رحلتنا الرائعه الى استراليا(سدني-مالبورن-جولد كوست)---بالصور

[سمسميه]

السلام عليكم
من بعد ذكر -لا اله الا الله-
يسعدني اشاركم روعة الرحله الى استراليا اغسطس 2008
مدة الرحله اسبوعين واشتملت زيارة المدن التاليه سدني - مالبورن - جولد كوست
اخترنا طيران الخطوط التايلنديه وكان طيرانهم حلو ومواعيدهم حلوه بعد

الرحله الاولى من الكويت الى بانكوك(ترانزيت) وكانت مدتها 7 ساعات تقريبا

هذي صورة الطياره من مطار الكويت



واليكم هذي اللقطه من نافذة الطياره




وصلنا مطار تايلند ويدوب نزلنا على طول كان النداء الاخير للطياره الثانيه من بانكوك الى سدني ومدة الرحله 9 ساعات!!!

صج صج تعبنا من طول الرحله والافضل لو ان الواحد يريح بتايلند شويه يوم او يومين ثم يتابع السفر

واليكم هاللقطه ايضا من نافذة الطياره



يتبع---

 

[سمسميه]

اول ما وصلنا سدني كان عندهم مغرب وكنا ميتين من اليوع لكن للاسف مطارهم كل المحلات والمطاعم الي فيه مسكره!!
لان الديره اغلب محلاتها تسكر 6 مساءا ما عدى الخميس اعتقد تظل لي ال 9
طبعا فرق التوقيت بينا وبينهم 7 ساعات
على طول خذينا تاكسي ورحنا الفندق(شقق فندقيه)



الفندق موقعه ممتاز كل شي ينراح له مشي ومن حيث النظافه بعد حلو بس للاسف نسيت اصوره من داخل!!:tomato2:
بس فيه عيب كبير!! غرفة النوم الرئيسيه بابها ما فيه قفل!!!!!!!!:eh_s(1):
وهذي المشكله واجهتنا بكل الشقق الفندقيه الي سكناها البيبان بدون قفل!!

غرفتنا كانت في الدور 75!!
وهذا المنظر الي تطل عليه الغرفه


هني اول ما وصانا كان ليل

وهني مغرب



وهني صبح



تحسون مستانسه على المنظر!!خخخخخخخخ:dddds:

يتبع---

 

[عيمية^والقلب^كندري]

اولا ماشالله والله يهنيج ومتابعة تقريرج الرائع :ggdw:

 

[سمسميه]

واجهتنا مشكله وهي ان جناطنا ما وصلوا بالمطار لان نسوهم في بانكوك!!
والصراحه تبهذلنا يومين بدون ملابس !! على الي يينا فيهم من الكويت
احنا لابسين صيفي واهم درجة الحراره عندهم 15 بررررررررررررررررررد:eh_s(1):
اشوه اني يايبه معاي جاكيتات للياهال دخلتهم معاي بجنطه صغيره بالطياره ووعدونا الخطوط التايلنديه ان من باجر اييبون لنا الجناط لي الاوتيل
اول شي ضاق خلقنا بس لما شفنا الديره اشحلاتها خلتنا نتاقلم مع هدومنا خصوصا ان السوق كله مسكر من الساعه 6 المغرب!!:tomato2:

نزلنا تعشينا جدام الاوتيل اكو مطعم فاتح يبيع اكل تركي حلال كلينا منه بيتزا وتمشينا شويه تالي رحنا نمنا لان كنا تعبانين من الرحله

ثاني يوم اتفقنا مع الريسبشن نبي رحله نشوف فيها معالم سدني وقالت لنا الموظفه جدامكم نص ساعه بس قبل ما يمشي الباص يالله تلحقون عليه
وفعلا لحقنا عليه الساعه 8 ونص بدت الرحله حول معالم سدني والخين اخليكم مع الصور



هذا الجسر الي يم دار الوبرا



وهذي دار الاوبرا



وهذا منظر يطل عليه مرتفع نزلنا عنده سايق الباص للتصوير

لاحظو هالورده الغريبه منتشره عندهم وايد


وهني منظر يطل على المحيط الازرق الرائع يا سبحان الله

يتبع---

 

