لو لقيت تاجره تبيع شغله ب 30 ؟؟ و أنا بره شايفتها ب 5 ؟؟ اتكلم و إلا أسكت ؟

[الذبانه الحايره]

السلام شلونكم بنات شخباركم ؟؟

جم مره أدش على المول عندنا و أشوف أسعار بعض الشغلات ... شوي غاليه .. ما في مشكله لو كانت جديده .. مو موجوده بالكويت ...

كيفها لو تبي تشتريها بدينار و تبيعها ب 100 ..


بس تخيلو الشغل موجود هني بالكويت .. ومعروف ... سعره رخيص وهي تبيعه دبل ..؟ ؟


بجامه تنباع بدينار ونص .. تبيعها ب 10 ؟؟

شغله تنباع عند طيور الجنه مال خيطان .. ب750 تبيعها 5 ؟؟؟

<<< كله بدون توصيل..

مره تكلمت .. وقلت بالعام .. بنك ثاني .. مو نكي هذا ..

أشكره . .. قلة ادب من البنات مو طبيعيه ..؟؟؟ هلاقه وما هلاقه ؟؟ :0bee2e8d89:


إنتي تحبين تصيرين مغفله كيفج ؟؟ غيرج ما يحب .. يشتري بجامه ب 10 ويكشخ فيها. . ومستانسه .. وأخرتها اللي حولها يشوفونها .. يدرون إنها بدينار ونص ؟؟



والتاجره أشكره تشوف الرد ومطنشه ... شتقول. . ؟ ؟كتبت العنوان و السعر . وكل شيء .. ؟؟


وومره قلت بحسن أسلوبي ..:dddds: .طرشتها عالخاص قلتلها قلبي .. شغلج شاريته من 3 سنين بالمكان الفلالاني بأقل من ربع سعرج ..

حقرتني وكملت موضوعها بصراحه ولا ردت على رسالتي .. أبدا أبدا ..

.. دشيت الموضوع وكل البنات الللللللله يهبل شهالفناتق ..؟؟ :dddds:


قلت قلعه خلوهم .. ما يستاهلون أحد يعلمهم ..



أنتو شرايكم بالموضوع ؟؟؟



من ألحين .. بقول شغله اللي بتقول .. كيفها التاجره تبيع اللي تبيعه و السعر اللي تبيه .. كيفج لا تشترين ..

بقولها حطي نفسج مو مكان التاجره لا ... حطي نفسج مكان اللي رايحه فلوسها على شيء تشتري بهالسعر منه 5 ؟؟



<<<< لا تنطشون هالشيء ...

والسلام ختام ..

 

[tmtmt]

بما اني تاجره بقولج سكتي <<<<< ههههههههه اتغشمر

لا حبيبتي شوفي اول شي يمكن اهيا ماتدري

ثاني شي في واااااااااايد مواقع يبيعون نفس المنتجات بس الاسعار تختلف + سعر الشحن يختلف عرفتي ...

يعني ممكن طالع عليها غالي

يعني انا ابيع ملابس تنكريه للاطفال لووووويه عشان القى ارخص موقع تلقييينهم شكثرهم
وممكن في ارخص مني وانا ما ادري

وممكن في بنات ما يدرون انه في مواقع رخيصه

ونسيت شنو يقولون بالضبط

بس جنه

اخلق لاخاك المسلم 70 عذر

 

[tmtmt]

حبيبتي نصيحه وحده نصحتني ياها وبقولج ياها

ما يصير تكتبين الللللللللللللله لازم تكتبين الله

 

[رند]

لاحبيبتي بالعكس تكلمي يعني مال داعي الطمع واستغفال الناس
وجزاج الله خيرر

 

[حياة زوجي]

مشكوره فتحتى اعيونه ما نحب نكون مغفلين

 

[نونو ام كشة]

مي دايما تقول قطع الارقاب ولا قطع الارزاق
بس بهالحاله لازم تتكلمين شنو تقص على الناس في ناس ما يطلعون وااايد ويدورون الاشياء اليديده..

وابيج ادزين لي اسمها اذا ممكن لاني هابه اشتري من المول هالايام ,, اخاف تقص علي بعد ؟؟

 

[جـــواهر]

الشرهه موعليها الشرهه ع اللي تشتري منها

لاتقولين الحريم مغفلات مايدرون لا حبيبتي يدرون ان هذا موجود بأقل سعر
بس بعض الحريم هني مايهمها البضاعه اهم شي انها ( شغل حريم )
عشان اذا احد سألها قالت والله ( شغل حريم ) ع بونه كشخه يعني ..!!!

