(الــجزء الــســابــع)
قط بكل ثقله على الصوفا .. لم الكوشيات الوثيرة بيده و دفن راسه
في حضن الصوفا الدافي ..
أول مرة يرتمي براحة على فرش وثير و ناعم ودافي من سنين ..*
عظامه تعودت على الأرض القاسية و السرير الحقير ..*
يحس كل عضلة في جسمه تألمه و كل ذرة من كيانه تعذبه ..*
غمض عينه و بسرعة قياسية استسلم لسلطان النوم!!
و تكور مثل الجنين وهو ضام نفسه ونايم ..*
في هاللحظة دخل يوسف الصالة و هو في حالة عالية من التوتر و الحيرة ..*
وفي صدره يصارع احاسيسه المتضاربة..*
مزيج من الشفقة والاحتقار .. الشوق و النفور ..*
اقترب منه وشافه على هالوضعية ..*
صحيح ان هو عملاق و شعره طويل ولحيته كثة .. ولكن شكله*
كان وكأنه طفل صغير نايم ..
كسر خاطره حيل ورجع الشوق يناغي إحساسه .. لكنه طرد هالإحساس*
بس مر بخياله طيف خالد وهو بالمستشفى و الأجهزة كلها موصولة فيه ..
بدأ كل شي يرجع له و يعكر عليه صفو السعادة برجوع أخوه ..*
غيرت باسم الجنونية ..*
تصرفاته الإجرامية ..*
قمر بين إيده تتلوى من الضرب ..*
خالد بين الحياة والموت ..*
بوخالد وأم خالد و منظرهم بالمستشفى وهم على وشك انهم يفقدون ولدهم*
الوحيد ..
ابتعد عنه باشمئزاز ..*
طالعه باحتقار واهو نايم بهدوء ..*
اشلون يقدر يستحمل النوم ؟؟ اشلون الكوابيس ما تطارده ؟؟*
اشلون عينه تنام بعد كل اللي سواه ؟!!*
تركه وهو ثاير من الغصب والقهر .. وهو موداري على العذاب اللي قعد*
يتعذبه باسم وهو نايم وضام نفسه بقوة ..
قمر ما قدرت تقعد في غرفتها بروحها طول ما باسم قاعد معاها تحت*
نفس السقف .. وعلى نفس الأرض ..
راحت غرفة أختها سارة واوصالها ترتعد ..*
ريم كانت منسدحة على السرير ومعطية ظهرها حق سارة عشان لا
تشوف دموعها اللي حرمتها من النوم والراحة ..
وسارة قاعدة تشتغل على الاب توب ومندمجة..*
سمعت صوت طق على الباب ..*
سارة : منو ؟؟*
قمر : انا ..*
بطلت لها سارة الباب و شافت شكلها واخترعت :*
قمر .. اشفيج ؟؟ اشفيه شكلج جذي جنج شايفة جني ؟؟
قمر دزتها ودخلت الغرفة وشافت ريم متغطية وكان على بالها نايمة .. طالعتها باحتقار و رمت نفسها على الجنب الثاني من سرير سارة الكبير .. وخذت نفس*
عميق ..
سارة راحت قعدت يمها ..*
سارة : قمور !! شفيج خرعتيني !!*
قمر : سارة .. باسم طلع من السجن !!
سارة انصدمت : أي شي !!!*
قمر وهي تضم نفسها : لا وبعد رجع البيت ..*
سارة بطلت عيونها أكثر : اهوا الحين اهني؟!!!*
قمر زفرت زفرة حارة :اييه !*
سارة تنهدت من الصدمة .. شهاليوم اللي من أوله صدمات .. اول شي ريم ..*
والحين باسم !!
قمر :المهم .. أنا ما قدرت أقعد بروحي بالغرفة .. قلت أيي أناديج عشان تيين عندي ..*
سارة تأشر على ريم بعيونها : وهذي ؟؟
قمر : خل تولي زين .. نايمة وما تحس .. نامت عليها طوفة !!*
سارة استاءت من كلام قمر بس ما اعترضت ..*
سارة : انزين بس خل آخذ لاب توبي ..*
استرسلت الأشعة الذهبية الدافية من أعالي السما و تسللت لكل زاوية*
من زوايا القصر الكئيب ..
