يوميـــــات مخطوبة

[النوار]

السلام عليكم و رحمة الله وبركاته

عليكم السلام ورحمة الله وبركاته ..

بنات ودي اقول شغله .. يا ريت تتقبلونها بصدر رحب


طبعا مبين عليكم جميعاً الاستمتاع بقراءة اليوميات و الاعجاب بالقصه و كاتبها .. و هذا شي طبيعي و ميول فطري للبنات انهم يحبون السوالف و الهذره



عفوا مع احترامي لنوار و لقصتها .. لي بعض الشغلات ودي اعقب عليها ...


حياج الله حبيبتي وحي الله تعقيبج البناء باذن الله ..


القصه فيها تفااصيل وااااااايد وااااااايد واااااااايد مالها ابدا داااااعي !!!

انا ببداية القصه كنت اكتب يومياً .. يعني شرح لكل يوم ..
عشان جذي في تفاصيل .. انتي تعتبرينها وااااايد او مالها داعيه او انا بوقت ماكتبتها شفت انه لها لزوم عشان تثري القصه او تطول الاحداث او مايمل القارئ ..

و في كلمات كللللش مو كويتيه !!
قد تكون تميل للبدوي .. بس البنت بينت باكثر من موقع انها مو بدويه .. وانها فررري و اهلها فرري و مو متحجبه , مع العلم ان اللي نعرفه عن البدو انهم متحفظين و ملتزمين بالعادات و التقاليد .. و ملتزمين بلبس الشرعي ( بغض النظر عن قناعتهم فيه )

الاخت نوار .. ليما البنات سئلوها انتي فيج عرج ( نظراً لبعض كلماتها ) تهربت و قالت بعدين تعرفون ؟!!! <=== ما اعتقد فيها شي لو قالت اي و الله فيني عرج او لا انا كويتيه 100% .. لا عيب ولاا حرام .. بس ليش تخفي هالشغله .. الله اعلم !!!

اول شي بخصوص اللهجه مااظن عيب ولا حرام انه تدخل لهجات في قصص تدخل فيها لغات اب بعض .. او انا اكتب بمثل الطريقه اللي اتكلم فيها ..
السبب اني ماحبيت اذكر تفاصيل .. لا بتزيد ولا بتنقص لاني انا قاعده اكتب يومياتي كمخطوبه بكل تفاصيل اللي انا ودي اذكرها .. انا ماقاعده اكتب قصة حياتي بتفاصيلها انا اذكر مرحله من مراحل حياتي حبيت اكتبها ..
السبب اني مابينت او وضحت انتي تشوفين هالشي لا عيب ولا حرام لكني عشان اخذ راحتي بالكتابه ودي اني اظل مو معروفه .. الدنيا صغيره .. وممكن انعرف اكثر لي ذكرة سالفة لهجتي فانا اثرت اخفاء هالشي .. وقلت يمكن بعدين مع الايام ينذكر .. فشنو الغلط او العيب بهالشي؟ ..
او اذا بيريحج تعرفين شالعرج اللي فيني .. وقسما بالله انا فيني عرج , بحريني او قطري او سعودي او عشت مرحله كبيره من مراحل حياتي في احد هالدول .. انا قلت هالمعلومه اللحين .. او الله يستر ..



ما ادري هالقصه قصة حياتج يا نوار او من وحي الخيال !!
بصراحة انا مستبعده انها تكون واقعيه ..
شدعووووووه شنو هالقصه اللي كلها تتمحور حول حياة نوار ..
الناس كلهم كلهم زينين !!!!!!!!

