ديوانيـة --> بجريآت <-- : تعالوا نفضفض ونسولف !

[الأوركيد~]

صباح الورد بنياااات

شلونكم مع الثقل؟

كل البنات اللي على ويه ولاده
عسى ربي يسهل عليكم بطلقة سهله
و ولادة طبيعية مريحة
و تقر عينكم بشوفة ضناكم

هود هود
مبروك دخلتج ال9
الفال لي و البقية يا رب

امس نظفت غرفتين بس و مو ذاك التنظيف القوي
و ظهري شخص عليي
اضطريت اصلي قبل لا انام قاعدة
:eh_s(4):

كروشات اللي بالاشهر الاخيرة
متى تثقلون عدل و تصلون يالسين؟
اشوف حماتي من ال5 يمكن تصلي قاعده
بس انا احس تو الناس
للحين ما ثقلنا عدل الحمدلله

بنوتات شنو احسن محلات حق اسرة اليهال
انا مفكرة اشوف بوتري بارن؟

و انا الحمدلله دخلت ال5
متى تنصحوني ابدا تجهيز
ودي افتك قبل رمضان!

 

[بدون بس مغتربه]

صباح النور

مبروك للي دخلو التاسع وعليها بالعافيه اللي قاعده تجهز.

الاوركيد انا بالثالث الحين واصلي وانا قاعده لسببين مو للثقل لا لان من اقوم واقعد تجيني اللوعه ماتحمل كذا مره اوقف بصلاتي بسبب الترجيع توصل عندي كلش بالصلاة والسبب الثاني وركي يعورني صاير الدكتوره تقول العضلات يبي لها فتره على ماترجع طبيعي. فكل وحده غير عن الثانيه ولها اسبابها انا صج ماحب اصلي وانا قاعده بس مجبوره لان جد حاليا ماقدر...




وانتي ديري بالج لاتشتغلين شغل مره وحده وتعبين ظهرج تذكري حاليا الجسم خارج عن طبيعته لانج حامل... فشوي شوي.



بنات منو مثلي كل مااكل شي احسه ماينزل واصل فوق كلش حتى لما ابي اتريع احس اني مخنوقه واكلي اصلا مو ذاك الزود بس كله جذي صار لي يومين.



أه بخصوص موضوع انج تعلمينهم متى ولادتج وشنو بطنج كله قولي يمكن يمكن ممو اكيد مادري حاولي من تعلمين ماتعطينهم الاكيد قولي مو واضح كلش والعلم بيد الله...

انا شفت اللي حوالي شفت باللي صار مع اختي من الغيره والحسد اللي فيهم كلامهم يغث مثل وجوههم ..

المهم اخذت اسلوبي واني اعلم بس ماعطي الاكيد ومااطول بالسوالف عن حملي معاهم على طول اغير الموضوع لان انا مو اول وحده احمل ولا اخر وحده تحمل بس ماله داعي يركزون علي...

 

[lawyara]

الاوركيد انا من السابع حسيت بطني كبر وما اقدر اسجد وايد صعبه فمت اصلي قاعده

 

[HoD'HoD]

الاوركيد الله يبارك فيج والفال لكم يارب
على الثقل حسيت فيه بداية السابع بس اخر اسبوع بالثامن حسيت الثقل صار دبل لان البيبي يكبر بسرعة نهاية الثامن والتاسع
وبالنسبة للصلاة اول ٣ شهور كنت اصلي قاعدة لان عندي ٣ اجهاضات من قبل بعيد عنكم ومو زينه الحركة نهائيا ومن الرابع ليلحين اصلي وانا واقفة الحمدلله مرات اكون تعبانة بس احس بالذنب اني اصلي قاعده واقول لا اقدر قاعدة افتر بالسوق وعلى الصلاة اقول تعبانة مايصير بس ذاك اليوم كنت تعبانة واصلة حدي صليت وانا قاعدة

ونصيحة لا تجهدين نفسج بالشغل ريحي توج بنص الحمل الله يسهل عليج

وعلى سرير البيبي بوتري بارن وماماز اند باباز حلوين بس غالي صراحة كنت باخذ منهم بس شدعوة نفسهم بسنتر بوينت ارخص
ومبين عليهم جودة فنويت اخذ السرير من سنتربوينت وباخذ لبس السرير والشراشف من بوتري بارن مع الستارة عاجبيني حيل


بدون
صار معاي نفسج من هرمونات الحمل المعدة ماتهضم الاكل تحسين واقف ماينزل
من دشيت الرابع راحت مني هالحالة وردت بالثامن ليلحين مستمرة الحمدلله على كل حال

وانا نفسج كل مايسألوني اقول يمكن بنت مو اكيد والموعد يمكن آخر الثامن وانا الصاجة عادي باجر اولد بوقت غير موعدي ويطلع ولد ماكو شي مضمون
وهم ارتاح من اسألتهم المزعجة واللي يبط جبدي زيادة هاااااا شنو بتسمينها اقولهم مادري ليلحين وصج ليلحين ما رسيت على اسم عاد شوفي ردة الفعل شدعوه ٩ شهور مافكرتي اكيد بتخشين ودي اذبحهم ههههه

 

[عروسة فوشيآ]

هلا بنات

انا بنص التاسع والحمدلله اصلي عادي واروح الحمام عربي
والامور تمام اللهم لك الحمد

مو كل حامل تثقل وماتقدر تسوي شغلها


والثقل معروفه يبدأ بالثلاث شهور الاخيره



بدون اذا اكلتي لاتقومين بعدها انسدحي شوي وريحي بعدها قومي عادي وسوي شغلج

وترا فبدايه الرابع بترتاحين ان شاءالله


اهم شي الفيتامينات والكالسيوم لاتتركونه

 

