ديوانية --<-@ {{ One Day We Will Be Slim}}

[Queen of Sadnes]

السلام عليككم بنات شلونكم وشخباركم

دارينا بالعافيه واستمري

نونه تروحين وتردين بالسلامه وحج مبرور وذنب مغفور ان شاء الله

عطوف شلونج عساج بخير عليج بالف عافيه شهيتني اروح المباركيه وديري بالج لا تكثرين فلفل و حلو عشان صحه البيبي

بزبز شلونج حبيبتي اي التجمع ما ادري شفيه هدووووووء بس الظاهر الكل قاعد يخربط مو بس انا

بنات انا صار لي فتره اكل وااايد ومو قادره اتحكم بنفسي ووزني زايد وحتى ردت هالزوائد طلعتلي ياربي اذا الواحد بس اكل شوي زياده بسرعه ينتفخ ما ادري شالحل مالي خلق ارد افكر واتقشف
الله يعين

باجي المتغيبات لا تخافون مو بس انتوا المخربطين كلنا ترا غاطسييين لوووووووووووول

 

[ضي]

صباحووووووووو

شلونكم حبايبى؟؟


كوكو حيااتي شلونج؟ الظاهر تنطريني اولد عشان تبلشين معاي رجيييييييييييم لووووووول


عطوف من صجج اكيد غااطسه بالاكل ،،، هوا في غيروووووووووووو :/

 

[خليفة العظماء]

بشترك معاكمم

مشكلتي بدت من ولدت وهالحلو يهل من كل صوب وبس يحطونه ابلع ههههه نسيت نفسي ومحد نبهمي
اخر مره قست وزني ماذكر عدل بس انا ابي يكون وزني50 او49 ابي نفس ايام العزابيه رشيقه

لان المشكله كل متني بالكرش وموحلو كلللش ابدا ابدا

 

[خليفة العظماء]

وانا مشكلتي كل مانام ولدي الله يحفظه اروح ابلع واطق طق بالنت هههههه
اكل اكل واي لي متي مادري شفيني
وهالحزه اشتهي ابتشينو مع كيك او توست مرتديلا هههههه

 

[خليفة العظماء]

نسيت اقول تقريبا يبي لي عشر كيلوات انزلهم عشان تروح الكرشه الحلوه

 

[LadY BuG 80]

مرحبا


^
^
^
^

اقول يا ام قطوه تترقص... ابني كل ما يشوف صورتك ارمزيه يطيييييييير لعندي يماما اب اب
استعبط اقوله ليش اب ؟؟؟؟ يقولي قو اب اب ... ابا الكات دانثينغ

و احطها و بس يبحلق فيها و يكركر ... :eh_s(17):



شخباركم بنات .. اظاهر بنقلبها تجمع زيادت الوزن الكل طايح بلعه

انا نفسيتي عدممممممممممم و كل مالها تسوء اكثر ..

تذكرون المنظار الي سويته للمعده شهر 5 ... ما وصلتني نتايجه من الاخصائيه !! انا قلت اكيد سلميه دام ما جاني خبر و طنشت

من فتره جتني رساله من الاخصائيه مسويه لي موعد منطار ثاني .... انا ؟؟؟؟؟ قلت شسالفه

كان عندي موعد مع طبيبة العائله ( طبعا اي شي يخصني يحولنه لها دوغري )

انا رحت لها كذا مره و ما جابت طاري نتايح المنظار و سألتها و قالت ماكو خبر ( هي عربيه عراقيه )

المهم اخر مره شفتها عشان التهاب الجيوب الانفيه طلبت منها مضاد ( انتيبيوتك)

و قلت لها ايش عندهم مسوين لي موعد منظار ثاني مع انهم ما عطوني نتايج الاول ؟؟؟ صارحه خفت على تفسي و راودتني شكوك

طلعت دكتورررررررررررررررررتي حسبي الله عليهاااااااااااااااااااااااا معاها نتايج اتقرير و ناسيه ... ايش اقول بسسسسسسسسسسسسسسسسسسسسسسسسس

و عندي التهاب في المعده مزمن و لازم اخذ كورس انتي بيوتك مكثف ...

طبعا ما قدرت تعطيني مضاد للجيوب الانفيه لاني متاخره و ما اخذت العلاج للمعده و ما يصير اخذهم سوا ..

و الاخصائيه تبي تسوي لي منظار ثاني على اساس اني اخذت العلاج من 5 شهووووووووووور

حسبي الله على هلانسانه !!!

رحت الخصائيه قلت لها الي صار مع الفاملي دوكتر ... قالت اهمال:eh_s(4): ...

