شنو و متى اوكل ولدي/ بنتي ؟ تم دمج جميع استفساراتكم هنا

[*uM_MiMi*]

رد: متى بديتي توكلين ولدج \بنتج ؟؟؟

عادي انا وكلت بنتي من 4 شهور ماصار فيها شي اسم الله عليها و قبل امهاتنا يبدون من 4 اشهر ايوكلون بس الحين الطب الحديث يقول يفضل انج تبلشين من 6 اشهر عشان مايصير حساسيه من انواع معينه من الاكل و خصوصا السرلاك وايد اسبب حساسيه حق اليهال اللي اقل من 6 اشهر عيال بنات خالاتي اللي بلشو سرلاك من 4 اشهر كله حساسيه! انا بلشت معاها خضراوات مسلوقة و عصيرات مخففه و فواكه و لمن كملت 6 عطيتها سيريلاك وعيش مطحون.

 

[LA TROO7]

رد: متى بديتي توكلين ولدج \بنتج ؟؟؟

متأكده وسوي بحث وراح تلاقين انه من مصلحه الطفل ياكل من 6 شهور مو قبل

 

[ym ym]

رد: متى بديتي توكلين ولدج \بنتج ؟؟؟

مرااحب عليكم انا ابدا اوكل عيالي من الشهر السادس واول شي ابدا فيه السيريلاك والبسكويت اهرسه وبصراحه ااكلهم من اكلنا يعني اهرس لهم الخضار اللي مسويته مع المرق او اوكلهم من الجريش او الهريس مع اللبن وبرضوا السليق يعني مااحط لهم نظام معين عشان مااتوهق فيهم من اكلنا اهرسه لهم واوكلهم طبعا اهم شي مايكون فيه دهون كثير وسلامت حبايبي وحبايبكم

 

[om a7md]

جم وجبه؟

السلام عليكم بنات

بنات بغيت اسالكم جم وجبه تعطون عيالكم انا ولدي كمل السنه وبغيت اعرف جم وجبه حليب تعطون ولدكم ؟
وجم وجبه اكل تعطونه؟

 

[ريحانة]

رد: متى بديتي توكلين ولدج \بنتج ؟؟؟

من الشهر السادس بس انا اذوق اعيالي من الرابع الاكل عشان ما يستغربون

 

[CHEESE CAKE1]

رد: متى بديتي توكلين ولدج \بنتج ؟؟؟

انا الحمدلله عيالي صحتهم زينه مو متان ولا عصلان والحمدلله شهيتهم وايد زينه
أبدي بالرابع البسكوته بالحليب بس مو الفارليز لأنه ثقيل
ومن عقب الرابع أذوقه تذواقه الأشياء
وعقبه عاد الأكل بالسادس

 

[حمرة الورد]

رد: متى بديتي توكلين ولدج \بنتج ؟؟؟

من الرابع

 

[برميتا]

رد: جم وجبه؟

رضعة حليب الصبح مبجر (مع صلاة الفير)
الضحى لي قعد وجبة غدا
بعدها بساعة رضعة حليب
ينام
العصر وجبة خفيفة فواكه مثلاً
بعدها بساعة رضعة حليب
المغرب عشا
بعدها بساعة رضعة حليب
وقبل لا ينام رضعة حليب

بوسيلي الحلو أحمد

 

[دلع86]

رد: متى بديتي توكلين ولدج \بنتج ؟؟؟

انا بديت مع بنتي من الرابع عطيتها عصير برتقال مخفف

وعيش ماركه ميلوبا و بسكووت مكتوب عليه من الشهر الرابع

 

[شموخ المرأه]

رد: جم وجبه؟

3 مرااات حليب

الصبح والظهر قبل نومته وبالليل قبل النومه بعد

عندج وجبة الفطور
وجبة الغدا
وجبة السناااك
وجبة العشااا
بهالوجبات اتنوعيله الأكل

 

[شموخ المرأه]

رد: متى بديتي توكلين ولدج \بنتج ؟؟؟

من الشهر الرابع ابدي اوكل اعياااالي

 

[nemo_1]

رد: متى بديتي توكلين ولدج \بنتج ؟؟؟

الأفضل من 6 أشهر ووكليه خضار وفواكه بس المانجا والفراوله والبيضة الكاملة من عمر سنة لان اذا عطيتيه من عمر 6 يسير معاه حساسية

 

[سندريــــلا]

