خفايف شهر الخير رمضان المبارك:: لبيت الاهل و الحموله (أول موضوع رمضاني 2009 متجدد)

[:: Diva ::]

السلام عليكم و رحمة الله و بركاته





شلونكم بنوتات شخباركم
رمضان شهر 8 و الحين شهر 6
ممكن تسألين ليش مستعيله و من الحين بلشت ايمع وصفات و اجرب و اترجم ؟




السبب

لان هالرمضان مميز بالنسبه لي
ما علي صيام لان راح اكون حامل بالشهور الاخيره الله يثبته لي يااااااااارب
و يعتبر اول رمضان لي متزوجه و الفال لكل البنات

و السبب المحرج اني وايد آكل نغزات لاني ما ادخل المطبخ لوووول
مع اني شاطره والله لكن وايد منكم يدري ان حمالي متعسر و اشياء تكدر الخلق فما مداني استعرض عضلاتي هههههه



الموضوع هذا راح يصير حق الحلويات + السلطات + الشوربات ( خفايف )
تسوينها و تودينها و عليكم بستين الف عافيه
و ان شالله تبيض ويهج


راح اعتمد على النقل و التجربه و على الترجمه
و يارب اطلع لكم بموضوع مفيد و الي حابه تشارك ترا مايردها الى كي بوردها :dddds:


و حياكم الله حبايبي


​

 

[طعزة]

يعطيج العافية وننطر ابداعاتج...

 

[كويتيه كيوت000]

الله ييعيده علينا بالخير
والبركه ويالله ناطرين ابداعاتج​

:eh_s(6):

 

[الصابرة المحتسبة]

خوووش موضوع وعساج على القوة

 

[:: Diva ::]

اول شي راح اشخل لكم ساحات الطبخ الخاصه بمنتدانا و انقل كل طبق مع اسم صاحبته



1- سلطة الجرجير للاخت :: أم حسون ::

قوه حبايبي انصحكم تسوون هالسلطه لذيييذه صج ومفيده وتبيض الوي



المقادير:
جرجير
بربير
نعناع
طماط الصغارالميني
صنوبر
تقدرين تضيفين عليها مشروم فرش او بروكلي او شمندر

تنضفين خضرتج عدل وتقطعينها وتحطينهم فوق بعض بالترتيب وبعين الطماط قصصي الوحده بالنص
الصنوبر حطي مقله فيها شوي دهن وخليه يتحمر وحطيه عالسلطه.
الصوص:
صلصه ايطاليه_كنو بالخل الثوم_خل بلسمك_دبس رمان_ليمون

2 - سلطة ناتشوز :: اورنجيا ::

* اول شي المكونات :

خس (وانا استخدم الامريكي لان احس الكويتي فيه مرورة!)
ملفوف احمر (اللي لونه بنفسجي شكو مسمينه احمر مادري لول)
ملفوف ابيض (انا ما استخدمته ولا مرة حطيت الجزر بداله)
ذرة
جزر
جبن تشدر كرافت
فلفل هلابينو (اذا عندكم يهال لا تحطون انا ما احط وايد بس شويونة يعني نكهة ولحد يحط وايد لان احس يخرب السلطة حلاته بس نكهة)
ناتشوز (اختارو اللي بالجبن)

*الصوص:

قفشتين مايونيز
3 قفاش صلصة فرنسية (لونها برتقالي)
قفشة زيت زيتون
قفشة خل ابيض
نكهة ثوم يعني شي ما يذكر كلش
شوية ملح

والحين الطريقة :

قصصو الخس+الملفوف وكل ما صغر الحجم كان احسن
بشرو الجبن+الجزر
ضيفوا الذرة والهلابينو

الحين بلشو في مقادير الصلصة وخلطو المقادير عدل مدل

والحين صبو الصوص على السلطه وخلطوهم عدل مدل....

