ديوانية بيت العمر

[مشاعل]

بنات قولولنا شنو الهبه بالبنيان وشنو الالوان للبيت من الخارج اخوي يقول بيج بس احس بايخ والكويت كلها بيج نبي شي فنتك وشنو افكاركم للسرداب اذا كان اهو للاستقبال افكر اقسم السرداب استقبال وشوي غرفه للبوفيهات بس بس احس مدري شلون اذا كانت نزلت الدرج على طول بصالة الاستقبال شلون بكره البوفيه والخدمه رايحين رادين عالحريم هالشي مو داش مخي

مميزه خلقه

نفسى انا بعد محتاره بسوى نص سرداب بس

وبخليه استقبالى وبحط بوفيه جاهز بسويه بنيان

 

[sara3]

هلوووووووووووووو


شخباركم شحوالكم...

انا انقطعت عنكم فترة بسبب الوفاه في عيلة زوجي ...

شخبار البنيان ..

احنا بعدنا ما صبينا باجر يحددون اماكن كهرباء مالت السقف بنات حبيت اسئلكم

انتو بتحطون المراوح ولا

هلا ريناد

عظم اللة اجرك حبيبتى وان شاء الله اخر الاحزان

بالنسبة لسؤالك المراوح محد يحطها الحين لان تاثر على جمال السقف .واذا اضطريتى واحتجتيها لفترة بسيطة عندك المراوح الارضية حبيبتى

 

[sara3]

مساء الخير

بنات الديوانية

وانا اتصفح النت شفت تجربة حية لبناء بيت العمر لعضو معرفة طارق 55 وراح احط لكم تجربتة ونصايحة للى يبنون حاليا ..............طبعا انا راح اخلى كلامة باللون الازرق اوكى ومشاركات ومداخلات وردوود الاخرين باللون الاحمر لان بصراحة حتى اصحاب الردوود كانت مشاركاتهم وايد فيها نقاط انا شايفة انها مفيدة لكم بنات

نبتدى




السلام عليكم

اول شئ .. أنا قاعد ابني الحين في منطقه جابر الاحمد .. ولازلت في معمعه البنيان والله يعين ويعين الجميع .. ..

هناك اسأله مهمه جدا لازم يسأل الشخص الي يبي يبني نفسه عنها ويحددها قبل البناء ..

في البدايه .. اول شئ انت تبي تبني بيت من اموالك الخاصه او ارض وقرض من الاسكان ؟؟ فيها فرق .. اشياء كثيره لاتعد ولاتحصي .. ثانيا .. هل انت مقتنع بالمنطقه 100% او عند اول فرصه راح نبيعه وتدخل داخل المنطقه ؟؟ ثانيا كم ميزانيتك ؟؟ كم عدد اولادك ؟؟ متي الوقت المناسب للبناء ؟؟

خلونا اول شئ نتكلم عن الوقت المناسب للبناء .. احسن شئ للبناء انك تبلش شهر 9 او 10 لان هذا الوقت احسن شئ للبناء من ناحيه الجو .. وبعدين الجو بارد تقدر تروح انت يالمالك وتقعد عندهم وتجابلهم .. حتي العامل له خلق يشتفل ولايمشي عليك اي شئ بسبب الحراره .. وبعدين بعد الاسود الي تقريبا يقعد ثلاث شهور او اربعه تخلي البيت يريح له طيله الصيف وتبين عيوبه وترييحته ..
خلاص خلصنا من الوقت المناسب .. نجي الان للسؤال الثاني ..
لو انك تبي تبني بيت عن طريق ارض وقرض .. الفرق بينه وبين اموالك الخاصه .. طبعا ارض وقرض انته محكوم بنظام الدفعات .. والمستحسن ان يكون عندك بيدك قبل البنيان مبلغ كاش من 7 الي 10 الالاف دينار تمشي امورك علشان لاتتأخر علي مايطلع الشيك .. وراح تتعب بدون هالمبلغ ولكن مو مستحيل .. طبعا اذا انت ماعندك يبيلك تنسيق قوي بين مختلف الاطراف الي الكل فيهم يبي حلاله منك .. فتصبر هذا وتواعد هذا .. وأنطر علي علي مايطلع الشيك .. ومن ةهالكلام .. وخاصه اذا اهمه شافوك رجل تفي بوعدك وتعطيهم بعدين .. مو لعاب تضحك عليهم .. وياما شفنا ناس يعتقدون انهم فهلويه يضحكون علي العمال او المقاول او مندوب الخرسانه وكاهو بيتهم واقف وعليهم قضايا صار لها اسنين ..
( الخلاصه .. مبلغ 7 الاف ضروري قبل البنيان .. لكن اذا ماعندك مو مشكله تهون اذا لسانك حلو )
وللموضوع بقيه ..وفيه تشعبات كثيره ..



بصراحة فكرة الطرح حلوه وبعد اذنك لو اساهم بتجربتي

طبعا اهم شي بعد اتخاذ قرار البنيان
المخطط هو شي متعب لازم مراجعته اكثر من مره واعتماده علشان ما تدخل بمتاهات مع المقاول
للأٍسف سقفل الأغلب عن بعض الامور او يتساهلها
يا جماعه السانتي الواحد يفرق فتأكد من المساحات الداخلية البنيان على الورق غير ومختلف عن الواقع
وعلشان لا تندم راجع واستشير
انا حاليا قاعد ابني وطحت بالخطئ والاكيد سبب ليه خسراه
لاني طلبت تغير مثل توسيع ممر داخلي من متر 20سانتي لمتر ونص
بتقولون شدعوه فرق 30 سانتي ماله داعي بقولكم يفرق بالبنيان
المطلوب من الواحد بعد اتخاذ القرار
مراجعة المخطط اكثر من مره والتدقيق عدل قبل لا يعتمده ويدفع رسوم المخطط والترخيص


انا سبق اني بنيت من قبل حوالي سنه ونصف ومررت بأخطاء تحصل مع كل واحد يبني اول مــره