و قاللت لي ما يخالف انا بكتب لك كورس العلاج ... كنتا الفروض الحين اسوي لك تحاليل دم و انشوف ادم ارتفع بعد علاج التهاب المعده ولا في سبب ثاني للانيميا

بس طبعا ما عالجتيه فا بأخر المنظار اثاني لين تنتهين من العلاج

بس بسوي لك فحص دم ( انشالله بروح بكره )

و توني من يومين بديت الكورس ( انتيبيوتك) مضاد حيوي مكثف

قلت لها ايش سبب الاتهاب ؟؟

قالت هو مزمن ممكن منذ اصغر ..

قلت لها انا سويت دايت ممكن يكون سبب ..؟ قالت لا

قلت لها ايش اسبابه .. قالت الخمر و انتي اكيد بعيده عنه

و اتدخين و هم انتي مو مدخنه

و ممكن الهم او ال Shoke ما ادري ايش هي بلعربي ... يعني لمن تنصدمين بخبر مفجع او الهم ... عاد انا استغرب ؟؟ الهم . ما صوبي كلش :krkrkr:

بلاخير قالت في حالتك اضن انها شي مزمن منذ اطفوله اكلتي شي ملوث او شيئ من هلقبيل

المهم علاجها اطبيعي العسل على اريق و ازبادي قبل انوم .. سبحان الله ازبادي ينظف المعده و الامعاء ولله جراثيم بكل انواعها يقتلها و يطهر الجهاز الهضمي و العسل يقوي جدار المعده و هم الخل ,, بس انا ما اقتنعت بلخل احسه راح يزيد المشكله لانه في جرح



قالت التهاب صغير لا تخافين بس لازم تكملين العلاج لو اهملتيه مع الوقت يكبر و يصير خبيث لا سمح الله بس هلكلام نقوله في الحلات الاتهاب قوي و مساحته كبيره الي عندك صغيير

المهم كرهت دكتورتي العربيه ... مع انه هاذي مو اول مره تخربط .. ياكثر خرابيطها

شكلي بغيرها بس شغله و نقل ملفات :eh_s(1):

المهم ادوا يصاحبه اكتأب و انا موووو ناقصه

ولله يا بنات اني صارلي فتره كل ما انزل هل 5 كيلو ارجعهم و هلمره شكلي تعديت ال 65

ما وزنت بس احس اني صايره منتفخههههههههه

ولا همني اصلا ,, ادري اني بعد فتره بفوق من الي انا فيه و انصدم بلوزن :eh_s(2): .. بس للحين ما ودي اهتم

ادري اني اهد كل الي سويته .. بس مو فارقه معاي اصلا كل شي خارب في حياتي جت على هاذي

يا رب اوعى على نفسي قبل لا اندم

اليوم اصباح كنت بوزن و غيرت رايي قلت لو وزنت و شفت رقم فوق ال 65 راح يزيد همي و اخاف اتهور و اوصل ال 70

طنشت و مشيت علن الميزان

بنات ولله حاسه اني اضييييع اضيع ... كل شي اخترب !! ايش الي صار

انا مو راضيه عن حياتي ... مليت

3 سنين و انا عايشه على هلحال ؟؟؟؟؟ ولله لدرجت انه لمن يجي زوجي و يطول فوق اشهرين احس انه وضع غلط و ابيه يسافر .. تعودت على بعده خلاص

لمن اشوف الي متزوجات فوق ال 5 سنوات !! استغرب !! اقولها 5 سنين اشلون تحلملتيه ما ودك يسافر شوي ؟؟ قاعد على قلبك

سبحان الله شعور ما اعرفه انه كل يوك كل شهر كل سنه مع بعض توو متش

... انا متزوجه بلاسم

6 سنوات زواج و عشت معاه سنه و 11 شهر و متفرقه

ياليتني ما تزوجت ,, يالتني جلست في بيت ابوي بنت ....... ايش اخذت من هزواج الا الهم و اشقى

خلاص تعبت .... بنات احيانا احس اني لازم انسحب من اتجمع لاكن اغيب كم يوم اشتاق و ارجع اشوف اخباركم

... ما احب اشكي احس اني جبانه ...

بس ولله منتهيه خلاص حتى لو رجع و لو عشنا سوا ... شايله بقلبي منه

ضيع عمري و سنيني انا منكثر ما اقهر في نفسي كل يوم مرض ...

تعبت ولله تعبت ... لو يحس فيني ما يخليني لهاذا كله بروحي ...

