شلون أشتري بيت ؟؟ واللي يعافيكم شاركواا ؟؟

[شمس و قمر]

رد : شلون أشتري بيت ؟؟ واللي يعافيكم شاركواا ؟؟

ااااااخ ضربتوا على الوتر الحساس

زوجي لو يستنى اسمه بالقرعه يبيلنا جم سنه يعني موكثير

بس لو يطلعله بيت سد يمكن يستخف

الاخ حاط في باله بيت راس وارتداد وشغل عدل

تدرون المصيبه وين؟؟؟؟؟؟

انا موموظفه<<<<<< عاله على المجتمع
وزوجي معاشه ضعيف

الحين عندنا بنت وحده وموملحقين عليها
بصراحه الوحده لازم تلبس عيالها احسن لبس وتوكلهم احسن اكل
وتعالجهم عند الخاص لان اذا بتودي عيالها مستشفى حكومه تكون جذي مستغنيه عنهم

 

[@ الرسامة @]

رد : شلون أشتري بيت ؟؟ واللي يعافيكم شاركواا ؟؟

شمس وقمر والله انج صاجة وريلج يتشرط وايد خل يرضى ببيت عادي والا ارتداد انسي اذا كنتي غير موظفة

 

[حواء الكون]

مشاركة: شلون أشتري بيت ؟؟ واللي يعافيكم شاركواا ؟؟

والله ماعندي خبره .. بس اسرع طريقه انج تشهرين بيت تبين تبيعينه اشلون ؟؟

ابي اعرف كل الطرق يعني الواحد ماله خلق يقعد سنه وسنتين وينطر احد يطق الباب

فاشلون يختصر وينشر هالشغله غير نشر اعلان بالوسيط وغيره شنو عندكم افكار ؟؟

 

[أم بدران]

مشاركة: شلون أشتري بيت ؟؟ واللي يعافيكم شاركواا ؟؟

واااااااااااي يابنات ماقدرت اكمل قراءة الردود من الحرة على اللي شفته واللي قلتوه عن غلا البيوت واسعارها يؤيؤيؤ

ماشاء الله عليكم خبرة ياريت ياريت تفيدون جزاكم الله خير



شووفووا ياجماااااااااعة الخير

عندنا بيت ورث وبالجابرية مساحته 500 داخلي يعني بسكة مو على شارع ولا زاوية

تتوقعون جم ييب ...

يمه يمه منهم الدلالين يقولون حده 150 الف

بس اللي سمعته منكم ان البيوت نار وبمناطق خارجية اشلون بالجابرية

عفية بنات نوروني الله ينور عليكم

تصدقون شبيت نار ههههههههه

 

[أم بدران]

مشاركة: شلون أشتري بيت ؟؟ واللي يعافيكم شاركواا ؟؟

وييييييييييييييييه وينكم

على حظي ماكو احد يرد علي ويبرد قلبي

جني ياية اخر الناس
بس البيوت واللي بيشترون بيوت للحين ماخلصوا يتراوالي
وينكم افيدوني افادكم الله

 

[ظلال القرآن]

مشاركة: شلون أشتري بيت ؟؟ واللي يعافيكم شاركواا ؟؟

بالكويت والحين مستحيل بشروطج هذي

مالج الى الدعاء

والله يعينكم

 

[أغلى حبيبه]

مشاركة: شلون أشتري بيت ؟؟ واللي يعافيكم شاركواا ؟؟

ام بدران الدلالوه من يشوفون بيت ورثه يطيحون السعر بالارض مادري ليش

مالكم شغل فيهم انتو حطو اعلانات وبيعوه

معقوله بالجابريه 150

عيل المناطق الخارجيه جم

مثل حالتنا ليش ورثه يطيحون السعر
واذا من بره سعر عالي

 

[قهوة عربية]

مشاركة: شلون أشتري بيت ؟؟ واللي يعافيكم شاركواا ؟؟

حبيبتي الرسامة ......اعقلها وتوكل

توكلي على الله وروحي انتي وزوجج بيت التمويل ....صج بواوقه وحرامية ....بس أمرج لله

ترا الدنيا كل مالها وتغلي ...واللي شافوه والدينا وأجدادنا من عز ودلال ورفاهية ...عيالنا ما راح يحصلونه ...وأكبر غلطة الواحد يغلطها أنه ما يشتري بيت مبكر