[سمسميه]

ام مهدي
اسعدني مرورج ومتابعتج

 

[سمسميه]

وبعد ما خلصت الجوله لاهم معالم سدني وقفنا السايق يم الاكواريم الاسترالي واليكم بعض اللقطات من داخل الاكواريوم



الافاعي



الطيور



وهذا الكولا نايم
الموظفه الي تشرح هناك تقول ان الكوالا ينام 20 ساعه باليوم و4 ساعات ياكل!!
قلت بقلبي اكيد فيه عرج كويتي!!خخخخخخخخ:dddds:



وهذي صوره اقرب للكوالا


واكيد ما ننسى اهم حيوان تشتهر فيه استراليا وهو غني عن التعريف



الكنغر

لاحظوا اشلون مرتز حق الصوره!!خخخخخخخخخ:dddds:

يتبع---

 

[سمسميه]

بعدين انتقلنا لقسم الاحياء المائيه واليكم بعض المقتطفات


هذا البطريق الاسترالي الصغير
سلم قلبه:dddds:

وهذا نجم البحر اشكال والوان سبحان الله



طبعا في صور وايد عن حيوانات غريبه وعجيله بس اغلبهم احنا طالعين فيهم:tomato2:
مرتزين:dddds:
هذا الي قدت اعرضه لكم
اليوم الي وراه تمشينا بسيدني بالمنطقه الي حوالينا مجمعات وتسوق
بس لاحظت ان سوقهم مو لي هناك ! يعني اغلبه بضايع صينيه او ماركات والماركات ما عندهم اخر كوليكشن يعني سوقنا احلى منهم
سوقهم عادي جدا
سدني قعدنا فيها يومين والثالث توجهنا فيه للمطار علشان نروح لمدينة الثلج مالبورن



انتظروني في الجزء الياي مع احداث مدينة مالبورن:tek:

 

[Lemon Juice]

عليكم بالعافيه

امبين عليها خوش سفره ما شاء الله

واستراليا بعد ما يبيله ديره ما تنعاف

ناطرينج مع التكمله

 

[supermarket]

متااابعة التقرير الحلو

وبانتظااار الجزء الثاني

 

[toot^o^mishmish]

متابعيييييييييييييييين لا اطولين علينا والف الحمد الله عالسلامة

 

[سنفورة]

تقرير ج باين عليه روعه من بدايته


انتي اي تاريخ كنتي باستراليا ؟؟

احنا العكس كانت جولد كوست وبعدين سدني
وملبورن احرمونا منها السفريااات النصابة ولغوهاااا


عليكم بالف عااافيه

متابعة معاكم

 

[سمسميه]

حياكم الله بنات
ردودكم تونس
جزاكم الله خير
تاريخ الرحله 29-7 الى 14-8

 

[dalprincess]

خوش صور عليكم متابعين التقرير وبغيت اسأل شلون رحتوا ملبرون بطياره وله شنو؟ ؟؟

 

[سمسميه]

الرحله لى مالبورن
اتجهنا للمطار الظهر على الطيران الداخلي"الاكوانتوس" مدة الرحله كانت ساعه تقريبا
وصلنا مالبورن وكان حده برررررررررررررررررررررد
اكثر من سيدني واول ما وصلنا كان يطق مطر
شي عجيب جو رائع رائع رائع
طبعا على ما وصلنا الاوتيل وهو "ستامفورد بلازا" صار المغرب وطبعا كل شي كان مسكر!!
هذا عيبهم بسرعه يسكرون:tomato2:

الاوتيل مع انه 5 ستار بس بصراحه ما عجبني تحسون انه قديم ومدودم!!
وهذي لقطه من اللوبي