رد: متى بديتي توكلين ولدج \بنتج ؟؟؟

من الشهر الرابع ابدي اعطي شويه ,,عيش مسلووق ومهروس واعطي خضاار مسلوقه جزر كوسا بطاط
بس مو وايد يعني مقدار قفشتين اكل كبار ,بس على اساس ان الياهل يتذووق ويبدي يتعود عالاكل وبعدها بفترره اعطي فواكه على اساس الياهل لايتعود عالحلااات وماياكل خضار
وفيه نوع بسكوت من عمر 4 شهور ماركة ميلوبا تلاقينه بمركز سلطان مافيه غلوتين فمايضر البيبي ولا يسبب حساسيه
حلوو تحطينه بالحليب او توكلينه

 

[فطووومه]

رد: متى ادخل الدجاج او اللحم او البيض على اكل بنتي؟؟؟

يسلمووو حبويتي والله انا بنتي كمات سنه وشهر ماعطيتها لا لحم ولا دياي ممادري متى اعطيهاااااااا

 

[مســـــافره]

ولدي حبيبي عمره جريب السنه وللحين ماني عارفه أوكله صح

هااااااااااااااااي

كويتيات حلوات امورات سنعات ----------->> تساحلكم عشان تساعدونها

حبايبي انا ولدي 11 شهر وقاعده اعطيه اكل كالتالي

ريوق بسكوت
غدى عيش وبطاط وجزر وكوسى
عشى مرات بسكوت ومرات عيش وجزر وبطاط
مع الحليب تقريبا اعطيه 5 مرات (بس اهو مايحب الحليب حده 3 أرقام وهالشي من عمر ه مو شي يديد)
وهم اعطيه عصاير من مالوت الاطفال
وأول كنت أعطيه سيريلاك(بالأرز) بس تعب صدره وناس قالولي السيريلاك موزين للي فيه صدر
مـــــــــــــــلاحظه ولدي ياخذ وقائي لغير الناطقين بالعربيه (وقائي يعني كمام مرتين فاليوم لان صدره وايد يتعب)

مــــــــــــــــلاحظه ثانيه ولدي ماعده الا ظرسين تحت



فمن خلااااااال خبرتكم شنو أقدر أعطيه شي يفيده ويناسبه مايتعب صدره ولا يكون صلب صلب لانه مسيكين ماعنده اسنان



وثاااااااااانكس

 

[Cute mama]

رد: ولدي حبيبي عمره جريب السنه وللحين ماني عارفه أوكله صح

انا مادري شنو الاكل اللي مايصلح تعطينه حق الياهل اللي صدره تعبان
بس ولدج بعمره هذا يقدر ياكل كل شي حتى لو توكلينه من طباخكم بس مايكون فيه بهار ولا وايد ملح
سويله ياهم بالخلاط .. انا ولدي ماشالله عمره 9 شهور وكل شي ياكل
بعدين ليش ماتعطينه فواكه ؟؟
انا لازم باليوم اعطي ولدي فواكه وخضار سويله سمج ودياي واهم شي اللحم لانه اللحم الاحمر يحتوي عالحديد بنسبه كبيره
انا ولدي ماكنت اعطيه وايد لحم الدكتورة قالتلي لونه باهت وناقصه حديد لازم توكلينه لحم احمر
وديري بالج المنجا والاناناس والفراوله والكيوي والعسل ومنتجات الابقار مايصير تعطين الياهل تحت السنه
وشنو بعد شنو بعد
اي عطيه كل يوم ماي تمر او سيريلاك تمر وايد زين حقه
هذا اللي قدرت اتذكره الحين وانشالله اكون افدتج

 

[شجرة الكرز]

رد: ولدي حبيبي عمره جريب السنه وللحين ماني عارفه أوكله صح

اختي الغاليه ،،
آنه ولدي كبر ولدج بنهاية هالشهر يكمل سنه ،،
الصبح أوكله بسكوت أو كيك أو فطاير مع مميه فيها عصير ،، << لأنه رضاعه طبيعيه <<
والظهريه اوكله من أكلنه او اذا كان اكلنه مايصلح له فأسوي خضار مفيوحه ،، أي شي بالثلاجه من خضره تصلح تنحط مع بعض أحطها وأسويله سويته خضار ،،
ويحب ياكل بطاط و قرع مفيوحين مع جبن شيدر شرائح وزعتر بيتزا ذراات يطلع عجيييييييييب حتى زوجي عجبه وياكل معاه ،، لا ويقولي رحته مطعم برجر كنج ههههههههههههه من نكهته السااااحره ،^_^
والعصريه أعطيه بفك او كيك او معمول تمر او بسكوت محشى بالفانيليا مع ممية مااي أو عصير ،،
وبليل العشااا أكون مخليتله مال غداه أسخنه واعطيه ،،
بس مسكين عزيزي توه قبل اسبوع طلعله ضرس واحد تحت بعد عناااااااااء طويل من الصخونه ،،
ليش تأخر على ماسنن لأنه فيه نقص كالسيوم وسوولووي آنه بعد تحاليل << لأني أرضعه فبيشوفون من شنو النقص الي فيه
طلع عندي انه بعد نقص كاليسوم وحديد ،،
فالحين قمت آخذ حبوب فيتامين والدكتور نصحني بشده إني اتعرض للشمس الصبح آنه وولدي لأنها مفيييييييييييييييييييييييييييييده بمعنى الكلمه ، لأنه شقتي أبد ماتحوشها الشمس ،،
وعطاني الدكتور 8 غراش كالسيوم حق ولدي وباليوم مرتين اعطيه مسكين بعد عناااااء طويل ،،-_-،،
وعندنه موعد بشهر 3 وانشالله نكون بخير بفضل دعواتكم الخالصه ،،
والحين قاعده افوحله بروكلي مع زهره وبطاط وجزر ،، حق عشاااه ،،

