منو فيكم تاخذ ماجله معاها؟

[fat]

حبيت أسالج عن لكروز من وين نحجز ومن وين تبدي الرحلة الي رحتوها اختي بتروح تايلاند ونصحتها تروح مثل رحلتج

 

[bintmishref]

انا احس على حسب كل شخص شنو احب.. يمكن انتي وريلج ما تاكلون جذي او يمكن عادي عندكم..
يعني بنت خالتي يوم كانت بتروح عند ريلها ما بقى شي ما خذته..

بالنسبه لنا لما كنا نروح النمسا.. عندهم قبل لا تغيب الشمس بنص ساعه تقريبا كل شي يصكر (حطيها في بالج لا تتوهقين) فأحنا ناكل وجبتين باليوم بس..
ابوي نوعه صحي وايد فأمي تحط تبرويرات شي فيه زعتر وشي فيه زيتون وتصكه بالنايلون عدل.. الزيت ناخذه من جمعيتهم هناك..
اهم شي غلايه الماي..
من ناحيه سماط و قلاصات بلاستيك وقفاش بلاستيك لازم ناخذ وطبعا هني ما يطلع حتى ربع السعر عندهم يعني وايد ارخص وماياخذ مكان منج وتحتاجينهم ساعات..
بالجمعيات تلقين السلطه مقصصه وخالصه واشكال وانواع سلطه خضره وسلطه معكرونه وسلطه بالجبن يعني بس محتاجه قفشه وشوكه حتى الصلصه تكون معاها مثل شغل ماكدونلز.. وتلقين حتى الفاكهه بدال لا تشترينها جذي يكونون مقصصينها يعني نص رقيه ولا سلطه فواكهه.. وكل يوم بيومه فرش..

السنه اللي طافت هبينا ناخذ من شوربه اكنور البودر ماتاخذ مكان و حلوه حق العشا..

هذا اذا كنتي بتقعدين بشقه اما اذا بفندق راح يفرق وايد..

وزلمسي فيها مطاعم وااايد وفيها الكباب والشورما وحلال بعد واللي يشتغلون فيه اتراك
ممم شنو بعد.. بالنسبه للماي بالنمسا قبل لا تشترين اي بطل تأكدي انه ماي عادي لان اهما اغلب شي يشربون ماي غازي احنا اول مره رحنا فيها النمسا وايد توهقنا لين ما لقينا بطول ماي عذب..

 

[daloO3a]

انا ما اودي

 

[فيروزه]

تاخذين معاج خفايف يعني مو شي ينطبخ

بس دول شرق اسيا غير اكلهم

 

[سموالاميره]

بنت مشرف ........

قوليلنا شنو اسم هذي المطاعم اللي بزلمسي؟؟؟

ومكانها بالظبط


تحياتي

 

[bintmishref]

و الله ماعرف اسمها بالضبط بس اهيا عند بحيره زلمسي.. المنطقه صايره سكه قطار.. على يمينها بحيره وممشى والعاب يهال ديارف وزحلاقيات.. ويسار البحيره في مطاعم ومحلات.. المطاعم وايد منها الايطالي ومنها محلات البيزا وفي مطعم بعد اسمه علاء الدين هذا اكلاته خليجيه يعني عيش ومجابيس ..الخ بس انا ماذقته اخوي اكل فيه ويمدحه..

زلمسي الفتره الاخيره صارت كلها خليجين.. وخاصه صوب الكافيهات جنج قاعده بشرق عند كافيه الشباب اللي قاعدين ويخزون بالرايح والراد:s

 

[أمانيQ8]

فاااااااااااااااااااااااااات وينج؟؟؟
انا تمام ...دقي خل انسولف ولهت عليج
بالنسبه للبطل ادري قطع اماعنيه من اول ههههههههههههههههههههههههههههههه

 

[أمانيQ8]

بنت مشرف صاجه باللي قلتيه وماقصرتي .. فيرووزه انا ماكنت اودي بس مجبوره الحين ..

 

[MyLittleBerry]

بصراحه انا بالسفر انحاش من الطباخ

اصلا ريلي مايرضى

وماتخيله يقولي اخذي خيشة عيش علشان اخذه واحطه بالخيشه

هههههههههههههه

مستحييييل

بس حليب اليهال اخذ

 

[غنوة ستايل]

لا و الله اخذ شكو عشا او ريوق مطاعم
و الدنيا نار ؟
اخذ معاي علبه كبيره فيها معلبات :
جبن كرفت ـ مرتديلا اقطه بالثلاجه بالفندق ـ
جبن مثلثات اموت عليه ـ علب فول مع حمص و متبل ـ بسكوت مالح ت كاكاو من المطار


يعني خفايف ما اكثر . لان تعرفين بس العشا وآخر الليل مكان ما اطلب من مطعم الفندق انا اكل بروحي.
خاصه اذا كان ريلي طالع مع ربعه . وراح يتأخر ما احب اطلب من لمطعم بروحي .

