ديوانيـة --> بجريآت <-- : تعالوا نفضفض ونسولف !

[حسآيِف]

مبرووووك للبنات اللي اولدووووو


الله يحفظ لهم عيالهم

 

[حسآيِف]

في بنات اسماءهم بالقائمة
واذكرهم كانو معاي على ايام تجهيزي للعرس بنكي القديم "مشتاقه لعيونه"

وناسة جذي .. سبحان الله

 

[دآآآنــه]

طريقه لولادة سهله ..

عندي لكم طريقه تجعل الولادة سهله حدها وتخفف من ألامها ،
يعني تجعل الولاده يخف ألمها لـ 70% ويطلع الجنين بسهوله،

والطريقه هي:
عندما تبدأ آلام الطلق يدهن البطن والظهر
بـ(زيت زيتون طبيعي بعد تسخينه مع حبة البركه) وتوضع الرجلين في حوض به ماء ساخن
لمدة سبع دقائق تقريباً،
سوف يخف الألم لدرجه غريبه،
وستسمع الحامل صوت عنق الرحم وهو يفتح بسرعه،
وسينزل الماء وسينزل رأس الطفل ..
سوف تبدأ الولاده بعد نصف ساعه بدون اي احساس بألم ..
.. سيكون ألم الطلق أخف من ألم الدوره ..
السر في ذلك أن زيت الزيتون والحبه السوداء يسهل إنقباض الرحم، وعروق الرحم متصله بالأقدام، وتأثير الماء الدافئ يجعل عنق الرحم يفتح بسرعه..

دعواتكم لي ربي يثبت لي جنيني و يقر عيني فيه سليما معافا من دون زياده و لا نقصان

 

[نور الضي]

اغلبهم كانوا معاي
بتجمع العرايس
الله يرزق الي ماحملوا

 

[# غنوجة بيبي #]

الله يبارك فيكم و يسلمكم

 

[نور الضي]

توني راده من السوق
وظهري يعورني
الله يعين شلون التاسع

 

[مذهلة2013]

قائمة بجريات 2014
------------------★


1- رفيعة الشآآن ( 27 / 5 )

2-3-( Zynah-Q8 ( 14 / 6 & منـال

4- شربات لوز ( 24 / 6 )

5- سور المدينه (28 / 6)

6- ( 4 / 7) om_sanad

7- (bnt-usa (7 / 15

8- مذهلة2013 (16 / 7)

9-10- ( 20 / 7 ) تدخلين القلب & ElRaZaH

11- (29/7) al_sheikha

12- نور الضي ( 6 / 8 )

13- سكر معقود ( 8 / 8 )

14- حبيبة حمد ( 25 / 8 )

15- حبي و حياتي (30/8)

16-17- آشوآآآق + فيلسوفة تتفلسف (2/9)

18- طموحه بزياده ( 4 / 9 )

19- حسآيف (9/7)

20- همس اشواقي (15/9)

21- الأوركيد~ ( 17 / 9 )

22- (4/10) katrina90

23- (5/10) zoz_ota

24-25- أمورته & لوولوو_88 ( 7 / 10 )

26- اهذريبك~ (14/10)

27- مهابه (21-10)

28- بدون بس مغتربه ( 24-10)

29- ( BaRBya ( 26 / 10

30- دآآآنه (28/11)

31- ام احلى بيبي (12/7)

32- (12/12)th7awe

33- غزل (18/1)

♥♥♥♥♥♥♥♥♥♥♥♥♥

 

[مذهلة2013]

نور

الله يعين الثقل كل ماله ويزيد

الحمدلله

 

[نور الضي]

انا الي مليت منه الادويه
والبرقنا احس تجيب لي لوعه مرات
قلت لدكتورتي قالت شي طبيعي

 

[# غنوجة بيبي #]

قصة ولادتي




الحمدلله الذي بنعمته تتم الصالحات
قصتي يوم الخميس الفير نزل معاي دم وردي و خفت بس بعدين قلت مرات بنزل الدم قبل الولاده بايام..المهم حطيت راسي ابي انام..ما قدرت..عوار ماسكني في بطني و ظهري ..الف يمين عوار و الف يسار عوار
..امشي عوار..افهد عوار..و كل ماله يزيد ..جان اقول لزوجي امش ودني انا تعبانه و احس بشي اخر بطني يعورني و احس شي يابس..و ان جنه شي يبي يطلع..المهم رحنا المستشفى و كان الوضع عندي عادي ما خفت..و كنت حاسه ان بيردوني البيت..لان ولا مره فحصت و قلت يمكن مو ولاده .. و دخلت قاسو ضغطي و سمعو قلب البيبي..و حطت لي السستر جهاز على بطني و قالت في طلق ..و نطرت الدكتوره على ما وصلت و فحصتني..قالت 3 سانتي و طلوق..يالله دخول ولاده..و اقول لزوجي تعال لا تخليني هههههه المهم صعدنا لغرفة الولاده و انا و ريلي فلم هندي اودعه و يودعني..دخلت الغرفه..مسكتني سستر و رحت و حطتلي حقنه شرجيه..و عقبها دخلت الحمام و انا اتألم و طلعت..ودوني الغرفه ..و قالو امشي..مشيت بالغرفه و سحبت مني دم حق تحليل ابرة الظهر لاني طالبتها و نطرت على ما طلع التحليل و الحمدلله تطابقت ..و دخلت علي دكتورة ابرة الظهر..غزتها لي..و بدا جسمي يتخدر..و بديت ادوخ بس ابي انام ..حطولي طلق صناعي لان الطلق مو حامي..و دش الدكتور فحصني عقب ساعتين قال 4 سانتي..و عقب بساعتين 6 سانتي ..و عقب فحصني قال 7 بعدين 8 ونص و بعدين 10..من صار الرحم مفتوح عشره قال الدكتور شدي..شديت ز قال راسها مو نازل الحوض..قال بروح ساعه و برجع يمكن ينزل الحوض..رد مره ثانيه حاول فيني و مارضى ينزل راسها الحوض..بعدين سحبها شديت و طلعت حطوها على بطني...