ممكن اذكر بعض منها بدايتا عند عمل المخطط الهندسي كثيرا من المهندسين المعمارين لا يعرف

حاجتك في التصميم وحاجتك في السكن إلا من خلال اخذ طلباتك من اول زياره للمكتب الهندسي ومن ثم يعمل تصميم

مبدئي ومن ثم تعمل عليه تغير عشرات المرات لاكن نصيحه يا أخـــوان كثيرا من يجهل ولا يلتفت

لابسط الامـــور في التصميم منها الممرات يعني ممر مغاسل الضيوف ان كان نساء او رجال س1,30 متر انا برأي يعتبر قليل ممر

لايقل عن 1,80 او مترين حتي نضع احتمال كبير في الادوار العلويه لما يعمل

مهندس التكيف مخطط مرور ونزول الدكت التكيف ان تختار الاماكن بعنايه

واماكن مناسبه وفي ملاحظه...... وهي الحمامات أجلكم الله الان معضم اهل القسايم لم يحسب حساب البانيو في الحمامات

يكتفي بنزول 3 او 5 سانتي في منسوب الحمام وهي بنظر معضم الناس افضل من البانيو ومشاكل الخرير مع الوقت .....



انا قاعد ابني وعندي الاسقف (( هوردي )) ومثل ماهو معروف
ان الهوردي يحطون وياه فلين عشان يخفف كمية الصبه
وبعدين نصحني اكثر من شخص اني اتخلص من الفلين
لانه يساعد على الحريق واي التماس كهربائي راح
يكون مشكله كبيره ويمكن تحصل اشياء مكروهه
والله يبعد عنا وعنكم الشر

النصيحه ......

ان الشخص اللي عنده هوردي يخلي شركه
يغلفون له الفلين وهم مسئولين عن تركيبه وازالته
لكن المشكله بالسعر راح يفرق كثير
او انه يركب الفلين العادي وبعد الصبه ماتريح
يتقاطع ويا عمال يشيلونه له


اخوى طارق عسى الله يباركلك بالبيت وعساه منزل مبارك
وجزاك الله خير على هالمؤضوع اللى بصراحه مفيد للجميع
ويليتك تكمل لنا مثل الصحى شنو البايبات الافضل واسعارهم
وسعر الصحى وسعر الكهربائى


السلام عليكم

أسف علي التأخير بسبب مرض الجهاز .. وقاعد أكتب الحين من اللاب توب وماأعرف كيف أكتب فيه صعب شوي .. بس ميخالف .. خلوني أرد علي الشباب الي جزاهم الله خير شرفوني بالموضوع ..

-------------


غلطان ياخوي تبني بالصيف .. غلطان ثم غلطان .. اخوي اول شئ البنيان يبيله مجابل .. ويقولون في الامثال الي ماعنده وقت لايبني !! جابل العمال والمقاول لازم .. ثانيا حتي الخرسانه لازم تنصب في جو بارد نوعا ما مو حار .. وأذا صبيتها بالحراره يبيلك حتي ثلج تحط فيها !!!! أي أدري بتقول شئ غريب .. لكن حسب ماسمعت وعرفت ان الخلطه الايرانيه يحطون فيها ثلج علشان تبرد شوي ( في الخلاط الايراني ) .. لان طال عمرك الخرسانه هي عباره عن تفاعلات كيميائيه .. بين الاسمنت والماء ومضاف عليها صلبوخ ورمل .. وبعدها يصب عليها الماء بصفه دوريه لزياده التفاعل والله يعينك علي استهلاك الماي في الصيف .. نصيحه .. ابني بعد رمضان الجو يكون اشوي احسن

---------------------

طبعا ماتقوله صحيح .. ولكن اخي الكريم يختلف الامر من مقاول للاخر .. وهذي نفسيات تختلف من واحد للثاني .. ولكن اغلبهم نعم يستغلون هذه النقطه ..

-----------------------

نعم ماتقوله صحيح من ناحيه الاخطاء .. وأنا ايضا حصل معاي اخطاء ولكن بسيطه ولله الحمد المشكله عندما تكون هناك اخطاء قاتله مثل مايقولون ماتترقع .. والله يعين الجميع

---------------------


شاكر لك نصيحتك .. ولله الحمد عندي هوردي وكنسلته وطلعت عمود .. مصاريف اقل طال عمرك

----------------------

اخوي بعد أيام أدخل أنا بمعمعه الصحي والكهرباء أنا دخلت عليهم خفيف الي الان ... لكن أنتظر ولاقي خير ان شاء الله ..

------------------

أخواني اي استفسار انا حاضر بالي اعرفه .. الي الان انا في مرحله الاسود .. لكني سأجاوبكم بحسب معلوماتي وشاكر تفاعلكم معاي


بنات الموضوع منقووووووووووووووول

 

[مشاعل]

سارا

مشكوره ع النقل

حلووو الواحد يستفيد من تجارب الغير

 

[اخت فروحه]

ريناد : عظم الله اجركم
بالنسبة للمراوح محد يحطها الحين بس اتصدقين احس افتقدناها حيل لانها تغير الهواء وتنشف الماي وتلطف الجو في الايام اللي الجو معتدل وحيل عملية بس شنسوي راحت موضتها


سارا : خوووش موضوع يعطيج العافية


بالنسبة لي الديكور متفقين معاه 3 شهور والاسبوع الياي بيكمل 5شهور بس يمكن بسب سفر زوجي
وهاليومين راح يركبون السقاله عشان المعجون والصبغ الخارجي , صج مو شي نصبغ السيجما بالحر بس شنسوي لازم نخلص السيجما عشان نركب الارضيات

في شغلة بديكور صالة الاستقبال بالممر مو عاجبتني مع انها مكلفة افكر اشيلها

اشرايكم؟؟؟؟

 

[sara3]

السلام عليكم

نكمل معاكم .. نطرح هالسؤال ( هل انت مقتنع بالمنطقه 100% او عند اول فرصه راح نبيعه وتدخل داخل المنطقه ؟؟)

أذا ياولد الحلال مو مقتنع بالمنطقه لاتقط علي بيتك وايد .. سوي بيت يعجب المشتري .. ودائما سوي شقه او اثنتين ( حسب مقدرتك ) علشان الي يبي يشتري اكيد يبيله يأجر البيت لمساعدته في القسط .. وكبر المطبخ .. لان دائما نظره المرأه مهمه في الموضوع لزياده الضغط علي الرجل ليشتري : ) صحيح والله هذي نظريه دلال فاهم .. عموما .. لاتقط علي البيت وايد أذا مو مقتنع بالمنطقه ..

