روايتي الاولى : (دليسا )

[سمراء اليل]

متي البارت الجاي

 

[Lolwa]

الفصل الرابع والعشرون​

​

يوصل بو أمجد مع فريده البيت​

ويلقون أمجد يستقبلهم​

بو أمجد : هلا أمجد​

أمجد: هلا يبا​

بو أمجد : سلم على خطيبتك ​

أمجد : هلا والله بفريده ​

فريده مشمأزه : بروح غرفتي أنام ​

يمسك أمجد ايدها : لحضه بيي وياج​

فريده مخترعه : شنو بتيي معاي ​

وتوخر ايده ​

أمجد : بكلمج بس​

فريده : مابينا كلام ​

بو أمجد : يا فريده طاوعي خطيبج​

فريده وهي تدمع وتصارخ : مو خطيبي موخطيبي ....يا وحوش ...أنا قاعده ببيت غريب مو ببيت أهلي ...طلعوني من هالبيت مابيكم مابيـــــــــــــــــــــــــكم ​

وتاخذ الفازه اللي تزين طاوله زاوية الصاله وتكسرها بالقاع وتصارخ : وحووووووووووووش ​

( ياتها حاله هستيريه ) ​

انتوا مو أهل ...انتوا أعداااااااء​

وحوووووووش ​

​

ماوتعت الا يايها طراق سنع يوعيها​

هالمره من أمجد ​

ويشيلها أمجد على كتفه وهي تقاوم وتصارخ وتطقه​

ويركب فيها الدري لي غرفتها ويقطها عالسرير ​

وتقوم من سريرها بتكسر شغله بغرفتها​

لكنه يمسك ايدها​

وايدها الثانيه تطق فيه أمجد​

ويمسك ايدها الثانيه ​

​

ويسدحها عالسرير مره ثانيه ​

وهو ماسك ايدينها الثنتين وهي تصارخ​

​

خلاها تصارخ فتره الين تعبت وانبح صوتها​

وقلب المود من العصبيه الى البجي ​

فريده وهي تبجي : مابيك ...ما أحبك ....مابي أتزوجك ....موريال اذا تزوجتني ....سامعني ... موريال ....أنا أحب رفيجك بدر ...أحبه وأبي اهو اللي يكون زوجي ... ما أتخيل أحد غيره يكون زوجي ...​

أمجد يطالعها وهو مبتسم : أدري قالولي ...​

بس اللي انتي ماتدرين عنه انه بدر مايحبج​

​

اهني فريده سكتت وطالعته فتره​

وهدها أمجد ​

وعدلت قعدتها بالسرير ​

فريده : انت شتقول ؟​

أمجد : بدر حبيبج هذا مايخش عني شي مثل ما أنا ما أخش عنه شي ​

كان مايدري انج بنت عمي يوم انه عرفج​

تدرين شلون عرفج ؟​

من خالته ناظرتج عايشه​

كات تبي تفتك منج ومن شطانتج عن طريق تخرجج ...واتفقت معاه انه يخليج تحبينه علشان تجابلين دروسج وتطلعين من مدرستها , وووعدته انها تعطيه ثلاثة الاف اذا نجحتي وتخرجتي ​

فريده : اكل خراك ....انت تجذب ... تقول هالسالفه علشان تبيني اكرهه ...​

أمجد يقوم ويوصل للباب : والله اذا مو مصدقتني دقي عليه . مستعد اييبلج تلفونج من ابوي علشان تسألينه ....والا أقولج ....شرايج أوديج باجر حق ناظرتج وتسألينها ...لأن بدر أكيد بينكر ...​

​

فريده : ودني حق الناظره باجر ...وأبي أسألها وانت يمي علشان تشوف نكرانها للموضوع ...​

أمجد : صار ...باجر راح تبان عندج الصوره عدل ...وتعرفين منو اللي يلعب عليج ومنو اللي يبي مصلحتج....​

ويروح ويسكر الباب وراه​

​

فريده : لأ مستحيل .... كل هالمده عايشه بوهم الحب .... ماني مصدقه .....يارب يكون أمجد جذاب وتنكر أبله عايشه الموضوع​