الجفون اللي تمت سهرانة طول الليل .. تهللت ترحب بشعاع الشمس ..*
يوسف .. قمر .. ريم ..*
عيون ما ذاقت النوم ..*
كل واحد فيهم يتعذب من الداخل ..*
يوسف يصارع أحاسيسه المتضاربة تجاه أخوه .. قمر خايفة من هالرجوع المفاجئ
والغير مرغوب فيه ..
ريم .. انتو أدرى بحالها !!*
تمت تطالع بالسقف المزخرف لمدة ..*
سمعت صوت معدتها وهي تنادي و تتلوى ..*
تذكرت إنها ما كلت شي أمس ..*
قامت من مكانها وهي تتنهد .. طالعت الساعة .. كانت الساعة 6 و 15 دقيقة ..*
أكيد أهل البيت لي الحين نايمين ..*
قررت إنها تقوم تسوي لها لقمة تاكلها تسد جوعها و تسكت صراخ معدتها*
عشان ترفع عن نفسها الإحراج بما إن محد قاعد لي الحين ..
نزلت من السلم و مرت على غرفة الطعام و الصالة في طريقها للمطبخ ..*
كان البيت هادي ولا فيه أي أثر لأي حركة ..*
لكن فيه شي في الصالة استوقفها و خلاها ترجع مرة ثانية ..*
شافت التلفزيون مبطل و استغربت لأن الكل نايم ..*
دخلت الصالة و طفت التلفزيون بدون لا تحس بباسم اللي كان نايم على الصوفا*
وبطل عينه بس طفت التلفزيون ..
راحت للمطبخ و بدت تحوس بالثلاجة والكبتات عشان لأنها ما تعرف اماكن الأغراض*
و كانت تطلع أصوات مزعجة وهي تدور بدون لا تحس بباسم اللي قعدته من النوم ولحقها*
و تم واقف عند الباب وهو متنسد عليه وحاط يده في جيبه ويطالعها ..*
كانت لابسة بيجامة سودا على ميكي ماوس و شكلها وكأنها طفلة ..*
كانت محتارة و مختبصة وهي ما تدري شتسوي وما تدري عن اللي واقف يراقبها ولا انتبهت*
له ..
طلعت لها كورن فليكس وحليب من الثلاجة ..*
و تمت تحوس بالكبتات تدور على طاسة ..*
عصبت و قالت تكلم نفسها بصوت عالي :اوووووف !! وين الطاسة !!*
باسم : في الكبت اللي فوق ..*
فزت من مكانها خايفة و التفتت حق مصدر الصوت ..*
شافته بهيئته العملاقة وثيابه المبهدلة و عيونه السودا اللي قعد تطالعها بطريقة غريبة خرعتها ..
تذكرت كلام قمر وسارة أمس.. أكيد هذا الشخص اللي قدامها هو المقصود ..*
حست بقشعريرة و ارتعد جسمها وتمت تطالعه بخوف وارتباك ..*
باسم دخل المطبخ واقترب منها شوي شوي وهي ترجع لي ورا بخوف إلى أن اصطدمت بالمغسلة وما قدرت ترجع أكثر ..*
باسم : شلونج سارة ؟؟*
ريم بلعت ريجها : أنا مو سارة !!*
باسم : عيل منو انتي ؟*
ريم سكتت و ما ردت عليه من الخوف ..*
طالعته بعيون ترجف بدون لا ترد ..*
باسم كرر بصوت عالي وبحدة : منو انتي ؟!!!!!!*
كانت على وشك انها تموت في مكانها لولا ان يوسف دخل عليهم فجأة في هاللحظة و
سمعه وهو يصرخ ..