انا لو تذبحيني ماشتري من مره الا اذا كانت البضاعه تسوى وماتنوجد بالكويت بس غيره مــــستحيل​

 

[<<لمار>>]

لاحبوووووبة لازم تقولين علشان تخاف الله بهالناس الذى تقص عليهم وتستغل جهلهم

 

[Judy abbott]

صج قطع الارقاب ولا قطع الارزآق بس لآزمالانساان مايكون طمـآع الطـمع مو زيين


وكل وحده وذمتهااااااا كيفهاا الي تبي تشتري تشتري والي ما تبي لا تشتري

 

[هيوونه@]

صاجه انا بعد شفت شغلات بالمول غاليه
تنباع بره ارخص وانصدم من السعر
الله يعطيج العافيه على التنبيه ...

 

[عبق الورد]

شكثر شغلات اشوفها معروضه بالمنتدى والقاها برى ارخص ... بس ما احب اقطع رزق احد
وللامانه هناك تاجرات بضاعتهم مميزه واسعارهم مناسبه ... بس المشكله باللي غضب تصير تاجره لا وترفع السعر بعد لووول
الله لايبلانا

 

[حكاية شهرزاد]

اي تكلمي وقولي لها ..

نعنبو فايده اضعاف اضعاف السعر ..

شدعوه .. فستان مارلين مونرو .. ولا بدله مادونا ..

قولي لها .. بيعي اللي ب5 ب10 .. مو 25 ..

لانه البنات ماردهم بيكشفون الحقيقة .. لانه الكل يروح السوق ..

وبعدين الناس يشترون من النت .. الاشياء اللي مو موجوده .. مو علشان النت ..

 

[املى كبير]

مشكوررررررررررررررة حبيبتى على التنبيه ​

 

[blue diamond]

نصيحه سكتي لانك ما تدرين من وين التاجره شاريه هالشغله لان احتمال في اكثر من مكان يبيع هالشي واكثر من سعر
وفوق هذا يمكن اهيا زايده عليها شغلات من تعبها فمن حقها انها ترفع سعرها
ولا تنسين بعد سعر الشحن والتوصيل واذا هيا بتفسها سافرت بعد التكلفه تزيد

وعموما الشي اختياري مو اجباري اذا انتي شايفه ان هالسعر ما يناسبج لا تشترينه ومن حق التاجره ترفع سعرها مثل ما تبي دام ان القانون ما يمنعهاوبكل الاحوال الشي راجع للمشتري مو للبائع

 

[النهج الاسمى]

شوفي حبيبتي

سعر عن سعر يفرق>>>اخاف اللي شفتيه برة رخيص صناعته تايوان والمرة صناعه زينه<لازم تتأكدين من هالشي

بس عشان ماتقطعين رزق المره

 

[النهج الاسمى]

اما اذا نفسها بالضبط والسعر اكثر من الضعف

لازم تقولينا منو>>>خو الطمع موزين<<<يكفي تاخذ ربحها

احنا خواتج وحقنا عليج تخبرينا منو هالتاجره

الوحده ماترضى خواتها مغفلات والسبب جشع بعض التاجرات

 

[ام خالد 78]

مشكوره على التنبيه لان انا دايما اشوف شغلات يبيعونها بالمول وبرا ارخص وهي مثلها

 

[ياعشيري جعلك السلال]

لا ترا ساعات تطلبين اشياء وتختلف
يعني مثلا

انا راح اصير تاجره قريب انشالله


مثال عندج جناط اجنر ترا فيه شي خربوطة وشي زين

انا اتكلم عن الي فيه التاغ ميد ان جاينه بس اصليه ايي شي صيني بوطقه وشي غالي
انا طلبت اكثر من وحدة واسعارهم تختلف من الملمس

ورحت المحل وشفتهم الاصليات نفس الي شريتهم

ولا تنسين ترا الشحن يكسر الظهر حده غالي

 

[يبقى الوله]

ثـانكس ع التنبيه بصـراحة ولايزعلوون خواتنا التجارات أنـا مافكر اشتـري من المووول بالمـنتدى إلا فـي حال شغله مو بالكوويت ممكن
ومـاتووقع فيه الحين شـي مو بالكـويت

 

[white**angel]

نصييحه لا تقولين
حراام يمكن اهيا محتاجه هالجم فلس الي قاعده تبيع منهم
والي تشوف البضاعه غاليه لا تشتريها كيفها الاختيار راجع لها بس هم ارد لقولج لا تقولين