خاص بأطفال التوحد

[ريحانة_14]

السلام عليكم ورحمة الله وبركاته ومغفرته وهدايته لنا جميعا

أول شي أحب أرحب بكل إللي بيدش الموضوع وأتمنى إني أفيدكم وأستفيد منكم كأمهات ولكم تجارب مع أطفال التوحد ( والله يصبر قلوبكم يارب )

أول شي أحب أعرفكم بنفسي

معلمة لإعاقة التوحد لمدة 7 سنوات

حاصلة على دورات في مجال إعاقة التوحد وكيفية وضع خطط تعليمية من داخل وخارج الكويت

بالإضافة لعملي كمعالجة نفسية مع الدكتور كاظم أبل لمدة سنتين

وأيضا دورات في البرمجة اللغوية للأعصاب Nlp المستوى الأول والثاني
ودورات بإدارة الذات وزيادة الثقة بالنفس

===============

بعد هالمقدمة البسيطة ..

أول خطوة تسوينها لطفلج إنج تحطين ورقة وقلم وتكتبين الأولويات أو المباديء إللي تبينه يتقنها .. وبحطلج تقسيمه على أساسها تصنفينله الأنشطة والمهارات إللي تبين تدربينه عليها ....

1- مهارة التواصل ( التدريب على الطلب والرفض / التدريب على الكلام إذا كان له بدايات كلام ومخارج الأصوات والحروف / التدريب تسمية الأشياء سواء كانت أدوات يستخدمها أو حيوانات أو إنه يتعرف على أعضاء جسده أو يتعرف على الألوان ويسميها أو الأشكال مربع مثلث مستطيل أو أفراد الأسرة مثلا ولد وبنت رجل إمرأه أو إذا كان مستواه علي يتعرف على الوظائف .. الإطفائي .. الطبيب .. الشرطي ... إلخ )

على حسب إنتي شنو تبين تعلمينه وأهو شنو يقدر يتعلم ...

2- مهارة العناية الذاتية والإعتماد على النفس
هذي تعتبر من أهم المهارات على الإطلاق لأن ماتدرين شنو الظروف إللي بيواجها الطفل التوحدي خلال حياته فيجب تدريبه وأهو بهالسن على كيفية إعتنائه بذاته وبنظافته الشخصية وكيفية إعتماده على نفسه ومن هالأنشطة :
التخلص من البامبرز / تشطيف نفسه بعد التبول والتبرز / غسل اليدين والوجه / تفريش أسنانه / ارتداء ملابسه سواء كانت قميص أو بنطلون / ارتداء الجوارب والأحذيه / إقفال الأزرارات والحزام والسحاب (على حسب ما إنتي معوده الطفل إنه يلبس لأن أحيانا بعض الأمهات تعوده إنه يلبس تيشيرتات بدون زرارات أو أحذيه بدون خيوط / وإذا كان الطفل بسن أكبر 6 - 10 سنوات تقدرين تدربينه على سيشوار الشعر / والإستحمام لوحده باستخدام الشامبو والصابون والليفه / تعطير منطقه تحت الإبط / تمشيط الشعر / وإذا كان بسن المراهقة تقدرين تدربينه على كيفيه استخدام ماكينة الحلاقة ... إلخ من مهرات العناية بالذات )

3- المهارة الإجتماعية
هذه المهارة ضرورية كي يتمكن الطفل من التواصل مع أقرانه كأفراد أسرته أو أخوته أو أصدقائه
( تقدرين تدربينه على اللعب مع الآخرين / إذا كان عمره صغير تدربينه على السلام على الآخرين / تدربينه على التعريف بنفسه وإذا كان لا يتمكن من الكلام يبتدي يعرف الناس بنفسه عن طريق الصور أو البطاقات وهذا المهارة ضرورية عشان لاسمح الله بيوم من الأيام يضيع مثل ماصار فبعض الأطفال مع أهاليهم / تدربينه على التحدث أمام الآخرين / أو التدريب على إنه يسرد قصه ... يعني أي مهارة خاصه بعلاقاته الإجتماعيه

4- المهارة الأكاديمية
بعض الأمهات تعتقد بأن هذه المهارة هي أهم مهارة يجب على الطفل إنه يتقنها وإن كان الطفل يتمكن من ذلك فابدئي معه ولا تتخاذلي
الأنشطة ( التدريب على الكتابة أي بدايات الكتابة .. يتعلم في البدايه كيف يمسك القلم / ونتدرج معاه برسم الخط الواحد من خلال عمل خطوط مفرغة بألواح الفلين وهذي يبيلها دورة كامله بروحها في كيفية عمل أنشطة الطفل التوحدي وتره جدا ممعته هالأنطه حتى بالنسبة لباقي الأطفال .. المهم إذا كان يتمكن من مسك القلم ورسم الخط نتدرج معاه لغاية ما يتوصل الطفل لتمكنه من كتابة إسمه وعنوانه تحسبا لأي ظرف يمر فيه .. وإذا كان يتمكن من ذلك وقدراته العقلية تقدرين تستعينين في مناهج العلوم واللغة العربية والرياضيات بشكل مبسط في البداية إلى أن يتوصل إلى المراحل المتقدمة