واخيرا ييبو الناتشوز وكسروه يعني فتفتوه بس مو وايد وصفوه فوق السلطه وبالعااااااااافية

3- سلطة الجرجير و المشروم :: كنوشا ::

ندخل بالمقادير :


* علبة روب

* 1 ملعقة طعام مايونييز

* 2 ملعقة طعام جبن برمزان مبشور

* 1 استكانه الصلصة الايطالية

* ملح وفلفل اسود


= تخلط مقادير الصلصه بالملعقه وتوضع على التالي =

يوضع بماعون السلطه ويفضل يكون مسطح احلى :

اوراق جرجير مقطعه + قليل من اوراق البربير + مشروم فرش مقطع شرايح + صنوبر محمص

تصف الخضار بالطبق وتصب الخلطه في المنتصف من فوقها دون خلطها

وتزين بالصنوبر وشرايح جبن البرمزان

وتوضع بالثلاجه قبل التقديم .... وصدقونيي ومتأكده بتعجبكم جروبها

4- سلطة الخس بالجبن الابيض :: على وجهها سمة الابرياء ::

المقادير:
• خس ( حسب الكمية المطلوبة )
• جبن فرنسي أبيض مقطع مكعبات
• جبن شيدر مقطع مكعبات

الصلصة توضع بالخلاط و مكوناتها :
1 شدة بقدونس
عصير ليمون
2 ملعقة مايونيز
2 ملعقة روب
1 ملعقة خل
قليل من الملح

5- سلطة الدجاج الفرنسيه :: عذاري ::

المقادير:​

3 صدور دجاج مقطع مكعبات
6 توست منزوع الجوانب و مقطع إلى مكعبات
- تتبيلة الدجاج :
بهارات
نصف كاس عصير ليمون ​

خس للزينة ​

الطريقة: ​

- تبيلي الدجاج بالبهارات و الليمون و دعيه في الثلاجة لمدة ساعة أو ساعتين .
- قلي قطع التوست بالزيت ثم ضعيها على ورق ماص للدهون و دعيها تبرد .
- ضعي القليل من الزيت في مقلاة و دعيه حتى يصبح حاراً ثم اقلي به الدجاج و قلبي على نار هادئة حتى ينضج .
- في صحن التقديم ضعي أوراق الخس ثم الخبز المقلي و أخيراً مكعبات الدجاج , و قدميها ​

6- سلطة سيزر :: عاشقة الجنه ::​

عندى لكم سلطة سيزر لذبذه وكل من ذاقها مدحها ويقولون طعمهابالضبط مثل فرايديز

وعلشان ما أطول بأعطيكم الطريقه وانشالله تعجبكم ... ​

المقادير : 1 خس أمريكى 2 ملعقة طعام جبن بارميزان مبشور​

​

3 قطع توست مقطع مكعبات 3 ملعقة طعام زيتون أسود بدون نواة.​

مقادير الصلصة : 1 علبة سمك الأنشوجة .​

​

1 علبة روب ( زبادى ) 1 ملعقة وسط صلصة الماسترد
6 ملعقة طعام مايونيز 3 ملعقة وسط زيت الزيتون .
1 عصير ليمونه .​

الطريقة :​

​

- يقطع الخس قطع متساويه ويقلى التوست بالزيت أو يحمر بالفرن حسب الرغبة .
- توضع مقادير الصلصة بالخلاط حتى يذوب سمك الأنشوجة .
- يخلط الخس بالصلصة ثم يصف فى طبق التقديم ونضيف فوق الخس التوست والجبن
والزيتون ثم نضيف قليل من الصلصة .​

7- سلطة جبن كرافت :: شذور الذهب ::​

المطلوب

​

​

​

بقدونس مفروم

خيار مبشور

ذره
وجبنه كرافت مبشوره >> مو العلبه الباكيت الازرق عرفتوه اسهل لما تبشرينه​

​

يكون البقدونس اكثر 00اوكي

وتخلطينهم مع بعض​

الصلصه

عصير ليمون + زيت زيتون + ملح + فلفل اسود + ودبس الرمان​

وكثري من الزيت زيتون وتقريبا 2 ملعقة ك من دبس الرمان ​

8- سلطة لسان العصفور :: بنت كيو ايت ان يو اس ايه ::​

المقادير : - كوبين معكرونة لسان العصفور

- فلفل بارد ملون ( أصفر، أخضر ، أحمر ) جميع الألوان حبة واحدة

- كوب ونصف ذرة
- جبن كرافت مقطع مكعبات صغيره جدا
- صرة اشبنت ، كوب زيتون أخضر أو أسود مقطع قطع صغيرة، صرة بقدونس
- عصير ليمون ، زيت زيتون ، رشة ملح
الطريقة : تسلق المعكرونة وبعد ذلك تضاف إليها الفلفل البارد في السلق
تصفى من الماء وتخلط المقادير السابقة مع بعض طبعاً بعد تقطيع البقدونس والاشبنت ويضاف إليها الملح والزيت زيتون وعصير ليمون​

9- سلطة طبقات الخضار :: ديانا ::

المقادير ..