يقولي ولله احبك و بعوضك !!! اي حب ؟؟ انا ما يهون علي اخلي عليه العيال و البيت و اغيب اسبوووع .. هاذا و هو ارجال ... انا مره مو راجل .. ليش هنت عليه ؟؟ اشلون سخى فيني ؟؟؟

ليش ما صعبت عليه و انا اقوله تكفى لا تسافر . لا تخليني .. ما اقدر زاد الحمل علي

ولله حرام علييييييه ... انا اذا اتصل ما افتح فمي بكلمه ما ودي اضايقه و صرت اتجنبه هليومين ادري اني مثل العبوه اناسفه و مؤقته .. و صرت اتجنبه ما ودي انفجر فيه

و ادري اني على طريف .. و اكتم في نفسي و هاذا مو زين علي .. بنات نفسيتي عدمممم

ابن زوجي الكبير مراهق 17 سنه ... هو صحيح طيب لاكن احيانا يحس بضغط و ينفجر في وجهي و يرفع صوته و يعاند ....

صحيح بعد فتره يجي يعتذر ... ادري انه مللللل ماسك مكان ابوه في بعضا الشياء

طيب و انااااااا .. ليش تعصب علي ليييش تصارخ في وجهي .. شايفني مرتاحه

يعني لا من هم ابوووك ولا همك .... خلاص ودي اموووت تعبت تعبت

اذا جا وزجي عندنا شهرين في العطله بنته الكبيره تشتغلني غيره و احسها تضايق و تبكي طولت الوقت

.. هم هي طيبه و مسكينه و تحبني .. بس مو متعوده على وجودي مع ابوها يعني و هو مسافر انا وياه اوكي و سمن على عسل .. بس يجي و تشوفنا سوا يبتدي كيد انسا.. و حراكتها من تحت لين تحت ( ارحمها احسها مشوشه و عايشه شخصيتين و هي ما تعرف ليش تتصرف معاي هتصرف ) بس انا كمان انعث من هلحركات انا بشر

و انا ما اقدر على هسوالف ولا لي في حركات الحريم ....

قلت له لو انت عايش معانا كان تعودت على انه انا زوجتك خلاص لاكن كذا انا اربيهم 3 سنوات و بس تجي ما تبيني حضراتها اقرب صوبك ؟؟؟ يعني انا في نظرها شغاله بس اربيهم و مستانسه على و انتى مو موجود بس انتى تجي .. هي تبيني اختفي من حياتها ؟؟ ولله شي يقهرررر



لا اني مرتاحه و هو بعيد ولا اني مرتاحه وهو هنا .... ودي يسافر لاني عايشه بسلام ويا بنته وهو بعيد ... وودي يرجع عشان هم عياله الي على راسي .

غلطتي ما سمعت كلام ابوي يوم كان رافض اني اتزوجه .... قالي بتتعبين قلت له مستحيل عياله صغار و حبوبين و هو يخاف الله .....

بس في اشياء صح تجرح غصبن عنا تصير الحين فهمت كلام ابوي قالي مهما كان مارح تتحملين نفسيا انا اعرفك بنتبي و اعرفك :eh_s(2): ( فديت ابوي ) الحين اذكر كلامه

و اول ما حملت ابوي قالي يا بنتي انتبهي من زوجك لا يحب عيالك اكثر و يفضلهم على عياله ...

و انا حفضت كلمت ابووووي و نفذتها لدرجت اني صرت احاول احط في باله انه عياله الكبار اهم لانهم كبار .. لين جت على راسي هههههه

مره كنت اشوف معاه ملابس و نشتري للعيال قبل المدارس لا تفتح و شفت ملابس لصغار مسوين عليها سييل ,,, و انا اشوف ,, قالي خليكي من اصغار الحين اول الي في المدارس

انا :eh_s(2): في داخل قلت يعني عيالك ( انا الغلطانه لاني كله اقوله الكبار اهم و علمته عيالي مو مهم لانهم صغار ) لانه في البدايه كان مدلع عيالي دللللع و خفت انه يفضلهم على عياله ليييييييييييييييين خليته يشوفهم ولا شي بدون لا يحس

ايش اقول بس

... هم شي الحين اني مستحيييييل ارضى ازوج بنتي واحد عنده عيال .. ما ارضى لها حرقت قلب

لا بترتاح اذا حسيتانك ضلمتهم ... و اذا عدلت راح تضلم نفسها ..

انا حطيت نفسي تحت اختبار صعب .. صعببببب

و كل ما صار لي شي ولا الله ابتلاني اقول يمكن حوبتهم ..

مع اني ولله اراعي ربي في كل شي و هم يقولون ولله نسمع سوالف من ربعنا عن خالتهم نحمد الله عليكي ..

بس تأنيب اضمير .. و انا مشكلتي اوسوس على ادق اتفاصيلللللل و اقهر في نفسي

اذا حد منهم سوا اي غلط اعاقب ... بعدين اجلس اسأل نفسي لو بنتي الي غلطت . كنت بعاقبها نفس اشي ؟

ارجع اقول لا .. لانه بنتي 5 سنوات و بنت زوجي 11 اكيد العاقب يختلف ؟؟؟ و ارجع اتخيل لو بنتي صارت 11 كنت بعاقبها نفس اشي ...