انتي تتسائلين اذا كانت القصه حقيقه او من وحي الخيال .. شنو الاحداث الغير واقعيه اللي شفتيها فالقصه؟ قوليلي او انا مستعده اناقشج فيها باذن الله ..
انا اقولج ضفت اشيا .. ماتغير من محور القصه .. بس تثريها او تبعد الشك عني لاني ماودي احد يعرفني .. لاني مستمتعه بكتابة التفاصيل .. او مستانسه على هالشي او ماقاعده افضح نفسي ولا احد .. او المشاكل اللي ذكرتها او بذكرها فالاجزاء اليايه تصير بكل بيت او الكل يعرفها ..
بالنسبه لتمحور القصه عن نوار .. انا قاعده اكتبها عن نفسي او يومياتي .. فشي طبيعي انها بتتمحور علي .. او بالنسبه للناس الزينيين .. احنا تونا .. ماكتبت وايد عشان تحكمين .. او اذا قصدج فعلاقتي مع يوسف فشي طبيعي انه بنكون زينين لانه فترة الخطوبه معروفه بهالشي انه كل طرف يحاول يطلع احسن ماعنده ..


على كل حال .. حبيت اعرض لكم بعض من الكلمات الغريبه اللي قريتها , كلش الكويتين ما يستخدمونها .. و بعض التفاصيل اللي قالتها و ملها ابدا داعي .. ولا ادري شنو الفكره منها !!

يالله بشوفها معاج .. خل استفيد ..


من متى بالكويت نقول ما نسلت شعري !!!!!!!!!!!!!



اول شي شنو تقصد بكلمه بزعم ؟؟؟
انا فهمت شنو تقصد .. بس ما خبرت الكويتين يقولون بزعم !!!

و غير كلمه ( بزعم ) بصراحة لفتني تعددها للشغلات اللي شرتها .. اوكي شنو تبي توصل له من هالتعدد الغريب !!

بالنسبه للكلمات اللي ذكرتيها .. انا ماقلت انه لهجتي مافيها كلمات خليجيه .. يمكن درست في احد هالدول او تعودت على كلماتها ..
او على فكره ثاني كلمه يزعم وليست بزعم :dddds:

الشغلات اللي شريتها ذكرتها لانها فادتني او حبيت افيد القارءات او مااظن فيها شي؟ شنو بتضر فيه؟


خبري بالكويت ينقال عن النساء = حريم مو نسواان !!!


صح كلامج يقولون حريم عدل :gathering: واهم شي انفهم المعنى الحمدلله



و من الشغلات الغريبه اللي مرت بالموضوع و مالقيت لها تفسير منطقي


من الكلام مبين ان نوار و امها يعرفون هالمره بدليل قالت يمه هذي من متى تتصل على امي <=== يعني في سابق معرفه من كلامها


احنا ناس اجتماعيين .. نروح او نيي او نعرف الناس الحمدلله او ننعزم بعراس او عزايم او حفلات او نشوف العالم .. او اهما ناس معروفين .. فعرفها بالاسم وبسبب انه نتشاوف في اماكن وايد بينا او بينهم سلام .. اتمنى انه التفسير منطقي او اقنعج انشاءلله

بعدين نكتشف مع الاحداث ان العايلتين ما يعرفون بعض .. و ام يوسف تتصل و تبي تزورهم علشان يتعرفون عليهم لانهم سمعوا كل خير عن نوار و اهلها !!!!!!!!!!!!!!!






لاحظوا قالت انها بالجامعه ...اول مره اشوووف طالبه جامعيه بسنه تخرج تقوم الصبح و تطيحله فراااااره من مطعم لي مطعم و من سوق لي سوق و صالون لي صالون ... لوووول وين الجامعه !!
اوكي يوم طنشتي .. يومين .. ثلاث .. مو كل الكورس !!!!
ما اتذكر انها داومت الا مره وحده .. ليما كانت تسمج يوسف و يتفاهمون على فكرة تقديم الملجه !!!!!
و حطوا تحت داومت خطين .. يعني سبحان الله على كثر الاحداث اللي تصير ولاا حدث مهم صار بالجامعه !!!

الحمدلله اللي تشوفينه فراره .. هذي روتين معظم البنات او انا ذكرت قبل انه دوامي مسائي مثل ماذكرت اني باخر سنه يمكن ماعندي إلا ماده او مادتين ماتدرين صح ولا لا .. وبالنسبه للاحداث اللي ماتصير بالجامعه لاني ادخل محاضرتي او اطلع او لين قعدت .. اذكر شصار اذا في شي يذكر ..