يوسف : باسم !!*
باسم التفت له ..*
يوسف طالعه بحقد : وخر عن البنية .. خرعتها !!*
ريم ارتاحت من شافت يوسف و ركضت لي عنده و هي تبتعد عن باسم اللي كان*
ساد عليها الطريج و هي تبتعد عنه طق كتفها بكتفه و ارتعدت*
و راحت وقفت يم يوسف ..*
باسم بدون لا يتحرك من مكانه : يوسف .. منو هذي ؟؟*
يوسف طالعه بنظرة : هذي ريم ..
باسم بنص عيون : منو ريم ؟؟*
يوسف : بنت عمي عادل ..*
باسم انصدم : مريم ما عندها غير قمر و سارة !!*
يوسف : هذي بنت فضة .. مو مريم !!*
باسم وهو يطالع ريم بنظرات حرقتها : اها ..*
يوسف طالع ريم بنظراته اللي تخليها تحس بالأمان : ها ريم .. شتسوين هني ؟؟*
ريم قالت بإحراج : ولا شي .. بس كنت يوعانة ونزلت آكل لي شي ..*
يوسف وهو يطالع الكورن فلكس : وهذا بيشبع جوعج ؟؟*
ريم نزلت راسها و حست بإحراج أكبر ..*
يوسف ابتسم لها وهو يسحب لها كرسي من الكراسي
الموجودة في المطبخ الكبير و يأشر لها تقعد عليه :*
بما إن اليوم عطلة الطباخ .. فراح أستغل هالفرصة عشان أسوي لج
أومليتي المشهور .. و صدقيني "هتاكلي صوابعك وراه " ..
ريم ضحكت بحيا : ههههه اوكي ..*
ابتسم يوسف من سمع ضحكتها الملائكية ورد لها الضحكة بينما باسم*
واقف يطالعهم من بعيد ..
يوسف التفت له وقال له بنفسية : انته ما تبي ؟؟*
باسم : امبلا ..*
طالعه بنظرة و التفت يشوف شغله ..*
قعدت ريم على الكرسي وتمت تطالع يوسف وهو يسوي الأكل بطريقة استعراضية*
مضحكة عشانها ..
وهو يهز المقلة و يقط الأومليت في الهوا ويرد يمسكها بالمقلة مرة ثانية و هي*
تضحك عليه وباسم واقف بمكانه ..
خلص يوسف وحط الاومليت في صحن حقها و صحن حق باسم وصحن حقه على الكاونتر الطويل الموجود في المطبخ ..*
حط صحن ريم يم صحنه و صحن باسم بعيد عنهم ..*
يوسف باشمئزاز : هذا صحنك ..*
وراح وقعد بالمقعد اللي على يمين ريم ..*
باسم حزت بخاطره الحركة و خذا الصحن و راح وقعد على يسار ريم اللي صارت*
بالنص بينهم وقال وهو يبتسم بألم : انا باكل هني..
طالعه يوسف باحتقار و التفتت عنه يطالع ريم و يبتسم لها : ها ريم .. عجبج الأكل ؟؟
ريم : ههههه لي الحين ما كليت شي ..*
يوسف : يلا عيل شناطره اكلي ..*
ريم : هههههه انزين .. شوي شوي علي ..*
خذت لها لقمة و يوسف يطالعها بتأمل ناطر رايها في أكله ..*
يوسف : ها .. اشرايج ؟؟*
ريم : ممم .. لذيذ !!*
باسم انقض على الأكل بكل شراهة .. سنين وهو منحرم من هالاكل و كانوا بالسجن يقدمون*
له أكل حتى ما يتقدم حق الحيوانات !!
قال حق يوسف وهو متحمس :
اي والله يا يوسف.. مو بس لذيذ .. الا أكثر من لذيذ !! عجيييب !!
يوسف طالعه باحتقار : انا سألتها ما سألتك ..*
باسم غص بالأكل و حس بالإهانة و مرة ثانية رجع الوخز اللي بقلبه ..*
ترك الأكل من يده .. ومسح فمه بالفوطة و قال وهو يبتسم ابتسامته المتألمة :*
تسلم ايدك يوسف ..