ثانيا كم ميزانيتك ؟؟

هذا السؤال جدا جدا جدا مهم .. ياجماعه .. عندك افلوس سوي علي كيف كيفك بالبيت من ادوار ثلاثه ورخام ومن هالكلام .. ماعندك سوي دورين وبس علي قد افلوسك .. وايد من الناس بالغوا بالاسود .. وعند التشطيب وقفوا .. وروح افتر بالمناطق تلاقي بيوت صار لها خمس سنين والي الان ماأسكنوا .. عموما .. اسأل نفسك أذا توهقت من وين اجيب افلوس ؟؟ في من يسلفني ؟؟ هل يصبر علي ؟؟ وبعدين .. ليش السلف والدين وأنت مو محتاج اصلا .. وليش الناس يتحملونك وأنت تبي مجرد كشخه ؟؟ شنو ذنبهم ؟؟ يااخي سوي دورين وطلع العمدان لين الله يرزقك وتكمل .. وأياكم أياكم أياكم من الربا اخواني .. انصح نفسي وأياكم والله يثبتني قبلكم بعد .. الربا يااخوان مصيبه .. يمحق الله الربا .. ومن تربي علي السحت فالنار اولي به .. ياجماعه الخير والله اننا مو مغصوبين علي هالشئ الخطير ... والحمد دورين والله كافيه علينا .. بس احنا نحب نتشيحط زياده عن اللزوم .. وحتي لو حسبتها حسابيا .. تأخذ عشرين الف من البنك ويسوونها عليك اربعين .. أمتي راح تطلعهم من الاجار ؟؟ يمكن 60 سنه ماراح يطلعهم .. يعني انت خسران خسران في النهايه .. عموما الخلاصه .. غندك افلوس سوي .. ماعندك لاتسوي واللي ماعندوش مايلزموش علي قوله المصريين .. وصبرك علي نفسك ولاصبر الناس عليك ,,,

كم عدد اولادك ؟؟ هذا السؤال لازم تطرحه علي نفسك .. اول شئ .. نقطه مهمه .. البنات لازم يكون لهم مكان مستقل عن الاولاد .. يعني غرفه كبيره او شقه صغيره .. غرفتين بينهم حمام ومسكره عليهم يطلعون يدخلون يستحمون يتسبحون كل هالشئ والاولاد ماشوفونهم .. بعيدا عن نظر الاولاد .. هذي نقطه مهمه لازم تطبقها .. خذ بعين الاعتبار عند البناء .. بعدين .. الكبير سوي له غرفه لحاله .. لكن اذا كانوا اثنين .. خلهم في غرفه مع بعض بس كبر الغرفه اشوي


خلونا نتكلم عن خطوه جدا مهمه .. اختيار المقاول ..

شوفوا .. وايد بيوت وقفت بسبب المقاول .. وللاسف مافي طريقه مضمونه 100 % علشان نتحاشي المشاكل مع المقاول .. لان في النهايه هي علاقه بين طرفين .. يمكن تقول كلمه تطلع منك .. توتر العلاقه ويروح المقاول ومايرجع ويوقف بيتك اسنين طويله في المحاكم بسبب كلمه طلعت لحظه سهو .. شوفوا ياجماعه .. اول خطوه ذكيه الشخص لازم يسويها .. هي اختيار المقاول الزين .. طبعا احسن طريقه عن ترشيح مقاول لك من طرف صديق او قريب مجرب هالمقاول وباني عنده ويمدح فيه .. لا وفي طريقه افضل من هذه .. طبعا انتوا تعرفون .. ان الفريج كامل يبني البيوت مع بعضهم البعض .. وتلاقيهم قاعدين في مكان واحد يسولفون ويشربون الشاي ويتبادلون الاحاديث عن البنيان .. وتلاقيهم كلهم يعرفون المقاولين الي في المنطقه .. أهنيه وفي هاللحظه يبين المقاول الممتاز .. تلاقيني انا مثلا قاعد مع مقاولي .. ومجربه .. لكني ارشح لك مقاول فلان جاري لاني اشوفه كل يوم تقريبا واعرف شغله .. الخلاصه .. أسأل عن المقاول الجيد .. وقول للي ينصحك ارجوك اذكرني سلبيات وايجابيات المقاول علشان نضمن ان بيتنا ينبي بأسرع وقت واجود صنعه ..
المقاولين ياأخوان نفسيات واطباع .. والي مروا علي اقولكم .. اكو مقاول زقرتي يقط من جيبه علي البنيان اذا ارتاحلك وهو عارف انك ثقه وراح ترجع افلوسه .. وأكو المحتحت المنتف الي يطر منك الدينار والدينارين .. قد يكون الاخير افضل من الاول في الفهاميه والضمير لكنه محتحت ومنتف .. أكو منهم الي زابن عندك في القسيمه نايم فيها مايتحرك .. ومجابل شغله .. وأكو الي يغيب عنك عشره ايام تدق عليه ولايرد عليك .. وتلاقي عنده خمس بيوت مااخذهم في نفس الوقت .. أذا عصبت عليه شويه جاك واشتغل يوم وغاب عنك اسبوع .. راح تشوف نماذج من المقاولين .. أفضلهم في نظري الي مجابل بيتك .. مايوقف يوم .. عماله من الساعه 6.30 الصبح تلقاهم في قسيمتك .. ولو انه حافي ومنتف .. فاهم شغله .. وينصح .. متجاوب معاك اذا قلت له ارفع او غير او بدل .. وعموما تغير رأيك في البيت اثناء التنفيذ هذا حلم كل مقاول علشان يزيد سعره عليك .. كمثال اتفقت معاه سعر نهائي عشره الاف دينار .. أثناء العمل خطرت لك فكره تسوي غرفه هالمكان .. يقولك اسويها لك بس تدفعلي 500 زياده !!! وأنت عارف ان المواد عليك .. بس هو يستغل الموقف وهذا شئ طبيعي كلهم جذيه .. كلهم بلا استثناء .. وعلشان تتغلب علي هالنقطه .. لازم تدرس خريطتك عدل .. وتكون دارسها دراسه 100% .. لاوتشرط عليه بعد قبل العقد .. أذا ابي ازيد طوفه او اهدم طوفه اشلون ؟؟ خليه يوافق علي هالشئ .. أنا اتفقت مع مقاولي ان اهدم ثلاث جدران .. عادي ومافي شئ وأكثر من هالعدد يحاسبني .. المهم كل المقاولين فاهمين الشغل بشكل ممتاز .. لكن من الي يعطي من نفسه .. اغلبهم شعارهم اكسب كثيرا واعمل قليلا الا من رحم ربي .. انت خلك فاهم وحاسبه علي شئ .. قوله سوي اهنيه كذا ولاتسوي اهنيه كذا .. اقربها مساحه الشبابيك .. ارتفاع السور .. أرتفاع الغرف او البيت ككل .. ومن هالكلام ..