و حسيت اني بحلم ماشاء الله..و قعدت تبجي..و الدكتور خيطني بس الخياط عواره يتعب صراحه
خصوصا بالحمام و لما ادهنه..
والحمدلله يا رب
و عسى ربي يرزق كل المحرومات
و عقبالكم يا رب بالولاده السهله
على كثر ما ان الولاده متعبه ..من تشوفين البيبي تنسين كل شي سبحان الله
و ان شاء الله تكون ولادتي قصتها مشجعه لكم و للبجريات

♥♥♥

 

[HoD'HoD]

السلام عليكم

الحمدلله الذي بنعمته تتم الصالحات ولدت بالسلامة ويبت بنوتة

مشكورين كل اللي باركولي والله يبارك فيكم ويسلمكم حبايبي والفال لكم بالولادة يارب

وهذي قصة ولادتي السعيدة لووول والصدفة العجيبة انا وغنوجة ولدنا بنفس اليوم ونفس المستشفى وتقريبا بيننا ساعه كانت جارتي بغرفة الولادة ههههه

الله يسلمكم ولدت يوم الخميس الظهر تاريخ ٢٢/٥ ورزقني ربي ببنوتة الله يحفظها لي وزنها ٣.٠٤٠ كيلو وطبعا حده السونار فلم كانت ٣.٣٥٠ وايد مزيدها

بداية القصة بدت مع موعدي بالاسبوع الثاني من التاسع فحصتني الدكتورة والرحم كان فاتح ٢ سانتي ورحتلها بعد ٣ ايام فتح ٤ سانتي والبيبي نزل بالحوض قالت خلال اسبوع ممكن تولدين ومر اسبوع وانا ماكو اي بوادر ولادة

رحت حق الدكتورة وفحصتني البيبي نازل بالحوض اكثر والرحم فاتح ٤ ليلحين قالت كثري مشي وشربي اعشاب وان شاءالله اييج الطلق عشان ادخلج ولادة واذا ماولدتي بيوم موعدج تاريخ ٢٦ راح اسويلج دخول ولادة

عاد يوم الثلاثا والاربعا رحت الممشى ومشيت ساعه كاملة وارد البيت اشرب دارسين وحليب وزعفران على امل ان اييني عوار وماكو شي نهائياً

يوم الخميس قعدت من النوم الصبح وحسيت في شي نزل دشيت الحمام وانتو بكرامة ولا ماي تارس الكيرفري ومدمرني بدلت وتوني بنزل الصاله ولا شي ينزل جيكت وهم ماي وتم ينزل على دفعات طبعا مانطرت لبست على طول وخذيت جنطتي ورحت المستشفى مع امي وريلي

دخلت على دكتورتي بالعيادة وانا انطر الدور ينزل ماي على ريولي قلت لاااا صارت خلاص المهم دشيت وفحصتني قالت فاتح ٤ سانتي بس دخول ولادة لان الماي نزل والبيبي بالحوض قلت توكلي على الله سويت اجراءات الدخول وطبعا لي هني مافيني عوار ولا طلق ولااااا شي

شكلي عجيييييب وانا داشة جناح الولادة اللي فيه غرف الولادة على ريولي واضحك وودعت ريلي وقلت حق امي ادعيلي ودشيت متحمسة هههههه

دخلوني الغرفة ابدل وحطولي حقنة شرجية وقالت لي السستر امشي بالغرفة لما نجهز غرفة الولادة وقعدت امشي وادعي ربي يسهل علي واستغفر طول الوقت

يتني السستر ماسكتني من ايدي ونتمشى بالممر هههه ودخلتني غرفة الولادة جان انسدح على سرير الولادة حسيت بخوف شويه لان اللي يمي تطلق وتصرخ المهم ركبتلي السستر التخطيط والدرب طالعت الساعة ولا الساعة ١ الظهر بالضبط قالت لي تبين ابرة ظهر قلتلها لا انا قوية راح اتحمل جان تضحك

يتني الدكتورة على طول وفحصت ولا واصل ٥ سانتي وانا مافيني عوار جان تقول عطوها طلق بالدرب جرعة خفيفة وراحت وعقب ماحطته بدى مغص خفيف وحطولي الكمام