احيانا ما اقدر اتخيل انه بنتي 11 سنه ماا عرف الاحساس كيف راح يكوووون و انقهر و ابكيييي و اقول ياويل من الله

اخاف لو كبرت بنتي تسوي نفس الغلطه الي سوتها بنت زوجي و عقابي لها يكون اخف وين بروح من ربي ما عدلت ... بيحاسبني اني فضلت بنتي ولا اخاف يردها في عيالي

بعدين اقول خلاص ما بعاقبهم ... و ابتدي افوت لهم بس اذا غلطت بنتي اعاقبها لاني ودي اربيها ...بعدين قامت بنتي تتعقد ليش هي تتعاقب و هم لا ... و في نفس الوقت هم يتمادون بحكم انهم اطفال

ا ارجع اقول كذا حرام انا ما اربهم نفس عيال لازم احزم معاهم اخاف الله يعاقبني انه ما ربيتهم قاعده اسنع بنتي بس .............................................

و ادخل في متاه لها اول و مالها اخررررررررررررررررررررر


عشان كذا اقوووووول اني في امتحاااان صعبببببببببببببببببببببببببببببببببببببب

و ميت مره قلت لزوجي اني محتاجه اقعد مع احد اخصائي ,, ما ادري مين ممكن طبيب نفسي اخصائيه اجتماعيه .. ما ادري مين الي ممكن يساعدني احسه وسواس قهري

ولله اني اعاني بهلعيال يرووووحي و تعبت .. بلله لو ابوهم هنا مو هو الي بيعاقب و يربي و يفكني من تأنيب اضمير

يمكن ما تفهموني لانه محد مرت بتجربه هاذي الا الي عندها عيال زوج

انا لو اسمع وحده تقولي هلكلام ولله بقول شتخربط ؟؟؟؟

بس لاني اعاني من وقت فراغ كبير غصب عني اوسوس

الله لا يحط وحده في الي انا فيه

ودي اشوف اخصائيه تساعدني .. بس ما ابغى اجانب ... كل الي هنا اجانب في اشياء كثير ما راح احس انها تقدر تقولها لو مسلمه احسن على الاقل تقدر تذكرني بلله

لو في اخصائيات بلمراسله

الله يسامحه زوجي كم قلت له ودي اشوف اخصائيه تعبت نفسيا .... يطنش و يشوف هلاشياء مو مهمه .... و مخليني ادخل انشر غسيلي على الانترنت و اطلب اخصائيات بلمراسله ...

لا تفهموني غلط مو قصدي انشر غسيلي لكم هههههههه انتوا خوات

بس العالم كله يقرا ... و كلهم متان هههههههه لانه المتان الي يدخلون هنا بس

اه بس احس ارتحت شوي

احس شويه صدري قام يدخله هوا... كانت مقموووته

نسيت نص الي كتبته فوق ههههه حالتي كانت صعبه اول ما ابتديت اكتب دموع و بكى الحين اشوه

ما راح اراجع الي كاتبته راح اعتمد المشاركه بدون مراجعه

صارلي ساعتين اكتب كانت 10:55 و الحين 12:46

فتكم بعفيه
​

 

[rymyy]

شلنونج حبيبتي كتونه ولله لج وحشه

ولله الحال من بعضه وانا بعد زايده من النفسيه التعبانه

وافضفضي لزوجج عشان ترتاحين لازم يسمعج لأن هذي همومكم مع بعض مش انتي لحالج .....بس مش بطريقه عتب" لا" بطريقه كيد النساء
__________________
وشغلي نفسج بدراسه ولا اي شيئ ينفعج بكره______فكري بنفسج شوي

 

[BiiShOoO]

شلووونكم بناات

حبيبتي قطعتي قلبي عليج و الله يكون بعونج و ياجرج على الهم الي انتي


يس حبيبتي لازم تفضفضين حق زوجج عشان يحس بالمسئوليه الكبيرة المقطوطه على ظهرج

 

[dareena]

يا عمري يا كتونة والله زعلتيني ع حالتج الله يهونها عليج حبيبتي و يعينج و يزيد صبرج وتفرج عليج بأذن الله وتتعوضين كل خير و راحه ع الي تسوينه

لا المتزوجه مرتاحه والا الي مو متزوجه مرتاحه الله يعين الجميع و يفتحها عليهم << تعقدت من الزواج خلاص هههههه

 

[dareena]

هذي جريمتي و وجباتي المأساوية امس غير الشبسات و الخربطة الثانية وااااي بنات مادري شصايدني انفتحت شهيتي ولان ماقعد بالبيت كل اكلي من برا