​

2 شرائح توست أسمر (( بس أنا عادي حطيت أبيض ))

1 كوب شرائح لهانه بيضاء ( ملفوف )​

1 كوب شرائح لهانه حمراء (نفس الشي ملفوف )​

1 كوب شرائح جزر​

نص كوب بقدونس مفروم​

انيي حق الصلصه واهم شي :d ​

1تحتها رقم ثلاثه يعني ثلث صح لووول كوب مايونيز​

3 ملعقة أكل خل أبيض​

شوية سكر​

ملح وزيادة أنا حطيت ليمون شويه وروب مع الصلصه طلعت لذيذه ؛)​

*********************​

الطريقة طبعا سهله .. ​

تقطع شرائح التوست مربعات صغار وتحمص بالفرن بس انا قليتها بالزيت ..
يعني في طريقتين ..​

تخلط مقادير الصلصة مع بعض جيداً ..​

واول شي مثل ماانتوا شايفين اتحطون الجزر اول طبقة في قاع اناء التقديم
الزجاجي ثم
تغطي بطبقة من اللهانه البيضاء ثم الحمراء ثم البقدونس ..
بعدين اتحطين عليها الصلصه وتخلينها لمدة نص ساعه بعدين تقطعين التوست
مثل ماقلنا و اتزينينه فيها ..​

10- سلطة نينو :: بنت كيو ايت ان يو اس ايه ::

كرنفال الخضار.


المقادير :-
2 صدر دجاج بالبقسماط (ساديا)
2 باذنجان مقطع شرائح طوليا
2 كوسا مقطعة شرائح طوليا
3 حبات جزر متوسطة الحجم مقطعة أصابع رفيعة
1 فلفل أخضر مقطع أصابع رفيعة
شرائح خس
روب
1 سن ثوم
2\1 ليمونة
ذرة ملح + ذرة فلفل أسود
1 ملعقة طعام خل
1 ملعقة طعام نعناع ناشف


الطريقة :-
1.تحمر صدور الدجاج وتترك لتبرد ثم تقطع طوليا.
2.تقلى جميع الخضار( ماعدا الخس) قليلا ( تشوح).
3.تخلط الصلصة: روب + ليمون + ملح + فلفل اسود + ثوم + خل + نعناع.
4.بماعون التقديم يصف الخس، ثم الخضار المقلية، ثم الدجاج المقلي.
5.توضع الصلصة بإناء منفصل.
ملاحظة: يمكن استبدال الدجاج بستيك متبل بخل وفلفل أسود وثوم، يشوح على الزيت حتى ينشف، ثم يرش بصويا صوص.


****بالهنا والشفا****

يتبع خواتي مو تنسون هالموضوع بيكون مرجع لكم للسلطات :: الشوربات :: الحلويات

​

 

[:: Diva ::]

يعطيج العافية وننطر ابداعاتج...

الله يعافي قلبج و انا ناطره مشاركتج حياتي
نفيد و نستفيد فديتج

 

[:: Diva ::]

الله ييعيده علينا بالخير


والبركه ويالله ناطرين ابداعاتج​

:eh_s(6):

اللهم امين تصدقين حدي متشوقه و مستاااااانسه لان رمضان ياي :ggdw:

 

[:: Diva ::]

خوووش موضوع وعساج على القوة

الله يقوي قلبج يالغاليه و يارب يفيدج الموضوع مثل ما راح يفيدني و يفيد باجي البنات

 

[:: Diva ::]

11- سلطة كل شي :: سمسميه ::