​

وفعلا تروح وياه في صباح اليوم التالي​

وتدش فريده تدرعم غرفة الناظره و أبله عايشه مستغربه قدومها الدفش والمفاجيء!!!​

عايشه :فريده ؟ خير شكو يايه وداشه بهالطريقه ؟ شعندج ؟​

فريده : صج انتي متفقه مع ولد اختج بدر انه يحبني واذا نجح تعطينه ثلاثه الاف ؟​

عايشه تدودهت : شنو م م منو قال هالكلام ؟ بدر ؟​

فريده : طبعا بدر اكو غيره ؟​

تقوم عايشه متصروعه وتتلوفت بره لا أحد يكون سامعهم ​

وتسكر الباب وترد تطالعها وتطالع أمجد ...​

عايشه : بدر يجذب ... مالج شغل فيه.. ​

أمجد : تنكرين انه كان منخش ورى مكتبج يوم انج تنادين فريده وقعد يتفحصها عشان يكون بدايه اتفاقكم؟​

عايشه : شششش قصروا حسكم . انتوا بمكان عمل ...​

أمجد : خوش! مكان عمل . ناظره تربويه ترضى الغلط على وحده من طالباتها .......هذا خوش عنوان حق أول صفحه بالجريده ...​

عايشه : شتبون مني انتوا الحين ؟​

فريده : ابي أعرف صح هالكلام والا لأ ؟​

عايشه : اه اه طبعا مو صج ... انتوا يايين تهينون موظف أثناء تأدية عمله ؟​

أمجد : وانتي تبيعين طالباتج وشرفهم ...ترى عقاب هذا أكبر عند القانون ...​

عايشه تقعد بمكتبها وتبتسم وهي ترجع بالكرسي متسنده عليه بالراحه​

عايشه : وشنو اثباتكم ؟​

فريده : خلاص ...يكفي اللي شفته....تأكدت الحين انكم كنتوا متآمرين علي ..​

وتطالع أمجد وهي تدمع : ودني البيت الحين ...​

أمجد : ماتبين نرفع عليها قضية عدم تأدية العمل بأمانه والتآمر على طالبه من طلابها لأمور شخصيه ​

عايشه تطالعه معصبه وميته من الخوف وقلبها يرقع : طلعوا بره ​

امجد : احنا ماشين ...يا ....حضرة الناظره المحترمه....​

وتطلع فريده وتركض لي عند سيارة أمجد ​

عايشه : انت مورفيج بدر ؟ ليش تتآمر عليه وتفضحه ؟​

أمجد : لأنه خش علي سالفة انه البنت اللي تكلم عنها وايد تكون بنت عمي ... وراح أعلمه شغله الخسيس....اشوفج على خير يا ......حضرة الناظره....​

ويروح عند السياره ويشوف فريده ناطرته وهي تمسح دموعها ​

أمجد : شفتي يا حبي اني أبيلج الخير .... أشوه اني فضحتهم علشان ماتطيحين بشباكهم هالناس الخمه ​

فريده : بطل الباب وودني البيت ...​

وهم بالسياره ​

أمجد : يا بعد عمري لا تسوين بروحج جذي ... هذا ماسيتاهل حبج ولا دمعه من دموعج الغاليه تسواه .... ترى ياما لعب عالبنات وقص عليهم وهدهم ..تراه انسان مو سوي ...​

فريده : نفسك انت ... علشان جذي مصادقين بعض ... لأنكم نفس الطبجه ....​

أمجد : لأ لأ لأ .... فريده ليش الغلط هذا....يه ؟ شفيج صبيتي الغضب علي أنا .... أفاعليج بس ...تزعليني يعني؟ ​