5- مهارة العضلات الدقيقة
تدربينه على استخدام المقص وقص الأوراق وتلوينها مثلا / أو تدريبه على شك الخرز ذو الأحجام الصغيرة طبعا هالنشاط يصلح للفتيات أكثر / وللأولاد تدربينه على اللعب في الطين والصلصال علشان على الأقل يقضي أوقات فراغه / وبالتدريج يتدرب على صنع أشكال من الصلصال ويلونها وكل ما يسوي شكل ويلونه بتلاحظين عليه نه سعيد جدا فيه وكأنه يفتخر إن هذا من صنع إيده ويفرح أكثر لما تاخذين شغله إللي سواه وتراوين أصدقائه وأفراد أسرته

6- المهارة المهنية
هذي مثل ما قلتلكم مقدمة للتأهيل المهني يعني شغل ورش عمل .. إذا كان مايعرف يطقطق بالمطرقة نحطله نشاط للتدريب على الطرق بالمطرقة على نتدرج معاه بعدين بالطرق بالخشب الخفيف وصنع ألعاب بسيطة / التدريب على صنع المأكولات الخفيفة مثل السندويتشات وطبعا بالتدريج من السندويتشات البسيطة لي السندويتشان إللي تحتاج إلى قص الطماط أو الخس / صنع السلطات سواء سلطة الفواكه وسلطة الخضروات / عصير برتقال عن طريق العصارة اليدوية / عمل الحلويات البسيطة مثل تقطيع الكعك بسكين بلاستيك طبعا في البداية وخلط الشوكولاته البودر مع القيمر ومن ثم سكبه فوق البسكويت المنقوع )

وطبعا بيكون بمثابة التشجيع له إذا دربتيه على إن أهو بنفسه يقطع ويحط بصحون ويقدم لأفراد أسرته وأصدقائه .

بالإضافة إلى التدريب على الديكوباج مثلا ( هذا بروحه دولة كاااااااااااملة بس نقدر ندرب عليه الطفل التوحدي بشكل مبسط وراح يستمتع فيه لأنه فيه تلطيخ ألوان ومعجون وبطبيعة الحال أي طفل يشعر بالسعاده لما تعطينه شوية ألوان يلطخ فيها .. بنعطيه مجال يلطخ لكن لازم يكون عندنا هدف وهو تدريبه على صنع أدوات أو تحف فنيه

7- مهارة العضلات الكبيرة
طبعا أهم نشاط فيها السباحة ( وبقولج إن السباحة جدا جدا جدا مفيدة للطفل التوحدي بشكل خاص لأنه يشعر بالإحتواء من الماء .. يحس إن في شي يضمه ومحيط دافي وحنون يشعر معاه بالأمان .. والسباحة بالذات مفيدة للأطفال إللذين لا يحبون الحضن أو العناق لأن محيط الماء لا يشعره بعدم الأمان بل على العكس تماما / بالإضافة إلى تقوية عضلات رجليه ويديه وساعديه )

وباقي الأنشطة الرياضية مثل رمي الكور في السلال أو الركض أو النط على الحبل أو اللعب في السكوتر أو قيادة الدراجة أو أي نشاط تحسين إن ولدج يحبه ويرغب في إنه يتقنه

========================

والخطوة إللي قبل هذا كله نسوي للطفل تقييم بالأنشطه إللي يعرفها وإللي ما يعرفها ... وبالتقييم راح تتفاجئييييييييييييين وايد وتكتشفين إن ولدج مكن يتقن وايد شغلات لكن حرصج واهتمامج الزايد فيه ممكن يضيعه ..

لأني بصراحة من خلال تجربتي يابنات كنت أشوف أمهات من زود اهتمامهم بالطفل أو الطفلة أهم يلبسونه ويوكلونه حتى لما يصير عمره 12 سنة

هذا مو يعني إنج حريصة عليه بالعكس إنتي تجنين عليه إذا ما كنتي من النوع إللي ماتحب تكلف ولدها بأي مهمه ... بالعكس دربيه على إنه يقوم بمهامه كأي إنسان عادي وبتشوفين العجب

=====================

لنا تكمله إن شالله يابنات لكن بموضوع عمل الأنشطة لازم نتلاقى وجها لوجه أفضل من النت وهذا راجعلكم حبايب قلبي


أحب أسمع تعليقاتكم خواتي ولنا عوده

أختكم

ريحانة_14

 

[SweeTa_4ever]

الله يعطيج العافيه

 

[ريحانة_14]

أحب أضيف شغلة

هل ولدج متدرب على التواصل عن طريق رموز الماكتون ؟؟؟

رموز الماكتون هي لغة عالمية .. يعني بأي مكان بالعالم تروحينله في مركز توحد بتلاقينه يستخدم رموز الماكتون مع أطفال التوحد ..