اول شئ نسيت اقولكم عن خطوه سابقه .. مهمه جدا هي الخريطه .. راح اكتب عنها بالتفصيل الممل .. ان شاء الله ..


السلام عليكم

هلا اخوي ابوفيصل بارك الله فيك ويشرفني متابعتك ولايهونون الشباب البقيه ..

الخريـــطه .. وماأدراك مالخريطه .. اخواني اتقان الخريطه ودراستها ممكن توفر عليك الالاف الدنانير .. اشلون ؟؟ اول شئ .. مثل ماقلت لكم .. بعدين في التنفيذ لو تطرأ لك فكره معينه يقعد يتشرط المقاول بالسعر .. والاكيد راح توافق لانه انت ماتبي الشغل يوقف .. وتشوف اشكره الاستغلال والابتزاز بكل اصوله وغصبا عليك توافق .. لو تكلمه بالعقل والمنطق .. راح ( يتنح ) معاك .. والله مابتوفي معاي .. والله الشغله مكلفه .. ومن هالكلام وانت عارف ان تكلفه يوميه عمال اثنين او ثلاث وماتزيد مصاريفه عن 100 دينار بالكثير ويطلب منك 500 كمثال !!! وعلشان تتخلص من هالابتزاز لازم تسوي الخريطه عدل .. مثل ماقلنا في الاول .. شوف افلوسك .. وقدرها .. افلوسي بأسعار هالايام كم تسويلي ؟؟ كمثال عندي 7 الالاف دينار .. زائد ال70 مالت الحكومه .. أسأل اسعار البناء هالايام .. راح يقولون لك تسويلك دورين ونصف بدون مبالغه بالتشطيبات .. حلو .. سوي دورين ونصف ولاتزيد .. أدري والله انها مهمه شاقه لان الكل يبي ينصحك .. يبيون يقولون لك .. عندك حديد مدعوم وطابوق ابيض مدعوم .. واسمنت مدعوم .. ابني ثلاث ادوار واخلص !! لك خلق بعدين طاخ وطيخ علي رأسك وانت ساكن البيت ؟؟ كيف تبني بعدين وأنت ساكن في نفس البيت ؟؟ كل هالكلام راح تسمعه وأكثر لكن خلك واقعي وأتخذ قرار حكيم .. انا ماعندي ولاراح ابالغ بالبنيان .. خلاص خلصنا .. لان اغلب الي اسمعوا هالكلام وقفت ابيوتهم لان ماعنده افلوس يشطب البيت ويلجأ للحرام والربا .. والسعيد من اتعض بغيره ..

