عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[جاي الضحى]

بزيد من الكلمات إلي تحد الواحد على التحلطم كلمة حريمتج....لول.

صبربر أثاريج من البنات إلي كانو يحرون ؛ هههه. عسل عسل


صبربر ذكرتيني وإذا فركنا الابهام بالسبابه يا سلااام حركه تحر إلي ما ينحر. لأ لأ إحتريت ما اداني الحركة اذكرني بشطانة ونحاسة الطفولة.

أقول خل نغير الموجه ونييب طاري شي حلو...


من الكلمات إلي صارت ما تردد مثل أول بين الناس اهي كلمة ميوه (فاكهه) صارت نادر تنسمع. شرايكم ؟ تسمعونها من الكل؟​

 

[الصابرة المحتسبة]

هلا بجويهه ويا زين الصورة ام شعر فله انتي ؟؟؟؟ ههه

ميوة يقلونها حمولتي لي يومج

 

[الصابرة المحتسبة]

صبحكم الله بالخير والكرامه

 

[جاي الضحى]

صبحج الله بالنور والسرور يا أحلى صبربر.

ماكو شي يديد؟! أقصد قديم عتيج؟!


بذكركم بكلمات عن العياره والخمبقه

إزكُومبي، إشلايتي شخصيات لعوبيه مو جاده. كلا يخبقون وعيايره .

 

[الصابرة المحتسبة]

هههه جويهه داشة بقوة مرة وحدة اشلايتي قوية

اشلايتي: تنقال للولد او الصبي اللي بس ماعنده شغل غير الجمبزة والعيارة وسوالف مالها اول ولاتالي

 

[الصابرة المحتسبة]

هلا خواتي
وينكم من غير شر
دلول ولهانا على سولبفج

 

[الصابرة المحتسبة]

السلام عليكم

تعرفون شنو الفلعة؟؟؟

يقولون قبل : زهب الدوا قبل الفلعة؟؟؟؟؟

 

[الكريستال]

الفلعة يعني الطقة اللي عالراس نتيجة حذف شي
غالبا الفلعة تسوي صعرورة
والصعرورة اهي انتفاخ في الرأس بسبب الحجر او الشيء المحذوف

 

[الصابرة المحتسبة]

هلا يالكرستال ويعطيج العافية انتي صح

 

[daloola]

يا حلوووووووووووووووكم

ولهت عليكم وعلى سوالفكم....طافني وايد

غميضة

شلونج جويهه..صبربر..كرستال..اورنجية...كل البنااااااات
عساكم بخير...عسى مانسمع عنكم الا كل خير

انا اليوم ماني بصويحيه....منشوله وبلاعيمي طابقة ...عشان جذيه قدرت ادش اسولف معاكم



الواحد اذا غط فترة والا كان الكل موجود الا واحد...يقولون له : ( غايب ولا انت مفقود)

وبنات عمي اذا احد غاب يقولون له : عليك جوكم

 

[الصابرة المحتسبة]

هلا بدلول شلونج احنا بخير عساج بخير
ويعل ربي يشافيج ويعافيج

 

[جاي الضحى]

الله بالخير؛

صبربر عساج طيبة يا غاليتنا؟

دلوله والله إن ولهنا عليج وعلى سوالفج. ما تشوفين شر. أجر وعافيه.

يا حيا الله الكريستال... صاجه ورى الفلعة عادةً صعروره. ههه.


على طاري إسمج الكريستال خل نييب طاري الذهب واكسسوارات أول.

خل نبدي بالإيد:

مضعد/ المضاعد : صار الاسم الشايع الحين إسوار. وأول يلبسون كذا مضعد بليد الوحده

حق الإرقبه:

عندكم البقمه: قلب/ عقد يتكون من إقطع ذهب. كذا قطعه متصله مع بعضها.

المزنط من الاسم القلب إلي يلصق بالرقبه. والكرداله لأ قلب عريض ويتدندل لا السدر يعني ما ينلبس إلا حق مناسبة.

حق زينة الراس فيه شغلات وايد:


الفركيتة: واهي جنها ماشه

الهامة و القبقب و السروح و التلول كلهم زينه حق الراس.

معني ما أحب التشكشك والذهبان بس بنفس الوقت أحس هالشغلات جزء من تراثنا ولازم نعرف شكانو يلبسون أول وعلى الأقل نحتفظ باسامي هالشغلات.