انا عندي سلطه دايما يطلبونها مني وايد حلوه
المقادير
جزر مبشور
خس مقطع صغار
باذنجان مقطع صغار ومقلي
بطاط مقطع مكعبات صغيره ومقلي
زيتون شرائح
بقدزنس مفروم
خبز مقطع صغار ومقلي
فلفل علوب(الحار) وقطع صغار

تخلط المقادير السابقه ماعدى الخبز وبعدين نحط عليها الصلصه
2 قفشه مايونيز+ 2 قفشه مسترد+ليمون

نصب الخلطه فوق السلطه بدون ما نخلطها وبعدين نحط الخبز من فوق
وبالعافيه
ملاحظه هذي السلطه حاره شويه وهذا الحلو فيها اذا تبين تقدرين تسوينها بدون فلفل

12- سلطة السبانخ :: الحنونه ::

المقادير
3 [all1=cc6666]كوب سبانخ مقطعة قطع كبيرة
1 فلفل احمر مقطع مربعات متوسطة
1 كوب كزبرة مفرومة
1 كوب بقدونس مفروم
2 ليمون مخلل مقطع صغير
2 فص ثوم مفروم
فلفل اسود ، ملح زيت زيتون [/all1]
الطريقة

[all1=ff6699]يوضع الفلفل والثوم علي النار مع زيت زيتون (لا يترك كثيرا علي النار ) .
ثم يضاف السبانخ ويغطي ويترك لمدة قليلة .
ثم تقلب ويضاف عليها الليمون والكزبرة والبقدونس لمدة قليلة.
ثم يرفع عن النار وتقدم . [/all1]

13- سلطة الخس :: بيتزا ::

خس مقطع شرايح رفيعة جدا
علبة ذرة كبيرة
خيار مقشر ومقطع مربعات صغيرة
خبز معكبات مقلي

الصلصة :
من الجمعيات والكل يلقاها
صلصة بلو شيزblue cheese اي ماركة واذا ما لقيتوا فيفضل صلصة رانش ranch
صلصة ايطالية italian dreasing اي نوع

الطريقة :
بعد ما تقطعين الخس والخيار تحطينهم بالترتيب بالبايركس وتحطين فوقهم الذرة
وبعدين الخبر ، وتخلطين من الصلصتين بص الكمية من كل نوع وتصينها فوق
السلطة
وبالعافية عليكم
جربوها وماراح تندمون

14- سلطة سهله :: ام روعه ::

مقادير السلطه :

خس مقطع بحجم كبير + نعناع + فلفل أخضر مقطع مكعبات + جزر مبشور + جبن أبيض مقطع مكعبات + خبز محمص بالفرن مع ملعقه كبيرة زيت زيتون

الصلصه :

ملعقتين كبار صلصة ثاوزند آيلند مالت ماكدونالدز تنباع بالجمعيات+ ملعقة كبيرة زيت زيتون +
عصير نص ليمونه + ملعقه كبيره خل أبيض + ملح + فلفل أسود + صماغ

تخلط عند التقديم ... وبألف عافيه

15- سلطة المكرونه المكسيكيه :: لولياس ::

سلطة المعكرونة بالصلصة المكسيكية
**********************

المقادير:
----------

2/1 كوب معكرونة رقم ( 39 ) في كتاب المطاحن الكويتية
1 كوب شرائح ديك رومي مدخن
2/1 كوب ذرة
2/1 كوب فلفل احمر بارد مقطع الى قطع صغيرة
2/1 كوب " اصفر " " " " "
2/1 كوب " اخضر " " " " "

--------------------

الصلصة:
----------

2 م.أ مايونيز
2 م.أ خل
1 م.أ زيت زيتون
ملح + فلفل اسود

16- سلطة فاهيتا :: بطوطه ::

المكونات :
1 ذرة (معلبات)
1 شيش طاووق مشوي (أمريكانا كرتون أصفر)
1خس مدور
الفليفلة بكل ألوانها أحمر أخضر أصفر برتقالي


الصلصة :
1 روب (زبادي)
ملعتين نعناع مجفف
ملعقتين زيت زيتون
4 ملاعق مايونيز
4ملاعق ليمون