وبالزاويه صورت لكم هالبوكيه



طبعا حطينا اغراضنا بالغرفه وطلعنا نتمشى شويه حوالين الاوتيل المدينه حيل هاديه وكشخه منطقه راقيه
وبعدين رحنا حجزنا لرحلة الثلج لباجر لان ماراح نقعد الا يوم واحد وراح نمشي
قعدنا من الصبح من الساعه 6 صباحا:eh_s(1): لان الرحله راح تنطلق 6 ونص بيمرنا الباص
لان مكان الثلج يبيله 3 ساعات ونص على ما نوصل راس الجبل
طول الطريج الصراحه كانت المناظر خياليه وخلابه الصراحه كلمة روعه شويه عليها سبحان الله
الخضره والبقر والغطيطه الي فجاه ندش فيها شي ولا في الخيال
واخليكم مع هالصوره



بعدين كانت معانا حماتي وتعبت شويه من الارتفاع بالجبل الظاهر صار معاها هبوط !!
فلهينا معاها مسكينه وقمنا نحاتيها
ولهالسبب للاسف ما صورت وايد بهاليوم لان كنا محتاسين شويه بس ان شاءالله تكون كمية الصور الي باعرضها كفيله بنقل روعة المناظر الخلابه
يتبع---

 

[سمسميه]

بنص الطريج وقفنا سايق الباص علشان ناجر تكرمون بوتات وجاكيتات لان الدرجه على راس الجبل راح تكون تحت الصفر_03BA:

خذينا العده وكملنا طريجنا واول ما وصلنا الصراحه فزت قلوبنا من روعة الي شفناه
اخليكم مع الصور


هني الكل قااعد يتزلج ويتزحلق على كيف كيفكم!!
شوفوا بنتي مسكينه طاحت وتزحلقت من الثلج!




واكيد ما نسينا نسوي رجل الثلج ولو نه معوق شويه!!
خخخخخخخخخخ


الصراحه كان يوم رهيب نزل علينا السنو جنه مطر!!
مطر من ثلج يا جدعان:dddds:
سبحان الله
وتمينا نلعب بوسط الثلج لما صارت الساعه 3 وشوي ركبنا الباص مره ثانيه لان ورانا درب 3 ساعات ونص لي الاوتيل!
طبعا الياهال نامو بالطريج لما وصلنا الفندق واحنا على طول قطينا روحنا ونمنا من التعب

يتبع---

 

[سمسميه]

ثالث يوم في مالبورن وهو اليوم الي لازم نروح فيه جولد كوست
قعدنا الصبح وقلنا بنطلع نتمشى على ما يصير موعد رحلتنا
تمشينا حوالين الاوتيل دشينا بوتيك جوتشي وشانيل وبعض محلات الماركات
اسعارهم نفس اسعارنا تقريبا بس لاحظت ان التشكيله الي عندهم مو احدث شي

على فكره خل اوريكم فلوسهم (الدولار الاسترالي) يضحكون جنهم فلوس لعبة مونوبولي!!



واحنا نمشي مرينا على هالمعالم



بعدين قعدنا بهالكافيه تريقنا قعدنا بالطاولات الي برا



وطلبنا هالبيض



كلوا منه الي معاي يقولون حلو اما انا اكتفيت بالموكا اللذيذه بهالجو البارد الصراحه حده واااااااااو

وبعدين رجعنا الاوتيل استعدادا للتوجه للمطار للسفر الى محطتنا الاخيره وهي جولد كوست

انتظروني بالجزء الثالث الرحله الى جولد كوست:tek:

 

[amoni]

يعطيك العافية سمسمية وتسلم أيدك على هالموضوع الصراحة موضوعك شوية عليه كلمة روعة اللي يشوفه يقول أنه عايش معاك الأحداث لأنك ماشيه بالترتيب ماشاءالله عليك وأنا بأنتظار أحداث الجولد كوست ترى ماراح أنسى

 

[شيهانه]

مشكوووووووووورة على هل التقرير الحلو وعليكم بالعافيه .. واما الفلوووس نكته صاااجه كانها بروي مو صج على هل الالوان ..

 

[F@ntG Q@t]

وناااااااااسة عليكم بالعافية

 

[زيـنـه]

سمسم

الحمدلله على السلامه

و متابعين تقريرج

بس مو شي ضياعة الجناط .. لان ماكان في وقت ترانزيت كافي في بانكوك .. يلا تتعلمون من العلئه