عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[البرق80]

بنات اول لما كنا صغار علاقتنا بجيرانا قويه اذكر طول اليوم انقضيه عندهم ولا في اي كلافه بس كانت ساعات يدتي الله يرحمها تزفنا تقولنا /
لا تكثر الدوس ياخلي تراهم يملونك لا انت ولدهم ولا انت طفل اربونه /يزين حجيها عسل ....الله يرحمها

 

[مشاعل الشمري]

بعد قلبي الله يحييج
وبحاول اعرف معناها؟؟؟؟
بشبشي اممممممممممممم

 

[بنت باباتي]

الله يرحمها جدتي كانت تقول نفس الشي

لاتكثر الدوس ياخلي يملونك لانت ولدهم ولا طفلن يربونك

 

[زبوطة]

الــــــــــــــــــــــــلـــــــــــــــــــــه

عاد ذكرتوني بيدتي الله بيارك بعمرها كله تحازيني سرور اناسة

سمعتو حزاة ام المواجع وحزاة مسيجرة هاذي عندنا في البحرين وحزاة بيض الحمرة

ولا لايطوفكم مرة احازي ولد خالتي سرور توني في البداية ما كملت قالي باجر قوليلي آخاف الحين في الليل
يا حليله

 

[daloola]

قوة







شلونكم خواتي حبيباتي ....شخباركم

بعد عمري جاي الضحى وصبربر ....تسأل عنكم العافية

انا صج قاطعه ... بس والله تطرون علي ... بس الظروف شنسوي فيها

حياكم الله خواتي اليدد اللي انضموا لنا

 

[الصابرة المحتسبة]

هلا بدلول
معذورة يالغالية
جويهه عسى المانع خير

 

[جاي الضحى]

السلام عليكم؛



شلونكم كويتياتنا، عساكم طيبين؟ لاهين مع الدراسه, الدوامات, والاهل واليهال؟!


والله اني وايد أفرح إذا دخلت وشفت مشاركاتكم. :eh_s(7):



صبربر شلونج يالغاليه؟ ما تفقدين غالي يا صبوره و أطمنج وأقول إن المانع كان سبب خير واهو ظرف سفر.



يالله دامي أنا اهني بذكر جم كلمة اندثرت عند بعضنا:



عوار شاخص أو أقول خاصرتي قامت تشخص علي يعني قامت تون من العوار؛ سمله عليكم وعلينا من الألم والعوار




كلمة مشبن؛ يعني إذا الخياط مو نظيف ومرتب تلقين الخام متكود بصوب ومعفس فيقولون طرف نفنوفج مشبن.



عين عنجوه: يعني ما يستحي أو تستحي سمله علينا.



ما بقى شي وتعطلون أو يعطلون إعيالكم وتستانسون بالاجازه إن شاء الله. ​

 

[الصابرة المحتسبة]

هلا جويهه عسى ربي يحفظج وين ماكنتي

ومن طول الغيبات جاب الغنايم

 

[نجمة في السما]

السلام عليكم يا أخواتي
موضوع الذكريات القديمة والحجي القديم والعادات إللي اندثرت موضوع مؤثر وايد ، آنا بالنسبة لي أحب الذكريات الأصيلة القديمة إللي تذكرني بطفولتي وبجداتي وبالبيت إللي تربيت فيه بصغري ولعبي بالسكّة وتسلّقي طوفة بيتنا أوّل ، وحظيرة الدياي والحمام إللي بحوش بيت يدّتي والبط إللي يركض بالحوش ويدّتي تعطيه الخبز المنقوع بالماي .. أتذكر يمعتنا على السفرة الخوص المدورة وقنجة العيش والسمج وناكل منها كلنا بإيدنا ونقوم شبعانين .. قنجة العيش فيها إبركة .. وصحن المحلبية بماي الورد والزعفران إللي تسوّيه عمتي .. بارد ولذيييييذ ! ما نسيت الكاشي المربعات مربعات لونه رمادي في مدخل بيتنا بكيفان ومدخل بيت يدذتي ، ولا نسيت برودته كل ما قعدت عليه .. ما نسيت بساطة ذاك الوقت مقابل تعقيد هالوقت .. ولا بيوت أوّل الملمومة إللي تكفّي كل الأسرة مقابل الفلل والقصور في الوقت إللي أفراد الأسرة ما يشوفون بعظهم بعظ فيها من كبرها .. ما نسيت حنّة يدّتي .. وقصعتها بإيدها لي تحنذت .. وعشاها البسيط الصحي لي قعدت بالحوش عقب المغرب : خبز إيراني وفلوح رقّي او خبز إيراني وروب مصنوع في البيت .. يا حلو أكل ذيج ليّام .. وبساطة ذيج ليّام .. ولمّة ذيج ليّام .. ويا حلوكم يوم فتحتوا باب هالذكريات فقلبي .. ويا ريت كويتنا مع حضارتها الحالية ترجع نظيفة مثل قبل .. وبسيطة مثل قبل .. ومتكاتفة مثل قبل ..
الله يحفظ ديرتنا .. ويجزيكم خير ويحفظ الجميع .. وياالله حسن الخاتمة

