Guess Who's Back

[بـ سـ كـ وتـ ة]

تكملة يوم 3 ديسمبر

تعشيت نص دياية مشوية مع خبزة لبنانية كاملة

 

[بـ سـ كـ وتـ ة]

يوم 4 ديسمبر أو 3 مو متأكدة يتني الدورة

ما خربطت بالأكل كنت آكل كميات صغيرة من كل شي

الخميس تريقت كوب شاي وحليب وتغديت جكن تندرز من بافلوز ومشيت الظهر قبل الغدا شوي

وبالليل وديت بنتي البحر تمشينا آنا معاها استانسنا الحمدلله

 

[بـ سـ كـ وتـ ة]

الجمعة تريقت صمونتين بيض عيون بتوست مع طماط ومخلل خيار وشوية مايونيز الساعة 6 الصبح تقريبا

وأعتقد شربت معاه موسي

والعشا رحنا المباركية تعشيت سمج وربيان مشوي وخبز إيراني حبتين ههههه كان طالع من التنور اشحلاته لا يقاوم

بس صراحة مشينا مشي في المباركية قبل وبعد الأكل مو أقل من ساعة

وكان مشي سريع مو تمشي

وختمتها بعصير قصب سكر ويمكن حبتين حلاو

 

[بـ سـ كـ وتـ ة]

اليوم الساعة 8 تقريبا تريقنا أومليت مكون من (بيض + زهرة + ذرة + طماط + جبن) برزيت زيتون


دايما الجمعة والسبت أحاول لما أطبخ أي وجبة أحط فيها خضار كثر ما أقدر عشان أعود فطوم عالأكل المفيد


الغدا كان متأخر تقريبا الساعة 6


حمست جبدة مع بصل وطماط ومعجون وكزبرة كليتها منها كمية تكفي 3/4 خبزة لبنانية

وشوية سلطة (خس + خيار + فجل + مخلل خيار + ليمون + خل + ملح + روب + زيت زيتون)


وشربت كوب عصير تفاح


العشا متأخر الساعة 1


خمس حبات قرص عقيلي صغار مع كوب شاي وحليب

 

[بـ سـ كـ وتـ ة]

طبعا وايد أهملت شرب الماي الفترة اللي طافت

ان شالله أرجع أشرب ماي وأسوي رياضة حتى لو 10 دقايق في اليوم

ان شالله م يخلص الشهر إلا وآنا كاسرة الـ 75

 

[بـ سـ كـ وتـ ة]

الاثنين 10 ديسمبر

ماخذة إجازة فتريقت في البيت الساعة 9 إلا ربع



أومليت حبتين بيض وجبن شيدار في ويه واحد خبز (نص خبزة) وكوب شاي وحليب وبطل ماي صغير

السناك ما صورته ربع خبزة محشية لبنة كنت مسويتها حق بنتي بس ما كلتها مسكينة مريضة

الغدا ما فضيت أطبخ لأني ماخذة إجازة عشان أسنع البيت



عيش أحمر ودياي 65 الساعة وروب 2 ونص

طبعا كميته وايد كبيرة ما كملته قسمته ووجبتين غدا وعشا

شربت معاه لبن المراعي

والعشا مثل ما قلت الباقي من الغدا + شوية حلوة عمانية

 

[بـ سـ كـ وتـ ة]

أمس 11 ديسمبر


ما تريقت


تغديت الساعة 3 وربع




عيش بالزرشك شوية بطاط وكباب ونص طماطة مشوية من مطعم بابك


العيش ما كملته كليت النص الثاني عالعشا


وكليت خبزة إيرانية مع حمص


هالأيام قاعدة آكل زيادة لأن قاعد يصير فيني هبوط أتوقع بس النزيف عقب الإجهاض


ناطرة أسوي فحص دم وآخذ فيتامينات


بس حاليا أحاول ما أقسى على نفسي لأن جسمي بعده ما ارتاح

 

[بـ سـ كـ وتـ ة]

اليوم 12 ديسمبر ... نهاية العالم على قولتهم هههه

قمت من النوم متأخر لأن ما علي صلاة

تريقت تفاحة خضرة الساعة 1 وثلث



والغدا كان الساعة 3 ونص



بطل ماي 330 مل
3 حبات برجر حمستهم مع زهرة وذرة وقرع وبروكلي

وعاليسار تجربة شبه ناجحة ... قريت إن في ناس يفحون الكبة بدال ما يقلونها قلت أجرب

فحتها ولما استوت حمشتها بنتفة زيت بس دهنت فيه المقلى

ملاحظاتي: الكبة مستوية 100%

طعمها لذيذ عادي نفس القلي

ما تنفع تقدمينها حق الضيوف لأنها انتفخت صارت لينة بسهولة اتفتت

عشان جذي قررت هالمرة إذا بسوي كبة بلبن ان شالله أعتمد هالطريقة ... أفوحها بعدين أدهنها بزيت وأدخلها الفرن تتحمر