لكن قبلها لازم نعرف أهو أساسا شلون يتواصل معاج ؟؟ هل عن طريق المجسمات والا الصور والا رموز الماكتون ؟

مثلا : أي مكان بيروح ولدج لازم تورينه قبلها مجسم مثلا للمكان إللي بيروحله عشان يعرف أهو وين رايح سواء كانت طلعه أو حمام أو وقت الغدا والعشا .. علشان لا تمسكين إيده وتودينه وأهو موعارف وين بيروح .

وبما إن الطفل التوحدي ذاكرته بصرية عشان جذي لازم يكون دايما شي مرئي يشوفه جدام عينه إذا مجسم أو صورة أو إشارة ماكتون

 

[سنع ومنع]

يعطيج العافية خووووووش موضوع ..
وعندي سؤال .. من وين نفدر نحصل رموز الماكتون ونشتريهم عشان نبدا نستخدمهم مع عيالنا ؟؟؟
ومشكورة وما قصرتي

 

[ريحانة_14]

هلا فيج حبيبتي سنع ومنع

والله يعافيج أختي سويت فور إيفر

عندي مذكرة كاملة وخاصة برموز ماكتون إذا تحبينأصورها و أرسلها لج

وفي منه سي دي شريته من معرض للإعاقات .. هم إذا تبين أطلبه لج

 

[القرآن ربيع قلبي]

الله يجزاج خير ويجعله في ميزان اعمالج بس سؤال اشلون كام اكتشف المرض

 

[ريحانة_14]

سنع منع تحصلينة سيدي ومذكرة ماكتون في جمعية رعاية المعاقين بحولي

أختي الغالية القرآن ربيع قلبي .. الطفل التوحدي فيه 12 صفة لكن مو شرط كلها تتواجد بنفس الطفل لكن إذا شفتي 7 أو 8 من هالصفات ممكن يكون الولد توحدي .

والصفات إهي :-

1- عدم الخوف من الخطر والأماكن الخطرة والأدوات الخطرة

2- عدم الإستجابة لنداء الأم أو أفراد الأسرة

3- ضعف في التواصل والعلاقات الإجتماعية

4- الترديد .. مثلا تقولينله شسمك ؟ يرد عليج شسمك ؟

5- الإنزواء أغلب الأوقات والتفرد في لعبة معينة خاصة به بعيدا عن أقرانه

6- التشتت عدم النظر إليك مباشرة

7- صعوبات النطق وأحيانا أخرى عدم التكلم بشكل نهائي

8- لف الأشياء .. تشوفينه يمسك الأشياء ويلفها بشكل دائري

9- الرفرفة باليدين .. أو الأرجحة بالرأس أو الجذع العلوي من الجسد

10- البكاء والصراخ بدون سبب محدد وواضح

11- أحيانا الأكل بدون توقف وعدم الإحساس بالشبع نهائيا ( إذا كانت من النوم الويليام أوتيزم )

12- الشعور بالضيق الشديد من الضم والحضن

13- الروتين والشعور بالضيق والحزن والتوتر من تغيير روتين حياته اليومية أو تغيير أماكن الأشياء


بالإضافة إلى ذلك أختي الكريمة إذا كان من نوع الأسبيرغر تكون عنده قدرات خارقة ومميزة بإتقان عمل معين

وقبل أن يكمل السنتين تقدرين تكتشفين من خلال عدم النظر إليك مباشرة .. أو عدم استجابته لك حين مناداته .. أو الصمت المطبق وعدم المناغاة .


ولك شكري وتقديري

أختكم

ريحانة_14

 

[Emanova]

كلامج وايد حلو يا ريحانه

لو من اول كانت هذي مداخلتج .... بدون المركزاللي ما ينذك اسمه ... بس يالله الله كريم

 

[ناني سيكرتس]

بعد عمري ريحانه جزاج الله خير وجعله بميزان اعمالج..
والله صج هالموضوع مفيد ياليت يثبتونها لان فيه ارشادات وطرق التعامل مع الطفل التوحدي, انا مستانسه انج نفذتي طلب وحطيتيلنا هالطرق, واتمنى من الكل ان يشارك معانا ويتفاعل بهالموضوع مثل ما تفاعلنا بموضوع الاخت ايمان الي يزاها الله خير افتحت لنا باب وحسستنى ان احنا مو بروحنا وان في احد يسمع ويفهم شكوانا.

حبيبتي انا ولدي فيه بطئ تعلم وفيه صفات توحديه, بس يوم كلمني الدكتور مال الطب التطوري قالي ان ولدي فيه طيف التوحد والي اسمه اسبرغر, فياليت تعطيني معلومات عن هالنوع من التوحد وطرق التعامل معاه..

 

[ريحانة_14]

حبيبتي إيمانوفا عادي ياقبي ماصار شي .. حياكم الله بالموضوع وأي شي تبون مايردكم إلا لسانكم

الغالية ناني سيكرتس ..