دشيت تحدي بالمنتدا جود امسك نفسي وشهيتي شوي وارد نفس قبل خوو ماتسنع الا بالعين الحمرة

يلا انا اول وحده اعترفت تعالو يا منخشات و اعترفو شكليتو وشخربطتو ليش منحاشين وخايفين ههههههه

 

[Melazlaza]

قوة بنات شلونكم
انا الحمدلله رجعت للاتزام اكلي صحي وسويت يلطة بتبروير بدون صوص عشان اذا يعت اكلها وطلعاتي للمطاعم مااطلب الا هيلثي غالبا سلطات




كتون قلبي انتي انا مابي اطبطب عليج لان ما اعتقد كلام المواساة بيفرحج او يهديج انا بتناقش معاج بالمنطق
اولا لازم تحطين قرارات نهائيا بمعاملتج للاولاد كلهم نفس المعاملة لا تدليل ولا عنف كلهم واحد وردود افعالهم لا تخلينها تأثر عليج لانهم مراااااهقين ومتخبطين ويبون يمشون الي براسهم واي اعتراض منج بسبب حبج لهم يحولونه لمعاملة زوجة اب مو ام
انتي صح صدقيني صح لان قلبج ابيض ودايما تفكرين بغيرج حساسة ومرهفة هالشي للأسف متعبج لو كنتي جامدة ومو فارقة معاج كنتي مرتاحة من الهم


بالنسبة لزوجج عندج واحد من اثنين اما انج تدزيله رسالة واضحة وصريحة بمعاناتج وبوحدتج
او انج تغيرين معاملتج معاه وتخليج رسمية معاه عشان يحس انج بالفعل تعبتي وبيسأل شفيج ولاتقوليله الزوج اذا شعر بغموض زوجته يلتصق فيها لا اراديا و يدووووور حوالين نفسه

كتون حبيبتي الي قاعدة تحسين فيه طبيعي انا حاسة فيج اقولج ليش
رفيجتي امها توفت وابوها تزوج وزوجة ابوها دللتهم واااااتيد اكثر من اولادها و صارت تفضلهم على اولادها عشان لا يحسون بالنقص لكن بالاخير رفيجتي واخوانها صاروا دلوعين وشخصياتهم غير مريحة لانها ياااا حرام ماتبي تزعلهم ابدا
وزوجة ابوها صديقة اختي المقربة تشتكي لاختي نفس شكوااااج بالضبط بس شالفايدة كبروا وصار تعديل سلوكهم صعب

الزبدة انتي صح و انا اشوف ان ضغط المسؤوليات عليج هو سبب شعوووورج بتأنيب الضمير لان من الصعب انج تأدين جميع الواجبات بأكمل وجه
كتون حياتي لا تحملين نفسج فوق طاقتها لان محد بيوقف حياته عليج احنا بس الي نوقف حياتنا عالبيت والاسرة لكن اهما لا
حطي جدول لحياتج انتي نمبر ون وبعدج الاسرة ضرووووووووري يوم واحد لج خاص فيج صالون او طلعة او اي شي يخصج ويريحج

وديري بالج على صحتج وغيري الدكتورة الدايخة ماكوووو فايدة فيننا يالعرب
خلج عالاجانب يلتزمون وامورهم مرتبة
ربي يسهل امورج يارب ويهون كل صعب عليج

 

[Melazlaza]

طوفوا البدليات من الاي فووووون
قصدي سلطة

 

[Queen of Sadnes]

السلام عليكم بنات

ضيون الظاهر جذي ابنطرج تولدين وابلش عاد امس زوجي لاحظ يقولي جنج متنانه واااااااااااااي قهر ما ابي ازيد المشكله انا اذا زدت كيلو ولا ثلاث ماتروح الزياده الا بالخلفيه والخواصر انا ايديني وريولي وكتوفي كلهم ضعاف بس السمنه ترتكز هناك ما ادري شالحل


كتون حبيبتي والله والله عورتي قلبي انا مع عطوف كل كلامها صح انتي اهتمي بنفسج وخلي لج يوم تدلعين فيه روحج بترتاحين وال شي تفكرين تسوينه والله جد اول شي جيب لج رقم وحده تسوي لج مساج بالبيت او انتي روحي لها تشيل عنج هالسترس كله ولاتوسويسين وااايد تتعبين وتكبرين وبالاخير محد درا عنج بيكبرون وكل واحد يلتهي بحياته ادري انه التعامل معاهم صعب بس خلاص دامج مسؤوله عنهم انتي تعاملينهم بالطريقه اللي تشوفنها صح وتناسب الموقف اللي قاعد يصير واتكلي على الله والله يدري شنو نيتج واستغفري سبحان الله على قولتج تخافين تكونين ظالمه احد فربج يغفر لج ويمسح على قلبج

