تعالي شاركينا بافكارج لضيوفج شغل ايدج

[وحيدة امى]

حتي بنطلع نتقهوي بروحنا علي اقل شي يفتح نفس وإذا خلصنا نقطه

 

[وحيدة امى]

عندي صور بنزلهم مع وصفات وبحطلكم بالاستغرام بنات روعه يعلمون الطبخ جزاهم الله خير

 

[وحيدة امى]

afnanetoo هذي الأخت افنان روعه تابعوها وصفاتها مظبوطه حرم الله أيديه عن النار

 

[وحيدة امى]

بنات شنو جربتًو شنو بدعتو كتبو هنيه

 

[المقتصرة]

تسلم ايدج يالغلا

 

[بكيزة هانم]

عجينة الفطاير تحشينها على ذوقج وبعد الفرن تحطينها باكياس وبالفريزر على طول
ممتازة جدا للمفاجئات وللتحضير المسبق للعزايم مجرد تطلعينها تسخين وتقديم
واحب البسبوسة بالجهاز على شكل قوالب حلو للتقديم
ومشكوورة عالموضوع لطرا علي شي برد

 

[برد & سلام]

الله يعطيكم العافية بدعتو والله ...

 

[dectora 7elwa]

خوش موضوع جزاكم الله خير
بس مافهمت شلون بسبوسه بالماكينه

 

[Rooz Aziz]

انا قبل اشتري من الحريم
بس مايجي نص الشهر والا المعاش رايح

اذا بقهوي وحده الحلووو مع التوصيل اقل شي 12
والفطاير والا الورق العنب نفي الشي اقل شي 10
20 دك كل زواره .!!!!!






تدرون شسويت

رخت المحلات اللي ورا سوق لندن
وشريت
بلاستيكات للسلطات
اذا زرت حمولتي والا اهلي والا خوالي والا سلطاتي معاي


وشريت منهم الورق الملون مال الكيك وشريت قفاش صغار

وصحون القصدير حق البسبوسه


وبالوقت الاخير احاول اني انا اسوي شغلي

اوفر وغير انه اوفر


اطعم والذ

 

[بيرشيكا]

ماشاء الله أفكار رؤووووعه بس نبي المقادير صح نبي نشتغل صح حبيبتي الكيكه. المالحه ما قلتي جم مقدار الدقيق هذا اللي وهقني يوم بغيت أسويها ولج مني جنيل الشكر

 

[<> إيلاف الكويت <>]

خوووش موضوع والله
تسلم ايدج حبوبه

ماعندي فكره وقاعده استفيد من افكاركم الحلوه

متااااابعه &#55357;&#56397;&#55357;&#56835;

 

[سلسبيل]

موضوع حلو
ومنكم نستفيد

 

[صرخه ريم]

الله يعافيكم انا جديده بالمنتدى وحابه تساعدوني بنتي عمرها 11 وحاسه معاها ريحه ومابي استخدم لها مزيلات عرق لان توها عن هالشغله فا ابي منك افضل خلطه لها بهالعمر الله يجزاكم خير

 

[صرخه ريم]

معقوله ولااحد منكم يعرف شي

 

[بـ سـ كـ وتـ ة]

أخت صرخة ريم

سؤالج مكانه غلط في موضوع العضوة عشان جذي محد انتبه له

الله يخلي لج بنيتج ... ولا مو صغيرة اسم الله عليها

الحين الوقت المناسب لأنه بدت هرموناتها اتغير

عوديها تستخدم صابونة ديتول أو لايف بوي أو أي صابونة تقتل البكتيريا

ولما تطلع تستخدم الديودرنت أو إذا تحبين في عند الهنود بودرة مسك ريحتها حلوة ... آنا بالنسبة لي أستخدم جل جيليت لأن بشرتي حساسة

وإذا خايفة عليها في تاجرات عندنا في المنتدى يسوون مزيلات عرق من مواد طبيعية

أو اخذي لها نوع طبي من الصيدلية

ترى هالموضوع وايد مهم لا تهملينه، ممكن ينفر الناس منها اسم الله عليها ولازم تتعود على روتين لنظافة من الحين لأن إذا كبرت صعب تلتزم

 

[بـ سـ كـ وتـ ة]

صاحبة الموضوع

بالنسبة لي أحب شغل البيت وايد

أسوي أي وصفة كيك تعجبني ... حاليا هابة بكيكة السفن أب هذي

قوامها بالضبط نفس الباوند كيك الجاهز وأخلط معاه الفاكهة المتوفرة عندي بلوبيري أو فاكهة