فريده :.....​

ويوصلون البيت ​

​

وفريده تروح غرفتها وتقفل على روحها ​

وسلوى ناطرتهم يجون وتاخذ أمجد على صوب ​

سلوى : بشر ؟​

أمجد : كلشي تمام التمام .... شكلها الحين منصدمه وعلى وشك انها تكرهه.... ​

سلوى : عفيه على ولدي الباخص .....الحين دورك ...فرصتك الحين تكون بالصوره وتعوضها خيانة اللي تحبه ...الحين قلبها مكسور وتبي اللي يمليه لها الحب من جديد .... عاد انت وشطارتك الحين...​

أمجد : لاتوصين حريص يا أمي ...​

سلوى : عفيه..... ولد أمه ...​

ويضحكون​

 

[سمراء اليل]

عمتها حقييييره وولد عها اكبر حقييير كل هذا عشان الفلوس بدر مشاعره صادقه كان المفروض يكون صريح معاها عشان ما يصير اللي صار


لي سؤال للكاتبه هذي اول روايه تكتبينها ولا لا تدرين ان هذي اول روايه ارضي اتابعها علي النت اول كللش ما اتابع روايه بس روايتج فيها سحر تخلينا نموت فيها لحظه ممكن رقم الساحر اللي مخليته يسحرنا هههههههههه مزحه اكيد الساحر دلوسا صح بصراحه روايه دلوسا احلي روايه

 

[سمراء اليل]

عمتها حقييييره وولد عها اكبر حقييير كل هذا عشان الفلوس بدر مشاعره صادقه كان المفروض يكون صريح معاها عشان ما يصير اللي صار


لي سؤال للكاتبه هذي اول روايه تكتبينها ولا لا تدرين ان هذي اول روايه ارضي اتابعها علي النت اول كللش ما اتابع روايه بس روايتج فيها سحر تخلينا نموت فيها لحظه ممكن رقم الساحر اللي مخليته يسحرنا هههههههههه مزحه اكيد الساحر دلوسا صح بصراحه روايه دلوسا احلي روايه

 

[Lolwa]

بعد عمري سمراء الليل.مشكوره عالاطراء الحلو. ..والحمد لله انه الروايه نالت احسانكم حبايبي....وبالنسبه لسؤالج.....اي هذي أول مره أخوض سالفة الكتابه. .والحمد لله انها كانت بدايه طيبه...والسحر يكون بكثرة التشويق بالقصه والباجي بعد يايكم بالطريج ههه


وحياج حبيبتي مره ثانيه. ....


تابعوني حبيباتي

 

[Lolwa]

أبي ردود سنعه علشان أحطلكم اليوم بارت مبجر

ترى كاهو زاهب بالوورد بس ناطر ردودكم

واللي توهم يقرون القصه شدعوه كلمه تشجعني شويونه

اليوم ماي شطاري علي ؟

مشتهيه اتغلى شوي
هههه

 

[miss 3yara]

امبييه ويييع شهالعايله :S
الله يعينج فريده
ناطرينج حبيببتي

 

[Aloolah]

اي حبيبتي تغلي على راااااحتج تستاهلين

نااااااااااااااااااطرينج نبي بااارت يبرد الجبد

 

[سمراء اليل]

ناطرينج انضاااااااار

 

[Lolwa]

الفصل الخامس والعشرون​

​

ببيت بو ناصر​

سلوى تتكلم بالتلفون : مبروك حبيبتي ..ألف ألف مبروك ..تستاهل فتون الغاليه​

الجانب الاخر من التلفون​

ام ناصر : الله يبارك فيج حبيبتي والفال لنور ونورا انشاء الله​

سلوى : متى بتملجون ؟​

أم ناصر : بعد اسبوع اشاء الله ..​

سلوى : والعرس ؟​

أم ناصر :بعد شهر ان الله كتب ...​

سلوى: ووين بتسوون العرس​

أم ناصر : بفندق ( الفلاني )انشاء الله​

سلوى : واي اينن هالفندق​

أم ناصر :...اي وايد حلو​

ويستمرون بالحديث .........​

​

فتون يم امها بالصاله والفرحه ماليه عينها​

فتون : فجوره لبسيني السوار هذا​

فجر تلبسها​

فجر : وايد مستانسه اليوم؟ اي !!! بيي رائد اليوم عالغدى ....شلون ما تستانسين ؟​

فتون : بس ...لبسيني وانتي ساكته...​

ويوصل رائد ويا امه وريم​

وتستقبلهم أم ناصر​

ويتغدون ...وبعد الغدى ووقت التحليه ويقعدون يسولفون ....وتحرص فتون انها تقعد يمه ....وتحاول تسولف وياه وتوانسه ...لكن رائد مايلقيها ويه وكلا مبوز ..ومكشر ...لاحظت فتون المود البايخ ماله ..​