انتي توج صغيرة ...حتى لو كان القرض كبير شوي ...ميخالف تصبروا ....والعشر سنين بسرعة تقزر ....وبالعكس إذا عيالج صغار ..ماراح تكون طلباتهم وايدة

بس إذا كبروا ...راح يقارنون بينهم وبين أصدقاءهم ...وليش مانسافر ....وليش مانشتري سيارة كشخة ...وليش ما عندنا شاليه حالنا حال خلق الله ...غير مصاريفهم الزايدة ..والبنات يبون يلبسون ماركات والصبيان سيارات ...وما راح تخلصين ...ولا تتوقعين كل شي يجي بسهالة ....

وترا أغلب الكويتيين جذي ....حتى لو سكنوا بيت جديد ...يبيلهم جم سنة عشان يأثثونه ...عادي محد يستحي من الصج ...

ضغطي على نفسج ...انتي وريلج ...ويمعوا مبلغ بسيط ..حتى لو 15 ألف أو 20 ألف ...مو مهم من وين تجيبونها ...دبروا أمركم ...

والله أنا وزوجي لما نوينا نشتري بيت ..حتى الطوفة تسلفنا منها .....وبعنا سيارة ....وأخذت معاش شهرين أجازة وزوجي كذلك ....وبعت ذهبي ....وكل شي سويناه ..وجمعنا المبلغ ..وشفنا البيت اللي نبيه ..عادي ..ما يسوي قيمته ...بس ...الجود من الموجود ..واشتراه لنا بيت التمويل ..
وقسطه علينا ...بدون مبالغة 750 دينار ........
والحين ...مر علينا 6 سنين ..وباقي لنا 4 سنين ...
صج ماكو سفر ..ماكو شاليهات ..ماكو غداء أو عشاء بره إلا بالشهر مرة ...لكن نقول ..هانت ...
والواحد يقول الحمد لله أنه ساكن في بيت ملك له ...

أنتي شوفوا بيت يمكن تأجرونه عشان يخفف عليكم القسط ...وأجرو الدور الأول أو البيت كله ...وسكني في بيت حمولتج ..كم سنة بعد ....والله ياحبيبتي بسرعة تمر السنين ..بس حاولوا أن الناس اللي تأجرونه لهم ناس ثقة أو عيال حمايل ..أو معارفكم


وأحب أقولج أني ساكنة بالبيت صار لي 5 سنين ..وتوني الحين أثث البيت ..عادي ...

والله يوفقك ياحبيبتي ويبرد قلبج ...

 

[.الحور.]

مشاركة: شلون أشتري بيت ؟؟ واللي يعافيكم شاركواا ؟؟

الله يعينكم ويسهل لكم ..

 

[bnt q8 in usa]

مشاركة: شلون أشتري بيت ؟؟ واللي يعافيكم شاركواا ؟؟

بنات الحين لاتفكرون تشترون لانه العقار مرتفع يقولج انشالله بعد سنتين من الحين العقار بينزل 20%

 

[nanosa78]

مشاركة: شلون أشتري بيت ؟؟ واللي يعافيكم شاركواا ؟؟

واللة هالحجي من زمان نسمعة ان العقار بينزل بس ما اعتقد خاصة بعض المناطق مثل جنوب السره شابه نار وما اظن انها بتنزل الله يعين

 

[السفيرة عزيزة]

مشاركة: شلون أشتري بيت ؟؟ واللي يعافيكم شاركواا ؟؟

و الله انا عن نفسي
ما قدرت ايمع
عاد خذيت قرض من التمويل
صج الاقساط كبيره
بس شنسوي

عاد اجرت فوق و لله الحمد
و ان شاء الله ما باقي شي و يخلص قرضنا

انا اقول اذا تقدرن تخشين شوي من معاشج عشان تسوين راس مال ينفعج
حاولي
اما اذا ما تقدرين مثل حالاتي
فالله المستعان

خليها عالله و اخذي قرض
بعد شتسوين
و اجري

 

[خبيرة اعشاب]