هني انا دخلت عالم ثاني مادري عن نفسي بس اسمع اصوات السسترات ووعيت لما السستر تناديني جان تقولي الرحم فاتح ٧ سانتي الحين بعد شوي تولدين طالعت الساعه كانت ١:٣٦ حطولي الكمام مرة ثانية وحسيت انها قاعدة تركب البربيش بس ماحسيت بالعوار بس بضغط

ما وعيت الا منوميني على الجنب اليسار وانا اسوي بش من نفسي السستر تقولي شنو فيج تحسين البيبي يبي يطلع اقولها اي جان تقولي اذا ياج عوار طلق سوي بش عشان تساعدين البيبي ينزل شوي اثاري انا ماكنت اسوي شي البيبي قاعد ينزل بروحه واهيه ماتدري عبالها فيني عوار واتعصر منه واقول شكو انطر العوار خل افتك جان اسوي بش مرتين

وماصارت ٥ دقايق الا الدكتورة داشة الغرفة ركض طبعا بعدين امي قالتلي انهم قاعدين ينطروني بره ويشوفون الدكتورة تطلع من الاصنصير ركض اخترعوا عبالهم فيني شي

المهم دشت الدكتورة وقاعده تلبس لبس العمليات وحطو ريولي فوق جان اقولها دكتورة جم وصل الرحم كان ٧ جان تقولي ياماما انتي فاتحة ١٠ سانتي وراس البيبي طالع انتي مو حاسه بشي؟؟ جان ابتسم اقولها مادري مو حاسه جنه حلم جان تقول طب كويس بسم الله وتشق طبعا ماحسيت بشي واسمعهم يقولون في طلق شدي شدي وانا اشد جان تقولي مرتين وخلاص شديت مرتين جان تطلع البيبي حطوها على صدري حبيبتي

عقبها صحيت ماكو احد بالغرفة والليتات والاجهزة مصكره طالعت الساعه ولا ٣:٥٥ حطيت ايدي على راسي ماكو شي شايلين كبوس العمليات وحطيت ايدي على بطني فاش ماكو بطن

جان تدش سستر اقولها انا ولدت قالت اي خلصتي ولادة وتضحك وارد اسألها شلون البيبي تقولي اوكي الحين نوديج غرفتج خلاص

وطبعا بعدين يتني الاخبار من امي تقولي عقب ماولدتي طلعت الدكتورة تقولي بنتج غريبة الطلق حامي حيل واهيه مو حاسة بالألم هههه

كانت الولادة سهالة الحمدلله رب العالمين بفضله ماتعبت دشيت الولادة الساعه ١ وبلش الطلق معاي الساعه ١:١١ وولدت ٢ ماعديت الساعة كله بفضل الله ثم بفضل الدعاء والدكتورة اللي اتينن صبرت علي وايد كانت تقدر تدخلني بطلق صناعي من اول مافتح الرحم ٢ سانتي بس مارضت ماتبي تتعبني

شرايكم بقصتي الفلم ههههه

الفال للي ماولدت ربي يرزقها بولادة سهلة ميسرة ويرزق كل محرومة يارب

 

[نور الضي]

الحمدالله علي سلامتج
هدهد
عسي كل ولاداتج نفس هالولاده
بس فيلم انتي وغنوجه
ماتواجهتوا؟

 

[مذهلة2013]

الحمدلله على السلامه هدهد
ماشاءالله قصتج اتينن اتمنى اولد نفس هالقصه
ربي يخليلج البيبي

 

[لوولوو_88]

الحمدلله على سلامتج هدهد حبيبتي و مبروك ما ياج .. قصتج عجيييييييييييبه ربي ترزق الكل الولاده السهلة و الميسرة .. و احلى شي الصدفه مع غنوجه ههههه يا حلوكم

 

[ElRaZaH]

الحمدلله ع سلامتكم غنوجه وهدهد ويتربون بعزكم ان شاء الله

قصصكم تحمس وان شاء الله الله يسهل علينا يارب

 

[مذهلة2013]

الرزة

يلا ما بقالنا شيء
ربي يسهل علينااااااا يااااااااارب :yaaaaaarb:

 

[ElRaZaH]

اي والله قربت الصجيه.



امييين ياااارب

 

[Om_Sanad]

ماشاءالله الف الف مبروك هدهد. شجعتيني
تتربي بعزكم ان شاءالله يارب ولادتي تكون جذي ماحس بشي واضحك
حدي خايففه

غنوجه قلبي باركت لج بنجمع يونيو ابارك لج اهني بعد. ماشاءالله عليكم اثنيناتكم الله سهل عليكم
تتربي بعزكم بنتكم وتشوفونها عروسه

سكر وزينه وشربات :ggdw:

 

[Om_Sanad]

سوري قصدي رفيعة الشان
مو سكر تو الناس عل سكر ههههه

 

[Bnt-USA]

الف مبرووووك غنوجه الولاده و هدهد الله يقومكم بالسلامه يارب وووومبرووك البنوتات الحلوين

الله يرزقني مثل ولادتج يا هذهد يارب ماشاءالله تبارك الله