تعانين من السمنة او تطنزين على السمينات حياج ابيج شوي

[انا حبه للابد]

الله يعينا على هالسمنه اللي ابتلينا فيها بس الواحد شيسوي يا ربي الحمل والولاده والعزايم تخلي العصله دبه

 

[تهاني الاميره]

الحين حنا بازمن فيه هوس شي اسمه الرشاقة
ترى تشوفين بعضهم ضعيفه هيكل عظمي وتسوي رجيم ههههههههه
واذا زادت كيلواو كليوين مصيبه :eh_s(16): وتحطيم باالنسبه لها
والحين الجمال باالنسبه حق الكل هو الرشاقه كل الناس صار كل الهم حقهم الرشاقه
ترى مو بس البنات حتى الشباب ياحرام اذبحوا نفسهم يخفون على القوام حقهم بعد هههههههه
بعدين الحين يقولون اي وحده رشيقه جميله موشرط وايد نشوف رشيقات بس مانقدر نطالع بوجهم وترى في بنات سمينات بس مو تكون سمينه وايد نشوفهم حلوات ولايق عليهم جسمهم يعني لوتضعف تطلع مو حلوه واكيد في رشيقات بعد جميلات
بس تدرون شنو اهم شي باالسمينه والرشيقه الثقه قلت الثقه بعد باالرشيقه لان وايد اشوف بعضهم متحطمين ويقولون ان فلانه تقول خشمي جذي وعيون جذي هذا دليل ان الكل يعاني :eh_s(10):السمينه والرشيقه مافي احد كامل ترى
علشان جذي اقول اهم شي ياناس الثقه تعلموا شلون تحبون نفسكم وتكون واثقين فيها :rerrerek:

 

[ليلو جبريت]

شرفتوني بردودكم
وصح في بنات مايحترمون جسدهم وتلبس اشاء تخلي الواحد غصب يطالع

 

[Mazyoona]

*
..... *​

للزين قالـوا مـن قديـمٍ علامـات
عينٍ و مبسـم والجسـم والرشاقـه

لكـن كسـر هالقاعـده هالمتينـات
مـن واقـعٍ ماهـو كـلام وبلاغـه

اللي محلهيـن ولـو هـن ثقيـلات
دايم خفـاف الـدم.. وفيهـن لباقـه

الله ياهـن ياجمـاعـه لطيـفـات
وعلى الكلام الحلـو فيهـن طلاقـه

ماهو ضروري بالرشاقه رشيقـات
وزود الوزن ماهوب يعنـي اعاقـه!

صحيح بعض اللبس يعني اهانـات؟!
الوزن بالضيّـق ..عديـم العلاقـه

بس مو ضروي يلبسن (استرتشات)
يازينهـم واللبـس واسـع نطـاقـه

لا بارك الله فيك يالضيـق بالـذات
ترى السعـه مـرات تعطـي اناقـه

قالوا الرجيـم اليـوم هـم البنيـات
قلت الرجيم ادري.. يبي لـه فراغـه

وقالوا الرياضه! قلت ماهن مريضات
للسكـري لا مامعـاهـن بطـاقـه

قابلهن الله بلا رجيـم و رياضـات
بهدي لهن منـي مـن الـورد باقـه

هن دفء هذا المجتمع.. هن رقيقات
هن ملح..هـن سكـر لذيـذٍ مذاقـه

هن لا سألتوني عن الحـب بسكـات
بقول هن فيهن عـن الحـب طاقـه

ماهو كلام اللي كتبتـه واشاعـات!!
انا اربطتنـي مـع متينـه علاقـه


فديييتكم يَ المتينات ،،
آختي بطبوطه و تعاني والله!!
عمرهآ 14 و طول الوقت تحاتي !!
​

* .....
*​

 

[راعية الطويلة]

الرشاقة نعمة
و الحمد لله إني ما أعاني من سمنةأبدا طول حياتي
و معاج إن الوحده تهتم بصحتها لأنها أمانة نحاسب عليها
عند الله

لكن ما أحب الإستهزاء و خاصة بالسمينة
و لابد أشوف فيها شيء مميز يميزها عن غيرها
و يخليها حلوة و جميلة
و لا أحب اللي وقت العزايم و الجمعات العائلية
تقط هالتعليقات ع السمين:

خففي أكلج بسج

البدلة مو لايقة عليج

إنت حلوة بس الجسم

وااااااااااااي متناااااانه

و غيرها و غيرها
يعني الأخت مسكينة تختلط بالناس تدور الأنس و الفرح

مو عشان المغثة
خليها تاكل و تستانس
و النصايح لها اسلوب مو جدام الناس حتى لو أهلها
تسلمين حبوبتنا الغالية لولا
موضوع حلو

 

[راعية الطويلة]

العيب الكبير عيب الشخصية والطبع
واللة الشكل الخارجي هين

:rerrerek:


أحلى رد على المناقشة
احسنت بارك الله فيج

 

[Tom ♥ Jerry]

.


