منو فيكم اللي كلمت ريلها بالتلفون قبل الملكة وتزوجته ... بليز ردو علي

[الفجر المضئ]

تكفون عفي عليكم ابي كل وحده لها تجربة ناجحة بالزواج لها اذا تزوجت واحد كانت تكلمه بالتلفون قبل الملكة

ترد علي وياليت تقولون هو يشك فيج ولا لا لأني اول مره بحياتي اكلم واحد يبي يتزوجني بالتلفون

وفي نفس الوقت خايفة بعدين يشك فيني

 

[فرااااولة]

مادري شقولج
بس انا بسالج سؤال
اذا انتي خذيتيه ماراح اتشكين فيه!!
اذا انتي لي الحين عالبر تركيه واذا يبيج يدق بابج
والله يهديكم

 

[لؤؤؤؤدي]

ان شاءالله البنات يفيدونج يالغلااااا

 

[فرااااولة]

بعدين بقولج شي
لا تاخذين براي البنات مع احترامي لهم
يعني البعض تلاقين مثلا عندها معارف اهني ورفيجات فما راح اتقولج ريلي يشك فيني
و وحدة مثلا ما تحب بعد تبين ان بيتها فيه مشاكل وشك وهواش، وانتي لا تبنين حياتج على تجارب بعض البنات اللي بيردون عليج لان كل وحدة ظروفها تختلف

 

[الأmـاكن]

حبيبتي الفجر المضئ

يعتمد على عقلية الشخص أو الطرف الـ 2 ..
هل هو شكاك ؟
أو متفتح ؟
يؤمن بالحب قبل الزواج ؟
محد عنده حل مشكلتك غيرك حياتي ..

الله يوفقك ويتمم عليك حبيبتي

 

[الفجر المضئ]

مشكورات حبايبي ....... بس انا عرفته حيل من خلال المكالمات وحتى قلت له انا خايفة تشك فيني لو تزوجتك ........... حلف بالله انه ماراح يشك فيني وقالي والله انا عارف انج عفيفة وما كلمتي احد غيري .......... وانا شاريج يابنت الناس ........ ولو ما تزوجتج ترى بيصير لي شي ......

 

[يوآش يوآش]

حبيبتي مو منطق هذا تسألين البنات

يعني ممكن ريلها ما شك بس ريلج يشك فيج

والعكس : )

 

[brettey]

ماله شغل المساله كلها متعلقه بالنصيب وياما شفت شوف عيني متزوجين عن حب وعايشين احسن عيشه ومتفاهمين الله يهنيهم
انا اعرف اثنين خوان الكبير زواجه تقليدي ماخذ بنت عمه ومحسر فيها بخيل ولا يسفرها ويخونها وقاعده صابره عشان العيال مره وحده ولدها بالخاص وعقب كله بالحكومه وياخذ معاشها الله يعينها ويسخره لها
والي اصغر منه ماخذ وحده بعد من عيلتهم بس تصير لهم من بعيد ماخذها عن حب لان مرقمها وكان يلاحقها وكلمها بالتلفون قبل الزواج بالبدايه ماكان يدري انها تصير له يوم رقمها وعقب عرف بس لو تطلب لبن العصفور يابه لها قبل لا تتوظف سفرها دبي وماليزيا وعقب ماتوظفت تحاططت معاه وراحوا اوربا وهالسنه بعد على ماسمعت بردون يروحون اوربا ومدللها ويطلعها يمووووت فيها غير ولاداتها الثنتين كله بالخاص وحده قبل لا تتوظف اهو الي دافع لها وتوها الشهر الي طاف والده وحط معاها وخذت افخم جناح وكل همه اهي وعياله الله يهنيهم

والله حتى مرت العود تقول لي يا بختهم متفاهمين عمرنا ما سمعنا لهم حس ولا يتهاوشون عكسي انا وزوجي كل يوم نتهاوش وكل من يسمع صوتنا
اهم صاير الاثنين ساكنين عند اهلهم وكل واحد شقه وشققهم قبال بعض

وهم جم وحده معاي بالدوام ماخذين بعض عن حب الله يهنيهم كافي التفاهم الي بينهم وبين ازواجهم

جذب الي يقولون الي تتزوج عن حب ماتتوفق والله يعاقبها
ياما ناس متزوجين زواج تقليدي ومتحسرين بعيشتهم
اوكي صج شفت حريم متزوجين عن حب وتأذوا وكانت النهايه اهي الطلاق بس اقليه انا بمحيطي اشوف اغلب الي تزوجوا عن حب متهنيين واغلب حالات الطلاق الي اشوفها قاعده تصير من الزواج التقليدي للاسف
وكله بالنهايه حظ ونصيب

 

[الفجر المضئ]

مشكورة حبيبتي والله طمنتيني ........... وانا عرفته حيل مو من النوع اللي يشك بالعكس هو اللي اعطاني رقمه وحاول ان يكلمني ورديته كم مره ....... يعني مو انا اللي بديت وهو عارف وقالي انا اعرف انج موحقة تليفونات وقالي انا حبيتج ولايمكن استغني عن صوتج يوم واحد

 

[شابوره بالعسل]

صباح الخير ..