الأسبيرغر تقدرين تقولين إنه مع التدريبات المكثفة راح يتطور بشكل سريع بإذن الله تعالى

وإحتمال تظهر عنده مع الأيام قدرة عالية في شي معين

لكن من الحين حاولي تقيمينه وتشوفين جوانب القصور عنده بشنو بالضبط ؟؟ وخبريني عشان أعطيج طرق معينه للتدريب معاه

لو تشرحينلي حالته بالضبط .. مثلا شنو يعرف يسوي وشنو مايعرف يسوي علشان أعطيج طرق تدريب مثاليه له ..

وهل يتكلم والا لأ؟؟

وشلون يتواصل معاج ؟؟ بالصور والا بالرموز والا بالكلمات ؟؟؟؟

وجم عمره ؟؟

وشنو تبين تعلمينه ؟؟

الأسبيرغر ممكن تدخلينله مناهج الروضه والإبتدائي العلوم واللغ العربية والرياضيات وتدربينه عليهم لكن بالتدريج وبشكل مبسط .. تتدرجين معاه من السهل ليييييييي الصعب ... علشان ما يحس بالإحباط

عطيني هالمعلومات عنه علشان أقدر أحطلج خطة حقه بالصيف .. خطه تعليمية سهله ومرحة ويستفيد منها بإذن الله


إي صج .. بعرف أهو يعتمد على نفسه والا لأ؟

بالأكل .. بروحة الحمام .. بارتداء الملابس .. بكل شي


وأتمنى يا أمهات يالغاليات إن كل وحده فيكم تحطلي وتفصلي قدرات ولدها بالضبط وبالتفصيل الممل علشان نحطله خطه تدريبية خلال فصل الصيف إذا لج مقاقه


تحياتي لكم

أختكم
ريحانة_14

 

[همسات ليالي]

شكرااااااا علي المجهود ريحانة وان شاء اللة يثبت وهذا مكانج بان يكون لج موضوع بروحج واحنا معاج اذا بغينا استشارة

 

[ريحانة_14]

حياج الله أختي همسات الليالي وتشرفي وتآنسي بأي وقت حبوبه

 

[ريمه الكويت]

مشكوره حبيبتي وماقصرتي

 

[ريحانة_14]

العفو ياقلبي ريمة الكويت

وأشكرج عالمرور

 

[ناني سيكرتس]

حبيبتي إيمانوفا عادي ياقبي ماصار شي .. حياكم الله بالموضوع وأي شي تبون مايردكم إلا لسانكم

الغالية ناني سيكرتس ..

الأسبيرغر تقدرين تقولين إنه مع التدريبات المكثفة راح يتطور بشكل سريع بإذن الله تعالى

وإحتمال تظهر عنده مع الأيام قدرة عالية في شي معين

لكن من الحين حاولي تقيمينه وتشوفين جوانب القصور عنده بشنو بالضبط ؟؟ وخبريني عشان أعطيج طرق معينه للتدريب معاه

لو تشرحينلي حالته بالضبط .. مثلا شنو يعرف يسوي وشنو مايعرف يسوي علشان أعطيج طرق تدريب مثاليه له ..

وهل يتكلم والا لأ؟؟

وشلون يتواصل معاج ؟؟ بالصور والا بالرموز والا بالكلمات ؟؟؟؟

وجم عمره ؟؟

وشنو تبين تعلمينه ؟؟

الأسبيرغر ممكن تدخلينله مناهج الروضه والإبتدائي العلوم واللغ العربية والرياضيات وتدربينه عليهم لكن بالتدريج وبشكل مبسط .. تتدرجين معاه من السهل ليييييييي الصعب ... علشان ما يحس بالإحباط

عطيني هالمعلومات عنه علشان أقدر أحطلج خطة حقه بالصيف .. خطه تعليمية سهله ومرحة ويستفيد منها بإذن الله


إي صج .. بعرف أهو يعتمد على نفسه والا لأ؟

بالأكل .. بروحة الحمام .. بارتداء الملابس .. بكل شي


وأتمنى يا أمهات يالغاليات إن كل وحده فيكم تحطلي وتفصلي قدرات ولدها بالضبط وبالتفصيل الممل علشان نحطله خطه تدريبية خلال فصل الصيف إذا لج مقاقه