آغلبيه المتان دمهم شربااااااات (= !
بس مو حلو الشخص يكون وآيد متين / اصلا اتييله آمراض اللهم يا كآفي عجيبه و غريبه
الوآحد لأزم يحآفظ على صحته و رشاقته
و آلرسول صلى الله عليه و آله و سلم وصى بهالشي ؛)

تسلمين ليلى !

 

[وردة الود]

مشكورة على طرح الموضوع

 

[PINKEIA]

آنا بصراحه من الي يتطنزون على لمتان وأتضايق من شكلهم بس ما أقول جدامهم لأ من وراهم لأني ماحب أجرح أحد وأكثر شغله تضايقني أشوف وحده متينه ولابسه ضيج وبنطلون مستانسه بالشحم عشان تبرزه المفروض تلبس واسع مادري أحس آكثر المتان مو هامتهم الرشاقه ولاصحتهم والله انقهر لما أشوف أحد متين ودي كل الناس ضعاف ماورا المتن غير البلاوي والأمراض ويحرمهم من لبس من المحلات الحلوه ليش مايخففون أكل ويشربون جاي أخضر اذا شربوا 5 أكواب كل يوم راح يساعد على تخفيف الوزن ومع الدايت والرياضه ومعلومه بعد أنا الليمون مع ماي دافي على الريج أشربه قبل الريوق زين يذوب الدهون أنا وزني بين 45 و46 ثابت مايتغير ولما كان عمري 13 سنه كنت حيل ضعيفه وزني 38 حتى ملابس مانغو معروف صغيره كانت وسيعه علي كان عمري13 مراهقه وأروح أشتري مقاس بناتي محلات أطفال 9 سنين لوووول دكتوره تقول حق أمي آكليها فول هههه طبعا مستحيل ماحبه والكل يقولي روحي أخصائية تغذيه زيدي وزنج شكو أروح أدور المتن عشان عقب آسوي دايت الحمدلله ماشفت نفسي متينه من وآنا صغيره عصله وان شاء الله دووم خالي كل مايشوفني يقول عصله الله يعين لمتان يارب كل وحده متينه تفكر بصحتها وتضعف حق نفسها مو حابين يشوفون جسمهم مشدود وبطنهم لازق بظهرهم وصدرهم مشدود لووول قاعده أشوقهم بكلامي عشان يتشجعون

 

[dj.RomanCe]

اتذكر اختي لما كانت صغيــره كانت شوي متيــنه ..

والبنات كانو يقولولها يا البطه . . !

عاد قلت لها لما احد يقولج يا البطه .. قولي لهم بط الله رااسج ماكله من حلآإل أبووج !

خخخ ومحد صار يقرب لها

شوفي اختي ليلى السمنه شي خطيــر صرآإحه

يعني للصحه أولا مو للشكل ..

والشخص المتين ماشوف شي يعيقه الا نفسه

لأن الأغلبيه كسالى ما يتحركون أو يتحركون بس ما يحافظون على غذائهم

الإنسان بالنهايه محاسب على نفسه اولا ولازم يحافظ على النعمه اللي الله انعم فيها عليه
والله يشفي كل مريض ومنهم اللي يعانون السمنه

 

[ليلو جبريت]

شرفتوني بردودكم

 

[هنووفوو]

الحين حتى في ناس تتفشل تمشي مع احد متين ساعات الاخت تتفشل من اختها ولا اخوها لان متان
حتى في متان ساعات تشوفونهم منبوذين بالمدارس
حرام والله يعورون القلب

 

[**miss-NY**]