يالله الحين منو تشرح لنا شلون صايرين الهامة و القبقب و السروح و التلول ؟

 

[cute.usa]

السلااااااااااااام عليكم
يا حلات موضوعكم اينن !! و اكو كلمات اول مره اسمعها عندكم هيهيهي

المهم خل اقول لكم بعض من كلمات اميمتي و يدتي الله يحفظهم

كرفايه = سرير
كنديشن = مكيف << كلمة يدتي الله يحفظها
تقضّبي = تمسّكي
شحاطه = نعال و انتوا بكراااامه << سمعتها من اختي حبيبتي
لا تبطون = لا تتأخرون
مشخص = امي تقولها لاخواني لما يلبسون غتره
قلق = مو مرتب مو نظيف


و ان شاء الله استمتعتوا معااي

 

[cute.usa]

و هم اميمتي ساعات تغني لحفيدتها واااااااااافديتها

سبيجـه بنت ابوها
ريـال تخاطبوها
واحد يقول للثاني
آنا عبـد لأبوهـا

و هم ساعات اميمتي و بنت اخوي يغنون لي يقولون لي

عمتي يابت ولد
سمته عبد الصمد

مع اني مو متزوجه توني صغيرونه هيهيهي

و هم اميمتي تغني لبنت اخوي لما ايون امها ابوها تقول :

كا يـا بابا كا يا <<< يعني كاهو حضر
رزّوا له الرّايـه
كا يات ماما كا يات <<< يعني كاهي حضرت
رزّوا لها الرّايات

 

[الصابرة المحتسبة]

هلا جويها هلا بهالشوفة

هذي الهامة تنحط على الراس وشارية لبنيتي ايام الروضة وحدة بس فالصو-

كيوت ياحلوج وياحلو سوالفج وحياج الله بينا

 

[الصابرة المحتسبة]

والقبقب يشبه الهامة وبالعرس يغنون هالأغنية

يا من باس العريس يا من باسها
ومسطر اللولو على راسها
ويابو لها القبقب وقالوا البسيه
وقالت ما البسه ولا يهمني
ويهمني الا اخوي زين الشباب
وعنده قلم فضه ويكتب كتاب
وعنده عروس له على ركبته
يمسح بسايلها حباب حباب

 

[ريم الرشيقة]

السلااااااااام عليكم
اشلونكم
شعلومكم
الحقيقة لكم ولهة
عاد اتصدقون ابوي الله يرحمه لبسني اسروح وتلول مرتين
مرة حق حفلة المدرسة على اساس ان يلوة
ومرة في ملجتي سوو لي يلوة صج ولبست الهامة ولسروح والتلول والمرتهش و
وفي بقمة عودة يسمونها كرسي يابر الله يرحمه ويرحم ابوي اللي دللني

 

[الصابرة المحتسبة]

وعليكم السلام ياريم

عسى ربي يرحم امواتنا واموات المسلمين
والأبو يحب يدلل بنيته عسى ربي يرحمهم برحمته

 

[الصابرة المحتسبة]

صبحكم الله بالخير والكرامة
شلونكم

 

[cute.usa]

يا حياتي يالصابره عيونج الحلوه و الهامه اللي تنحط على الراس امي شرت لبنت اخوي نفسه و لبسته اياها
بالقرقيعان طلع شكلها حييييل حلوووو
أمووت على الشغلات التراثيه حيييل حتى أذكر رحت عرس إحدى العوايل الكويتيه و ما شاء الله العروس دشت مرتين
أول مره دشت و كانت لابسه أخضر و لابسه الهامه اللي تنحط على الراس <<ما اعرف شسمه و سوولها يلوه و وكتّوا على الحضور ورد قرنفل و ريحان شي عجييييب
و المره الثانيه دشت لابسه ابيض
و الله ان الكل استااانس حييييل عسى الله يوفقها

خل احط لكم جم كلمه

تتـن = زقاير >>> مرات اقول لأخوي يا شراب التتـن
ما مداني = ماكو وقت <<< داااايمـا نقول هالكلمه
طنطل = طويل <<< كله اقول لأخوي طنطل ما شاء الله حييييل طويل عملااااق

و ان شاء الله اكون ضيفه خفيفه على قلوبكم