و بعدين مع الاحداث نعرف ان ابو يوسف متوفي !!!! شلووووووووون ؟؟
اي اي بعد قالت ان زوج خالتها يعرفه ..... يالله تتطوف ان يعرفونه قبل لا يتوفى !!
بس شلون يزرونه بدوانيته <==== الله اعلم !!

مثل ماقلتي قبل لايتوفي او لي يومج الديوانيه مفتوحه .. او يمكن انا ذكرت هالشي عشان الناس لي عرفوني يقولون .. لا هذي ابو ريلها مو متوفي .. او مايفكرون فيني او اتم اكتب على راحتي بس هالعموم ماكنت بافاول على ابو ريلي .. هالحجي قبل لايتوفى ..

لو تلاحظون على حسب كلامها قعدوا الصبح و سوالفوا و سووا حجوزات الصالون و الحلو و خلافه .. ثم راحوا الرايه (نقدر نقول ان روحتهم للرايه كانت بحدود الساعه 10 مثلاً اذا كانوا قاعدين من 8 او 9 ) حلوو
خلينا نقول قضوا ساعه بالرايه ( ما بين تتسوق و تقيس بدلات) يعني على الساعه 11 راحوا حق مشغل البيت اللي قالت لهم خالتها .. خلينا نقول مع الزحمه خصوصاً و قت الظهر و طلعت دوامات وصلوا الصالحيه الساعه 12و نص <=== الصالحيه يسكرون 1 و يفتحون 5 العصر !!!!!!!!!!!!!!
شلون مداها بنص ساعه تلاقي بدله و جوتي .. اوكي اوكي فرضاً فرضاً انا تقديري غلط .. و مداها بنص ساعه تحصل بدله حلوه و جوتي ..
راحوا لنوتر ياكلووون ( خلونا نقول الساعه 2 ) .. اللللللللللللله من ال2 لي اذان المغرب (حوالي الساعه 5 على ابجر توقيت ممكن) <=============== بصراحة الاحداث مو ضااابطه و توقيت غير منطقي بالمررررررررررررررررره !!!!!

قصه يا بعد عمري قصه .! او صارت احداثها من فتره مو اليوم او امس .. او خربطه بالاوقات لاتظر ولاتفيد .. او عالعموم .. انا اقولج اللحين سامحيني على الخلل الفني ..:eh_s(8):






صلي على النبي .. دله بتبين لج ان عينه حاده و شكلها حلووو ؟!
و بعدين شنو هالطاوله اللي بمستوى ويهه ... و طبيعي الدله بتكون على طاوله بعيده شووي يعني متر على القليل ..
و شدعوه لاصق ويه بالدله علشان يبين خشمه كبير لهدرجــــــــــه !!! <=== سوري بس كلش ما تتفوت !!

---- بنات حطوا دله جدامكم و شوفوا اذا يبين الويه لي هالدرجه .. وانتوا حكموااا !! ----

لا حبيبتي .. هالسالفه بالصير صارت بكل تفاصيلها .. ماعندي متر اللحين عشان اقيس لج مستوى الطاوله .. لكن صارت او دلتنا يمكن غير لدلال :dddds:




جيس شكبره .. اخرتها داخله ........................................ محفظه على قولة الام !!!

لي انا محفظه او في اشياء للبيت .. ماذكرتها! .. اسفه .. سقطت سهواً مو عيــــــــــب ولا غيرت شي بالطرح نفسه الله يهديج!

و بعدين قالت ..



قمــــــــــة التناقض !!


اختي .. انا مااكل سلطه او كل طلباتي بدون سلطه او بس احب السيزر لما تتشبع بالسوس عشان يغطي طعم الخس ..!
او ماذكرت كل هذا مايه فبالي ... او انا توني اللحين حبيت هالسلطه بالذات او احب سلطة الكولسلو Incase ذكرت عنها شي بالاجزاء اليايه ..