تحياتي لكم

أختكم
ريحانة_14

شوفي بالضيط حالة ولدي اهو عمره 6 سنين ..
اول شي اهو عنده صعوبة نطق, كان ما يعرف يتحجى بس الحين الحمد لله تحسن وايد عن قبل واهو كان يركب جمل بسيكه بس الحين تطور وقام يقول حجي وايد, حتى بعض الحروف كانوا صعبين عليه والحين اشوفه احسن.
اهو بالاول كان وايد يردد الكلام, يعني اذا سالتيه اشلونك؟ يرد عليج اشلونك.. وساعات وايد مايعرف يرد , بسالحين من بعد الروضه اكتشفت انه لما يردد الحجي يكون اصلا مو فاهم انا شتكلم عنه يعني مو فاهم السؤال, هالحاله الحين وايد خفت بس ساعات لما ما يفهم يردد. ايه وبعد ترا ما يعرف الضمائر يعني اذا يقولي شي عن نفسه اما انه يقول ماما عطي يوسف ( اهو) ماي ولا اي شي يبيه, ما يعرف انت من انتي ولا اهو ولا اهي..
طبعا ماكو تواصل بالنظر, بس الحين مع الفيتامينات الي قاعد ياخذهم صار في تواصل بالنظر, اول ما يطالعني كلش بس بالطب التطوري قالولي لما تبين تكلمينه كله قوليله وين عيونك , ولا طالع عيوني عشان يتواصل معاج بالنظر, وفعلا هالشي سوا نتيجه معاه والحين قام يطالعني بس ما يطالع الناس ولا يرد عليهم احياناايه بالاول كنت اقوله طاع شنو هذا, وتكون صوره شجره, فاقوله هذي شجره ولونها اخضر وبني, والحين قام يعرف اذا شاف شجره يوصفها لي, وحتى في اشياء وايد يصفها لي عباله حبيبي اني مو فاعمه عليه بس طبعا انا فاهمه ..
كان واااااااااااااااااااااااااااااااااااااااااايد اكتف يعني عنده فرط حركه مو طبيعي, ما يقعد بس يحوس, والحين شوي طخ مع علاج الدكتوره عبير والفيتامينات الي ياخذهم وبعد ما منعت عنه الخرابيط الي كان ياكلها تحسن علي الولد ..
اهو عنده ضعف بعضلات ايده , يعني ما يعرف ياكل بروحه مع انه يصر انه ياكل بروحه بس ما يعرف يمسك القفشه عدل, حتى القلم ما يمسكه عدل, وما يعرف يقص بالمقص وهالشي وايد مكدرني لان ما يعرف هالاشياء البسيطه, ابيه يتعلمها وابيه يتدرب عدل عليها بس مو عارفه اشلون ..
بالنسبه حق الحمام اهو يروح بروحه ويقولي اذا بروح الحمام, المسكين يقولي ماما انا بروح الحمام بسوي... اذا قلت له روح يروح واذا قلت له لا ما يروح, ساعات اكون مشغوله ولا ما سمعته ينطرني ليما اسمعه المسكين, جم مره اقوله تبي تروح الحمام روح حبيبي لا تقولي بس مو فاهم, والحين قاعده اعلمه اشلون يغسل نفسه من عقب الحمام شوي شوي ..

انا ابي اعلمه الضمائر وابي وابي اضبط السلوك عنده لان كل ما اوديه مدرسه احتياجات خاصه كله يقولولي يبيله تضبيط سلوك, ان شاء الله الاسبوع الياي راح اييله مدرس عشان تضبيط السلوك والنطق عنده.
ودي العب معاه العاب تربويه ولا العاب مفيده منها يتعلم ومنها يستانس. اهو الشي الوحيد الي يلعب فيه اهو الكمبيوتر لان ابوه مدمن كمبيوتر وكان يعلمه شويه فالحين الولد تعلم عالكمبيوتر ويعرف يفتح الالعاب ويلعب فيه بروحه وساعات اهو اسم الله عليه يعلمني عاللعبه, طبعا انا منعت عنه الكمبيوتر لان بدال ما يندمج معانا قام يدخل بعالم مع الالعاب ونسانا كلنا, والحين بديت معاه طريقة الثواب والعقاب وطبقتها عالكمبيوتر, اذا سوا شي زين خليته يلعب ساعه, واذا سوا شي مو زين وقفت عنه وشلت الكمبيوتر, طبعا كان صعب هالشي وياما تغربلت معاه وياما صرخ وبجى بس الحين الحمد الله شفت نتيجه من هالشي..


واي وايد قرقت اذا تقدرين حبيبتي تعطيني افكار عشان هالصيف يكون له ممتع اهو وخوانه.. وشكرا

:cxxxp:

 

[كرزه كويتيه]

اختي ريحانه مشكوره وايد على الموضوع الاكثر من رئع واللي اسأل الله انه يكون بميزان اعمالج..
اختي الغاليه انا ولدي عمره سنتين ونص وفيه اشياء وايد متعبتني ومحيرتني اقدر اعرض لج تصرفاته واكون شاكره لج اذا قلتيلي اذا فيه توحد ولا لا؟؟​

 

[ريحانة_14]

أول شي أختي الكريمة كرزة .. عرضي وإن شالله تعالى يكون باستطاعتي أقدملج شي يفيدج

==============
ناني سيكرتس ... إنتي يبيلج موضوع كامل بروحج

شوفي ... أول شي وبشكل عام بحالة التدريب على أي شي كل ما استخدمتي حواسه كلها ووجهتيها ناحية تدريبه على شغله معينه كلما ركزت في باله أكثر ..