 

[نجمة في السما]

السلام عليكم يا أخواتي
أمس كتبت لكم جم سطر عن ذكرياتي القديمة ، ولكن فيها جم غلطة مطبعية فسامحونا ، والغلطات في جملة ( في مدخل بيتنا بكيفان ومدخل بيت يدذتي ) والصح ( مدخل بيت يدّتي ) ، والغلطة الثانية في جملة ( ما نسيت حنة يدتي وقصعتها بإيدها لي تحنذت ) والصح (قصعتها بإيدها لي تحنّت ) .
وأبي أزيد اليوم وأقول إن كلام عيال اليوم مو بس تغيّر ، يا معودين لو هو بس تغير وظل كويتي ميخالف ، عيالنا صار حجيهم كويتي مكسّر ومخلوط بالانجليزي ، هذا غير إللي ما يفهمون كلامنا خير شر ولغتهم الرئيسية هي اللغة الأجنبية !! وين لغتنا العربية ؟ وين لغة القرآن الكريم ؟ واللي خرّب لهجتنا الحلوة زيادة هي المسلسلات الكويتية إللي ما فيها ممثلين كويتيين ، فيها ممثلين وممثلات يحاولون يتحجون كويتي .. وإخذوا عاد البدليات إللي مالها والي !! أهوه مو بس خنعيد بعظ كلامنا القديم إللي قمنا ما نتداوله .. خلينا نحافظ أصلا على لهجتنا العريقة قبل لا إيي اليوم إللي يصير فيه الحجي الكويتي خليط من جميع اللهجات وبدون هوية ، ولا تنسون تأثير الزواج بغير الكويتيات وتأثير لغة الأم على الأبناء .. والله الحجي يطول ويطول .. لكن الواحد مو عارف شيقول وشيخّلي !!

 

[جاي الضحى]

هلا بالزين صبوره؛ عساج تكونين بخير وعافية. إن شاء الله ما تسمعين كلام من أحد غير الكلام الزين إلي دوم تسمعينا إياه. الله يوفقج. حبيبة سمله عليج.

وعليكم السلام ؛

الله يا نجمة (نيمه)؛ عيشتيني معاج ولمست ذكرياتج. نحب نحب نحب ذيج البساطة ونبيها تعود.

ماهو شيا عجيب إن الظروف تغيير مع الزمن ولكنه شياً يحز بالخاطر إن الماضي وذكرياته و جوه بدى يندفن ويتلاشى. خلونا نتماشى مع التطورات ولكن ما ننسى قديمنا وما نخلي زينه يضيع. جزء كبير من الوطنية في نظري اهو الحفاظ على تاريخ وقديم وتراث الديره وأهلها ماهو مجرد رفعة علم في يومين من السنة.

قوليلنا نجمة شنو يطري عليج من كلمات كنتي تسمعينها أول بس ما قمتي تسمعينها هالايام؟


الله يطرح فيج البركة وحياج الله وعسى دوم هالذكريات إتراودج وتكون منبع سعادة وتفاؤل.


فقدناكم يالغايبين

 

[حنين]

قصيصكم تونس بس يبلها قعده باجر بحط الجاي والحب وبقعد وياكم
في مكان لي ولا لازم احجز قبل ما ايي ؟؟؟

 

[نجمة في السما]