ريم حست بإنه انجرح و حز بخاطرها عليه ..*
يوسف ندم للحظة لكن مسرع ما رجع طيف الماضي في باله ..*
صعد باسم الطابق العلوي يرتاح في غرفته اللي تركها من ست سنين مضت ..*
مشى وهو يجر خطواته بثقل ..*
وصل لي غرفته المجاورة لغرفة قمر ..*
وقف عند باب غرفته للحظة وهو يسترجع كل اللي مضى ..*
حس براسه يدور و قلبه يعتصره الألم و اللوعة ..*
ترنح في مكانه و حاول يتسعيد توازنه بصعوبة و راح لغرفته و حط يده على قبضة الباب*
عشان يبطلها لكنها كانت مقفولة..
تأفف بعصبية ..*
ومرة ثانية تسللت عيونه لباب غرفة قمر ...*
تم يطالعه بحيرة و هو متردد بشكل كبير ..*
لكنه اقترب من الغرفة و طق بابها طقتين ورا بعض ..*
ما سمع جواب ..*
هم انه يطق الباب مرة ثانية لكنه تراجع و راح لآخر الممر .. شاف*
غرفة يوسف مبطلة ..
دخلها وصكر الباب وراه وارتمى على السرير ..*
وفي هاللحظة بطلت قمر الباب تشوف من الطارق لكنها اكتشفت ان ما في حد ..*
و سمعت صوت باب غرفة يوسف وهو يتصكر بقوة .. استغربت و راحت لعند غرفة يوسف*
وطقت عليه الباب ..
قمر : يوسف ..*
فز باسم من السرير و قلبه يدق بعنف .. بدون شعور راح لعند الباب و قفله مرتين ..*
سمعت قمر صوت الباب وهو يتقفل .. عصبت عليه ظنت إنه يوسف يستفزها ويأذيها:*
انزين .. انا أوريك يالكريه !!
وراحت غرفتها وهي معصبة ..*
/
\
/
بطلت عيونها شوي شوي..*
تحس بألم فظيع في ظهرها ورقبتها ..*
شافت نفسها مرمية على الأرض .. تذكرت اللي صار أمس ورجعت
الدموع تتجمع في عيونها لكنها تحدتهم و منعتهم من انهم يبللون خدها ..*
كانت نايمة بثياب الطلعة و مكياجها وكحلها سايح ..*
قامت من مكانها بصعوبة وهي تتألم ..*
شافت السرير على حطته .. اكيد جاسم ما نام هني أمس !!*
خذت لها شاور سريع و بطلت الكبت و مدت يدها بطريقة عشوائية تطلع لها*
شي تلبسه لان ما لها مزاج تختار بعد اللي صار ..
كان نفنوف بدون اكمام احمر بلون دم الغزال قصير يوصل لي الركبة و ظهره مكشوف .. ضيج*
لي الخصر وبعدين يبدي يصير كلوش ..
لبسته و نثرت شعرها على راحته وطبيعته و حطت لها روج لونه أحمر صارخ مثل*
لون نفنوفها وحطت لها كحل خفيف وماسكرا ..
كانت تحس بإن هذي هي طريقتها عشان تتأسف منه لان لسانها بالغصب يتكلم في حضرته ..*
نزلت تدور عليه لكنها ما تعنت وايد لأنها سمعت صوته البيانو ماله قادم من غرفة*
الطعام ممزوج بصوته العذاب وهو يغني اغنية ايطالية ما فهمت شي من كلماتها لكنها*
استمتعت بصوته و موسيقاه ..*
وصلت لعند غرفة الطعام و وقفت عند الباب و صدمها المنظر اللي شافته ..*
بلعت ريجها و حست بغصة ..*
كان قاعد يعزف على البيانو و حور قاعدة على طرف البيانو و تطالعه بدلع وهو طاير ومستانس*
و يطالعها بغزل ..
حست بحرقة بمعدتها و الدم يغلي عروقها ..*
وإحساس قاتل غريب ما عرفت له تفسير !!*
حليمة : احم ..*
انتبهوا لها و وقف جاسم عزف فجاة وتم يطالعها بشكلها العذاب هذا .. تنهد و هو يطالعها وقال لها*
بنص عيون وهو يذكر اللي صار أمس : هلا حليمة ..*
حور قامت من مكانها و راحت لعند حليمة واهي تقول بابتسامة وسيعة وتطالعها من فوق لي تحت :*
هلا هلا .. هلا بالطش والرش !!
