عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[جاي الضحى]

أهليين كويتيات؛

الشر ما ييكم. باراك الله فيكم. :tek:

صبربر الله يعطيج العافية يا وخيتي.

دلوله ياحلو حجيات أهلج. صاجه حجي الأولين يصغرون ويدلعون الاشياء ويقولبون الأسامي. هههه.

الله يذكرج بالخير بالمطل. ما لحظتو إن ما يقولون أحمر؛ أخضر يقولون حمر ؛خضر...على طاري الأحمر قبل من يشفون إنقليزي أو بناني أبيض يوصفونا بحمر عطر. هههه

أفندييا : شتاقتلج العافية . عجبه حجياتج. :eh_s(7): إيه في ناس يقلون خبز ايراني وناس يقلون خبز خباز. واحنا نقول فحم وضو. :eh_s(6):

جلاديلياس: حياج ربي.

إيه أيام أول إسم بزه منتشر وهم إسم موزه وهيفه ومضاوي وموضي وسبيجه؛ غنيمه هالايام صارت نادره هالاسامي!​

 

[daloola]

صبحكم الله بالخير
اليوم اليمعه لازم محد يدش قبل الصلاة
لوووووووووووووووووووووووول
نصلي ونعين من الله خير تالي ندش

واللي عندها زوارة تتوكل على الله واللي فاضية من طقتي تدش تسولف معاي

جاي الضحى
شلون الوالدة بشري عنها عسى أشوة؟

 

[الصابرة المحتسبة]

عدل يا اورنجية عمري انتي
دلولا ليلحين نسمي ضو وشبوا الضو
والوالدة تسمي الصحن صحين وتقول دايما هالدنيا فية (يعني زوالة ومودايمة لحد)
وعلى طاري الأسامي أموت على الأسامي بزة وموضي ودلال ولا احب كادي ورتاج وروان بس شنسوي .

 

[الصابرة المحتسبة]

ويه دلولا ذكرتيني بيوم الجمعه قبل الوالد الله يرحمه ويحلله ويرحم أمواتكم لي صارت صباحية الجمعه هالفطور زاهب من صباح الله خير والتغسل والتطيب والبخور ودهن العود ولي رد من الصلاة نجبنا غدانا على السفرة ام خوص تذكرونها وتغدينه يالله من فضلك جان مطبق زبيدي مع سمن عداني ولا مجبوس دجاج أو لحم .بس السمج أحس مخصص ليوم الجمعه عند الوالدة .

 

[الصابرة المحتسبة]

تعالوا ادنوا هني شوي
ترى ماسولفنا عن البر وحياة البداوة بسولف لكم : قبل بالربيع لما نكشت مو ألحين يكشتون صوب الديرة يقولون بر فبل نروح حدود السالمي والهعرفج والعشب يالله من فضلك والنوير مغطي البر الله .ونجمع هالفقع الزبيدي على هالكبر بس مرة صار لي موقف لقيت زبيدية شكبرها ولا يمها حنش شكبره أسود قمت أصارخ من قمة راسي الا امي تنادي العيال ويذبحونه .

 

[الصابرة المحتسبة]

وين حبايبنا من غير شر؟؟؟؟؟

 

[daloola]

صبربر
شكلج وايد عودة شخبار السفرة الخوص
من طلعنا على الدنيا واحنا نتغدا على جرايد ....يوم كشخنا قمنا نحط نايلون
اذكر بالعزايم بس يحطون صماط ....اللي على ميوة والكشخه على ورد

تعالي صبربر مانقول فطور؟؟؟؟ جكيناج
نقول ريوق

جاي الضحى
شلون الوالدة

الا تعالوا ...وين تشتغلون؟

 

[الصابرة المحتسبة]

جكيتيني على بدلية فطور عادي ريوق وتريقنا هههه

سفرة ام الخوص لازم بالبيت بعد الوالدة تعلقها
انا ربة بيت .

 

[الصابرة المحتسبة]

انزين منو تعرف شنو معنى طير شلوا؟؟؟؟؟

 

[daloola]

صباح الخير عليكم كلكم

طير شلوا هذي قصة...انا بقولج اللي اعرفه وانتي صححي المعلومة...هذي وحده اسمها شلوا وعندها عيال صغار وريلها متوفي
واهي تسمي عيالها طيور ... فإذا احد ساعدها وعطاها شي تقول هذا حق طير شلوا ...وكبروا عيالها وصاروا رياييل وقاموا يعتمدون عليهم بالاشغال اللي يبي لها قوة ولين كبروا واهي تسميهم طيور...عاد في شي صار مادري شنو سألها واحد من سوا هالشي جان تقول له طير شلوا (قصدها ولدها ) عاد قاموا الناس يقولون طير شلوا


ونترك لكم التفاصيل

عاد قولوا لي اذا صح والا غلط

 

[جاي الضحى]

مساكم الله بالخير؛

شلونكم خواتي؟ عساكم بخير؟
الوالده الحمد الله أحسن؛ مو مثل أول; بس أحسن من أول ما طاحت علينا.