لو ترجعون للمشاركه رقم 506 بالصقحه رقم 51
راح تلاقون ان الاخت نوار ما شاء الله عليها هبت ريح .. مسويه مجبوس من الظهر .. حق عزيمه العشا اللي مسويتها خالتها ام يوسف .. لووووووووووووووووووووول

حبيبتي انتي بنفسج اللحين رجعي حق اول جمله بتشوفين اني كاتبه انه الخدامه اهي اللي مسويه المجبوس ..




هذولي ^^^ قليل من كثير .. في واااااايد شغلات ما ادش المخ .. بس طوفتها و اكتفيت بالشغلات اللي صج سوتلي علامه استفهام كبيره

بعد الاشياء الغريبه اللي عرضتها لكم .. اعتقد تقدرون تقررون اذا هالقصه صجيه ولاا من وحي الخيال !!
انا برأي هالنوع من القصص ما تتعدى احلام اليقظه .

بصراااااااحة .. انا مستغربه من اعجابكم بالقصه على الرغم من كل هالتناقضات الواضحه ..
انا مو قصدي اجرح بشخص الكاتبه .. ولكن حسيت انها تضحك علينا بكلامها !!!
ودي اعرف شنو تبي توصله بالضبط ؟؟؟


ملاحظه : مشاركتي اعتبروها بعض التساؤلات .. اللي ما لقيت لها جواب مقنع
ارحب بمناقشتها .. و ودي احد يقنعني !

اخر شي بشكرج على اسلوبج اللي تكلمتي فيه ..
ماجرحتي بمعنى التجريح او استدليتي بكل شي بكلام او اقتباسات ودلائل ..
وكل كلامج صح .. بس اخر شي ..
لما قلتي اضحك عليكم بكلامي .. ليش بضحك او شيضحك ؟
انا ماناديت البنات اقولهم تعالو اقرو حقيقة حياتي .. انا كاتبه قصه .. و مكتوب يم الموضوع قصه ..
احداثها كلها من الواقع مافيها الحمدلله طنازه على احد او غلط بحق احد .. او اي شي يسيئ حق اي كائن كان الحمدلله فليش بضحك عليكم؟
انا فرحت بتفاعل البنات وياي .. كان ودي اخذ راحتي او كان في بالي اني بنزل جزء كل يوم خميس .. بهتم فيه او بكتب شي مرتب .. لكن حماس البنات خلاني اكتب بسرعه بسرعه .. انزل لهم اي شي عشان ماينتضرون وايد ويملون ..
وخصوصا لما اقرى انه وحده شابكه من الجامعه تنطر جزء .. او يات بنت قالت انا مسافره او شبكت اول ماوصلت انطر الجزء اليديد ..
او هالشي خلاني اشتط معاهم او انزل بسرعه بسرعه .. بدون تفكير .. كل اللي فبالي .. اني اكتب اشياء تفرح البنات او تستاهل اهتمامهم او في نفس الوقت ماتفضح شخصيتي ..
عشان هالشي شفتي بعض التناقضات اللي برايي منطقيه ..
والحمدلله البنات اللي يقرون لي كلهم مثقفات او اسلوبهم من احسن الاساليب والدليل مو بس مشاركاتهم في موضوعي شوفي مشاركاتهم بكل مكان ..
او هذي فخر لي او عمري ماكان فبالي اني اضحك على احد ... قصدي او غرضي الوحيد اني مستمتعه بهالفتره .. او حبيت اشارك فيها البنات ..

او سامحيني على الاطاله او اتمنى اني ماضايقتج بأي كلمه لانه والله مااقصد اضايقج بشي ..
بس حبيت اوضح رايي

..

 

[النوار]

واللحين حبيت اشكر كل البنات على مشاركاتهم او وقفتهم وياي ..
والشكر الاهم للاداره ..
اللي عطوني ثقتهم اولاً .. او شرف التثبيت ..
او شكر خاص لبنت الكويت .. بعد عمري .. ماكنت اظن قصتي بتوووووصل هالكثر ..
والحمدلله كله بسببكم انتو .. كلكم ودي اشكركم اسم اسم .. بس اخاف انسى احد او يزعل
او زعلكم مااقدر عليه
فرحتووووني او بردتو قلبي الله يبرد قلبكم ..