راحت لي عند حليمة و لمتها وباستها على خدها بحركة خلت حليمة تخاف من نوايا هالحور وتصرفاتها
الغريبة هذي !!
حليمة وكانه حد صب عليها ماي بااارد : الحمد لله على السلامة حور ..*
حور ابتسمت لها بخبث و ضحكت بدلع : هههههه .. الله يسلمج حليمة ..*
جاسم قام من على البيانو واتجه لطاولة الطعام وقعد على طرفها ..*
حور مسكت يد حليمة و جرتها معاها :
يلا تعالي .. الفطور جاهز حبيبتي !!
قعدت حور على المقعد اللي يم جاسم و هي ماسكة حليمة بيدها بقوة وتأشر لها على المقعد اللي*
يمها واللي بعيد عن جاسم : تفضلي حليمة .. قعدي هني ..
حليمة تخصلت من قبضة يدها بصعوبة وقوة .. وقالت لها بتحدي وهي تتجه للمقعد اللي يم*
جاسم من الطرف الثاني : لأ .. انا بقعد هني !!
و قعدت على الكرسي وهي تطالعها بكبرياء..*
جاسم ابتسم حق حليمة باستهزاء وهو يشرب من الكوب ..*
حور اقتربت منه بدلع و هي تطالع حليمة عشان تقهرها : جسومي .. خذ هاللقمة من يدي ..*
جاسم طالعها وهو يبتسم وخذا اللقمة من يدها بكل سرور .. و حور تطالع حليمة بانتصار ..*
وحليمة ترد عليها بنظرات واثقة من اللامبالاة ..
حور قالت لها وهي تتغنج عشان تقهرها :*
أقول حليمة .. ياريت انج ما تزعلين مني عشان أمس جاسم نام بغرفتي آنا -وشددت على انا- لان تدرين
بعد توني رادة من السفر ..
حليمة طالعتها من فوق لي تحت بكبرياء وضحكت باستهزاء :*
هه ! أزعل ؟؟ لا حبيبتي ما أزعل ..
وطالعت جاسم بدلع و كلمته بغنج ولاول مرة :*
أقول جاسم .. خاطري أطلع اليوم .. اشرايك انا وياك نطلع ويا بعض ؟؟
وختمت كلامها وهي تطالعه بدلال ..*
جاسم استغرب من دلعها و كلامها حقه و نظراتها حقه .. لكنه عرف انها مو من قلبها*
وانها تسوي جذي عشان تقهر حور ..*
قال لها وهو يبتسم ببرود : اليوم ما أقدر .. وعدت حور إني أطلعها..*
وطالعتها حور بانتصار و غرور وهي تلتصق بجاسم أكثر ..*
حليمة شبت نار لكنها حاولت قدر الإمكان انها تكون طبيعية :*
مو مشكلة .. إن شاء الله مرة ثانية !!
و قعدت تاكل من صحنها بدون شهية و هي تغلي من الداخل ..*
حور : حبيبي .. متى بتطلعني ؟؟*
جاسم يطالعها ببرود :*
تدرين شنو حور ؟؟ تذكرت ان اليوم عندي شغل .. ما اقدر اطلعج ! خليها مرة ثانية ..
وارتشف رشفة من كوبه وقام من مكانه بسرعة ..*
حليمة طالعت حور وعلى وجهها ابتسامة ..*
حور انقهرت و قعدت مكانها تاكل وهي معصبة ..*
طلع جاسم للحديقة وهو يتنهد بقوة ..*
قعد يفكر في حور وتصرفاتها المريبة هذي ..*
طول عمرها وهي باردة معاه .. شوراها ؟؟!!!!*
/
\
/
مسك طلال خالته و سندها على جسمه وبطل باب الشقة ودخلها داخل ..*
جليلة واهيا تكح : جزاك الله ألف خير يا ولدي ..*
طلال وهو يقعد خالته على الصوفا ويحط كيس الأدوية على الطاولة :*
ما سويت إلا الواجب يا خالتي ..