فتون بقلبها : يعني كل مره جذي يا رائد؟​

أم ناصر : تعالي اخذي قطعة الجيز كيك وعطيه خطيبج​

فتون : انشالله​

وتاخذ الصحن وتقعد يمه وتقول : حبيبي إخذ هاللقمه مني​

رائد : ياخذ منها القفشه والصحن ويحطهم عالطاوله , بعد شوي آكل بروحي مابي الحين ..​

فتون انقص ويهها​

فتون : على راحتك حبيبي...​

رائد حاقرها ويدخل بسوالف مع أمه عن مواضيع متنوعه وتسأله أم ناصر ويجاوبها وهو مبتسم ..بس من تدش فتون بالموضوع يرد يكشر ويسكت ولا يجاوب على أسئلتها ومشاركاتها...​

فتون اهني طفح الكيل عندها وتقوم ...​

فتون بصوت عالي : رائد..​

رائد يطالعها ببرود​

فتون : ممكن شوي ؟​

وتروح شوي بعيد عن أهلها​

رائد ليلحين ماقام ولا وده يقوم​

أم رائد : يمه شوف خطيبتك شتبي بعدين تعال كمل سالفتك ...​

رائد وهو يقوم غصب وهو يتنهد : ...انشاء الله​

​

فتون تتكلم بصوت واطي : شفيك علي رائد ؟ ليش جذي تعاملني؟​

رائد : مافي شي ...​

فتون وخانقتها العبره : رائد أنا أحبك , وأنطر الوقت اللي انت بتيي عندنا البيت وأكون طايره من الفرحه... عكسك انت ,من خطبنا وانت كلما تيي بيتنا و نتلاقي ماتلقيني ويه ...​

رائد : تروالج ...تبين انتي الحين مني شي غير التحلطم هذا ..​

فتون : تبجي وتحط إيدها على ويهها وتركب غرفتها وهي تصيح​

أم ناصر : فتونه شفيج أمي ؟​

ريم تشوفها وتلحقها لي غرفتها​

أم رائد تطالع رائد معصبه : شقلت لها ؟​

رائد : ماقلت شي ... يالله خن نروح البيت ... دخت بنام .​

​

​

​

بيت بو أمجد بالليل​

​

يرن الجرس​

​

تبطله الخدامه​

وتيي ركض عند سلوى​

​

الخدامه : ماما هذا رجال صديق بابا أمجد يجي مع واجد رجال !​

سلوى : شنو ؟​

وتروح تطل من الدريشه تلقى بدر مع رياييل متهندمين وكاشخين بالدشاديش والرزه والاقتر المنسوفه بحركات فنيه....​

سلوى طاح قلبها يوم شافتهم والبست عبايتها وكلمتهم من ورى الباب الرئيسي للصاله و المطله للحوش ...​