انا مستعده ارد على اي وحده عندها استفسار بالخاص او باي صفحه غير صفحتي ..
ارجوكم خلو قصتي بحالها .. :0bee2e8d89:

والله اني قاعده اكتبها كل يوم بروحي . او سمحولي على اي تناقض ممكن تقرونه ..
لكن القصه حقيقه .. او مو منقوله .. او قاعده تصير او اذا فيها اشيا مو واضحه فالسبب بس اني ابي احافظ على سرية هويتي الشخصيه عشان ابقى معاكم او اسولف لكم بكل شي بالتفصيل او اشاركم همومي او مشاكلي مثل افراحي باذن الله

اللحين اتمنى نوقف نقاش بالسالفه اللي صارت او نككمل اجزاء القصه
انا كتبت 4 اجزاء بشوف لهم صور عشان انزلها لكم باذن الله الليله ..
او سامحوني .. وايد طولت عليكم
احبكم فالله
وحبيت اقول للبنت اللي قاعده تنقل قصتي فالمنتديات الثانيه ..
مشكوره او وايد فرحتيني .. خصوصا انج ذاكره كل التفاصيل او حقوق الطبع او الله يعطيج العافيه او يقويج انشاءلله

انتظروووووووووووني

 

[ام عفاف الكويت]

قلبج كبير والله حبيبتي كملي

 

[ام عفاف الكويت]

حياتي مالج دخل هذا ثمن الشهره
بعد عمري والله تستاهلين كل خير

 

[ام الفهد712]

حبيبتي والله نواااره كملي واحنااا معاااج

متااااابعينج ياااقلبي

 

[pure feminine]

الله يوفقج انشاءالله


اسلوبج راااااااااقي حيل

ناطرين التكمله

<< متابعه

 

[الشموخ]

لااااااتبطين علينا الليله

وبالفعل انا ملاحظه كل شي والبنات بس عادي لانها وضحت مره اننا بعدين راح نعرف وبصرااااااااحه عادي عندنا لان احترمنا الخصوصيه ومن حقها لان مثل ما انتي شايفه بدت قصتها تنتقل بين المنتديات ولو انا منها بسوي مثلها وراح اكون معرضه للتناقضات لانها ما خذت وقتهاااااا يعني بمعنى آآآآآآآخر مانضجت القصه بس حنا متونسين صراااااااحه وبارادتنا حبينا نتابع

والكل عقله براسه يعرف خلاصه هي وجدت القصه للمتعه لا اكثر ولا اقل لانا اللي بحتذي فيها ولاهي اللي مقدمه نصايح فيها او عامله اسقاطات عالمجتمع علشان تعرفنا الصح والخطأ

على قوووووووولت نواره مرحله هي تعيشها وحبت توثقها



كملي وبانتظاااااااااااااارك

نواره اذا ودك لاتستعجلين بالكتابه لو تحددين يوم معين وساعه معينه بتنزيل القصه افضل لك وللقصه احسن مايكون فيها حشو واشياء تعرضك للانتقاد}}}}}اتمنى تقبلين النصيحه بصدر ررررررررررررحب مثل ماعودتيناااا


صج احنا ملاقيف ومطافيق مااااااانصبر بس الله يعينا عالنطررررره لووووووووووووووووووووول

 

[q8**girl]

واااااي نواره حياتي والله .. ترا كل مشهور وناجح ينتقد وهذا دليييل نجاحه ..
بنات انا بس بقول شغله الي مايبي اتابع لايتابع محد قاصبه فلييش التجريح والانتقادات الي مالها داعي ..؟؟
ومبرووك الف مبرووك على التثبيييت وتستاهليين والله :**
وناااطريين التكمله بفااارغ الصبرر ..

