس

فوفو انا بامريكا كان ولدي فيه خفسه براسه ع جهة اليمين بسيطه وكنت اهتم حيل انومه مرات يمين ومرات يسار وأقول لزوجي يضحك علي لما راح الطبيب وشافته الدكتوره ع طول حولته وقالت محيط الرأس مو اوكي وعطوه جهاز ينام فيه وعلى مراحل اقيس راْسه وأغير له المراحل الجهاز على شكل سرير أهو مافي الا العافيه لاتحاتين أهو جم مره قاس راس ولدج عشان يعرف وبعدين اتوقع هذا شي وراثي شوفي راس ابوه شي تلاقينه وراثي حماتي كانت حامل وقالو لها معاق راْسه كبير سوت سونار عند دكتور ثاني اول ماشاف ابوه ضحك قال مافيه شي ولدكم بس نفس راس ابوه

 

[حمرة الورد]

فوفو منو الدكتور ماعليج امر

 

[baa6aa]

فوفو ان شاء الله ماكو الا العافيه انا جذي من ايام السونار تخيلي والدكتورة تقولي راس بنتج كبير
خصوصا ان جم مرة يسوون لي دخول من الالام اللي كنت احس فيها بسبه مكانها يكون راسها ضاغط و يعورني
ونفس الشي بالولاده قالت بتطول لان راسها كبير
وليلحين راسها كبير بس ماقالو شي عادي بس مرات يحبون التهويل فانتي طولي بالج


لما شفتي شكثر تعانين مع ريلج ان مو زين
انا كنت اقوله من اللي قاعد يسوونه فيني اهله واهوة ساكت ان بيحوشني اكتئاب اعرف نفسي
ولمن حسيت وصلت حدي امس رحت حق استشاريه نفسيه و فعلاً قالت بوادر اكتئاب و قالت اتلاحق على عمري قبل مايحوشني صج وامشي على علاجات و جذي
ومسكينه قعدت معاي مده طويله و صج العله باهله حسبي الله ونعم الوكيل
يخربون بيت ولدهم واهوة قاعد مرتاح مايدورون راحته مثلا ولا شنو

 

[Q8_QT]

فوفو



سلامته ولدج مايشوف شر انا بعد بنتي خشمها يصب وكله وصخ صارلها فترة جذيه

 

[fofowa_q8]

كتبت رد شطوله وانمسح

المهم اختصار الرد اني من امس مانمت احاتي عبود

وقاعدة على اعصابي ناطرة الدكتور ورحت العيادة

كتب لنا السونار اللي يحتاجه وطرت فيه على طول

سوينا السونار وربي لك الحمد والشكر كل شي طبيعي

الحمدلله احس ردت فيني الروح

وقالي ان حجم راسه شي وراثي وان شاالله يطلع ذكي على هالصماخ

 

[fofowa_q8]

الله يسلمكم جميعا ماقصرتو عالدعاء

بالنسبة للحساسية قالي لازم تتقبلين ان ولدج

فيه حساسية نفسج ونفس ابوه واخته ولازم بخاخ

كورتيزون حق خشمه وكمام حق صدره

لان اذا سكتنا راح ينتكس.. كنت متضايقه عالربو وحساسية

خشمه بس بعد سالفة راسه اقول مليون الحمدلله

الحساسية ولا شي غيرها .. والحين موسم حساسية

ديروبالكم على عيالكم اي شي يهيج الحساسية وخرو

عنهم حتى لو مافيهم احتياط واكثر شي قالي الدكتور

ان يزيد الحساسية الطيور بالبيت خصوصا الكاسكو

انا كان رايح عن بالي وبنتي ٢٤ ساعة عنده

بس رديت البيت قلت حق ابوي ان الدكتور قال جذي

عن الكاسكو قام وشاله وداه حق رفيجه مع انه عندنا

من سنين وابوي يحب حيل عزيز عليه مربيه

ومعلمه يتكلم بس يقول صحة عيالي اولى قلعته

الكاسكو بس ادري ان مو من قلبه يحبه كسر خاطري ابوي

 

[مناوووي]

مرحبا
شلونكم
وشلون عيالكم ضيعت رقمي وتذكرته تو
شخباركم
فوفو حياتي عبود مايشوف شر

 

[مناوووي]

بنات
ولدي لمن احطه على بطنه يبجي مايبي

وللحين ماقلب
عااادي ؟؟؟
كمل 5 شهور