سلوى :هلا والله ؟​

بدر : شلونج خالتي ؟​

سلوى تحاجيه بثقل : الحمد لله​

بدر : وين عمي بو أمجد ؟ بغيناه بسالفه ضروريه ؟​

سلوى : أهو طالع الحين بس ياي بالطريج ...اه ...اه ....حياكم حياكم بالدوانيه ..​

بدر : الله يحييج خالتي ... ياليت تدقين عليه وتستعجلينه..​

سلوى باستغراب : خير يا ولدي ؟ ماقلتلي شبغيتوا فيه ؟​

بدر : لي يه راح تعرفون انشاء الله...​

وتدش سلوى داخل​

وبسرعه تدق على ريلها وتقوله عن الرياييل اللي ناطرينه مع بدر...​

سلوى : هذا لايكون سواها وياي يخطبها رسمي منه ويايب أهله يشهدون وياه ؟​

بو أمجد : الظاهر جذي ... والا ليش عيل يايين ؟​

سلوى : شلون الحين ؟​

بو أمجد : أنا راح أتصرف​

​

​

وتخلص من مكالمتها من بو أمجد وتدق على أمجد ....​

سلوى : أمجد إلحق!!!!!​

​

يوصل بو أمجد البيت ويدش الدوانيه​

​

بدر : قوه عمي ؟​

بو أمجد : هلا هلا ...حيا الله من يانه والله​

ويسلمون عليه واحد واحد ويقعدون​

بدر يعرفه عليهم أثناء ما هو يسلم عليهم​

بدر : هذا خالي العود سعد ...وهذا ولده محمد .... وهذا خالي عبدالرحمن ...وهذا خالي صالح ...​

بو أمجد : ياهلا ...حياكم الله ...تفضلوا استريحوا ..​

بعد مايتعرفون على بعض يتكلم الخال العود و يبدي بالموضوع..​

سعد : وطبعا احنا اليوم يايين ولنا الشرف ان احنا تناسب معاكم ونطلب إيد بنتكم فريده حق ولدنا بدر ..​

بو أمجد يبين لهم انه ضايق خلقه: بس فريده مخطوبه حق ولد عمها والزواج قريب انشاء الله... كان بودي اني أساعدكم ...سامحوني ..​

سعد : وهل اهي موافقه على ولد عمها ؟ يليتك تسأل البنت الحين اذا هي موافقه عليه ...لأني أنا سامع انها ماتبيه ومايجوز تزوج البنت بالإكراه...​

​

أمجد توه واصل​

أمجد : ومن قال انه احنا بنزوجها بالاكراه لاسمح الله؟؟؟...البنت​

تبيني وراضيه فيني ...احنا مانغصب بناتنا عالزواج ...شنو شايفنا ؟ ..​

​

​

​

 

[سمراء اليل]

ااااااااااااااه ودي امسك امجدو هذا وامه واكفخهم لين ما اقول بس واقولهم احسن لولو يا ليت لو تخلين هذا الشرف لي والله شسوي خلوني اعصب جد حقاره وعمها الله يهديه




متااااااابعه ومتي البارت الجاي

 

[Aloolah]

وييييييع امجد اما امه مال بكس يكسر خشمها و مال تمجع من كشتها هل سحليه ام الخلاجين << لووول من القهر


مشكوووورة على البارت

 

[Lolwa]

أنا وياكم سلوى وأمجد يبطون الجبد

بس نطروا شبيصير بعدين
وللقصه مفاجآت

نطروني اليوم بالليل

 

[miss 3yara]

اي شي !! ويع امجد
كملي حبيبتي ناطرينج

 

[Lolwa]

الفصل السادس والعشرون​

​

بدر : الا مغصبينها ونص .... ما أصدق كلام يطلع من واحد خاين العشره ونذل نفسك..​

أمجد : أنا خاين العشره ؟ مادري منو اللي خاين العشره ؟ اللي يواعد أعراض الناس وشرفهم !!!... ومو أي ناس!! شرف رفيجه !!!​

بدر :اي شرف انت ؟ لايكون انت اخوها أو ابوها وانا مادري​

أمجد : أنا ولد عمها...​

بدر : اذا اهي من عرضك مثل ماتقول ياولد عمها؟ ليش عيل متكلم عنها عندي ذاك اليوم كأنه وحده ماتعرفها يايه من الشارع ؟ ماتخاف على عرضها وشرفها ؟؟؟​

أمجد : من باب الميانه ...حاسبك رفيجي ؟؟​

بدريبتسم : شفت شلون إنك نذل وخسيس ..مافي واحد يتكلم عن عرضه حتى لو عند أقرب رفيج عنده ,اسمه انه غريب عنه وعنها..​