 

[احلى@كويتيه]

الله يوفق كل المخطوبات

 

[bint_looda]

معاااج يا حلوووه للآخر ...
اي حبيت اقول شغله : نسلت شعري << كلمه كويتيه قديمه انا ليلحين استخدمها من كثر ما اقعد ويا يدتي
نسلت مثل انسل وبس هذا الي حبيت اقوله .. ان امشط كلمه يديده ما صارلها وايد

 

[بنوتة نعومة]

يلا نوار نبي نكمل القصة

 

[Bamya]

مبرووووك التثبيت هذا انما يدل على ان القصة ناااااااااجحه ناااااااجحه ناااااااااااجحه بالثلاااااث

واللي بيشتغل محقق عليه بالعاافيه بدوخة الرااس والفراغه اللي اهو فيها

بس خلونا نتاابع الاحداث ونستمتع وخلوا البنت في حالها

كتبي على أقل من مهلج واخذي رااااحتج بالكتابه بالاسلوب اللي يعجبج لا تحاتين ولا تدققين ترى احنا حبينا فييج التلقائية في الكتاابة والشفافية

الله يوفقج متابعتج وناطرة الاجزاء اللي وعدتينا فيها عسوولة

 

[النوار]

عدنــــــــا
بنبتدي اول شي بدعاء الاستفتاح
"اللهم باعد بيني وبين خطاياي كما باعدت بين المشرق والمغرب، اللهم نقني من خطاياي كما ينقى الثوب الأبيض من الدنس اللهم اغسلني من خطاياي بالماء والثلج والبرد"

"سبحانك اللهم وبحمد ك وتبارك اسمك وتعالي جدك، ولا إله غيرك”

"وجهت وجهي للذي فطر السموات والأرض حنيفاً وما أنا من المشركين، إن صلاتي ونُسُكي ومحياي ومماتي لله رب العالمين، لا شريك له وبذلك أمرت وأنا من المسلمين اللهم أنت الملك لا إله إلا أنت، أنت ربي وأنا عبدك، ظلمت نفسي، اعترفت بذنبي، فاغفر لي ذنوبي جميعاً، إنه لا يغفر الذنوب إلا أنت، واهدني لأحسن الأخلاق، لا يهدي لأحسنها إلا أنت، واصرف عني سيئها لا يصرف عني سيئها إلا أنت لبيك وسعديك والخير بين يديك، والشر ليس إليك، أنا بك وإليك، تباركت وتعاليت أستغفرك وأتوب إليك ”

دام عندي هالقد متابعات .. خل نستفيد او ناخذ كلنا اجر :tek::tek::tek:

قعدت الصبح ..
كان عندي امتحان الصبح ..
ماكنت نايمه عدل بالليل قاعده اراجع ..
داير راسي .. قلت حق الخدامه تسويلي شاي ..
او رحت سبحت ..
شرت الشاي او لبست او طلعت من البيت ..
وانا بالطريج دقيت على يوسف قالي اليوم عنده بارت تايم او مابنقدر نطلع بالبريك .. قلت له مو مشكله من زمان ماتغديت مع بيتنا
خلصت امتحاني .. او قعدت بكفتيريات الجامعه اسولف مع البنات شوي ..
في وايد بنات من زمان مو شايفتهم لانه دوامهم الصبح او انا اداوم العصر ..
قعدنا نسولف ..
ونتناقش وقلت لهم عيد ميلاد يوسف جريب او موعارفه شاسوي له ..
او كل وحده قعدت تفكر او تقولي ..
مريوم قالت لي ..
اخذيله فوجر مساج ..
او سارونه ردت .. لا حلاته شي يظل معاه يستخدمه او يستفيد منه .. في اقلام كارتير وايد حلوين وانصحج تاخذين له قلم خفيف .. او مو ريشه
صج انهم ارخص لكن عمليين او بيستفيد منهم اكثر ..
او تقدرين تاخذين له التلفون اليديد من ابل
iphone اسمها وايد حلو ..
ردت لطيفه قالت مرت اخوي بالفلنتاين يابت حق اخوي ..غطى حق سريره .. او طقم معاه فوط ..
قالت سارونه على طاري الفوط انا مره شفت محل .. يطرز على الفوط اللي تبين .. او الخط واااااااايد حلو .. يكتب لج اسمه او اسمج