 

[عاشقة الككاو]

فنانة ماشاءالله عليج
وسلامتها فطوم حبيبتي شلون صارت الحين
الله يحفظها يارب ،، ومشكورة وايد ع معلومات الكالسيوم وفيتامين د


ما قصرتي يا الغالية


ونظامج حلوو بس عقب ما تتاكدين من دمج خففي عيوش وكثري سلطات وسوي اي مجهود بدني ولو 10 دقايق يحرق السعرات ويشغل عملية الحرق عندج..

لعبي ويا فطووم نطنطوا مع بعض لحقيها صيدا مصيدة سووا هروله خل تقلدج بالحركات الرياضيه
رح تحسين انها متعه ووناسه اكثر من انه لازم وشي واجب ..



وموفقة ومتابعتج عسووله

 

[بـ سـ كـ وتـ ة]

حياج الله حبيبتي

الويكند أوف بس ما خربطت بالعكس أحسن من الأيام العادية

يمكن اللي صج خربتها فيه شبس ليز بالخل عن خاطري وما شالله تبارك الرحمن ماني حاسدة نفسي كلللللش ما استسغت طعمه

لأني من زمان ما آكل هالخرابيط صرت ما أحب طعمها

وحبتين ماكنتوش عمتي يايبته مخصوص حقي فيه النكهات القديمة اللي قطعوها

وخل أقولج سر العيوش الأسبوع اللي طاف

كنت ما خذة إجازة 3 أيام أنظف البيت لأن كان حايشه إعصار عقب ظروفي الصحية

فقلت منها تنظيف ومنها تصفية

كنت من الصبح لين أنام وآنا أنظف وأرتب وأخم وأمسح

يعني حرقت أم أم أمهم ههههههه بدعت

أذكر كنت أحط راسي بالليل جني ميتة

بس الصراحة النتيجة تسوى من قلب

من زمان ما حسيت بهالرضا عن بيتي

 

[بـ سـ كـ وتـ ة]

اليوم راح أعتبره بداية يديدة لأني حاسة نفسي أحسن شوي الدوخة خفت والنزيف الحمدلله وقف

ريوقي كوب شاي وحليب نسيت أقولهم بدون سكر وذوبت فيه قطعتين ويتابيكس

بطل ماي 300 مل

وبنتغدى في بافلوز بطلب كنتري فرايد جكن مع خضار

وشوربة جكن انشلادا sharing آنا وزوجي

والدرينكس يا إما ماي أو عصير برتقال فريش على حسب بشوف

وحق العصر يايبة معاي تقريبا ربع حبة بوملو وناس يسمونه بوملي

العشا ان شالله بيضتين مفيوحين وسمبوسة جبن مدهونة بالزيت ومحمرة بدون قلي

وبحاول أروح أمشي شوي عالبحر حتى لو نص ساعة

 

[بـ سـ كـ وتـ ة]

اي وعلى فطوم والمطامر معاها هذا أصلا من طقوسنا شبه اليومية آنا وأبوها

اللعب مع الصغار متعة ما بعدها متعة

وسوري عالبدليات حرف الواو والألف خربانين مرات ما يطلعون إذا ما ضغطت عالحرف حيل

 

[عاشقة الككاو]

هههههههههههههههههههههه
يحلاتكم الله يخليكم لبعض يارب


وحيل حلووو يومج والاحلى انج تعرفين انج تحرقين السعرات مالت العيوش ف منها طاقة وطعم لذيذ ومنها بذكائج تحرقينه وولا كأنج اكلتيه

وصاجه البيت اذا اعتفس يصير مو اعصار الا بركان ههههههه انا ما عندي خدامة وحيل عفيسة ودثرة

كله ماكو وقت واول ما بدوري ينام على طووول انا يمة هههه

 

[بـ سـ كـ وتـ ة]

تسلمين حبيبتي ويخلي لج بدور وأبوه يا رب



أحلى شي صار لي أكثر من سنتين ساكنة في الفنطاس وما عرف مطاعمهم هههه



ما أعرف إلا اللي ريلي علمني عليهم وكلهم عيوش



وبابك كان مغامرة شفته في موقع طلباتي وجربته



شوفي بطلع عن الموضوع بس شوي مو وايد ... اعتبريه تمرين يديد



بيتي كان دثرة مو طبيعية بس قدرت أرتبه عدل ولأول مرة من تزوجت



وكنت بنزل موضوع بس كسلت



شوفي يا محفوظة السلامة



احنا صار عرسنا واحنا بعدنا مو مجهزين الشقة بالكامل ولا مرتبينها ضايقنا الوقت



بعدين أول أسبوعين ريلي كان إجازة فما كان يخليني أقوم أسوي شي في البيت كله يبي نقعد مع بعض