مشاركة: شلون أشتري بيت ؟؟ واللي يعافيكم شاركواا ؟؟

تبون الصدج ...انا متزوجه صار لي 5 سنين و ساكنين بشقه انا و زوجي
فشنو سوينا خدينا ارض و قرض اسكاني من وزاره الاسكان ...و الحين حنا قاعدين نبني فيه ...البيت عاد وين ...بجنوب الجهرا............المهم ما علينا
هناك الايجارات على 250 اقل شي
قلنا نبي نبنيه نظام شقق ...و ناجره و تطلع لنا منه فايده انشاء الله ...و بعدين لا ساعدتنا الظروف نبيعه و نزود على فلوسه و ندور لنا البيت السنع عاد و الله لقيت لي بيت بالاندلس يجنن دورين و نص سرداب ..و كنت افكر ناخده بس الظروف ما سمحت اش حقه نوهق نفسنا في اقساط ...الحمد لله ما حنا بطايرين و البيوت موجوده ....لا توفرت عندج الفلوس اخدي

 

[عنايد]

مشاركة: شلون أشتري بيت ؟؟ واللي يعافيكم شاركواا ؟؟

بنااات صج حبطتوني الرسامه لاتستعجلين على نفسج مدام اهل زوجج زينين تحملي شوي كاآنا ماكله تبن من هالاجارات وقرض ما اقدر آخذ لان الاسعار فوق الخيال فمدام انج عايشه مرتاحه وكلها جم سنه وطالع بيتج ليش ماتتونسين بحياتج ولكل حادث حديث وانصحج لاتضيقين على نفسج الحين ولما يخلص القرض تطلع لج سوالف ثانيه اثاث ما اثاث واعيال وسفر وخرابيط الدنيا جذيه صبر بس احسن تصبرين على سكن صغير وانتي مستانسه فيه لاطالب ولا مطلوب ولا انج تقعدين تحاتين القرض ومتى يخلص ويشيب راسج ليش يباااا

 

[bambena]

مشاركة: شلون أشتري بيت ؟؟ واللي يعافيكم شاركواا ؟؟

حمدالله احنا تلاحقنا عمرنا وشرينا بجنوب السره قبل لا تغلى ، ام ضاري بنك التسليف يعطي 70 الف بشرط ان عندج ارض بتبنينها وطبعا يعطونج دفعه مباشره بناء 10 الاف وبعدين يكشفون على البيت اذا خلصتي المطلوب يصرفون الدقعه اللي وراها وجذي او يعطونج ال70 دفعه وحده اذا لقيتي بيت جاهز تشترينه يكشفون علبه واذا وافقو عليه يعطونج 70 والقسط 100 او 10% من اجمالي الراتب ايهما اكثر واذا البيت اللي بتشترينه مؤجر يزيد القسط 50 دك

 

[أم ضارى]

مشاركة: شلون أشتري بيت ؟؟ واللي يعافيكم شاركواا ؟؟

مشكوره بامبينا على الرد

انا وحده من الناس ساكنه فى بيت اهل زوجى مع ان شقتى محكر حمام ومومرتاحه

بس عسل على قلبى ولا اتبهذل مع الاجارات اتحمل شويه علشان اقدر ايمع والله يفرجها ان شاء الله

 

[@ الرسامة @]

مشاركة: شلون أشتري بيت ؟؟ واللي يعافيكم شاركواا ؟؟

بنات مشكورين على التفاعل بس لقيت حل

مناسب وخلاني العب بالفلوس لعب












لا تخافون حلال بحلال
















نطروني راح انزل موضوع خاص فيه بعد جم يوم بس ارد شقتي واطلع من الاربعين

 

[أم ضارى]

مشاركة: شلون أشتري بيت ؟؟ واللي يعافيكم شاركواا ؟؟

الرسامه متى بتكتبيلنا الحل ... عيزنا واحنا ننطر

 

[@ الرسامة @]

مشاركة: شلون أشتري بيت ؟؟ واللي يعافيكم شاركواا ؟؟

بس عطيني مهلة هل جم يوم لاني ابي اكتبه بشكل مفصل

 

[أم ضارى]

مشاركة: شلون أشتري بيت ؟؟ واللي يعافيكم شاركواا ؟؟

وآآآآآآآآآدى أقعده

ناطرينج الرسامه بس ان شاء الله ماتتأخرين علينا وايد