الطريقة : يقطع كل من الفليفلة والشيش بالطول ، يقطع الخس
نضع الخس والفليفلة والذرة في وعاء وتخلط مقادير الصلصة وتوضوع فوقها وتخلط المقادير
نضع الشيش فوق المقادير دون خلطه معها

سلطة برميته :: برميته ::

المقادير: باذنجان مقطع بشكل طولي مقلي.
خيار مقطع نفس طريقة تقطيع الباذنجان.
علبة ذره
مخلل خيار مقطع طوليا
بصل جوانح مقلي ومقرمش

(الصلصه : روب, هرده مقدار ملعقة او حسب الرغبه , ملعقة مايونيز , ملح وفلفل)

الطريقة:

نصف طبقة الباذنجان ثم طبقة الخيار ثم المخلل ثم الذره ثم الصلصه ونزينها بالبصل والبقدونس وبالعافيه

سلطة معكرونه بالبستو :: هامورا ::

معكروينه حلزونيه مسلوقه بماي وملح لما تشخلونها حطو لها قفشة زيت زيتون خلوها على صوب
صدر دياي او 2 على حسب كمية الاشخاص بدون عظم مشوي بعدين قطعوه شرايح طويله
طماط مجفف شرايح
صلصة بستو اذا مالكم خلق تشترونها سوها بالبيت شدة ريحان وشوية كزبره تقريبا قفشه وشوية بقدونس البقدونس شوي اكثر من الكزبره + صنوبر انا اخمط بيدي واحط + 2 او 3 فص ثوم+ جبنه بارمزان ربع كوب تقريبا + زيت زيتون تحطونهم بالخلاط لين يصيرون نفس الصلصله اذا جامده ظيفولها زيت زيتون
تخلطون الكل مع بعض بعدين ترشون عليها جبنه بارميزان

علبكم بالعافيه

 

[" بنت العز "]

تسلم ايدك حبيبتى
رمضان قرب الله يعوده علينا وعليكم بالصحه والعافيه
ماقصرتى فديتتتتتتتتتتتتتتتتتتتتتتتتتتتتتتتتتتتتتتتتتتتتتتتك ياعسل

 

[:: Diva ::]

يسلم لي راسج يا بنت العز الله يبلغنا معاكم :*

 

[:: Diva ::]

شوربة الخضار بالكريمه :: بنت الكويت ::

المكونات والمقادير


7 أكواب ونصف الكوب ماء
ـ مكعبا مرقة الدجاج ـ
ملعقة زبد
ـ كوبا كرات مقطع مكعبات ـ
كوب بطاطس حلو مقطع لمكعبات ـ
كوب جزر أبيض مقطع لمكعبات
ـ فليفلة حمراء مقطعة لمكعبات ـ
كوب كرفس مقطع لمكعبات ـ
6 فصوص ثوم مفرومة
ـ نصف ملعقة فلفل أسود ـ
نصف كوب كريمة للخفق

طريقة التحضير

1ـ اغلي الماء مع مكعب مرقة الدجاج، ثم حمري جميع الخضر بالزبد تحميراً جيداً، واضيفي اليها الفلفل الأسود

2 ـ اضيفي كوبا واحدا من الماء المغلي، ثم امزجي المقادير في الخلاط وصفيها. أعيديها ثانية إلى القدر واضيفي ما تبقى من كمية الماء واتركيها حتى يغلي

3 ـ اضيفي الكريمة مع التحريك ثم قدميها ساخنة

شوربة الدجاج بالكريمه :: نحله ::

المقادير

صدر دجاجة بدون عظم
ملعقة شاي ثوم
ملعقتي طعام زبدة
ملعقة طعام طحين أبيض
كاسين ماء حار
مكعب ماجي
ملعقتين طعام كريمة او زبادي
رشة فلفل أسود

الطريقة

يحمر الثوم مع الزبدة جيدا ثم يضاف إليه مكعب الماجي
يضاف الدجاج المسلوق ويقلب جيدا
يوضع الطحين على الخليط ويقلب جيدا
يضاف الماء الحار ويترك الخليط على نار هادئة حتى يصبح القوام غليظ
تتبل الشوربة بالفلفل الأسود
توضع الكريمة او الزبادي وتقلب الشوربة بإستمرار
تترك على النار لمدة 3 دقائق مع التحريك المستمر
تقدم مع الليمون