عموما الخريطه وماأدراك مالخريطه ..
اولا قلت لكم تحت سوي لك غرفه مع حمامها .. في المستقبل لما تكبر وتشيب .. تحتاج لها أذا ماتقدر تطلع السلم بعدين .. وأنا عملت للغرفه الي تحت باب بينها وبين غرفه السائق .. بس الباب مسكر والعتب موجود علشان في اي وقت افتحه ( العتب هو خرسانه الي فوق الباب ) وهذي مجرد فكره خطرت لي اثناء البنيان .. لاننا عانينا من الوالد الله يرحمه .. لانه جاه شلل ابعيد عنكم وعانينا من دخول وخروج المرافق له الي داخل البيت .. وهذي دنيا كل شئ يصير فيها .. بتقولون اشدعوه ومن هالكلام .. اقولكم ياجماعه هي كلها عتب بسيط حطيناه لحين الحاجه له وأذا مااحتجناه يفيد مايضر والفكره ببلاش مو بفلوس .. .. ثانيا .. الديوانيه .. فيه ناس يبون الخصوصيه في الديوانيه .. واناس ثانيه ماتحب الديوانيه المسكره وكل واحد حسب احتياجه وقناعاته .. بس اغلب الكويتيين يحتاجون الديوانيه .. المهم حط فيها تكرمون حمام وحط فيه دوش بعد لاسمح الله يجيك اخوك او احد أقربائك يسكن عندك يومين .. يلاقي الديوانيه مجهزه للعيش فيها يومين .. أو .. نفرض ان زوجتك طردتك من الغرفه .. روح عيش فيها يومين علي ماتراضيها : ) اتغشمر وياكم ..
المهم .. تحت كل واحد فيكم يحط الي بيه .. من صالات او غرف او شئ ثاني ..
الدور الاول .. ايضا مثل ماقلت لكم .. البنات لهم شقه لحالهم .. والاولاد غرف لهم علي حسب اعمارهم اذا متقاربه كل اثنين في غرفه واحده .. وحاول ان تتخيل في المستقبل اذا يبي احد من اعيالك يتزوج هل استطيع ان افصل شقه ايضا حقه ؟؟ خاصه للي عندهم ثلاث اولاد او اربعه .. يعني سوي طريقه الغرف تتقبل الفصل بعدين ..وأنشاء ايضا باب لحاله .. غرفتك انت وام العيال .. الماستر .. في اخر عمرك حاول ان تدلع نفسك شوي ... سويلك غرفه كبيره وحمام تكرمون واسع حق جاكوزي بعدين .. او علي الاقل كبير وحلو .. ومابقي بالعمر كثر مامضي .. حاول قدر المستطاع ان تجعل الصاله فوق نوعا ما بعيده عن غرفه نومك .. لك خلق انت نائم واليهال يتهاوشون بره جنب غرفتك .. انا اقول حاولوا .. قدر المستطاع يعني ,,
الي يبي يأجر .. لازم تعمل سلمين .. واحد لك يوصل من الارضي الي الاول فقط .. والثاني الي فيه المصعد يوصل الي السطح .. لازم سلمين للايجار .. او حتي للاولادك بعدين .. يمكن زوجتك ماترهم مع زوجه ولدك .. عطه الشقه الي فوق يطلع ويدخل ولاتشوفه ولايشوفك والله وياه .. وهذي دنيا كل شئ يصير فيها ..
طبعا كل هالنصائح يعنمد عليه موقع البيت .. البطن وظهر غير والزاويه غير .. وهلم جرا ..
الدور الثالث .. اذا عندك مقدره سوي شقتين .. ماعندك سوي شقه واحده .. وحاول ان تضع التكييف علي سطح الشقه الي بنيتها .. وتخلي مكان الشقه الثانيه فاضي علشان تبني عليها اي وقت بدون ازاله الدكت مال التكييف وهذه نقطه مهمه ..
الان .. اقعد أنت وزوجتك .. وارسم في كراسه عاديه .. وأعمل نماذج للبيت وطريقه توزيع الغرف .. سوي مره ومرتين وحتي ال 100 مره .. ولما تخلص .. وتقتنع انت وزوجتك .. روح افتر علي البيوت في المناطق الجديده مثل غرب مشرف .. الجليب .. الدوحه .. وروح افتر عليهم وصور البيت الي يعجبك بالكاميرا .. وحط في بالك كل تكسيه خارجيه او تصميم خارجي يكلف كلفه تختلف عن الثاني .. وكل شئ بسعره .. اذا كنت منتف وماعندك افلوس غير السبعين ركز علي بيون المزاييك .. لانها ارخص شئ .. لاوالله عندك افلوس طالع بيوت الحجر او السيجما لانها اغلي شوي .. المهم لما ترسي علي نموذج معين من الشكل الخارجي اهنيه روح للمهندس وقول له ابي تسويلي قياسات هالخريطه وركب عليها هالواجهات وطريقتها وطريقه الشبابيك .. هو بدوره يرسمها لك بالقياسات وأذا اعجبتك المهندس يوديها حق المهندس الانشائي علشان يسويلها العواميد ونسب الحديد ومن هالشغلات وضروري .. ضروري .. ترفق انت فيها الشكل النهائي علشان لايحط لك العواميد مكان الشبابيك الي انت اخترتها .. وحاول ان تقول له لايحط لك هوردي وايد .. لان الهوردي مكلف ويأخذ حديد واسمنت وايد .. حاول .. وياجماعه بعض العواميد مو بايخه للدرجه هذي .. يمكن يطلع لك هاالعمود في مكان يكون مو مؤثر وايد بل يمكن بالعكس اذا مكانه عادي خليه ولاتشيله .. لبسه زجاج او اي شئ كديكور يطلع شكله حلو .. يقول لي قريب لي يقول قطيت افلوس علي الهوردي علشان الغي عمود .. ولما خلص بيتي شفت ان العمود مو مأثر ذاك التأثير علي الصاله .. فتحسفت اني الغينه .. عموما خذوها قاعده .. عامود فوق عامود .. البيت مرتاح ومريح .. هوردي وجسور وعمدان نايمه .. البيت اقل راحه مهما تقط عليه وهذا غير المخاسير .. أما ان طلع لك العمود في الوسط هذه ام المشاكل والله يعينك علي تكلفه الغائه ..
لازم تقول للمهندس الانشائي ارتفاع البيت الي تبيه .. عموما لك 5 امتار للدور كأرتفاع من البلديه .. فيه ناس تسوي 5 امتار ارتفاع الدور الاول كفخامه .. مافي مشكله ولكن المهندس الانشائي راح يسويلك عرض العمود تحت 25 سانتي وفي هذه الحاله يكون ظهور العامود بشكل بارز في الطوفه لان قطر الطابوقه اقل .. فلازم تحط الطابوقه ( الطابوق الابيض ) بالعرض وهذا مكلف عليك .. خلك بالارتفاع الطبيعي 430 متر وهذا الارتفاع مايحتاج له عمدان 25 سانتي .. يحتاج له 20 سانتي فقط وهذا مو مشكله .. ولازم تكتب الارتفاع هذا في الخريطه وتأكد علي المقاول هالامر من البدايه قبل توقيع العقد علشان لايزيد عليك المبلغ في التنفيذ ( طلب مني مقاولي 300 دينار للارتفاع دور واحد فقط زياده الي 430 سانتي وطلب 1000 دينار زياده عند ارتفاع 5 متر كامله .. وسويت 430 سنتي ) !!!

