ساكنه في بيت حموله ؟ تعالي قوليلنا شلون فطوركم برمضان و شنو طبختي :)

[Zen&7ala]

اهلييين باك



انا ما سويت الورق عنب ما قدرت اطبخه و الفه لاني قعد متأخر فسويت صله على السرييع و اشوه اني مفرزنه كبب



المهم باجر بسوي الورق عنب و سلطه ان شاء الله

 

[ابلة لولوة]

هلا بنات

نصيحه لويه الله

حق اللي ماتطبخ او مالها خلق تطبخ

روحي تفطري عند حمولتج واخذي معاج ماعون

مرة حطي فيه هريس ومره جريش

تلاقونه جاهز عند ابو النخي والباجيلا الي بلجمعيه

وعاده الحموله يحبون هالاصناف

وسعرة رخيص ومايكلف

تعودو لاتدشون على الحموله وايدكم فاضيه

عشان تربيه اهلكم وسنعهم يبين من تصرفاتكم

وعساكم من عواده ​

 

[Zen&7ala]

^
^
^
والله صاجه انا عن نفسي احب اول يوم بالذات اسوي حلو (لان رمضان حلاته سويت ) و سلطه او اي شي خفايف


يعني ما فيها كلافه ولا تعب


و لو بس تقصين خس و تقليلج بطاط او بيديان او زهره او اي شي و يكون عندج اي سوس بالبيت سيزر سوس ولا رانش

ولا فرينش و حطيه و خلطيه بتصير سلطه مو طبيعيه !! و كان الله غفور رحيم

 

[^noonaa^]

انا ساااكنه عند حمولتي ولازم يوميا انزل اجييك عالفطور لانه يوميا نتفطر معاهم ماعدا الايام اللي ازور فيها بيت اهلي
واشوف خالتي شنو مسويه واذا ريلي يبي شي غير عن طباخهم اسويله

 

[قسي قلبك تعيش]

مبارك عليكم الشهر اول شي
ثاني شي مهما سويتي وخدمتي مايبين بعين احد بس لازم نسوي لوجه الله
فنظامنا احنا كل يوم علا وحده تسوي الفطور فاول يوم انا سويت سلطه وتشريب لحم ومجبوس دجاج مع الدقوس وشوربه ومعكرونيه بشمل

والسحور كل واحد بروح فاسوي بشقتي علا قدنا وازيد لخالتي شوي ونزل لها منه
وسلامتكم

 

[شموخي عذبهم]

مرحبااا انا جديده ع المنتدي ويشرفني ايكون اول مشاركه لي هني
انا لي شقه بروحي ومطبخ بروحي بس طبيعه حمولتي ان نتجمع وقت الفطووور وكل وحده من حمواتي عليها شغله فأسوي طبق وانزله بصراحه العام كنت اسوي فطااير تجنن
والسنه هاذي مادرى وش اسوي وامااعرف للطبخخخ وااااايد وماني فنانه فيه بصراحه كل ما سويت شئ خررررب
اليوم سويت مكرونه بـالجبن والقشطه بصينيه بس لما جيت اقصصها تفككتت وانحرجت جني مو حاطتها بصينيه
واللحين محتاره شنو اسوي

 

[هموووم]

انا ساكنة عند حمولتي بجناح وماعندي الا كفتيريا ف انزل اصلح مع خالتي اشياء بسيطة مثل حشوات ويجيب السايق خبز وتحشي الخدامة

 

[MissChoco]

انا ساكنه بشقه عند حمولتي واحنا متعودين من لمن كنت ابيت اهلي انه مانسوي شي
لانه عندنا طباخ وخدم اهما ملزومين يطبخون وينجبون السفره ,, ولا شفايدة الطباخ!!

فأنزل اتفطر والسحور طبعا انا وريلي بشقتنه

 

[opera]

انا ساكنه عندهم و احب انزل اتفطر معاهم .. ضيقه خلق اذا بتفطر انا وريلي بس .. واشرب جاي واحلي بعد عقب الفطور

بعدين اصعد شقتي .. وعادة ما اطلع ولا مكان الا اذا في موجب او زياره

امس ما سويت شي بس خليت ريلي اييب قطايف

اليوم قلت حق خالتي اني بسوي جكن تكا مسالا << اول مره اسوي هالطبق بجرب فيهم

وبس كل يوم اسويلي طبق واحد او حلو

لانه احنا شويه بس عمي وخالتي وانا وريلي اللي انتفطر

 

[عاشقة_الجمال]

انا ساكنه عند حموولتي والعاده اتفطر معاهم

الفطوور خالتي تسوويه وانا مسوويه الكبب

ومرات اسوووي طبق ثاني

بس احنا الفطوور الرسمي عندنا شوربه وتشريب وكبب وسمبووسه احلى واخف

 