أمجد : يايلي لي بيتي وتهيني بعد ؟ ...يالله , يالله أشوف عرض كتافك ...و تفضل من غير مطرود ...​

خوال بدر مستغربين من الكلام الكبير اللي قاعد يدور بينهنم !!!​

سعد :يه ؟ انتوا جذي تعاملون الضيوف عندكم ؟​

بو أمجد طاقته البوهه والفشيله مايدري شيقول ..​

سعد : يالله يالله يارياييل قمنا...مالنا مكان هني....​

بو أمجد يساسرولده : مو جذي قصيت ويهي ...​

ويطلعون الرياييل وهم معصبين وكل واحد فيهم يتحلطم وبدر يمر صوب أمجد بيطلع ...وأمجد يبتسمله : نشوفك على خير يابدير...​

بدر ياخذه من فانيلته عند سدره ويلوتها له: اسمعني زين ...فريده لي مولحد غيري ... فامهني ؟ مو تصدق انك بتتزوجها ..هالشي ماراح يصير لو على قص رقبتي ...​

أمجد : يه يه يه !!!!!​

ويطق ايده ويوخرها عنه ...​

أمجد : خربت كشختي ....( ويعدل التي شيرت )​

ويطالعه :وليش ما أصدق ! كاني خاطبها وهي راضيه وحددنا العرس بعد ..​

بدر يطلع من طوره ويطقه بوكس : إنت جذااااااااااااااب ..​

​

ويردله أمجد البوكس ويتكافخون بالقعاع ويفاككونهم الرياييل ويطلعون بره ويا بدر ...​

أمجد يصارخ : علشان بس يكون لك علم وقبل لا تفارج وتطلع من بيتنا ....​

وبحقاره يقول :تراها وصلها خبر الثلاثة آلاف اللي خبرك ...هاه ...​

​

الكل يطالع بدر وبوجوهم علامات الاستغراب: آه ه​

​

وبدر يبي يوصله مره ثانيه علشان يكمل بيطقه ويكوفنه من جديد..بس يمسكونه ومايخلونه يبرد جبدته فيه ...​

بدر : يالـــ(......) حسافه اني كنت رفيجك كل هالسنين ...طلعت منت كفو أحد يصادقك ياجلب..​

أمجد يطالعه بويه كله إنتصارو انه فش غليله وحقده عليه وردله الطراق اللي طقاه من جم يوم ...​

​

ويأشرله حركته المشهوره بينه وبين بدر لي إلعبوا ويا بعض وانتصروا وهوتعبير عن الانتصار:​

الحركه يرفع صبعينه من الايدين ويحطهم على بعض ويكون علامة الاكس ....​

​

بدر شاف الحركه وانقهرمن داخله لكنه يبتسم ويقول حق أهله : خلاص هدوني موكفو عليه الطق الحمار لي طقيته يمشي ...بس اكتيفنا منه ...توكلوا على الله خن نمشي من هالمكان الموبوء....​

أمجد مكشر وأسنانه باينه ​

..: بس بالأخير منو اللي فاااااز ؟؟؟الحماااااااااااااااااار...​

بو أمجد يكفخه على راسه : بس خلصنا يا حمار ... وراحوا خلاص..​

أمجد : يبا خلني أفج غليلي قاهرني خو الــــ(....)...​

​

​

فريده الحين داخل غرفتها من وقت ماردت من الناظره اليوم الصبح وهي ليلحين ماطلعت من غرفتها !!!!​

يرد أمجد البيت وهو مفلع وآثار الطق ماليه ويهه ومزورق من كل صوب !!!​

وتيي سلوى مخترعه وبيدها ضمادات وإسعافات أوليه ...وتمسح بويهه​

نور وأنوار ونورا كانوا مراقبين الوضع​

ويكلمون روحهم :​

نور:مصيبه عليها الرياييل تتحذف عليها من كل صوب ؟....لا ...ويتناجرون عشانها بعد ! وكل واحد مستعد يضحي بعمره على شان خاطرها !!! علامج يانور حظج نايم ؟؟؟( وتكم على روحها ) هممممم مالت...​