وللحديث بقيه ,,


ما شاء الله، الله يعطيك العافية ، بصراحة وايد ونستنا بشرحك و مفيد و ماقصرت

و اعجبتني فكرة الحمام الواسع (الجاكوزي) ، ممكن بالمستقبل اتحوله مطبخ تحضيري جنبه غرفة خادمة و حمامها اذا تبي تأجر لان العازل يكون موجود

انزين اخوي تقدر تشرحلي من الناحية الفنية اشلون يفرق الهوردي او ليش مكلف؟ شلون ممكن تجمع سقف هوردي مع عادي في الطابق نفسه (اذا فهمتك عدل)؟؟



بارك الله فيك اخوى طارق وجزاك الله خير على المعلومات المفيده
وجعله الله فى ميزان حسناتك
انا اتفق معاك بكل شى وانا حاليا بمرحلة البناء تونى طالع بالارضى
بس فيه ملاحظه بالنسبه للبناء دورين ونص او ثلاثه ترا التكلفه قليله وانا اقول وانصح ببناء الثلاث ادوار من البدايه لانها صعبه بعدين ومكلفه ومزعجه اللى ماعنده يحاول مايشطب الدور الثالث او يحول التكييف على بيت التمويل ويدفع فسط التكييف من اجار الشقق اللى بالثالث
لانه بصراحه ناس كثيرين بنو دورين ونص وتحسفو
الافضل بناء الثالث من البدايه عشان التكييف مكان الدكتات والبايبات الصحى وكذالك التكسيه الخارجيه وشغلات كثيره
وبارك الله فيك

السلام عليكم

الاخ busalih

بالنسبه لسؤالك عن الهوردي ..هو له سلبيات وايجابيات ... ومن أيجابياته ...عازل للصوت بين الدورين...امكانية التعديل والاضافة لاي دور...واعادة تصميم كل دور بشكل مختلف عن الاخر...اقوي للمبنى انشائيا...ومن عيوبه...زيادة التكلفه...وثقله على المبنى
أما بالنسبه لسؤالك عن الهوردي وليش هو مكلف .. هو عباره عن كميات كثيره من الاسمنت والحديد .. وبقيمته تسوي عشر عواميد ( علي حسب مساحته ) !!! فأيش الاحسن والارخص لك ؟؟ الاكيد ان العمود ارخص وايد .. ثانيا العمود اقوي لكنه مزعج اذا طلع لك في مكان في الوسط .. ولهذا الناس تستبدله بالهوردي .. شوف اول شئ العامود .. اذا اتضايقت من مكانه حط عمدان نايمه .. او الجسور وهو ايضا كتشبيه عامودين وبينهم عمود نائم ويكون عرضه اقصي شئ 80 سانتي .. وأذا ايضا ماصار والمسافه كبيره حط هوردي وهو الاغلي وأنا كان عندي نصف دور كامل المهندس الانشائي مسويه هوردي كان قيمته تفريبا 600 دينار .. الغيت الهوردي وطلع عمود بس مكانه مو ذاك الاهميه او التأثير

أما عن الجمع بين العمدان وزالهوردي فهو امر عادي .. الدور الكامل فيه عمدان وايضا هوردي بل ان الهوردي بالنهايه تحمله عمدان !! لاتستغرب .. الهوردي عباره عن مساحه أنت لاتريد بها عامود .. فتستبدل العامود بقطعه محدده القياس ( 8 في 12 ) وهو لنفترض صاله .. قطعه من الاسمنت مع الحديد .. تحملها في الاطراف عمدان ..
وهذي صوره توضح أكثر ماهو الهوردي

الله يجزاك ووالديك ومن تحب الجنة , وعسى الله يعينك على بنيانك ودينك.

سؤال: هل يوجد عقد موقع بين المالك والمقاول بصيغة ثابتة ( Standard ) لحفظ حقوق الطرفين والتزاماتهم. (ان وجد , ممكن تبين البنود المهمة اللي تكون في صالح المالك وتحميه)



شكرا اخوي ممكن تحديد قياسات مبدئية للتالي:
1- غرف النوم للاولاد؟
2-غرفة الماستر؟
3-الحمامات(الماستر-الاولاد- السائق-الديوانية-الضيوف)؟
4- المطبخ؟
5- مخزن المطبخ؟
6- الممرات؟
7- الصالات؟
8- الديوانية؟
9-غرفة الطعام؟
10-غرفة المعيشة؟
11-السلم؟
12-المصعد؟
13-المسافة المتروكة بيني وبين الجار بالارضي والدور الاول؟؟
مع مراعاة المساحة القسيمة =400 م 2


مثل ماتقول .. وأتفق معاك بس انت ماتقدر تأجر الا بعد سنتين او ثلاث بعد ماتكون المنطقه اصبحت مرغوبه .. والله يعين الجميع ..


طبعا فيه صيغه مهمه وراح اكتب أهم بنودها .. لكن اهم النقاط .. حاليا في بالي :
تحط لك فتره محدده للانتهاء البناء .. يعني تكتب مده انجاز البناء الاسود اربعه شهور وبعدها خصم 20 دينار لكل يوم تأخير ( كمثال ) ضروري تكتبها .. وعموما دائما التأخير يكون من المالك وليس المقاول .. لان الطابوق الابيض علي ماتطلبه ويجيك يبيله اسبوعين احيانا !! وهلما جرا عموما سأكتب المزيد .. قاتل الله العجله



اخوي هذي تعتمد عليك انت شخصيا ... و عدد افراد اسرتك
بس اهم شي لازم تنتبه له .. الديوانية + الصالة + المطبخ ... لازم يكون حجمهم مناسب و كبير

اما باقي الغرف .. فهذي حسب الشخص اللي فيها ... يعني غرفوة ولد بروحه اكيد اضغر من غرفة ولدين بتحطهم مع بعض ...