السلام عليكم يا أخواتي ، وهلا يا جاي الضحى
ما أنسى عمتي يوم آنا صغيرة لي سوّت لنا " الجرثي " el-chirthy .. يا هو لذيييييذ ..
الجرثي إهوه اللبنة اليامدة ويسوونها الكويتيين أول وايد ، وهي مفيدة وكلها كالسيوم وفيتامين دي وتقوي العظام في هالزمن اللي كل من فيه هشاشة من شرب البيبسي والكولا ، وآنا من حنيني حق أيام قبل بديت أسويها حق عيالي من إرمظان إللي طاف ، وطريقتها يا خواتي سهلة : خلطي 24 قفشة كبيرة حليب التموين مع 7 كلاسات ماي وسخني الخليط لما يغلي ، بعدين خليه يبرد شوية ، لي صار دافي حطي فيه قوطيين روب يكون من نوع حامظ أحسن ، وخليه يصك ويحمظ يوم ونص أو يومين حسب حرارة الجو ، لي حمّظ ييبي كيس قماش ململ أو غترة نظيفة قديمة وصبيه كله فيها وربطيها وخلي تحتها قوطي أو ماعون تنقّط فيه مايها لين تنشف وتصير لبنة .. آنا أخليه ثلاث أيام في المطبخ الداخلي فوق بعيد عن الغبار والقطاوة ، بعدين أطلّع اللبنة " قصدي الجرثي " وأحطه في كيس نايلون شفاف نظيف من ملوت حفظ الأكل وأصب عليه شوية زيت زيتون حتى لا يستهوي أو يتغير طعمه .. وما يصير فيه شي حتى لو مر عليه جم يوم وطبعا نحفظه بالثلاجة .. بالعافية عليكم الجرثي .. ويا حلو أكل قبل ، مو أكل عيالنا الحين كله من المطاعم لين صاروا كل واحد فيهم شمتنه يا بعد عمري !! والله يبيلنا حملة توعوية عن أهمية أكل البيوت وأضرار أكل المطاعم .. يعني الجرثي إللي سوّيته والا لبنة الجمعية ؟؟! وأسمع عنكم كل خير ومع السلامة

 

[eman12]

السوالف وايد حلوه بس من الامثال والحكم لي عمه عسالله يطول بعمرها تقول للشخص اللي يدعي علي شخص ثاني
دعوه تصيب ودعوه تخيب ودعوه تقطع النصيب

 

[جاي الضحى]

هلا حنونه حياج الله لا لا ما يحتاي حجز متى ما شتهيتي تعالي. ذكرتج بموضوع الصابره الله يذكرها بالخير كانت جنها تحازينا وتعطينا من هالنصايح السنعة. وأميييين يا رب العالمين؛ ماكو اكرم و أرحم من الله.



نييييمه عليكم بألف عافية الجرثي وقواااج الله على طريقته. أنا أشهد إن اليهال زاد المتن بينهم من ويبات المطاعم؛سواق شرمبي يشاوطون بالشوارع والسوس ماله والي بضروس اليهال من هالبيبسي والبطاطات والكاكاووات؛ غميضة.



يا حيا الله إيمان؛ أمين؛ إيه صاجه عمتج لا تدعين على أحد . الله يشافي الوالد.​

 

[نجمة في السما]

السلام عليكم يا أخواتي
مشكورة يا جاي الضحى على إطرائج
أذكر يوم آنا صغيرة ويدّتي الله يرحمها بقوّتها ، لي أحّد طق باب السّكّة وبتروح تفج له الباب .. أول شي إتّغطّى بملفعها .. وما كانت تقول " منو ؟ " أو " لحظة .. لحظة " أو " ها .. منو ؟ " ، لأ .. أذكر كانت تقول " مِنْ بالباب ؟؟ " ، وهي عبارة كانت دارجة أول والحين اختفت

 

[نجمة في السما]

السلام عليكم يا أخواتي
منهي فيكم تذكر حديقة مبنى محافظة الأحمدي أول ؟؟ لما كنا نكشت فيها مع أهلنا وربعنا يوم إحنا صغار ؟؟ والنافورة إللي بوسط الحديقة ونشوف فيها يهال يطبون ويتسبحون فيها ؟؟ ونراكظ بره الحديقة قبال مبنى المحافظة ؟ وساعات نروح الجهة الثانية ورا الشجر ونطب في المنحدر الترابي إللي ورا ؟ هذا كان كل يوم جمعة .. بعدين نرد البيت نتسبّح وننام حق المدارس ثاني يوم .. وياما أحلاها من أيام .. والسلام ختام

 

[((الجوري))]

السلام عليكم

مووضع روعه تسلمين حبيبتي

ابي اعرف معنى كلمة يقايشني ؟ : )

 

[جاي الضحى]

السلام عليكم كويتياات

مااااا قصرتي نجمة. صاجه من بالباب :eh_s(17):

يقايشني = يقدر إتحداني= يوصل مواصيلي​

 

[وحشني شوف الكويت]

السلام عليكم .. كيف حالكم

الموضوووووع مرررررررررره يجنن

أحب كذا حكي الأولين وغطاويهم وبساطتهم

ومن الكلمات اللي دايم جدتي تقولها

حدر = تحت
ازهمي على فلانه = دقي عليها او كلميها
القرنه = الزاويه << هههه احب هالكلمه

واذا تذكرت شي جيت كتبته ...

متااااااااابعه