حلووو موضوعج انا عمري ماعيبت على متينه بس لاحظت المتينه تكون حسااسه شوي من اي كلمه بنت خالتي سمينه ولا عمري علقت عليها لانه عادي هذي الدنيا في سمينه وضعيفه بس واايد تعلق على شكلها اعطيج مثال مرة رحنا انا وامي واختي وبنات خالاتي الثنتين وحده منهم البنت السمينه اوكي نشتري نفانيف حق عرس المهم تخيلي واحنا بغرف التبديل يوم خلصنا ولبسنا طلعنا بره الغرفه انوري بعض اللبس الا اهيه قعدت وطلعت بعد دقايق يعني مستحيل تكون لبسته المهم طلعت منفسه ومعصبه ولا تقولي برد البيت واحنا نحلف لالا الا تلبسين وبحكم انه صديقتي بعد وعلا قتنا قوويه من الباجي قالت اوكي بلبس وبوريج المهم البست والله العظيم اللبس يهبل عليها واحلف لها ماكو فايده ماتصدقني وكله جذي لاحظتها اهيه الوحيده اللي تطنز على نفسها والله احنا ولا مرة تطنزنا عليها او حشينا فيها من ورى ظهرها بس مااكو فايده قلنالها انتي عدوت نفسج بس صج تكسر خاطري وخصوصا بالتسوق و من جذي دايم اطوف تصرفاتها من حرتها على نفسها لانها كانت ضعيفه بس يتلها فترة متنت ومو قادرة تنزل الوزن الله ينزل وزنها بصحه وعافيه ان شاءالله

واسفه على القرقر وااجد لووووول

 

[شندوخه]

موضوعج وايد حلو .. وترى يابنات مو كل متينه من الاكل في ادويه والله العظيم تفتخ الواحد مثل الكرتزون يحبس السوائل بالجسم ويخزن فيج عالاقل 4 كيلوات زايده وكلها سوائل

 

[tagtoga]

والله ياوخيتي انا نحيفه ويجرحوني العالم تجريح مو طبيعي
ما اعتبر نحيفه حيل ومالي ملامح
بس علشان الحين السمنه على قفا من يشيل صرت شاذه عنهم ومصدر للتريقه !!!!
زي ما ينجرح السمين ترا النحيف ينجرح اكثر منه اضعاف اضعاف


ماسبق جرحت او تتريقت على سمينه مو خوف من مشاعرها انها تنكسر
بس خوف من الله لأنها مالها ذنب باللي هي فيه ولو الواحد بيختار لروحه اختار احسن شي

بس اللي لاحظته الكل يحاول ما يجرح السمين ويداري على مشاعره لدرجة الجنون
ومع ذالك النحيف يقذف بأشد النكت والتجريحات من بعض الناس ويستغربون ليه يزعل .؟

مره كنت بنادي صحي وكان الكل يطالعني غريبه وش جابك هنا وهاتك ياتريقه
يوم حكيت لوحده قلت ترا النحيفه مو شرط تقدر تاكل كل شي ومو شرط انها تستغني عن الرياضه
خصوصا النحاف يمكن يكونون اكثر عرضه للكلسترول
والقولون وا وا وا
قالت وحده منهم ليت فيني كلسترول وقولون وقرحه بس اني نحيفه
بالله يابنات هذا حكي
قلت امين الله يجعلك عن قريب تذوقين اللي نذوقه
قالت ميخالف اكل علاج له


النحيف والسمين يعاني بس اللي يتريق او يلخز ترا ماعنده احترام لذاته قبل يصير عنده احترام للغير

بس اسمحي لي يا اختي معليش
بعض السمينات ترغمك انك تناظرينها
خصوصا اذا لابسه عاري حيل او جينز ضيق والتي شيرت حيل قصير
والنحيفه برضو اذا لبست لك قصير او سواريه وعظامها متغززه غصب تناظرينها
ماتتشمتين بس غصب بتطالعين
فا يليت اللي زي كذا تتستر شوي وتلبس شي يناسبها ويغطي بعض الامور بحيث ماتنجرح من النظرات


مودتي

 

[الرشوف]

اممم
شوفووو انا بطة

وسويت رجيم ونزلت

بس تعبت حيل
ومع التعب تركت الرجيم

وقمت اكل
وكل يقولولي ليش احلا عليج الضعف
وليش ما تضعفين

تعرفون شنووو لاعت جبدي من شي اسمة ريجم

الحين قلت طاف
والله تعبت نفسيتي وانا افكر

خلاص يبا


انا بحافظ على نفسي ضعفت ضعفت ما ضعفت

الله قاسملي هالشي
ومو المتن الي مشوهني
ولا الي معيقني
الحمدلله
على كل حال