يعني .. تبين تعلمينه الضمائر .. وشلون يقول أنا .. لما يقولج ماما عطي يوسف .. تروحين تييبينله قلاص الماي وتمسكين إيده وتوجهينها عليه وتقولينله ... ماما عطيني ماي ... تتكلمين كأنج إنتي يوسف وتبين ماي ( لأنه كان متعود يردد )
وطبعا ما تعطينه الماس إلا لما يقولج الجمله إللي تبينها ... ولما يقولها لازم يكون في معزز فوري .. إللي أهو يا إما تصفقينله وتحيينه .. أو give me five مع إبتسامه طبعا أو الدغدغه .. يعني أي تعزيزات من هالنوع تبينله إنه قام بإنجاز كبير .. ولو كان في نوع من المبالغه في المعزز يكون أحسن بعد .. هييييييييي شااااااااطر يووووووووووووووسف ... وديه عند أبوه والا أخوانه .. بابا إسمع يوسف .. وعلى هالوزن تستمرين معاه ( والمعزز الفوري ضروري )
أما إذا بتعلمينه الضمائر .. تيبينله صور رياييل وحريم .. وصورتج إنتي وأبوه .. وتسوينله نشاط شلون ؟؟؟

تعرفين ألواح الفلين ؟

تييبين لوحة فلين بس صغيرة بحجم إيطار صور بحيث يكفي لصورتين ( قلت حق إيمانوفا إني مستعدة أسويلكم دورة بتطبيقات عملية لكيفية عمل الأنشطة التعليمية )

وتحددينها بإيطار من التييب الملون بس بلون واحد وتقسمينها أيضا بالتيب تسوينها نصفين .. وتثبتين صورة أبوه بأعلى القسم الأول وصورتج بأعلى القسم الثاني .. وتثبتين أضرف ( تقدرين تستخدمين أضرف المكاتيب ) تحت كل صورة .. ويكون عندج مجموعة صور حق صبيان وبنات .. ممكن صور أفراد الأسرة وممكن صور أطفال عاديين .. ويبتدي يصنف مع توجيه تعليمات منج له ... وتركزين على كلمة هذه وو هذا ( الضمائر ) هذا بصوت عالي بابا ( وهذي ماما) ( هذي بنت ) هذا ولد ... وطبعا ما تنتقلين من صورة لي صورة إلى لما تكررين وتخلينه يقول وراج .. ولما يقول وراج تعطينه ( معزز فوري ) دغدغة .. شاطر يوسف مع إبتسامه .. ولما يخلص كل الصور تكونين حاطتله معزز ( مادي ) جدام عينه ( حلاوة ) (لعبه يحبها) أي شي يحبه بس يكون بحجم صغير علشان لا يفقد تأثيره مع الوقت

واستخدام الإطارات في النشاط لسبب واضح .. وأهو إن الطفل التوحدي تركيزه ضعيف .. والإطار يساعده على إنه يحدد ويوجه تركيزه لناحية العمل إللي ينجزه .

بخصوص إستخدام الأدوات الدقيقة ... نشاط شك الخرز يساعده وايد على تقوية عضلاته الدقيقة .. لكن نبدأ بالتدريج بخرز كبير الحجم على أعمدة ثابته ( نقدر نسوي هالنشاط مع بعض إذا قررتوا نلتقي بالدورة إلى أن نوصل معاه على شك الخرز الصغير الحجم باستخدام خيوط ( الحداق ) خيط الدبارة وبتصنيف الألوان وتسميتها

نشاط إستخدام المقص .. هذا النشاط كنت أعتبره جدا مهم لطلبتي وأدربهم عليه بشكل مكثف وباليوم الواحد 3 مرات وحتى أثناء فترات الاستراحه ...

تييبين صندوق من الفلين وتقسمينه ثلاث أقسام .. قسم فيه المقص .. وقسم فيه عدد 5 أوراق مقصوصه بطول 10 سم وعرض 2 سم .. وبنص الورق تكونين راسمه خط عريض بشكل عامودي بالمنتصف .. وتدخلين أصابعه بالمقص وتساعدينه في البدايه بمساعدة ( جسدية ) إيدج على إيده وتقصين الورقة بمساعدتج إنتي بحيث إن بحركة وحده بس يقدر يقطع الورقة إلى نصفين ومايحتاج يرجع يفتح المقص ويسكره مرة ثانيه لأ بمجرد حركة وحده من المقص تنقطع الورقه .. ( ولاتنسين المعزز اللفظي بعد الإنتهاء من قص كل ورقة ) والمعزز المادي ( المحطوط جدام عينه ) بعد الإنتهاء من النشاط كله .. وإذا حسيتي إن مافي تقدم ومو قادر ينجز النشاط بروحه .. زيدي عدد الأوراق وخلي الخط العامودي إللي بالمنتصف 1 سم وزيدي سماكته .. لكن مدام إنه أسبيرغر راح يتقنه بسرعه بإذن الواحد الأحد ..