وبعد الأسبوعين اهو داوم وآنا بديت أتنسى وكانت نساتي نوم ... 9 أشهر نايمة حضرتي



كنت الجميلة النائمة هههه



يعني البيت طول هالفترة ما ترتب 100% لازم في سوالف مخششة ودرج داعسة فيه الأكو والماكو



بعدين ولدت الحمدلله وانشغلت مع البيبي



وعقبها توظفت ودوامي من 8 لي 5 وما أوصل البيت إلا 8ونص ولا 9



فما أعتقد بيتج دثرة أكثر من بيتي



ييبي لج سلال غسيل الهدوم الكبار ووانتي بكرامة تب زبالة الكبير



وجهزي سلة فيها كل منظفاتج وعدة التنظيف اللي تحتاجينها في كل الغرف وهالسلة خليها ثابتة لا تشيلين منها شي عشان تسهل عليج في المستقبل



الحين دشي لج غرفة ومسكي زاوية زاوية وفرزي الأغراض



اللي تبينه وموجود في مكانه المناسب خليه

الزبالة قطيها في نفس اللحظة

اللي تبينها بس مكانه غلط حطيه في وحدة من السلال عشان بعدين ادورين عالبيت وتحطين كل شي في مكانه

الأشياء الزينة بس ما قمتي تستخدمينها حطيها في سلة ثانية عشان بعدين ادقين عاللجنة ياخذونها



إذا وايد عندج أغراض وما ميمديج ترتبين وتفرزين مو مشكلة خلي الأولوية عندج الجرد



قطي كثر ما تقدرين ... ثاني مرة لما اتيين اترتبين إلا الأغراض شوية ووايد سهل عليج ترتبينها



وأعتقد أحسن وأنسب حل في وضعج إن ريلج لما يوصل يمسك بدور أو اتييبين أمج ولا وحدة من خواتج تمسكه لج



نصيحة فضي بيتج من الحين باجر لما يمشي ان شالله ما تلحقين عليه وما تدرين شنو ممكن يحط في حلجه لا سمح الله واستعيني عالشغل بسبحان الله 33 مرة الحمدلله 33 والله أكبر 34

وأتمنالج من كل قلبي إنج ما اطيحين في نفس غلطتي

 

[بـ سـ كـ وتـ ة]

اليوم راح أعتبره بداية يديدة لأني حاسة نفسي أحسن شوي الدوخة خفت والنزيف الحمدلله وقف

ريوقي كوب شاي وحليب نسيت أقولهم بدون سكر وذوبت فيه قطعتين ويتابيكس

بطل ماي 300 مل

وبنتغدى في بافلوز بطلب كنتري فرايد جكن مع خضار

وشوربة جكن انشلادا sharing آنا وزوجي

والدرينكس يا إما ماي أو عصير برتقال فريش على حسب بشوف

وحق العصر يايبة معاي تقريبا ربع حبة بوملو وناس يسمونه بوملي

العشا ان شالله بيضتين مفيوحين وسمبوسة جبن مدهونة بالزيت ومحمرة بدون قلي

وبحاول أروح أمشي شوي عالبحر حتى لو نص ساعة

تكملة يومي ​

الغدا كان في بافلوز مثل ما قلت شربت معاه عصير برتقال​

وقبل العشا رحت مشيت مشي سريع نص ساعة بالضبط​

عقبها رجعت البيت نظفت المطبخ وفضيت الكبتات تقريبا ساعة​

والعشا بيضة مفيوحة وحدة وحبتين سمبوسة جبن محمرة بنتفة زيت زيتون​

وبس الحمدلله​

 

[بـ سـ كـ وتـ ة]

صباح الخير

يومي أمس 17 ديسمبر

كان زين نوعا ما بس شوي خربتها عالعشا

تريقت 180 مل حليب المراعي لو فات مع قطعتين يتابيكس وتقريبا ربع حبة بوملو

صورت بس اليوم تلفوني مو معاي

والغدا سلطة شمندر بالروب والليمون وقفشة صغيرة هردة مع شوربة عدس وبيضة مفيوحة حطيتها بصمونة صغيرة كبر البيضة مع مايونيز وعصير برتقال تروبيكانا

والعشا 2 شاورم لحم بخبز صاج

الماي شربت 3 بطول × 300 مل

ومع الحليب والعصير يصيرون تقريبا بحدود لتر ونص

 

[بـ سـ كـ وتـ ة]