اما زوجج فالصراحه ماادري شقولج مهما يكون مو المفروض يخليج جذي ولي متى كلميه وكوني حازمه وياه من غير عصبيه وهواش لا بالهدووووء بس خلج حاده وان انتي مو قادره خلالالالالالاص واذا صار شي انت المسؤول حسسيه بالمسؤوليه حتى لو هو بعيد

والله يعينج ويصبرج ويهدي عيالج ويصلحهم يارب

 

[الشيخه الفت]

كـتون كاندي..... ​

..................الله يشفيك يارب ويأجرك ...اللتهاب اللي في المعدة يمكن قصدك (جرثومة المعدة)؟! لأنو سبب الجرثومة يكون تسمم من اكل معين وللأسف ماله حل ..الاسباب..​

هناك ألية لحماية جدار [URL="wlmailhtml:{70A8721A-D363-465C-801F-53F284FAEA86}mid://00000002/!x-usc:http://www.alkutnet.com/vb/showthread.php?24728-جرثومة-المعدة-اعراضها-وعلاجها&"]المعدة [/URL]والأمعاء من الأحماض المفرزة ولخلل ما في هذه الآلية يحدث إلتهاب [URL="wlmailhtml:{70A8721A-D363-465C-801F-53F284FAEA86}mid://00000002/!x-usc:http://www.alkutnet.com/vb/showthread.php?24728-جرثومة-المعدة-اعراضها-وعلاجها&"]المعدة [/URL](Gastritis) أو التقرح (Ulcer) ​

وأشهر مسببات هذا الخلل هو وجود بكتيريا الهيليكوباكتر بايلوراي (Helicobacter pylori)
ومن الأسباب الأخرى التي تؤدي إلى القرحة
- الإستخدام المستمر والمطول لأدوية مضادات الإلتهاب الغير استرودية مثل الأسبرين (Aspirin)، البروفين(Ibuprofen) وغيرها
- شرب الكحوليات
- التدخين
بالإضافة إلى ذلك هناك أشخاص معرضين أكثر من غيرهم للإصابة بالقرحة وهم حاملي فصيلة الدم (O) أو المصابين بمرض نادر يسمى متلازمة زولنجر إلسون (Zollinger-Ellison Syndrome)​

الأعراض​

- ألم في البطن، ويحدث بعد ساعتين إلى ثلاث ساعات من الأكل أو عند عدم الأكل لمدة معينة عندما تفوت إحدى الوجبات. يخف الألم عند تناول مضادات الحموضة أو الحليب
- تقيء ولوعان
- نقص في الوزن
- حرقة الفؤاد او ما يعرف بالإسترجاع المريئي
- خمول
- وقد يحدث تقيء دم أو تلون البراز بلون أسود داكن كالقار (تكرمون).
وقد لا يحس المصاب بأية أعراض سوى ألم خفيف في أعلى البطن..​

بس الادوية ممكن تخفف من المها ...الثوم رائع للإلتهاب المعدة والعسل معروف خذي ثلاث فصوص مع كوب زبادي ..مرتين باليوم..مع الغداء ومع العشاء..حاولي تهتمين بأكلك يكون صحي وسليم لاتفكرين بوزنك ..ترا التفكير السلبي وانو وزنك راح يزيد وتشلين هم ممكن فعلا يصير عندك زيادة في الوزن بسبب تفكيرك جذبتي الاشياء السلبيه لك ..وكمان في هرمون يفرز في الجسم اسمه الكورتيزول يسبب إكتئاب وحالة نفسية سيئة ..كورتيزول بالإنجليزية Cortisol ،هو هرمون يفرز بواسطة الغدة الكظرية.
ويلعب الكورتيزول دوراً مهماً في وظيفة كل جزء من أجزاء الجسم تقريباً ، والوقوع تحت التوتر أو ضغط عصبي شديد يرفع مستوياته ، فيؤثر بصورة سلبية على الصحة العامة للجسم.​

​

فاأنتبي لنفسك وصحتك حبيبتي والله محد راح يفيدك لازوج ولا عيال ولا غيرة ...بالنسبة لدكتورتك مدام مو اول مره تسويها اسحبي ملفك من عندها وارفعي عليها شكوى هذي مهملة والحمد لله جات سليمة ...​

بالنسبة لمشكلتك مع زوجك..شوفي ياعزيزتي ....في مثل عندنا يقول( زوجك على ماعودتِيه..وإبنك على ماربِتيه..)...يعني انتي من البداية عودتي زوجك على انك تقومين بالمسؤوليات بدالة وتحلين محلة وتهتمين بعيالة وكل الشغل على راسك..​