ولاتزيد مساعدتج الجسدية له أكثر من إسبوع على أقصى حد .. وتالي تكون مساعدتج له بنموذج .. يعني تقصين الورقة جدامه وتعطينه المقص تخلينه أهو يتولى قص الورقة الثانيه .. وتالي تساعدينه لفظيا ( يوسف يقص الورقة ) ولما يقصها .. واااااااااو اللــــــــــــه شاطر يوووووسف ( لأنه بالنهاية طفل ويحتاج لعبارات تشجيعيه )

وبالتدريج لما تلاحظين إنه أتقن قص الورقة تزيدين سماكة الورقة إلى 3سم وتضعفين الخط المرسوم لأنج تبينه يقص على الخط صح ؟؟

==============

بخصوص التركيز .. الاستاذ وليد العيسى عضو بشركات أرض الطبيعه أو صاحبها ماني عارفه .. ينصح باستخدام الطحين الأسمر والخبز الأسمر المدعم بالنخاله لأطفال التوحد لأن الطحين الأسمر يساعد على زيادة التركيز ... وجربتها مع بنتي بصراحه لما كان عمرها 1ونص فظيعه فظيعه فظيييييييييييعه كانت ولاحظت عليها إن كل ما أتكلم معاها تنتبه وتركز معاي بأي شغله نسويها أنا معاها .. بس لما كبرت عنفصت علي

بالإضافه إلى الكشمش ( الزبيب الأسود ) ياخذ منه 7 حبات مغسوله بماي الورد كل يوم صباحا على الريق لزيادة الحفظ والتركيز لأن ورد فيه أحاديث كثيرة عن النبي محمد ( صلى الله عليه وآله وسلم ) في أغلب الكتب إللي تتكلم عن الطب الشعبي .. ولييييي اليوم أنا وبتني وزوجي يوميا 7 حبات كشمش أسود عالريج

==================

التدريب على مسك القلم .. نشاط كتابة الخط داخل حدود الفلين

أبي أريح شوي وأرجع أكمل أوكي .. المعذرة

 

[ريحانة_14]

نكمل ...

التدريب على الكتابة ومسكة القلم ...

تييبين لوحين فلين بحجم ورقة الـ A4 وترسمين باللوحة الأولى خمس خطوط أفقية وبينهم مسافة 10سم تقريبا .. وتحفرينها بالموس بحيث إن قلم white board يدش فيها يعني مو وايد واسعه .. واللوحة إللي تحتها تجلدينها بجلاد شفاف عشان ينمسح قلم الوايت بورد ..

وتلصقين اللوحتين فبعض من جانب واحد بس بلزاق لسهولة المسح

ومثل طريقة التدريب على المقص .. تدربينه على مسكة القلم .. إيدج على يدة في البداية ومدام عنده محاولات بداية النجاح راح ينجح فيها بإذن الله بوقت سريع ..

تالي بعد ما يجتاز هالنشاط بفترة .. تييبينله شفافيات وورقة A4 ترسمين فيها 5 خطوط مقطعه .. مع نقطه واضحة في البداية والنهاية علشان يحدد أهو نفسه وين يبتدي ووين ينتهي .. وتدخلينها بالشفافيه .. وهم نفس الشي .. إيدج على إيده ليش تحسين إنه قادر يمسك القلم بروحه تتركينه وبس تأشيرينله .

=================

طبعا هالتدريبا لازم تكونين إنتي معاه بروحكم قاعدين في مكان هادي وخالي من المشتتات علشان تثمر هالجلسات وطبعا لازم وإنتي تدربينه وتكتبين معاه تتكلمين معاه بهدوء وبمفاهيم واضحه . يوسف حبيبي يمسك القلم ويرسم الخط .. يوسف شاطر يكتب بلون أحمر وتزيدين عنده حصيلة المفاهيم

وبوقت استراحته أو فراغه نييبله ألعاب تربوية أو ألعاب تقوي عضلاته الدقيقة مثل الطين الصلصال .. وايد وايد وايد ممتع بالنسبه للأطفال .. وخصوصا لما يسوون فيه أشكال بطين الخزف وتنشف ويلونونها ..

وركزي على الألعاب إللي محتاجه لنوع من القوة لما يمسكها بإيده .. في لعبه قطع خشب بألوان ومطرقة وقاعدة ثابته .. المطرقة شوييييييية ثقيلة ( مخصصة للأطفال ) يمسكها ويدخل القطع الخشبية داخل فتحاتها وبألوانها المحدده ويطقطق فيها ... هاللعبة عيالي كانوا يتهاوشون عليها توننننننس صراحه

وملونه والقطع الخشبية على أشكال .. فتعينج على إنج تدربينه على أكثر من مفهوم وتحققين أكثر من هدف ... عن طريق كلامج معاه ... يوسف ماسك المطرقة .. ومسكي إيده وخليه يأشر على نفسه .. أنا عندي مطرقة مثلا .. ويمسك المكعب إللي لونه أصفر مثلا ويدخله بالفتحه الصفرا ..