وهذه طبعاً فكرتي انا . و انا اللي اقنعت ريلي فيها يعني أمرأه مدبره

 

[غنوة ستايل]

اضحكم .. ؟؟

مره ريلي مسافر القاهره . و انا لازم الحقه عقب اسبووع من سفره

طبعاً اهوا دق علي عشان اخذ معاي ( ربيان ـ وزبيدي )

ما شاء الله اخذت حوالي ( 10 كيلو زبيدي ـ و 14 ربيان ) من الدانه حقت الاسماك يابوه بصندوق مثلج واخذته معاي للقاهره

المهم لعنت الساعه اللي اخذته فيها ....

شهر كامل زز وانا اقشر بالربيان و اقلي بالسمج ....

ما تم طالب مغترب في القاهره . او كويتي في القاهره ما جه شقتنا اكل زبيدي

قطاوه مو رجال ... هههههههههههههههههههههههههههههههههههههههههههه

بس صج صج لاعت جبدي

 

[*فالنتينو*]

حبيبتي انصحج اهم شي تاخذين وياج الشاي لان بصراحة لما رحت النمسا شفت جايهم يلوع الجبد يا يجيج اسود فاحم وماله طعم او إذا تبين احمر جابولج كركديه؟؟!
اخذيلج الغلاية والأوتي الصغير العملي لان بعض الفنادق مافيها وبساكيت صغار وكروسان صغار وعصير كيديدي هذا اللي خذيته معاي

 

[bintmishref]

تعديل ::
مطعم الاكلات الخليجيه اخوي اكل فيه و ما يمدحه**
يعني لا تدشونه
لان مو نظيف وايد

 

[7alawa]

انا اخذ جاي و حليب ابو قوس <_-- ادمان جاي حليب هههههه
و اخذ 3in1 بس

 

[supermarket]

اخذ الجاي والقهوة والنسكافيه الكابتشينو

واخذ بسكوت وكاكاو وشيبس ومكسرات

واخذ احتياطيا جيسين توست والا صمون ونوعين او 3 اجبان

سبحان الله مانوصل مبجر ... ما القى سوبر ماركت جريب ... يعني للطواري نقزر فيه

 

[مشمشة رمانة]

انارايحتلة المطعم الي بسلمسي وصح اسمة علاء الدين واهوة كلش مقابل القراند هوتيل يفصل بينهم سكة القطار شوفي لما يصير الفندق والبحيرةبويهج المطعم يصير على ايدج اليسار وترة للامانة احنا أكلناعندةوماشفنا علية شي باعكس من كثر الزحمة علية ماتحصلين طاولة بسرعة وعلى السوبر ماركت في واحد تركي كل شي عندة يصير وراالسنتر كلش واهي صغيرة كلش ماتضيع [/COL OR]

 

[أمانيQ8]

كويت بتر فلاي .. لا موخيشه عاد يعني .. عاللي اقدر مع ان زوجي طاق بريله ما اخذ عيييييش يقول شنو يعني اذا بنشتري عيش من اهناك بناخذ كيلو بجم يعني دينارين ثلاث عااااادي ولا اودي عيش

دلع لوووووووووووووووووول قضيتيها زفر بزفر عيل يلا ماقصرتي طبختيلهم
فالنتينو لااااااااازم الجاي والحليب من صجج ما اعرف اقند راسي الا بجاينا
حلاوا بوقوس اول من بيدش الجنطه ههههههههههههههه
سوبر ماركت اكيد كل اللي قلتيه باخذه بس توست لا ما اقدر .. وين احطه اخاف يتنتف!

 

[ياشايل الظبى]

انا اخذ معاى

اخذ الشاى والقهوه ... والتمر ... والبهارات ...

 

[أمانيQ8]

targetبهارات...معناته طبخ ... باخذ امري لله

 

[malekatsabaa]

والله يعتمد!!!

اذا معاي يهال ولا ابروهي وحسب الديره الي رايحه لها..دول الخليج طبعا ...ولا شي

اما الدول العربيه والاوربيه.. اخذ وايد اشياء الزيتون...الجبن الابيض والكلاص.. التونه..التوست ..الصمون ..العصير الي يحبونه اعيالي..المرتديلا... الفلفل الدقوس وغيرها اشياء ما اذكرها..

وطبعا لازم اتفكرين بالشغله لان في بعض الدول الله يزيد النعمه ما ينوكل..واذا الواحد بيطول اكيد بيمل من اكل المطاعم

احيانا اسوي شاي وجبن وزيتون... يكون بعد جم يوم من اكل المطاعم واحس انه احلى من احسن مطعم!!!