.مااعترضتي ولابينتي له ان له واجبات وحقوق كزوج وكاأب لعيالة انتي ايش كلفك بعيالة وتربيتهم؟! يمكن انتي عشان قلبك طيب وتبغين الاجر قلتي معليش بتحملهم
واعاملهم مثل عيالي بس صدقيني تربية العيال مو سهلة وخصوصا انهم كبار يعني فاهمين وواعين انتي زوجة اب مو ام مهما كنتي طيبه وحنونة صدقيني ماراح يستوعبون هذا الشيء..وبذات انهم في مرحلة مراهقة الولد يحتاج لأب يكون جنبة ويعدل سلوكه ويعلمه الصح من الخطاْ ..وحتى البنت تحتاج لحنان الاب وحبه اكيد بتغار منك لانها كبيرة وعارفة انتي زوجة ابوها وممكن تاخذين ابوهم منهم ..فاالغلط غلطك من البداية حبيبتي يمكن انتي بنظرك يوم سويتي هالشيء وتحملتي حمل فوق طاقتك انك بترضينه وبتكبرين في عينه وهذا الشيء والله غلط الزوج عليه حقوق لازم يعرفها هو مو دوره يجيب لكم فلوس وبس! ايش فايدة الفلوس وعيالة محرومين منه وانتي محتاجته اكثر يوقف معاك ويساعدك بتربيتهم ويتحمل مسؤوليتهم ترا الحرمه مهما كانت شخصيتها قوية تراها ضعيفة وتحتاج لحنان الرجل وعطفه لانها خلقت من ضلع مايل لو حاول الرجل يعدلها ويخليها مستقيمة ويحملها فوق طاقتها تنكسر ...​

عموما انتي اللحين مافيه قدامك الا تصارحينة بكل اللي في قلبك لاتخلين ولا شيء ...لازم يعرف انتي متحملة وساكته وهو ع بالة انك مرتاحة ومبسوطة يجي من السفر يلاقي احسن استقبال وراحة وعيالة مبسوطين وكل الامور قدامه تمام بس مايدري وش اللي في قلبك ...انتي بالشكل هذا ممكن لاسمح الله بعيد الشر تجيك امراض انتي في غنى عنها لو عرفتي تحلين مشكلتك.. المواجهة والمصارحة هي الحل ...كلميه بهداوة وفضفضي له كل اللي بخاطرك تراه في النهاية زوجك سترك وغطاك ولازم تتشاركون في الافراح والاحزان وخصوصا ان المشكلة تخص حياتكم وعيالكم ...​

قبل يومين حضرت دورة اسمها خططي لسعادتك مع استاذه الله يسعدها دنيا واخرة هي الدورة اصلا للمخطوبات وللمتزوجات تعلمنا كيف نتعامل مع الرجل وايش هي حقوق الرجل اللي له واللي عليه وكيف هي نفسيته وكيف الوحدة تتعامل مع زوجها من بداية الخطوبة والزواج ....
وقالت لنا شريط اسمه فهم النفسيات للجاسم المطوع ...يشرح لك عن طبيعة نفسية الرجل وطبيعة نفسية المراءة وكيف تتعاملون مع بعض ينفع للمخطوبين والمتزوجين وممكن تهدينه زوجك يسمعه ...​

المقاطع موجودة على اليوتيوب ..​

الجزء الاول ... http://youtu.be/YbyKn55rynI


الجزء الثاني .. http://youtu.be/ySQQivLnPhY

وفي النهاية بنصحك بنصيحة اكيد انتي عارفتها بس من باب التذكير ...{ وَذَكِّرْ فَإِنَّ الذِّكْرَى تَنْفَعُ المُؤْمِنِينَ }....​

الاستغفار ..استغفري قد ماتقدرين وانتي تشتغلين في البيت وانتي بالسيارة وانتي تغسلين المواعين المهم استغفري قد ماتقدرين (أستغفر الله العلي العظيم واتوب إليه)...وقيام الليل والدعاء...في ما معنى حديث عن الرسول صلى الله عليه وسلم (ان الدعاء يرد القضاء)...​

وكمان دعاء رائع وفضلة كبير على ناس كثير لدرجة انو وحدة كان زوجها مصاب بالايدز وتاب وكانت حاملة المرض وراحو عند شيخ وقالهم قولو هالدعاء يوميا على قد ماتقدرون (حسبي الله لا اله الا هو عليه توكلت وهو رب العرش العظيم ) وبعد شهر راحت تحلل سبحان الله مالقت ولا اثر للمرض حتى الاطباء استغربو .. بس اهم شيء اليقين والثقة ان الله سبحانه وتعالى قادر على كل شيء ..​

