كويتيه اوبدون دشي

[فطوم 84]

السلام عليكم جميعا انا متابعه قديمه بمنتدي بس هالفتره بديت اشارك معاكم بنات انا حبيت اتكلم معاكم كخوات لي انا بنت بدون طبعا اللي مايعرف البدون ومعاناتنا يجهل هالناس اللي والله ناس مسالمين وفيهم خير طبعا انا ابوي خدم الكويت باحدي الجهات العسكريه وشارك بحروب وخدمته اكثر من خمسه وثلاثين سنه شارك بالحروب انسان مخلص طيب فزاع لحب ومساعده الناس والله انا مابي اكمل عن تاريخ الوالد كثر ماابي اقول احنا درسنا وتعبنا عشان نعلق شهايدنا؟؟؟كافي المعاناه بتطبيقي لما الكل ياخذ اعاناه وانتي تجمعين الفلس عالفلس عشان تشترين من مكتبه وماتكشخين وتنقصين علي نفسج لانه ماودج تحملين اهلج فوق طاقتهم بعدين انا وحده قلت بتوظف منو يوظفني بس ادش مكان يسالوني وين بطاقتج اعطيهم تعالي اسمعي الاحراج وشلون يعاملونا والله شي يحززز بخاطر الوحده فينا لانه بنت اوادم صارت تستحي تتوظف وتروح تدور تدور واخرتها تلاقي بنت حلال تخاف الله تشغلها بمركز واخرها معاش اميه بذمتكم شيسوي وتلاقينه نتعب ونشقي وكراف والميه تروح نصها لاهلنا ومع هذا صابرين ونقول الحمدلله وثقتنا بالله كبيره انا وحده الحمدلله انهم سمحوا لنا بعمره صدقوني ما انسي احلي ايام عمري بمكه والله حسيت اني مو علي هالارض وانا اشوف الكعبه انهرت وبجيت حسيت مهما تكونين مستضعفه الله معاج ماينساج هانت علي الدنيا وكل شي بس وحده من جماعتنا عيوووز ماتت واهي تبجي ودها تحج وللاسف منعوها وماعطوها جواز هالسالفه قديمه احتمال الحين يطلعون الله اعلم بنات بذات الكويتيات اللي بمنتدي اذا في وحده بتقولي كلام جارح بليز لاترد ترا احنا البنات البدون والله بس نبي توظفونا بنحس نصير نصرف نشيل نفسنا كل الجاليات تشتغل واحنا ممنوع والله اللي يحز بخاطر افضل نسب وتقدير وشهايد واخلاق وبنات عفيفات مانبي نطالب جنسيه اولي نبي نعيش نبي نعيش نبي نعيش والله ثقتنا بالله كبيره واذا كانت الارض ومن فيها مايرحمون فثقتنا بالله انه لما نوقف بين ادينه بنقول يالله احنا برغم حاجتنا ماسوينا معاصي مثل غيرنا واخذنا فلوس لا يارحمن يارحيم احنا برغم حاجتنا تعففنا اللهم اني احبك واحب من يحبك واحب عمل يقربني الي حبك اسالكم بالله لاتحذفون موضوعي واللي تدش تدعي لنا وياليت ماتجرح بالكلام

 

[هاديه احمد]

الله يفرج همج وهم كل مهموووم يارب

 

[كل الغلا زوجي]

ربج ما ينسى أحد والظلم له آخر
وحسبي الله ونعم الوكيل

 

[golnaz]

حبيبتي .. عسى الله يفرجها عليكم وعلى كل مهموم ويعينكم ويعين الجميع امين يارب

 

[ޢޢޢإيمانޢޢޢะۣۨ>]

عسى الله يفرّج همكم ويسهل أموركم
وايد ناس فاهمين موضوع البدون بشكل غلط وقاعدين يستهزئون
حبيبتي شوفي المراكز الطبيّه وقدمي على وظايف عندهم
يحتاجون استقبال وخدمة عملاء ورواتبهم تقريبا ٢٥٠
ربي يوفقج​

 

[fairy girl]

ياحبيبتي انتي

الله يفرجها عليج , و ماضاقت الا لتفرج

دايما كرري هالدعاء بشكل يومي

""اللَّهُمَّ اكْفِنِي بِحَلَالِكَ عَنْ حَرَامِكَ، وَأَغْنِنِي بِفَضْلِكَ عَمَّنْ سِوَاكَ ".