حاولي تعرضين ولدج على دكتور خل يشوف ليش مايشرب حليب ...

ومثل ماقالت اختي وكليه لحووووم وسمج ودجاج آنه الكتور قالي وكليه كل شي وماعليج من حجي الناس ،،
واهم شي خل ياكل فواكه وتمر وماااااااااي ،،


وساااامحوووني على الطواله ،،
وأي شي آنه بالخدمه حبـــيبتي ،،،

 

[roro]

رد: ولدي حبيبي عمره جريب السنه وللحين ماني عارفه أوكله صح

عن واقع تجربه وخبره طبيه
ولدي عمره سنه وشهر
اقولج نظام الغذائي مال د. نسرين الخطيب اللي في رويال حياة
الطفل من عمر 8 شهور وفوق
الريوق: حليب , خبز , فطاير جبن " بس مو دسم " , بسكوت
قبل الغدا : يشرب حليبته
وقت الغدا : الخضار على البخار بس ديري بالج لا تخلطين البطاط مع العيش او البطاط مع الجزر او القرع مع البطاط لان يسوي " امسااك " بمعنى سوي عيش مع كوسا وبروكلي - ويوم سوي جزر وكوسا باميا- يوم بطاط مع بازاليا و معكرونا- يوم اسبرغاس مع فاصوليا و كوسا
ومن الافضل ما تضيفين الملح او الماجي خل ياكله على طبيعته او اذا ما حبه شوي ملح
بالاضافه للخضار اللي قلتها ضيفي جزء من صدر الدجاج وليس الفخذ لان مليان دهون الفخذ .

العصر: فاكهه او روب بالفواكه ووااااايد زين الروب حق الهضم بسكوت - انا اعطي ولدي البسكوت اللي داخله تمر تعرفينه ؟ اكو على شكل كور واكو على شكل اصابع اعطيه بو اصابع عشان يمسكه وياكل مع عصائر فرش مثل عصير جزر - تفاح - برتقال - او كوكتيل مثل شوي موز مع مشمش وهالسوالف
العشاء : شوربة كويكر او عدس او خلاصة الدجاج مع خبز او اعطيه بيض بس مره الى مرتين بالاسبوع او صمون وزعتر .

طبعا بعد ما يكمل السنه ابدي معاه في اللحوم " واولها لحم العجل " لان اطرى وافضل لي معدة الطفل في الهضم - والسمك اخر الوجبات
ومن يكمل 11 شهر او سنه وكليه من اكلكم وشوي سلطه من غير درسنز وايد او تبوله .

وديري بالج من الحلاو والبطاط وهالخرابيط انا اشوفه يزوغ على البطاط اعطيه جيس كورن فلكس وانوع له اللي بالكاكاو او العسل او العادي


وسلامتج

 

[نبض قطر]

الزبيب

مرحبا بنات

انا أم جديدة وحبيت استفيد من خبراتكم
متى وشلون اعطي بنتي زبيب ؟

 

[legally blonde]

رد: متى بديتي توكلين ولدج \بنتج ؟؟؟

حسب الوزن
اذا كان البيبي عند الولاده وزنه أكثر من 2,5 كيلو ------- تبدين توكلينه من بعد الشهر الرابع
الوزن عند الولادة 2,3-2,5 كيلو ------- من بعد الشهر الخامس
أقل من 2,3 كيلو -------- بعد الشهر السادس


اذا ابتديتي معاه قبلها ممكن يسبب له حساسيه خصوصا انه جهازه الهضمي مو مكتمل
و اذا ابتديتي عقبها بفترة راح يكون متعود عالحليب و ماراح يتقبل الأكل