مع المعزز الفوري ..

=================================

طريقة الطلب والرفض ..

ماعليه هالطريقة شويييييية متعبه لكن تريحج مع الوقت وتخليه يعتمد على نفسه وتقدرين تستخدمينها لين تشوفينه إنه ممكن يستغني عنها تشيلينها ...
والطفل التوحدي لازم يكون عارف أهو وين رايح بالضبط قبل ما يدخل المكان .. بالإضافة إلى ذاكرته البصرية .. لأنه يعاني من ضعف في الذاكره اللغوية .. فما نقدر نعطيه معلومات شفوية إلا إذا كانت مدعمه بالصور
ألواح فلين أحجامها حسب الصور والمتطلبات إللي بتحطينها عليها

وهذي طريقة التواصل والطلب

دقايق وراجعه

 

[ناني سيكرتس]

ما شاء الله عليج, والله صج امور سهله بس لانج مدرسه فتعطين افكار حلوه وسهله..
مشكوره وما قصرتي خوش رد, واذا تسمحلي الاخت ايمان انا ابي دوره فيس تو فيس ان شاء الله لو فيها انا بروحي بس عشان ابي استفيد اكثر, لان بعد صعبه كل شوي ادش النت واقرا الموضوع وجذي..

حبيت اضيفلج معلومه عن ولدي, اهو بالبدايه كان بالحضانه الانجليزيه الدوليه وكان ما يعرف يتكلم بس من عقبهم قام يتكلم انجليزي عدل والمعربي ما يعرف, وكنا نكلمه انجليزي بالبدايه ليما دش الروضه وقمنا نحاجيه نص عربي ونص انجليزي, فصار عنده لخبطه باللغتين, بس اهو توه يستوعب ان هذول لغتين منفصلين والسبب قناة سبيس تون عرف ان وحده عربيه ووحده انجليزيه, وطبعا اهو يحب الانجليزيه لان العربيه ما تلفت انتباهه كلش..
بالنسبه للكتابه بسنه ثانيه روضه علمته الابله يكتب عربي طبع بالغصب عرف بس اهو ماشاء الله عليه يكتب الحروف الانجليزيه كلها ويعرف يكتب اسمه واسم اخوه واسمي بالانجليزي, بالاضافه الي يعض الكلمات السهله..
وترا اهو فيه نقطه معينه ترا ما يعرف يقرا وهذي مشكله عويصه, مثلا اذا وريته كلمه كات ( قطه ) يقرا لي الاحرف بس ما يعرف يقول كات يعني اسبلينج بس, وهالشي مو زين عيه وكل من قالي لازم يعرف يقرا, والحين انا توني باديه اعرله اشلون يقرا بس ابي اعرف اشلون اعلمه صح, يعني انت الحين ذكرتي ان لازم التعليم يكون بمكان هادي وبعدي عن اي مثير وانا توني استوعب هالنقطه وان شاء الله بطبقها معاه..

يزاج الله خير لان تربويا وايد فدتيني , والبنات ايمان وسنع وهمسات معنويا واموميا وايد فادوني بعد..

 

[ريحانة_14]

لوووووووووووووووووووووول

عيل أنا قاعده أعطيج البداياااااااات حق وليدج ماشالله عليج قدراته حيل عاليه

عيل تبتدين معاه بالمناهج يا أم يوسف

تقدرين تحصلين على مناهج اللغه العربية والرياضيات وتعلمينه له بشكل مبسط ومدعمه بالصور

يعني ... مثل تطبيقات العلوم تدمجينها بتطبيقات اللغه العربية والكتابه

نسويله أنشطه وأوراق عمل داخل شفافيات علشان يتدرب عليها كل يوم

صورة بطة والا سيارة ومعاها تكون ملونة وتحتها كلمة بطة بالنقط علشان يقدر يكتبها كذا مرة

وتزيدين الصورة على حسب إستيعابه وبعدين نخلي النقط حيييييييل متباعده ‘لى أن يوصل إنه يكتبها بدون نقط مع قراءة إسمها ووصف ألوانها ... ولو تييبينله مجسم البطه أو السيارة أو الكرة أو أي مصطلح من دسمان مثلا يصير عنده رابط

لين بعدين تيبين صورة تكوين جملة .. الولد يشرب ( ماه صورة ولد يشرب )

وأحيانا الأطفال التوحدين يقرون شكل الكلمة مو أحرفها

بس إذا إنتي تبينه يقرا إبتدي معاه بالأحرف

نفس مناهج اللغه العربية .. أ .. أناناس ... ب بطه ... ج جمل .... مع صور وكلمات منقطه منها يحفظ الحروف وأشكالها ويصف الصور إللي مدعمه بالمجسمات


وجيكي عالخاص بعد شوي