[Model Look]

بنااات
انا توني متزوجه
صارلي شهر تقريبا وساكنه معاهم

امس تعباااانه ماسويت شي لانه توني راده من السفر قبل رمضان بيوم

بس دشيت المطبخ مع خالتي واساعدها

القهر ريلي عارف اني تعباانه يقولي جدام خالتي اخاف تعبتي شنو سويتي انتي

شطابخه

وااي قهرررر اصلا اذا بطبخ لازم جمعيه وانا ما مداني

واعرف اطبخ بس العادي مرق دياي ولحم ومجبوس بحكم اني ادرس برا واشتهي مرات

بس فناتق ماعرف

اي و بيتهم مااياكلون ماكو بالبيت الا خالتي وعمي وحماتي

 

[غلا-زوجي]

انا عندي مطبخ فبيت حمولتي ..سويت لهم سلطة دياي ونخي وسلطة الزهرة بالبطاط ونزلت شويه سمبوسه وشوربه..
بس مافيني شده اطبخ زياده لاني حامل بال8

 

[Zen&7ala]

مشاء الله حلو الله يوفقكم يا رب و بنات فيدونا بالاطباق الحلوه المجربه حطولنا صور

 

[غارقة بأحزانها]

انا مو ساكنة عندهم
العادة يوم الجمعة نروح زوارة نتفطر هناك
بس انا شفت خالتي تعبانة
قلت لها خلاص تصير الزوارة بعد التراويح وكل وحدة تييب طبق معاها
مسكينة كل رمضان تطبخ وأتعب روحها ومحد يأكل ويصير فوضة
ناس تبي تتفطر على طول وناس تبي تأكل تمرة وتروح تصلي وعقب ترد
والصراحة عقب الفطور الواحد يتعب ويبي يرتاح خصوصا اول الايام لان الجسم مو متعود عالصيام
لا وازعاج اليهال يخلي الواحد يخرب صيامه
انا عندي الزوارة تكون غبقة احسن

 

[Zen&7ala]

up up up

 

[HaYoOoMa]

مااعندي مطبخ

انزل قبل الفطوور بربع ساااعه

وبسس الحمدالله كل شي الخدامات يسوونه لان خالتي اساسا ماتطبخ

وكل خيييير

عيش وديااي او لحم وشوربه وتشريب وسلطه و جريس

وعقب الفطور علطول نحط الجاي والققهوووه والكبب والسمبوسه والحلويات والحمدالله

واساااساا مافي الا انا وبنتي وخالتي وريلي وعمي وحماااي @@ وبسوووووووو خفيفين هههه

 

[Zen&7ala]

^
^

وناسه ههههههههه

 

[ام الكبتن ماجد]

اب
وناسه تذكرت رمضان

يلا نعيد الموضوع

كل وحده تكتب تجربتها

 

[كويتية بروما]

من تزوجت ماصادف كنت برمضان بالكويت
عالعموم عندهم طباخ مفتكه من الطباخ خخخ

 

[ملكة الفرس]

أنا ساكنه عند حمولتي لكن الله لا يوريكم ألي أشوفه في رمضان عندهم
أول شي على السفره الاخوان و الخوات يتناجرون نجره شوي و يقومون يشدون شعر بعض من النجره
ثاني شي الله يزيد النعمه على الاكل هل الاكل ألي ينطبخ و تارسه السفره من اوله لين آخره و ما ينوكل وكله قط بالزباله بعد الفطور...
وما يعجبهم العجب أذا سويت شي هذا ما يحب البصل وهذا ما يحب الجزر وهذا ما يحب الكزبره و هذا ما يحب الشبت و هذا ما يحب المعكرونه يعني يكرهون الواحد عيشته و يخلون الواحد يندم ندم عمره أنه سوالهم شي ومنها حرمت أسوي شي كلش ... و ترد بالأخير أم زوجي خلو حق الخدم ياكلونه ... !!!
وكل كوم وعيال حمواني كوم و نجره و صراخ و يدورون حوالينا يلعبون و احنا نفطر يعني شقول بس وام ريلي ما غير تتحلطم يعني والله اكره حياتي لمن اقعد اجابلهم على السفره !!!

اما في بيت أهلي والله مو مدح في بيت أهلي الحمدلله رب العالمين أمي ما شا الله تطبخ هل الاكل النظيف و الحلو و المحموس ونقعد على السفره نسمي و نتفطر وأحنا مستانسين و مرتاحين و عقبها نقوم نصلي و عقبها نقعد نشرب جاي و سوالف و غشمره ...