[lawyara]

فجأه بطني قام يحكني واي يذبح الظاهر لانه البطن صار حيل مشدود ، اذا اتعرفون كريم يهدي الحكه عطوني اسمه

 

[HoD'HoD]

ماشاءالله عروسا الله يتمم عليج
عاد يقولون قعدة الحمام العربي وانتي بكرامة افضل شي حق الولادة تساعد وايد

لويرا
انا كنت استخدم لوشن طبي بفيتامين اي وشجرة الشاي والبابونج معطيني اياه دكتور جلدية حق الحكة استخدمته اول الاشهر طلعت فيني حبوب بايدي واستخدمته قال عادي تحطين 3 مرات باليوم
كلمت دكتورتي قالت استخدميه آمن للحامل وماخليت صيدلية ماسألتهم من الخوف ههههه هذا اهو

 

[lawyara]

مشكوووره هدهد ♥♥

 

[HoD'HoD]

العفوو حبيبتي

 

[الأوركيد~]

سلام احلى امهات

بدبد
هلا و الله
ايه انا عارفه في حالات استثنائية تخليج من اول يوم تصلين قاعده
بس كنت أقصد النورمال
يعني ما شالله حماتي الحمدلله
ما عندها مشاكل بالحمل
الله يتمم عليي و عليها و عليكم
و بخصوص الاكل
اتوقع عادي
لاني انا بعد ما ينهضم بسرعه
اذا كلت الظهر ما ايوع الا متى
الله يسهل لنا يا رب

لويرا
هودهود
فوشيا

تسلمون عالرد
و الله يسهل علينا ان شالله

بخصوص كبر البطن
انابلشت احط زيت الارجان اذا لي خلق عبى جسمي كامل
و اذا مكسلة استخدم كريم الدكتورة عالبطن و الصدر بس

و بخصوص موضوع ان تخبرين او لا
صراحة بعض الناس ملاقيف استغفر الله
حتى عن الاسم يسألون
مع اني ما احب اسال حد
بس شنسوي
يعدون لج عد
:eh_s(1):

 

[قرة عيونه]

شخبااااركم بناااات

والله لكم وحشششه

من زمان مادخلت المنتدى من بديت تجهيز حيل انشغلت حتى مافي وقت للنوم

طول اليوم طالعه وارد بالليل يسسهرني البيبي مانام الا الصبح شوي لما امي تمسكه والعصر اطلع اجهز

ان شاء الله باقي يومين واخلص الاربعين

عقبااااالكم كلكم تولدون بالسلامه يارب

لان البيبي توه هدا شوي وبسرعه قاعده اكتب قبل لا يبجي ماقدرت اقرا الصفحات اللي طافتني

بشرووا منو ودلت ومنو دخلت التاسع

الله يسهل عليكم كلكم يارب

 

[الأوركيد~]

قرة
:eh_s(9):
لج وحشة فوق ما تتصورين
من فترة عبالي
:eh_s(7):
الله ييسر لج طلعتج من ال40
و يعينج على التربية الصالحه يا رب

 

[بدون بس مغتربه]

فوشيا الله يتمم عليج وتولدين بالسلامه

الاوركيد صح... في ناس مافيها شي وتتكاسل...انا الحمدلله بس تروح اللوعه ارجع اصلي طبيعي حتى لو وركي يعورني....

هدهد حتى انا فيني حبوب من الحمل وطلع بويهي وايديني وتحت خواصري شوي... المشكله غريب احسه خشن اول مره يطلع لي جذي... وانا شريت دهن من غير كحول او عطور...يرطب البشره بس اتكاسل منه بصراحه...بس بعد السبوح احط منه......


قره الله يهنيج بحياتج الجديده ولج وحشه بعد...شلونج مع الرضاعه .... ودي اسال اساله بس اقول لااا عيب خلاص...^_^

 

[lawyara]

شلووونكم بجريات ،، ما يكبرني اولدت ، الحمدالله على سلامتها ويتربى بعزها البيبي

اهليين قره منوره

 

[بدون بس مغتربه]

صج الحمدلله على سلامتها وسلامة البيبي يتربى بعزهم...خل تكتب لنا ولادتها...ان شالله كانت ولادتها يسره

 

[مآيكبرني نك]

يلآ مبرؤك عليكم تقدم المرآتب

بدون الله يسلمج عزيزتي ، قصه ولآدتي حاطتنهآ ف تجمع ابريل ^.^

بس مانصحج تقرينهآ

 

[الأوركيد~]

ما يكبرني نك
الحمدلله عالسلامة
و يتربى بعزج البيبي

بدبد
شلونج؟
شسم دهنج و من وين ماخذته؟

 

[بدون بس مغتربه]

ههه صح خرعتيني بس الحين بدخل واقرا ،،، الفضول وماادراك ماالفضول...


الاوركيد... انا استعمل كريم من كلينك

هذه صورته وشكله حجمه كبيره ويطول معاج شهرين ثلاثه مو بسرعه يخلص لان بس تحطين مسحه خفيفه تحسين بنعومته وترطيبه

هو الوحيد اللي مريحني بصراحه انا كل شي فيه عطور ماحبها..وفعلا يرطب ويخلي البشره حيل ناعمه

بس بصراحه مادري اذا في منه في الكويت او لا بس اكيد فيه,,,

 

[فيلسوفة تتفلسف]

مايكبرني الف مبروك وحمدلله على سلامتج

قرة شلوونج فاقدينج

 

[ElRaZaH]

الف مبروك مايكبرني
والفال للبقيه يارب