نورا : الكاوليه!!! بسبتها سوت نجره وفوضه بين الرياييل!! وخسرت هالاثنين صداقتهم اللي كانت من عمر ؟؟؟؟..باااال ؟​

أنوار هي مع لوية عيالها : هنيالها فريده عالحب هذا ...ياليت أنا اللي عندي يحبني جذي ويضحي بعمره علشاني !!!​

وتكلم بنتها : بس ياميومه لا تغنين وتناقزين مو وقتج ....وي!؟؟! جنان موصخه خن أغيرلها...​

​

سلمى تكلم أمها أنوار : يمه منو هذيلي الرياييل؟؟ وليش يايين ؟؟؟وليش خالي أمجد طق رفيجه؟؟؟​

أنوار : يايين يخطبون فريده ...وأمجد خاطبها بعد ...بس هذا مايرضى أحد ثاني يتزوجها غيره.. فحاشته الغيره... وعصب وطق خالج ..عرفتي الحين ؟ مانبي أسئله ثانيه لو سمحتي ..​

سلمى : انزين ليش يحبونها اثنين ؟ خل تتزوج الأثنين عيل ؟​

أنوار : سلموه موفاضيتلج أنا ...يبي الحفاظ هناك اللي فوق القنفه ..​

سلمى تروح تييب الحفاظ : الحين خالوه أمجد مو يصير رفيج هذا الريال اللي طقه ؟ انزين ليش يطقه ؟ أهو يعني محاربه ؟​

أنوار : أوووووووف منج ومن أسألتج ؟ ياليتج تسألين جذي لمن تدرسين ؟بس شالعة قلبي بسوالف انتي ماتعرفينها...قعدي انتي جنووووون خن ألبسج البنطرون ذبحتيني...متى الله ياخذني وأفتك من هالعذاب ,...آخ ياظهري ...الناس تدلع عمرها بخدامه وهذا ولا يتنزل يجيبلي وحده بدال اللي انحاشت !!!!..قطيعه مادري ليش منحاشه ؟ .. ميونه لا تناططين بالقنفه ما أقدر ألبس إختج...​

​

سلمى وايد مستغربه من السالفه وأول مره تشهد خطبة بحياتها وذابحها الفضول ومحد ملقيها ويه ..لامن امها ولا خالتها ولا حتى يدتها ...كل وحده لاهيه بشي اللي تسعف ولدها واللي تساعدها بتضميد أخوها ...وواللي سرحانه باللي صاير وطايحينله حش وقرض ببنت خلق الله ....الخ​

وقررت سلمى انها تسأل صاحبة الشأن هي ماغيرها ...​

​

...وراحت فوق غرفة فريده بتقولها​

تبطل سلمى غرفه فريده ..تتفاجأ بالباب يطلع مقفول !!!​

سلمى : فريده ؟ فريده ؟ فجي الباب....​

محد يرد ولا تسمع أي حركه ؟؟؟​

سلمى : أكو ناس يوا علشان يخطبونج ويطقون بعض وسووا هوشه تحت!​

​

​

ولا حس ولا خبر !!!!​

​

سلمى : ليش ماتفتحين الباب ؟​

​

تنزل سلمى تحت وتشوف خالها أمجد منسدح وتوها يدتها خالصه من اسعافاته ..​

وتقعد يمه سلمى : خالي خالي ؟؟​

بوأمجد : لا تأذينه توه مطقوق مايقدر يسولف وياج يابنتي...​

سلمى : ليش فريده قافله على روحها الباب وماترد علي لمن أناديها ؟؟؟​

سلوى : طقي عليها الباب حيل وتقعدلج من النوم هالمخديه...​

سلمى : إي طقيت حيل ومده !بس ماتسمعني !!!​

جنان أم السنه ونص حست إنه هاليوم فيه شي غيروغريب وكلهم ملتمين بالصاله ويتناقشون وبصوت عالي وضايق خلقهم... ومومن عوايدهم انهم يسوون جذي ..​