ماراح ازيد على ان هالشي يعتمد على عقليه الرجال ,, والمرا بعد

بس اختي موضوعج ماله داعي فيه بنات صغار عندنا وهالشي لما يقرونه ويشوفون ناس تشجع عليه بيستسهلون السالفه ولو انتي طحتي بواحد زين 1000000000 غيره ذيابه ويبون اللعب ..

اذا يبيج يطق باب بيتكم .. ووو التلفونات وهالسوالف خلوها عقب المجله

 

[ماس ولولي]

سالفتج ما تستاهل فاتحتلها موضوع وتشاورين البنات لانه اذا ابتليتم فاستتروا حتى لو كلمته قبل عيب تقول وماله داعي ومحد يهمه اصلا
الله يصلح امرج ويوفقج ويعطيج على قد نيتج
بس لا تخلين هالفكره تعشش بمخوخ البنات لانه ممكن وحده تتشجع وتكلم عبالها جذي اوكي ويصير ما يصير وتاخذين ذنبها لانه وايد اللي مشو بهالطريج وندموا وبجو دم بدال الدموع لانه اكثرهم يدورون البنات البريئات ويضحكون عليهم
واصابع ايدج مو سوى
ممكن وحده خذت واحد تعرفه وتهنت ووحده كلمت وخطبها وعانت
وترى كلمج ولا خطبج خطبه تقليديه من الاهل هذي كلها اسباب
ولا الحظ عند الله اذا الله كاتبلج حياه سعيده بتعيشينها واذا كاتبلج اتمرمرين راح تشوفينه سواء معاه او مع غيره
النصيب ما تقدرين تتنجنبينه استخيري رب العباد وطلبي مشورته والله ايسر امورج ولا راي البنات لا يحل ولا يربط
تقبلي مروري

 

[أحبه موت]

ياعمري يعتمد عالشخص نفسه في رياييل معقدين وفي رياييل لا عادي عندهم ومتفهمين

 

[iron women]

ماني فاهمة ليش هالجوم عالبنية من البعض لمجرد انها سالت بهالشغلة وين الغلط يعني البنية تبي تسمع اراء مختلفة بالنهاية القرار لها عيل شحقى فاتحين المنتدا مو عشان ناخذ راي بعض ونستفيد من تجارب غيرنا؟

عموما حبيتي مثل ماقالو البنات يعتمد على الريال يعني يختلف من شخص لشخص وهالشي مايبين الا عقب الزواج

انا مثلا خذيت زوجي عن حب لاكن عمره ماشك فيني ولا عايرني عشان اني حبيته او كلمته لاكن هالشي موقاعدة

وكل ريال له شخصيته وطبعه وبانهاية الزواج قسمة ونصيب والتوفيق من الله وانتي فكري فيها من ناحية اذا الشخص

زين وشاريج ويبي ايدش البيت من بابه مافيها شي اكيد اهلج بيسالون عنه وعن اخلاقة اما من ناحية الشك والغيرة

فهاذي تصير احيانا مع الريال عقب الزواج حتى لو ماكان ماخذ زوجته عن حب يعني طبعه ايكون شكاك

 

[Q8iYa'87]

كل شخص و تفكيره و عقليته .. استخيري ربج و شوفي

و انصحج تهدين الفون الحين عشان الله يوفقج .. لا تعصين الله على شي ما يسوى

و الحمدلله انه يبيج خلاص عيل ما فيها شي .. استخيري و ادعي اذا زين توكلي على الله

 

[pretty sarona]

مو مقياس ,, ما نقدر نقول ان الزواج اللي عن حب فاشل و التقليدي ناجح ,, لان يعتمد على التوافق بين الطرفين ,, و هالشي ما يبين الا بالعشرة

 

[الفجر المضئ]

مشكورات حبايبي بصراحة انا داخلة بنك غير لأني عارفة انكم راح تهجمون علي ,,,,,,,,,, بس الله يسامحكم

 

[brettey]

طنشي الي يهاجمون طاف ماعليج منهم حبوبه

 

[الفجر المضئ]

brettey مشكورة حبيبتي اليوم قلت له ما نبي نكلم بعض بجى بالتلفون وحسيت انه راح يموت والى الأن ما ادري وش صارفيه ....... والله حدي خايفة اني اكون سويت بالريال مصيبة

 

[meen_ana]

حبووبه خل يتقدم لج والله يكتب للي في خير ومو شرط يشك فيج بعد الزواج دام اهو للي مختارج في ارادته

 

[الفجر المضئ]

هو تقدم لي بس اهلي رافضين والى الأن يحاول ويكلمني بس اليوم قلت له خلاص مانبي نكلم بعض لحد اهلي نايقتنوعون
بس مسجين مات بجي وبعدها مادز لي مسج ولا حاول يكلمني بصراحة انا ارتحت بس خايفه على مشاعره