 

[sosowaty]

عسالله يفرج همكم

 

[بنت ديرتها]

الله يفرج همج ويوفقج يارب​

 

[AL-DMERA]

والله البدون ماطالبوا الا انهم يعيشون ,,
لأنهم مو عايشين مربوطين ,,
اذا خايفين تعطونهم جنسيه لاتعطونهم بس عالأقل جواز,,وظيفه,, شي يخليهم يحسون انهم موجودين بهالعالم ,,
شالحكمه من عدم اعطائهم جواز ودي أفهم !؟
حرااام واحد ولده مات صغير شحلاته قال ماااابي فلووووس بس ابي جواااز اسفر ولدي اعالجه !!
ماطلب فلووس ولا شي صعب ,, بس جواز حراااام عليكم ,,
شلون انسان عايش بأرض لايقدر يشتغل يعيش نفسه ولا يعالج نفسه وولا شي !؟
اذا حطولهم بسطه يسترزقون منها شالوها وسين وجيم ومخفر ,, ليييييييش !؟
ذابحينهم واهم حيين مربوطين موقادرين يتنفسون ,,
كتبت هالكلام من الحره اللي فيني شفت مظاهراتهم وقلت والله مالومهم ,,

حبيبتي سوري خليت موضوعج فضفضه باللي فيني بس تذكرتهم وكل يوم اتحلطم وافكر واقول والله حرام ,,
أدري اللي قاعد يصيرلكم مو شويه ,,
وانكم تعانون معاناة ربي العآلم فيهآ ,,
بس شتسوين غير انج تدعين ربج إن الله يفرجها عليكم ,,
حاولي قد ماتقدرين تقومين الليل وتدعين ,,
الله الكبير واهو القااادر إن يفرج همكم واهو اللي بيده كل شي ,,
الجأي ربج وان شاء الله تنحل ,,
وحاولي تدورين بالمستشفيات الخاصه والحضانات أو أي مكان تتوظفين فيه والله يوفقج ياااارب ,,

 

[بنت الأجوااد]

الله يبرزقكم قريب ان شاء الله

 

[عمري الكويت]

كلنا معاكم وانتوا اخوانا واهلنا وعايشين معانا في ارض وحده وكلنا واقفين معاكم في قضيتكم عسي ربي يفرجها عليكم يارب ويفتح لكم ابواب رزقه يارب حاسين في معاناتكم والله بس مافي اليد حيله غير الدعاء لكم

 

[عادت ذكرياتي]

إن شاء الله تنحل قضية المستحقين منهم بالقريب العاجل ...

المشكلة يا اختي اختلط الحابل بالنابل والزين بالشين ...

يعني في بدون والله ثم والله يعترفون إنهم قاطين جناسيهم بس طبعا اللي يفضحونهم بناتهم وساعيين في الأرض فساد ...

أما اللي خادمين البلد ورافعين الراس وولاءهم لهالديرة عسى الله يرزقهم على قد نيتهم ويفرج عليهم

نتمنالكم كل خير يا قلبي

 

[امجاد الاولين]

الله يفرجها عليكم

حالتكم تقطع القلب

 

[حبيبي فهوودي]

الله يفرج همج ويرزقج

 

[ام كوثر2007]

حبيبتي انتي ابوج عسكري .. يعني خدم هالديره من عمر وان شاءالله اييي دوركم بالتجنيس مثل ما تجنس غيركم من البدون ..


السالفه يمكن يبيلها شوي صبر وايمان بالقدر .. وان شاءالله بتفرج وصدقيني بتفرج ..


الكويت ان شاءالله مهي ظالمه احد واكبر دليل انها قاعده تجنس .. وايد سمعت وشفت اسماء بدون قبل فتره تجنسوا ..


ومن ناحيه الوظيفه والله انا اشوفكم اولااا من الوافدييين انكم تشتغلون بالمدارس والتدريس علي الاقل انتو منا وفينا ونفس لهجتنا وحتي عيالنا ما يتاثرون من اللهجات الثانيه والعنصريه ..


ما اقول الا عسى الله يفرجها عليكم حبيبتي .. وفرج الله قريب والحين الامور قاعده تتعدل اشوي اشوي


وصدقيني انا ما يضيق خلقي علي البنت البدووون تدرين ليش ؟


لانه مردج ان شاءالله بتاخذين كويتي وتجنسين عليه حتي لو ما تجنسوا اهلج


بس الرك علي الريال البدون هذا احس صج ماله حل ويقطع القلب .. وانا اقصد الشرفاااء منهم .. اللى لهم عمر بالكويت وعندهم احصاء 65


اما اا اللفووو اللى يونا عقب الغزووو .. لا والله صراحه ما يستحقوون حتي انهم يعيشوون بالديره ..


وعسى الله يوفقكم حبيبتي وقلوبنا وياكم والله .