وربي ان عندي اختبار نصفي والمفروض اني جالسة اذاكر بس دخلت التجمع وربي يوم قريت ردك ضاق صدري كأني اعرفك من سنين وماهان علي اطلع الا وانا راده عليك أتمنى من كل قلبي اني قدرت افيدك بشيء..​

والله يعينك ويسهل امورك ويفرج كربك ويعطيك على قد نيتك يارب ويحنن قلب زوجك عليك .....:eh_s(17):​

<<<يوه حسيت ردي موضوع لحالة !​

.​

 

[الحراير]

مرحبا شلونكم بنات

كتونه وربي نحبج والله يعينج ومشاءالله كلام عطوف حلو ماعندي كلام ازيده عليه هي كفت وفت

وصدقيني لج الاجر حبيبتي

 

[Lady <3 A]

مرحبا شلونكم بنات

نونة .. تروحين وتردين بالسلامه ان شاء الله وحج مبرور وسعي مشكور وذنب مغفور ان شاء الله

باقي البنات شلونكم ؟

اسمحولي دشيت اقرا ع السريع وحبيت ارد على كتون

حبيبتي خلي ريلاكسد شوي ولا تضغطين نفسج بالتفكير وحاولي تخلين تفكيرج إيجابي ترا هالشيي يأثر على صحتج وأنا أقولج إنه سبب من مسببات التهاب المعدة

وحبيت انبهج لشي .. لا تاخذين مضاد حيوي لالتهاب المعدة إلا إذا كان المسبب (جرثومة المعدة) ! إذا النتيجة ما فيها إصابتج بجرثومة المعدة فما له داعي المضاد ! بيكون علاجج الرئيسي هو الاوميبرازول مثل النكسيوم والبارييت وغيرهم وايد نفس التركيبة ونظامج الغذائي راح يتغير وفيه ممنوعات لازم تبتعدين عنها
فديري بالج وغيري دكتورتج أحسن وعيدي المنظار مره ثانيه أو اخذي النتيجة ووديها لطبيب ثاني
أنا صابني التهاب قوي في المعده والامعاء والمريء وبأكثر من موضع في كل جزء وغير المشاكل الثانية ( لو أراويج صور نتيجة آخر منظار تخترعين ) في الجهاز الهضمي وما اخذت مضاد حيوي مع إن المشكلة كانت مستمرة حوالي 3 سنين أو أكثر بس ما كان المسبب جرثومة المعدة المشكلة كانت نفسية وسببها الرئيسي ضغط الدراسة وأمور ثانية مرت علي في هالفترة

بالنسبة لفضفضتج بصراحة حسيت إني مو قادرة أكتب لج نصيحة ما بي أزيدج ولا أبي أنصحج بشي غلط !
فما عندي غير إني ادعيلج بتيسير الأمور وتسهيلها والاستقرار والله يفرج همج يارب

,

بالنسبة للي يخربطون فأنا وياكم من غيرت وزني بالشريط رديت أخربط لوووووول

كوكو ولكم باك مس يو :*
لولو مختفية عسى المانع خير ؟ وغيرها وايد إن شاء الله الكل يكونون بخير وصحة وعافية
وكروشات شلونكم

 

[Lady <3 A]

معقولة من امس ولا رد وين اختفيتوا

 

[Melazlaza]

قوة شلووونكم
شفيكم طاااخين
بزبز شلونج حبيبتي لج وحشه
باجي البنات وينكم
اليوم رحت موعدي والا زاااااااايدة كيلوووو ونص تحطمت حدي وقلت لاااااازم التزم ضروووووري

كتون شلونج حبيبتي والله قاعدة افكر فيج طمنينا عليج
لولو فيييييينك يا قمييييل يا ام الرشاقة انتي 
ضيون
كوكو
شوكلاته مختفية
دارينا
وينكم يا قوم؟؟!!!



بنات بروووته وينها حدها مفقودة والله من زمان ما شفتها حتى بمواضيع ثانية مالها بينه

 

[rymyy]

شلونكم انا ملتزمه حمد لله بعد الخربطه
كوتن ولولو وام عمور وصبوره وبرات وكل البنات اللي مختفين وينكم طمنونا عنكم

 

[Queen of Sadnes]

هلا بنات شلونكم

بزبز وانا مس يو تو

عطوف طبيعي بعد الزياده حتى لو كان اكلج هيلثي ومعقول لا تتحطمين ان شاء الله الله يسهل عليج وبعد الولاده شوفي شغلج عدل

ريوم قووووود جوب وكملي وعساج عالقوه

لولو وينج من زمان مو مبينه وام عمور وباجي البنات شلونكم

كتون حبيبتي طمنينا عليج