ابتسمت له جليلة والتعب واضح على وجهها ..*
طلعت لهم كوثر من الغرفة واهيا تركض لامها تلمها بدون ما تنتبه حق طلال:*
ها يمة .. شقال الطبيب؟؟
طلال طالعها بشوق : مجرد نزلة برد ..*
كوثر انتبهت له و رجعت شعرها لي ورا اذنها بخجل: اشلونك طلال ؟؟*
طلال وهو شوي وياكلها بعيونه : تمام بشوفتج !!*
ابتسمت كوثر بخجل و لاحظت جليلة نظراتهم و ابتسمت بخفوت ..*
رن التلفون ..*
شالته كوثر : ألو ..*
ريم بلهفة : ألو .. كوثر !!*
كوثر طارت من الفرحة : ريمووووه !! يالدبة !!*
ريم :*
كووووووووووووووووثر !! بعد روحي اشلونج شخبارج واشلون خالتي جليلة و اشلون eve ؟؟
كوثر تتصنع الدلع : ولج عين تدقين بعد ؟؟ اصلا انا زعلانة منج وااايد !!*
ريم : افا !! ليش ؟؟*
كوثر : مو قلت لج بس توصلين دقي علي ؟؟ ليش جذي تخليني على اعصابي ؟؟*
ريم : هههه والله حبيبتي مو قصدي .. تدرين بعد بروحي مختبصة..*
كوثر: انزين .. سامحتج هالمرة .. بس لا تعدينها مرة ثانية !!*
ريم : انزين ما قلتي لي كوكو .. شخباركم ؟؟*
كوثر :
انا الحمد لله و امي يمي وتسلم عليج وما علينا قاصر .. بس Eve بعد عمري
لا ليلها ليل ولا نهارها نهار بجي وصياح طول الوقت ..
ريم :*
يا حبيبتي !! تكفين كوثر لا تتركينها بروحها اهيا مو متعودة على جذي امي الله يرحمها
كانت تلازمها 24 ساعة .. مروا عليها قعدوا عندها ونسوها ..
كوثر :انشا الله حبيبتي لاتوصين حريص ..*
ريم : مشتااااااااااقة لج !!*
كوثر :حبيبتي وانا أكثر !! ودي الحين ايي عندج !!*
ريم : صج ؟؟ تعالي ؟؟*
كوثر :لا ريموه من صجج فشلة .. استحي !!*
ريم :*
تكفين كوثر والله ما عندي احد بهالبيت خواتي ما يعطوني ويه
ومرت ابوي واضح تكرهني و ابوي كله بالشغل حتى ايام العطل و عندي*
ولد عم يخرع توة طالع من السجن !!*
كوثر : هههههههههه .. انزين ما عندي حد يوصلني !!*
طلال اللي كان مستمع للمحادثة كلها ما صدق تيي له فرصة جذي تدخل و قال :*
انا اوصلج كوثر ..
كوثر استحت وقالت تكلم طلال :ما أبي اكلف عليك طلال ..*
طلال : افا يا كوثر .. جذي أزعل !! والله ما في كلافة !!*
كوثر نزلت راسها : اوكي .. خلاص ..*
وردت تكلم ريم : الو .. ريم ..*
ريم : هههاااااااااي يا عيني عالرومانسية .. طلال عندكم ؟؟*
كوثر : هههههه اي !*
ريم: يا عيني بس ياعيني.. انا اشوفج تكلميني وانتي مستانسة !! اثاري حبيب القلب يمج ..
كوثر : هههههههههه بس عاد خلاص .. يلا انا الحين ابدل ثيابي وايي ..*
ريم : هههههه اي عاد ما اوصيج هلا هلا .. تكشخي عدل ..*
كوثر :سكتي زين !!*
ريم : هههههههههههه استحت ! يلا باي ..*
كوثر : باي !*
انتهى الباارت ....
وان شااءالله التكمله راح احطهااا بعد شووي *اوو بااجر بس ابي رايكم وتوقعاتكم
*