 

[(دنيتي)]

بسم الله الرحمن الرحيم

اشكرج اختي ع موضوعج اللي عطاني المجال اني افضفض ونتكلم عنننا احنا بنات البدون

اشكر خواتي اللي قالو كلمه الحق بخصوص قضيه البدون


بالنسبه اني اتكلم عن البدون ، البدون الشرفاء اللي يرخصو النفس في يبيل هذا للوطن مستحقي الجنسيه الذين اثبتو ولاءهم لهديره الحبيبه التي


كنا ولانزال نفديها بالغالي سواءا جنستنا او لا ، حبنا لايتغير لهااا


بالنسبه للوظايف اختي انا اعتقد كتبت عن اختي اللي درست تمريض ع حسابنا الخاص

ثلاثه الاف وخمسمائه دينار بالاضافه انا ساكنين بضاحيه علي صباح السالم ( ام الهيمان) والدراسه بالشويخ والبانزين دينار يوميا على مدار ثلاث سنوات ونصف السنه

بالاضافه للكتب نجحت اختي وتخرجت الحمدلله

ركزي اختي على الكلام اللي بقوله


لما تخرجت قدمت عالوزاره وراجعتهم يقولون لازم امج كويتيه بما انج بدون او ابوج عسكري

طبعا شكو الوظيفه بمهنه الوالد؟!!!

يابت المستندات اللي تثبت انه عسكري واسير سابق واحصاء ماقبل ال١٩٦٥ حيث يوجد لدينا احصاءسنه ١٩٥٨

وعمل جدي قبل هالسنوات في الكويت وثم في شركه النفط

طبعا لو تلاحظين الاثباتات مالها اي علاقه بوظيفه اختي كونها ممرضه !!! بس عطتهم شروطهم

بعد هذا وذاك قالت مسؤله استقبال الطلبات لا عندنا اكتفاء!!! زين شكوو!!
بعد ما تراجعت اختي خطوه استقبلت نفس الموضفه طلبات من ممرضات بكل رحابه صدر !!!!


لاحظي المنهجيه اللي تتبعها ضد البدون

والموضوع ليس صدفه حيث جميع اللي تخرجو مع اختي من الوافدين تعينووو وعملو ممرضات باستثناء االممرضات البدون!!!

واختي علقت شهادتها على االطوف ؟؟ لماذا هل ماذا اجرمت لتعاقب هذا العقاب؟ كل اللذي تريده لقمه حلال؟؟ وظيفه عمل ؟ وليس صدقه؟

السؤال لماذا استهداف البدون وتحطيمهم؟

لااحد يعرف الاجابه

البدون الى متى ؟


هل هذا جزاءنا لحب الكويت؟

الحمدلله والشكر واذا لنا حق بناخذه من الذي لاتضيع عنده الحقوق

حسبننا الله ونعم الوكيل

الصبر اختي احتسبي اجرج


والحمدلله والشكر بكل الاحوال

 

[ام كوثر2007]

دنيتي ان شاءالله ربي بيفرجها عليكم صدقيني ..

وانا والله لمن ادخل المستشفيات واشوف هالعيايز المسدحين بالغرف والطوارئ واشوف هالممرضات الفلبن يهذرون انقلش والعيوز ضايعه بالطوووشه ..


والله مره صرخت علي فلبينه تكلم العيوز انقلش والعيوز تحرك راسها مره من العوار ومره من العله اللى فوق راسها تهذر وهي مو فاهمه عليها ..

صرخت بغرفه الطوارئ والله صوتي ياب لي اخر المستشفي .. ولمن ياا مدير الدكاتره .. قلت له اتقوا الله في هالمساكين وحطو لهم احد يفهم لهجتهم ..


خو اهما اللى قاعدين بديرتنا ومجبورين يكلمونا بالعربيه مو احنا اللى ننجرب نكلمهم بلهجتهم ..


وفعلا حزتها تذكرت بنات البدون اللى متخرجين سواء مدرسه او ممرضه .. والمفروض اهي اللى يكون مكانها بدال هالفلبينيه ..


لكن لا حول ولا قوه .. وهالشي ما يعني انه مافي ممرضات بدون يشتغلون .. لا بالعكس انا لمن شلت المراره كانو اغلب الممرضات بدون اللى يدشوون علي بمبارك ..

وان شاءالله ربي يفرجها ما عليج ..

 

[عرش الأنوثه]

في منهم خدمواااا البلد مثل ( الوالد) اللي يحفظاا لي فديتاا والله

ويستحقهاا عن جدااااااااراا بعد ... الله كريم

 

[MiSsY HottY]

الله يعينكم والله اليوم شفت صور المظاهرات بالجرايد ضاق خلقي

 

[(دنيتي)]

اشكرج على تعقييبج اختي ام كوثر بالنسبه للمرضات

اللي شفتيهم انا اختي لما درست سالت عن التوضيف وقالوا اي فيه


ووظفوو بنات تخرجو قبل دفعتها وتوظفو بس واسطات !!!!بس البدون لازم تييب واسطه؟؟

ليش محد يقولج السبب الخفي!!