أثاري مو بس احنا إن يوم اليمعه عادةً سمج. إذا اشتى والجو حلو معناته تشوي بالحديقة (هامور؛ ميد) وإذا الجو مغبر و لاهبوب وحر معناته زبيدي ولا محمر. ورفيجتكم مو ذاك الزود مع المحمر. ما أحب شوك ومرق؛ شوك ومشوي ميخالف بس شوك ومرق ما أحب. ههه على طاري السمج والشوك؛ الله يا الميد متروس شوك ياو. سمجه نتيفونه بس كلها شوك. يتطلب جهد عشان ينوكل. وتمرتي إذا كليته كله يمي أخاف أغص.
وبرمضان أكل السمج يخف في بيتنا سبحان الله. معنى الكل يحبه بس سبحان الله مادري ليش الصايم ما يشتهي السمج مو مثل الأيام العادية. التشريبه والهريس يتفرهدون على السفره. صج رمضان له جوه وأكله. أبي قيماااات. أقول تسوون كباب؟ << خبز عروق؟!! لأ لأ شكلي يوعنه وقمت أتشهى. ههه. يا حسرتنا ...الحين بتقلون هذي ما تدخل من الباب.

صبربر صاجه بر قبل غير عن الحين؛ تحسين فيه حياة. نباتات حيوانات وذيج الطيور إلي الحين نفقدت. ههه لقيتي زبيديه بالبر؟ غبره الله ستر. الله ياني يكش شعر ينبي من الزواحف.

دلوله قصة طير شلوإ عدل؛ هذا أنا إلي سامعته. وقعدت الأرض حلوه. حلاته بين فتره وفتره الواحد يتمقط على القاع. الحين مو يسوون اليوقا على الأرض؟!!. قميضه كل شي تغير؛ حتى الشاليهات إلي المفروض تكون حق الوناسه والبساطه والتغيير كشخنها وصارت مثل البيوت!!​

 

[الصابرة المحتسبة]

الحمدلله على سلامة الوالدة ياجاي الضحى ويعل ربي يخليها لكم .

قصة طير شلوا والله أعلم : ثلاث صبيان أكبرهم عمره سبع سنين وأصغرهم توه ما فطم من الحليب مات ابوهم وكان اسمه( عجرش ) وبعده بستة اشهر توفيت والدتهم فلم يبقى لهم الا جدتهم من ابيهم وتدعى شـلوى ونظرا لضيق ذات اليد اصبحت هذه العجوز تدور وسط البيوت تطلب اكل للاطفال..... فصارت ومن باب الاستلطاف تقول ماعندكم عشى او غدا لطويراتي تقصد بذلك الاطفال الثلاثة .


شاع خبرها بين الناس وعلم الشيخ الجربا ( من شيوخ شمر ) بامر هذه العجوز فأمر ان ينقل بيتها الى جوار بيته وقد تم ذلك وكان الجربا قبل ان يقدم الغداء او العشاء يقول لاتنسون طيور شلوى وكان يشرف هو بنفسه على ذلك ومع الايام كبر الاطفال الثلاثة وهم شويش ...وعدامه....وهيشان...واصبحوا رجالا يستطيعون القتال .

 

[daloola]

أشوة معلوماتي عدل

شخباركم وشلون اهلكم وعيالكم

ها صبربر ماكو غطاوي ماكو حزاوي

جاي الضحى الله يشافي الوالدة ...يقول لج لي هدك البين ماهدك الكبر.... عسى الله يخليها لكم

 

[الصابرة المحتسبة]

السلام عليكم
شلونكم يالغاليات؟؟

هلا دلولا ان شاءالله بحط لكم


اورنجية وينج عسى ماشر؟؟

 

[الصابرة المحتسبة]

تعالي صبربر مانقول فطور؟؟؟؟ جكيناج

سلاطين المجالس
شياطيـــــن الوغا عــــــــز القبيله
نزلنا والطويل يقود جمعه
رجال(ن) من ســــلالات نبيــلــــه
سكنا في رحى وادي يهول
وكل(ن) بالشدايـــــد يحتمـــــي له
وفي ليل العيينه والبنادق
بطشنــــــا في فهـــد ويا عميلـــــه
خذينا ثار ضيدان بن خالد
ومن يغــــــدر بنـــا يا عزتيــــــــله
تشوف الجمع يمناك ويسارك
مع خيــــــل تعلى فــــي صهيلـــــه
تفج نحورن فرسان ومشايخ
وكل(ن) بالوغـا (( خلى خليلــــــه ))
وفي جوده مع كنزان نفخر
وبالهيجـــــا فعايلنــــــــا جزيلــــــه
(محافيظ) المراجل والكرامه
هل الطولـــــه فعايلهم جميلـــــه
(نواجع) للزمن عز وشكاله
مكانتهم على راس الطويلــــــه

 

[الصابرة المحتسبة]

بياضه بياض القطنه ، وإن سحبناه إنتفخ بطنه

 

[العيون**السود]

اهلييييييييين في اي احد هنــــــــــــــــــــــــــــــــــــآآآ؟؟

 

[daloola]

اذا ماخاب ظني ..... الشراع


حياج الله العيون السود
يا ام العيون السود ماجوزن أنا...لونج الخمري سحر لعيوننا

 

[الصابرة المحتسبة]

عدل يادلولا


وألحين الغطاية الثانية:
أسألك عن حرمه ، لها رجال ، و دايما متابعها .

 

[جاي الضحى]

الغطاية الثانية:
أسألك عن حرمه ، لها رجال ، و دايما متابعها .

هذا حل الغطاية بصوره ;

عساكم على القوة يا كويتييات صج قاعدين تذكرونا بشغلات يمكن نكون ناسينها. :eh_s(7):

كويتييات منهي لا الحين تقول هالكلمات؟!

متخثله: عيزانه وجسمها مقصص.


مخفره: يعني كلا بالبيت ما تشوف باب السكه؛ ما تطلع.


وكلمة مدهده. منو تشرح شنو يعني إذا قالو فلان مدهده؟!

أفنديا وينج؟ فقدناج! ​