بالنسبه للبنود الي لازم تحطها في العقد بينك وبين المقاول .. طبعا المقاول راح يجيبلك العقد .. اقرأه علي راحتك ويفضل ان يكون معاك واحد خبره في البنيان ( اخوك - قريبك ) يكون معاك .. أذا ماكان موجود قول للمقاول خلني أقراه علي راحتي وبعدين أناديك واوقعه .. لاتستحي لانه اذا فيه شئ مو من صالحك انت راح تتوهق بعدين .. وبعدين روح حق واحد خبره وقوله اشرايك بالعقد ؟؟ زين ولاأزيد عليه مواد ؟؟ دائما وابدا استشير اهل الخبره من اهلك او ربعك ليفيدونك بالبنيان ..
بعدين .. .. في حاله انك ماخذ المقاول شغل ايده والمواد عليك .. هو يتعهد بأن يجيب لك النجار والحداد .. وموادها عليه هو ..

أما من ناحيتك ..انت اشرط ان يكون الخشب جديد ( بالنسبه للعمدان ) أو علي الاقل ينكتب بالعقد نظيف .. أو يكون جديد في الاساس ويتكرر نفس الخشب في باقي الادوار .. المهم والافضل طبعا جديد في كل الادوار وهذي صعبه علي المقاول وصعب يرضي لانه مكلف ...

البند الثاني الي انت المفروض تكتبه .. ان الحفار عليه والدفان بمعني هو الي يجيب رمل الدفان .. وهذا احيانا يوصل الي 400 دينار يكون سعر السكس ويل 5 دنانير واحيانا 8 دنانير وتحتاج لك احيانا 50 درب رمل ..وهذا ماراح يوافق عليها المقاول .. لكن اضغط عليه علشان يوافق ..
بعدين اكتب في العقد لازم هو يجيب عدد 2 هزاز في الصبه .. وأفرض عليه لازم يكون اقل شئ يحضر عدد 4 عمال عند الصبه .. اقل شئ .. ومن هالشغلات يعني .. هذا الامر كله اذا كنت تعرف المقاول وجايبينه لك عن طريق معرفه ومجربينه اما ان كان غريب .. حط ايضا شرط خصم 20 دينار علي كل حاله تعشيش في الصبه .. وهذا الامر ( التعشيش ) يبيله موضوع لحاله .. طبعا انت لما تحط هالشرط علشان يقل التعشيش الي اقل درجه ممكنه .. وليكون هو المقاول حريص علي عدم ظهوره ..
التعشيش ..

صوره توضيحيه للتعشيش بسيط .. شوفوا المربع الاحمر هو الصبه العاديه .. والمربع الاخضر هذا هو التعشيش وهذا عيب في الخرسانه او الصبه .. يكون سببه ان المقاول ماأستعمل الهزاز .. والصبه تكون ناشفه مافيها ماء ... طبعا الصبه الي زايد الماء فيها هذه صبه غير جيده ايضا الناشفه هذا عيب فيها لكن تكون بين البينين .. والخاثره مثل الروب تقريبا هيه الجيده ويستعمل معاها الهزاز ليملئ الفراغات الموجوده في الخشب .. عموما الصبه الايرانيه يكون فيها ماء اكثر من الخرسانه الجاهزه ويكون التعشيش تقريبا قليل بعكس الجاهزه .. وأيضا التعشيش اذا كان قليل مساحته مافي مشكله .. حتي لو كان التعشيش كبير بحيث احيانا تدخل ذراعك كله داخل التعشيش يوجد مواد في السوق تعالج هذا الامر أكو ةماده تنحط سائله وبعدين تتحول الماده الي صلبه قويه جدا اقوي من الخرسانه ... عموما التعشيش عيب وخطير ولهذا نضع بند في العقد لمنع تكراره كثيره ..
عموما هذي ابرز الشروط الي لازم تكتبها بالاضافه بند التأخير الي ذكرته في السابق .. وهذا البند هو الي أنت تكون متحكم بالمقاول لانه يخاف انك تطالبه بمبلغ التأخير .. ودائما مثل ماقلت لكم في السابق تكون انت سبب التأخير وليس المقاول .. عموما اذا ذكرت شئ ثاني راح اكتبه واتمني من الاخوه البقيه ان يذكروني يمكن اكون نسيت شئ مهم .. والفائده عموما لنا كلنا ..

نصيحه اخيره .. خلي واحد خبره بالبناء قريبك او من اصحابك معاك في كتابه العقد ..


منقوووووووووووووووووووووووووووول

 

[sara3]

سارا

مشكوره ع النقل

حلووو الواحد يستفيد من تجارب الغير

هلا حبيبتى

ياريت كل وحدة تبنى تحط يمها دفتر واتسجل الملاحظات اللى تهمها وترجع لها وقت الحاجة

والعفو حياتى

 

[sara3]

ريناد : عظم الله اجركم
بالنسبة للمراوح محد يحطها الحين بس اتصدقين احس افتقدناها حيل لانها تغير الهواء وتنشف الماي وتلطف الجو في الايام اللي الجو معتدل وحيل عملية بس شنسوي راحت موضتها


سارا : خوووش موضوع يعطيج العافية


بالنسبة لي الديكور متفقين معاه 3 شهور والاسبوع الياي بيكمل 5شهور بس يمكن بسب سفر زوجي
وهاليومين راح يركبون السقاله عشان المعجون والصبغ الخارجي , صج مو شي نصبغ السيجما بالحر بس شنسوي لازم نخلص السيجما عشان نركب الارضيات

في شغلة بديكور صالة الاستقبال بالممر مو عاجبتني مع انها مكلفة افكر اشيلها

اشرايكم؟؟؟؟

هلا فروحة يامالك من التاخير بس عطوة فركة اذن ليش قبل مايسافر ابوكم ما فهمتوة شنو تبون بالضبط؟؟؟؟؟؟؟؟؟؟

 

[مشاعل]

تسلمين والله

سجلت كل شى وعساج على القوووه

وفى ميزان اعمالج

 

[ريناد9]

ريناد

محد يحط مراوح الحين


انتظرى رد باقى البنات

هلا مشاعل .........