الثلاثاء 18 ديسمبر

ريوقي كوب حليب كامل الدسم بدون سكر
ربع حبة بوملو تقريبا
حبتين ويتابيكس

الغدا
شوربة عدس
سلطة جكن سيزرز
قطعتين صغار بيف
عصير برتقال تروبيكانا

العصر سناك:
كوب شاي وحليب

العشا:
باجي حبة البوملو كملتها صار لها 3 أيام مقصوصة راح تخترب إذا ما كليتها

وسويت تمارين حق الخواصر 30 تمرين بس

 

[بـ سـ كـ وتـ ة]

الأربعاء 19 ديسمبر

الريوق:
ربع خبزة حشيتها لبنة أولكر الصغيرة
ونتفة خبز كبر لقمة وحدة نوتيلا عشان أقنع فطوم تاكل

الغدا:
سلطة تونة كنت مجهزتها حق الدوام بس ما داومت


سناك: جاي بالهيل والزعفران وماي الورد

وعلى أساس إني بوقف أكل بس تفاجأت إن عمتي بعد عمري دازتلي عيش ومرق دياي بالبطاط والقرع

كليت منه بس ما كثرت

وسناك: شاي وحليب

سويت هالتمرين

http://www.youtube.com/watch?v=xRScb2l4Z4g

ساعة إلا ربع وقبلها تقريبا كنت مسوية جم تمرين عالماشي تقريبا خمس دقايق من بينهم النط مع فتح الايدين والريول وضمهم (المقص)

 

[عاشقة الككاو]

ماااشاء الله يومج حلووو وحلووو انج قعد تخدعين جسمج مرة تاكلين دسم وتشدين بالرياضة ومرة خفيف وهم حركة عشان يزيد معدل الحرق عند وجسمج يضيع وعباله هم بتاكلين اكثر وهذي اهي فايدة السناك او حصص الوجبات الخفيفة ..



ومشكورة وايد ع خطة تنظيف البيت بصراحه وااايد تنفع وعملية جدا خاصة اني عندي كمية هدوووم وخلاجين ووايرات والعاب رهيبة وبعضهم ما ينفع ينخش ويحتاج قط ..

وابشرج انا الحين حامل يارب لك الحمد بس المشكلة نزل مني بني وانتي بكرامة ورحت الدكتورة ف عطتني ابر وحبوب مثبت لغاية 15 يوم واراجعها مادري ليش حمل عن حمل يفرق

ببدر كنت شحلاتي مافيني الا العافيه الحين كل ما امسح عزج الله يطلع الدم هذا .. وحيل خايفة وموسوسة والله .. يارب لا يضيع تعبي والحمدلله ع كل حال .. طبعا الابرة جداااا حاااااارة ولا اراديا انقز منها ،، و طبعا بدر مااقدر اشيله نفس اول 24 ساعه .. والمشكلة عزج الله لما اغير له البامبرز ويكون مسويها اظطر اشيله ع الحمام واغسله عدل الثنايا وكل شي مع انه اسم الله علية 9 كيلو بس احس ظهري بينكسر والدكتورة منبهتني راحه تامة مدة 5 ايام كاملة شسوي ماكو خدامة معاي ومافي غيري والابو فيه دسك بالظهر ( انزلاق غضروفي ) ف مستحيل يشيل اي شي ولانه حاليا قعد يسوي علاج طبيعي و 20 جلسة يارب يشفية ويشفي كل مرضى المسلمين ..



فكرت انام عند امي انا وبدر ع الاقل يمسكونه شوي عني ف الاخ بو بدر الله يسامحه يقول مااعرف انام بدونكم يصير لي ارق وماانام ابيكم عندي .. وفكرت اخلية ينام عند امي بس ماكو فراش مريح له واحس بهذله ..


وما ودي اكشت فيه واروح واهوه مو راضي لانه من النوع الي وايد ملول واذا سويت شي مو عاجبة بيحن ويدقدق عليه ويصدع راسي

الله الحافظ الله رزقني الحمل بدون حول مني ولا قوة وربي قادر يحفظة لو اني اشيل اثقال الحمدلله ع كل حال ..


سامحيني قلت لج قصة حياتي كاملة بس سبحان الله حبيتج بالله وحسيت شكثر ودج تساعديني وتشرحين لي كل شي مثل قصة الكالسيوم والتنظيف ..


عسى الله يوفقج دنيا واخره ويخليلج فطوم وابوها ويرزقج الحمل السليم التامل عاجلا غير اجل يارب العالمين ..

 

[بـ سـ كـ وتـ ة]

حبيبتي رديت عليج يوم الجمعة رد اشطوله اشعرضه بس انمسح

أسوي عشا وأرد عليج ان شالله