وإذا مستعيلة عندج كرواسون الفيصل الميني سويلهم حشوات مختلفة ورتبيهم وقدميهم

تقدرين تسوين حشوة الدياي بالكريمة والذرة والمشروم

أو حمسة دياي وجزر وفلفل بارد مبشورين مع رشة لومي وشوية مايونيز

أو سلطة تونة وخضار ومايونيز

أو أنواع أجبان ومرتديلا

وهم تقدرين تسوين فيه حلو

سوي فيه أم علي واستخدميه بدال الجلاش

أو سوي محلبية أو كستر وحشي الكرواسون بعد صبي عليه توفي اللي يسوونه من شكر وزبدة وقيمر أو هرشيز السائل

ومرة شفت فكرة عجبتني

وحدة ما شالله عليها سنعة اهي وبناتها

يايبة الطماط الصغار مفرغته من اللب ومحشيته تبولة

وفي عندج بعد وصفة الـ deviled eggs

تفوحين البيض وتقصينه من النص بعدين تشيلين الصفار تجمعينه كله في ماعون

تهرسينه بالشوكة وتضيفين له مسترد ومايونيز وخيار مخلل (الصغير اللي بالكيلو صوب الأجبان)

وطبعا ملح وفلفل أسود وممكن بقدونس مثلا

بعدين تحطين هالحشوة في جيس الكريمة مال تزيين الكيك وترجعين تحطينه في البيض بشكل حلو

شكله النهائي راح يكون جذي

وإذا تدرين مثلا إن ضيوفج يهتمون برشاقتهم ومسوين رجيم تقدرين توجبينهم وبنفس الوقت تساعدينهم ما تخربين عليهم

سوي حمص في البيت (علبة نخي - فصين إلى 3 ثوم - نص علبة روب - كمون - ملح - 3 قفاش هردة) ضربيهم في الخلاط

وقدمي معاه خيار وجزر وسلري مقصصين بالطول

تقدرين تقدمينهم في المواعين الزجاج اللي جنها كوب اللي يقمون فيها الحلو البارد

كل وحدة جدامها ماعون الحمص وماعون الخضار تغمس

والحين ما شالله الفاكهة اشحلاتها

قصصي الرقي والبطيخ دوائر بالأداة مالت الرقي (شكلها مثل سكوب البرد بس صغيرة)

شي دوائر وشي مكعبات وشي مثلثات المهم بحجم اللقمة

وشكلي حسب الفاكهة اللي تحبينها فراولة بابايا أناناس كيوي حسب مزاجج

بعدين شكيهم في سيخ الخشب أو في عود أسنان إذا حابة شكلهم يصير أذرب

هذا اللي طرى على بالي الحين وإذا تذكرت شي ثاني أرجع حق موضوعج ان شالله

الكل راح ياكل فواكه حتى اللي ما يحبها

 

[بـ سـ كـ وتـ ة]

اي الشاي بدال ما تقدمينه مثل ما اهو حق الكل واللي ما يحب الشاي الأحمر ما يشرب

تقدرين تسوينه نظام بوفيه تحطين الغلاية متروسة ماي ويمها الكواب والسكر مرتبين

ويمهم مقسم شكله حلو حطي فيه أنواع الشاي وأنواع السكر وهم أنواع النسكافيه اللي تصير مغلفات عشان كل وحدة تشرب على ذوقها

والبيتزا السريعة مالت التوست هم حلوة ومرات تنقذ هههه

وآخر شي

سوي سندويتشات توستة دهنيها بمايونيز وحطي شريحة مرتديلا وفوقها توستة ثانية دهنيها مايونيز وحطي جبن سلايس

وتوستة أخيرة ... يعني 3 طبقات

يا إما تقصينها أربع قطع مثلثة أو إذا عندج قطاعات البسكوت قصصيهم أشكال وشكيهم بعود الأسنان

شكلهم يونس والكل يحبهم حتى اليهال

وعليكم بألف عافية ان شالله

 

[اطيااااف]

ومنكم نستفيد

 

[دانه كول]

روعه روعه
والله انكم فنانات
ويعطيج العافيه
ياصاحبة الموضوع
انا عندي طريقة دونات روووعه وطعمها
رهيييب

الطريقه

نص كيس طحين المطاحن
ثلاث ملاعق حليب بودره
ملعقة خميره
ملعقة باكنج بودر
نص بيالة سكر
ملعقه صغيره فانيلا
واعجنها بماي وتكون العجينه
مونفس الفطاير اثقل شوي
وبعدها اعجنها بشوي زيت
عشان تتماسك
خلي العجينه ترتاح نص ساعه
وبعدها شكلي الدونات
وغطيهم بكيس نايلون
عشر دقايق وبعدين اقليها بالزيت
وبعدها رشي علي بعضها سكر بودره
وبعضها بالهرشي سوي مثل الخطوط
عليها وصفيهم بصينيه حلا حلوه وقديمها
اللي تجربها وتضبط معاها الله يهنيها بالطعم
اللذيذ هههههههه
وسلامتكم

 

[MoonDiamond]

انا بديت اهجر شغل الحريم واعتمد على نفسي اقصد خدامتي هههههههههههه
المواجيب مكلفه والناس مايهتمون مثل اهتمامي