وراحت حق يدها بو أمجد تلمه وتاخذ منه حنان !!!!​

بو أمجد : بس بس خلصنا من هالسالفه خرعتوا الياهل ...أنوار بنتي ... ليش ماتاخذين عيالج الحين وتروحين بيتكم وتيين باجر لين تهدى الأوضاع ؟​

أنوار: انشاء الله يبا ...​

وتلم عيالها ولويتها وتطلع من البيت ...​

أمجد توه يستوعب كلام سلمى بعد ماراحت ... ويقوم فجأه...ويعوره راسه من قومته الفجائيه : أخ راسي...​

سلوى : شفيك أمي ؟​

أمجد يطالع بالساعه : الساعه جم ؟​

يلقاها 11 بالليل​

ويفز ويروح الدري وهو ماسك راسه اللي يعوره​

سلوي: لا تجهد روحك ..انت متعور !​

يروح غرفة فريده ويفج الباب ....طبعا مقفول !​

..: فريده ....فريده فجي الباب ..​

​

​

صخه.............​

​

فريده..... فريده!!!! تسمعيني ؟؟؟​

فجي الباااب ...​

ويطق الباب... ويطق الباب حيل وكلماله ويزيد القوه​

​

​

هم ماكو فايده!!​

​

اخترع أمجد ويرجع شوي ويطق الباب حيل بجتفة بيكسره​

مره...​

​

ويرفسه بريله بالمره الثانيه ...​

​

والثالثه....​

​

وسط ذهول أهله !!!!!!!!!!!!!!!!!​

ويجي أبوه يساعده ويطق وياه الباب بيكسره ويشلعه​

​

وأخيرا​

​

ينشلع الباب ويتمايل من مكانه ويدشون كلهم الغرفه​

ويلقى أمجد فريده طايحه بالقاع يم السرير وحوالينها الدم ...!!!​

​

​

بو أمجد وعياله ومرته : آآآآه​

أمجد وهو مذهول من المنظر ومخترع بنفس الوقت ....​

يشيلها ويحط راسها بحضنه .....ويتفحص من وين ياي الدم؟​

​

ياي من ايدينها!!!!(بالوريد اللي يكون تحت الكفين لفريده )​

​

ويشوف يمها قلاص مكسور بالأرض!!!!​

​

يطق أمجد بخدودها بيقعدها ويناديها​

​

​

وفريده مايظهر منها أي إنفعال ويحط أذونه على صدرها بيسمع دقات قلبها!!​

أمجد يرتاح من صوت الدقات : الحمدلله ....​

​

أمجد يصارخ على أهله اللي بس يتفرجون : شناطرين دقوا عالاسعاااااااااااااااااااااااااااااااااااف​

 

[Aloolah]

حدي اندمجت و يعطيييييج العافيه حبيبتي


البارت روووووعه

 

[عازميه ولي فخر]

يمااااي فريده بتنتحر لااا عساها تقوم بسلامه هذا كلا من امجدوو الزفت ولا تنسون امه

 

[سمراء اليل]

لولوه شفتي اختي عازميه ولي الفخر دايم تاخذ اي فوني وانا نايمه وتسجل الدخول باسمها وتنسي الخروج ومرات ارد باسمها اذا شفتي اي رد باسم عازميه تراها انا واللي فوقي الر اللي انا رادته تعبت وياها هين والله ما انام الا ورمز سري طول وعرض وبعرف شلون تدخل

 

[Lolwa]

ألولا حياتي ثانكس عالمتابعه


سمراء الليل ضحكتيني
الله يخليلكم لبعض انشاء الله
قوليلها عن روايتي خل تتابعها

وبالنسبه لفريده

لاتحكمون عليها من هالبارت
نطربوا البارت الياي
بحطه انشاء الله عالتسع
وبتعرفون

 

[άGώâ ми àώàŁ]

ambeeehh:|!
bader 7addyy 7aabeeetaa!!!
Naaaa6reeeeeeeeeeeeenchhhh