سارونه عجبتني افكارها .. واقعيه او مايبيلها وقت ..
قلت لهم انزين اللحين الهديه مو مشكله بس شاسوي له برنامج حق اليوم؟
قالت لي تمي طول اليوم تعطينه هدايا ..
اخذي اشيا رخيصه او شي غالي .. او عطيه من الاقل لي الاغلى طول اليوم ..
طرشيله الصبح ورد عالدوام ..
او بعدين وديله الساعه 12 الظهر كيكه صغيرونه عالدوام ..
او بالبريك انتظريه برى .. او عزميه عالغدا .. او قبل وديلهم وحده من الهدايا يعطونه اياها ويا الاكل ..
او اغلى هديه خليها على سريره بالبيت لي رد بالليل يلقاها ..
عجبتني فكرتها وكل البنات بعد قالولي خوووووووش فكره ..
والحمدلله السيوله فالوقت الحالي موجوده ..
البنات كلهم كان عندهم محاضرات .. دقيت على وفوي رفيجتي او قالت لي بتلاقيني بالمجمع ..
اول شي رحت كارتير اخذت قلم ب60 دينار فضيــــــــــــــــــع .. لونه فضي او في خطط ذهبيه او نفس البراغي ..
نفس براغي الـLove collection
حبيت الفكره ..
فنانه سارو! ..

واحنا نتمشى .. شفت عند محل ميداليات رجاليه بأحرف ..
خذيت ثنتين حرفه او حرفي ..
او خليت لي حرفه
ثنتينهم ماكلفوني اكثر من 14 دينار

بعدين دخلنا محل شريت عطر .. قديم بس انا واااااااااايد احبه ..
او كله اعطر فيه داري .. او اخلصه عن ابوي قبل ..
اهما من جينيفشي اظن اسمه Space
او شي جذي ..
ريحته عذاااااااااب بس اهوا قديم ..

المهم قررنا نرجع البيت الوقت تأخر ..
رحت تغديت مع بيتنا ودخلت انام ..
كلمت يوسف شوي او نمت لي المغرب ..
قعدت .. او كانو متيمعين اب بيتنا خالاتي او يدتي .. او اختي يايه وعيالها او اسمع اللويه برى
المهم .. سبحت او كلمت يوسف ..
قلت له ماقدر اشوفك اليوم خالاتي عندنا
باقي اسبوع عن عيدميلاده
من ضمن خطتي اني اسوي نيولوك لاني ماله من لون شعري ..
او كنت بصبغه حق العرس ..
فاللحين خوش مناسبه ..
فقلت بحاول اتحجج بهالاسبوع
+ انا مسويه رجيم او قاعده اضعف او ماقاعد يلاحظ لانه يشوفني كل يوم
فماافرق عليه .. بهالاسبوع بزيد الجرعه شوي .. عشان اتغير
المهم .. طلعت حق خالاتي .. احب يمعتهم والسوالف ..
مليت من لوية الشوارع ..بصراحه ..
المهم .. قعدت اسولف وياهم عن استعداداتي قالولي لاتصبغين اللحين .. عشان ماتخلصين الافكار او بعد العرس تملين او يصير كلشي مسويته ..
خلي الصبغ قبل العرس عشان تتغيرين ..
اقتنعت بفكرتهم .. شجعوني بالرجيم .. او قالولي واصلي .. خوش فكره
قلت حق خالتي ابي فكره حق هديه رخيصه او مفيده
قالت لي غتره .. جيفينشي او دانهيل اسعارهم ماتزيد عن 20 دينار ..
بعدين تربعنا او قعدنا نفكر حق العرس ..
انا ابي حفلة عشى محفوفه ..
خالاتي قالولي كل افكار ممكن تسوينها بحفلة العشى سويتيها بالملجه ..
المهم او قعدنا نفكر ..
او عطوني افكار قلت بشوف ويا يوسف شلون ..
او طلعو من بيتنا متأخر بالليل .. او يوسف كان يدق او انا مااسمع التلفون او دز لي مسج قالي انا بنام
اول مره ينام قبل لااكلمه ..
اول مره يدز مسج من هالنوع العاده ينام او عادي انا اقعده بعدين
دزيت له مسج .." انا اسفه حبيب قلبي قاعدين نسولف عن عرسنا او لهيت مع الافكار او نسيت اكلمك نساك الموت انشاءلله .. اول ماتقعد كلمني وحشتني وايد"
..
او نمت ..