شوربة خضار :: حوراء ::

المقادير:

1/2 1 لتر شورببة دجاج

2 بطاط

3 جزر

1 فليفله

2 كوسه

خضروات ورقية ( كرفس / سلق / كزبره / شبنت / بصل اخضر / سبانخ ) ممكن الاستغناء عن بعض الانواع

2 الى 3 ملعقة اكل شوفان

1 كيس شوربة ماجي خضروات الربيع

الطريقة :

1. تنظف الخضروات الورقية و تغسل و تفرم ناعما .

2. نقشر البطاط و الجزر و الكوسة و الفليفلة و تقطع مكعبات صغيرة .

3. نغلي شوربة الدجاج و تضاف اليها الخضروات الورقية .

4. تضاف باقي الخضروات المقطعة و تترك لمدة 10 دقائق .

5. تضاف لة شوربة خضروات الربيع ممكن الأستغناء عنها بوضع قليل من الشعرية .

6. نضع الشوفان على الشوربه و يحرك و يترك على نار هادئة لمدة 10 دقائق حتى يثخن قوامه .

بالعافية

شوربة القرع :: كويتيه مملوحه ::

المقادير:
3 أكواب قرع
مكعبين ماجى
2 ونص كوب ماى
بصله واحده مقطعه مكعبات
كريمه حسب الرغبه
الطريقه:
تحطين القرع مع الماى والماجى والبصل وتخلينه يطبخ, لما ينضج القرع تحطينه بالبلندر
وبعدين تردينه بالجدر وتحطين فوقه الكريمه

لنا عوده

 

[<<لمار>>]

يعطيج العافية حبوووووبة ويلا كملى ناطرينج

 

[:: Diva ::]

ان شالله حياتي بكمل بس اشوف الردود الي تبرد الجبد

 

[الفنانه79]

والله خووووووش موضوع

لسبب ان انا كنت شغااااله ارمضان اللي قبل العام هههههههههههههه وناااااااااااااااسه بدعت بالاكل

ورمضان العاااااام كنت حامل واتنسى لي 4 شهووور وكله بجي ولوووعه وضيجه شي مووووطبيعي الله المستعان

وان شاء الله هالسنه فااااااضيه عطله لاشغل ولا مشغله ومووووحامل فبحط حيلي في المطبخ وافنتق

ولي عودة ان شاء الله​

 

[مطيرية سنةألفين]

موسووعة رمضاانياااات ......لاشهى الاكلات الرمضانية

:dfgl:

هاي كويتيات بما ان رمضان قرب وعلى الابواب..............


حبيت انا نتشارك ونسوي موسوعة احلى الاكلات اللي نسويها في رمضان.............


وكل وحدة تحطلنا الاكلات اللي تسويها ومقاديرها ..............


وسواء كان اطباق رئيسية او سلطات او حلويات..............​

وانا راح احطلكم مجموعة من الاكلات بس لما اشووووف في تفاعل

 

[<<لمار>>]

رد: موسووعة رمضاانياااات ......لاشهى الاكلات الرمضانية

يلا ناطرينج وعسى ربى يبلغنى ويبلغج رمضان

 

[ريمه الكويت]

رد: موسووعة رمضاانياااات ......لاشهى الاكلات الرمضانية

انشالله راح اكون معاكم

 

[مطيرية سنةألفين]

رد: موسووعة رمضاانياااات ......لاشهى الاكلات الرمضانية

اول شي ببدي بالكبب والسمبوسة

كرات الجبن بالزيتون

المقادير

3علب جبن شيدر متوسط الحجم
4/1كاس حليب طازج
ملاعق طعام طحين
بيض و بقسماط
زيتون اسود منزوع النوى

الطريقة:
يعجن الجبن مع الطحين والحليب
كوري العجينة ثم ضعي في الوسط حبة زيتون ودحرجيها في البيض ثم البقسماط
تقلى في الزيت​

 

[78MariMar78]

رد: موسووعة رمضاانياااات ......لاشهى الاكلات الرمضانية

يمي يمي

فكرة حلوة


بانتظار البقية