لكن جونا غير يبالنا حتى لو كنا في عز البرد
انا احط في غرف ومطبخ

 

[ريناد9]

هلا ريناد

عظم اللة اجرك حبيبتى وان شاء الله اخر الاحزان

بالنسبة لسؤالك المراوح محد يحطها الحين لان تاثر على جمال السقف .واذا اضطريتى واحتجتيها لفترة بسيطة عندك المراوح الارضية حبيبتى

هلا حبيبتي سارة ...

اجرنا واجركم مشكورة فديتج

ام بالنسبة للمراوح

انا قلت احطها بس في غرف ومطبخ ام باجي البيت لا طبعا

 

[وصايف لو]

مساء الخيرات ياحبوبات
اختي ريناد عظم الله اجركم

اختي الغالية سار يامالي العافية تسلم ايدينك وقلبك وعقلك على هذه الجهود الجبارة
ان شاء الله في ميزان أعمالك .

 

[ريناد9]

ماشاء الله عليج يا سارة

تسلمين حبيبتي على النقل ..

 

[ريناد9]

مساء الخيرات ياحبوبات
اختي ريناد عظم الله اجركم

اختي الغالية سار يامالي العافية تسلم ايدينك وقلبك وعقلك على هذه الجهود الجبارة
ان شاء الله في ميزان أعمالك .

هلا حبيبتي وصايف
اجرنا واجركم

 

[وصايف لو]

السلام عليكم ورحمة الله وبركاتة
بالنسبة لي بنيت ثلاث ادوار بدون سرداب طبعا على شارع واحد والارتداد عن الشارع بس7م الحمد لله ونجبرنا نرد الدور الارضي 3م علشان يكون في مصافط لسيارات والدور 1و2 على مهم مارجعتهم يعني صارت الادوار اللي فوق بارزة عن االارضي تقريبا متر ونصف (تراني معرف اشرح بس معلينا) وان شاء الله رح نسكن في الدور الارضي بس ليش؟؟؟؟
( للحين ماعندي اولاد بس انا وزوجي الله كريم ) وبخلي الدور1و2 للأجار علشان جذي رجعت الدور الارضي ....ان شاء الله تكونوا فهمتوا علي.........
وباقي التفاصيل ان شاء الله تجيكم ..


بس الحين عندي سؤال ايهو قبل أفضل نحط العازل للحمامات أعزكم الله والمطابخ :yaaaaaarb:
اووووووووو المساح

 

[ريناد9]

ريناد : عظم الله اجركم
بالنسبة للمراوح محد يحطها الحين بس اتصدقين احس افتقدناها حيل لانها تغير الهواء وتنشف الماي وتلطف الجو في الايام اللي الجو معتدل وحيل عملية بس شنسوي راحت موضتها


سارا : خوووش موضوع يعطيج العافية


بالنسبة لي الديكور متفقين معاه 3 شهور والاسبوع الياي بيكمل 5شهور بس يمكن بسب سفر زوجي
وهاليومين راح يركبون السقاله عشان المعجون والصبغ الخارجي , صج مو شي نصبغ السيجما بالحر بس شنسوي لازم نخلص السيجما عشان نركب الارضيات

في شغلة بديكور صالة الاستقبال بالممر مو عاجبتني مع انها مكلفة افكر اشيلها

اشرايكم؟؟؟؟

مشكورة يا قلبي ..اجرنا واجركم

هاي ثاني بيت اللي يالسين نبنيه ...في البيت الاولي ما حطيت المراوح
لكن احيانا كنت احتاجها .بدل التكيف وعيالي لما كانو مرضانين كنت استغني عن التكيف ..وما كانو يطيقون لا حر ولا برد
مشان كذي قلت احط المراوح في الغرف ...
جونا مش جو اروبا :eh_s(11):

 

[اخت فروحه]

السلام عليكم ورحمة الله وبركاتة
بالنسبة لي بنيت ثلاث ادوار بدون سرداب طبعا على شارع واحد والارتداد عن الشارع بس7م الحمد لله ونجبرنا نرد الدور الارضي 3م علشان يكون في مصافط لسيارات والدور 1و2 على مهم مارجعتهم يعني صارت الادوار اللي فوق بارزة عن االارضي تقريبا متر ونصف (تراني معرف اشرح بس معلينا) وان شاء الله رح نسكن في الدور الارضي بس ليش؟؟؟؟
( للحين ماعندي اولاد بس انا وزوجي الله كريم ) وبخلي الدور1و2 للأجار علشان جذي رجعت الدور الارضي ....ان شاء الله تكونوا فهمتوا علي.........
وباقي التفاصيل ان شاء الله تجيكم ..


بس الحين عندي سؤال ايهو قبل أفضل نحط العازل للحمامات أعزكم الله والمطابخ :yaaaaaarb:
اووووووووو المساح

هلا وصايف :


الله يرزقكم بالتوأم يارب:yaaaaaarb:

بالنسبة للعازل سويناه قبل المساح

في معلومة مهمة : انتوا رديتوا بالدور الارضي فبرزت الادوار العلوية :الاماكن البارزة من الدور الاول لما تسوون الارضيات لازم تحطون عازل عشان بالصي مايسخن هالمكان من الغرفة

يارب تكون المعلومة وصلت ((عسى بس ما ننساها لما نركب الارضيات لووووول)

 

[اخت فروحه]

هلا فروحة يامالك من التاخير بس عطوة فركة اذن ليش قبل مايسافر ابوكم ما فهمتوة شنو تبون بالضبط؟؟؟؟؟؟؟؟؟؟

اهلين سارا :

احنا مفهمينه كل شي وانا كنت متابعة القسيمة مع اخوي بس اهوا صارت له مشاكل مع البلدية وتعطل الشغل:s141:

الحين قاعدين يفتحون فتحات التكييف والليتات

 

[مشاعل]

انا قررت ابنى نص سرداب و3 ادوار

بس ماراح اشطب الا الارضى والدور الاول

ولين الله يعطينا نشطب الباقى

 

[مشاعل]

مساكم الله بالخير

من جرب مكتب سيف بوقماز للمقاولات ؟؟