 

[طفلة العشرين]

عسى ما زعل

ننطر التكملة

 

[Bamya]

عااااااااااااااشت نوار:ggdw::ggdw:

تسلمييييييييييييييييييييين عالجزء اليديد

كملي متابعينج:eh_s(8):

 

[ام الفهد712]

ياالله ناااطرينج حبيبتي

لايوقف لايوقف لايوقف لايوقف

 

[جوويره]

و شدعوه لاصق ويه بالدله علشان يبين خشمه كبير لهدرجــــــــــه !!! <=== سوري بس كلش ما تتفوت !!
-------------------------
حبيت اعقب على الكلام اللي قالته الاخت ان مو معقوله يبين ويهه بالدله..امبلا وايد تصيرلي هالشغله اشوف ويهي بالدله والصينيه مرات اذا تلمع حتى بالقفشه الستيل يبن الويه وايد اتمنظر فيها لوووول
ومن قالت هالكلام النوار وانا حسيت انها صاجه اميه بالميه ومايابت شي من عندها لان صح صح وايد تصيرلنا هالمواقف وزين سويتي يوم ذكرتي هالشغله تبين انج على نياتج وصريحه وماتعرفين اللف والدوران..كملي يا قلبي متابعينج للنهايه باذن الله

 

[ام عفاف الكويت]

متابعتج

 

[q8tia27]

مبرووووك التثبيت وحمداله عالسلامه ضاقت خلوقنا تعلمنا عاليوميات والاكشن نبي نعرف اكثر ناطرينج حبوبه ولايهمج حجي العذال ماعليج لان ماترمى الا الشجره المثمره وموفقه حبيبتي نواره واتصدقين انا استفدت اشكثر اشيا من القصه وخذيت جم فكره منج اسمحيلي
ناااااطرين باجي الاحداث

 

[أم بدير]

شوفوا انا ما احب اقرى واااااايد حجي
بس صراحه القصه تونس
من جذي بين كل ثلاث اربع ايام اطلي طله عليها اقرى اخر الاحداث والمستجدات
ومع اني انسانه دقيقه ووايد اركز وادق وافصفص القصص تفصفص
الا اني عمري مافكرت اسأل شنو أصلج والا فيج عرج
انتوا شكو فيها عرج والا بدويه والا حضريه؟
هلهالسالفه بتخليكم تحبون القصه اكثر والا تكرهونها؟
اذا عاجبتكم القصه تابعوا واذا مو عاجبتكم لاتتابعون مو مغصوبين
وبعدين من جد والله وانتوا تقرون تحسبون السالعه جم والمكان هذا صج موجود والا لأ والا شلون أكيد مو متحجبه وفري والا شلون دقت عليهم
ياربي اذا محترين ان البنيه صارلها متابعين لقصتها حطوا قصصكم وخل نشوف المصداقيه والاختصار والتفاصيل المضبوقه بالساعه والدقيقه واحنا نحكم
عذريني اختي نوار على هالمداخله بس والله جد اتنرفز من بنات يردون بس لغرض انهم ميتين قهر ويمكن مو متزوجين ولا انخطبوا أو مو محبوبين نهائيا وذابحهم ان البنات هني حبوج

كملي حبيبتي ومالج شغل باحد
موقفه يارب