ديوانية بيت العمر

[sara3]

حبايبي كويتيات انا طلع لي بيت حكومي في مدينة سعد العبدالله البيت شغل عدل وماعليه كلام

لكن حبيت ابدله ببيت راس وادفع الفرق للطرف الثاني .... وابي رايكم وتدلوني على الطريقه

الي اعلن فيها عن رغبتي بالبدل مع العلم اني رافضه فكرة المكتب العقاري كوسيط لانه يرفع السعر يمكن للدبل


ياليت تساعدوني اكون شاكره لكم

هلا حبيبتى

حطى اعلانات بالمنطقة نفسها .او بالجرايد الصفرة،وعن طريق معارفك واصدقائك

وموفقة حبيبتى

 

[sara3]

ها صحيح والله أني انصدمت في أسعار الشتر شنو سعر المتر 27 - 32- 45-
وانا الحين لازم اركب الصناديق والله مدري شسوي الله يعافيكم خواتي اللي مجربة شي رخيص وكويس تقوليه

الله يعينك وايعين الجميع الا هالشترات دوخة كنا بس نبى نحط جهة الشارع وانا ما وافقت الا البيت كلة
عاد تعالى شوفى الدرايش اشكثرهم

فى ناس اتحط الصندوق وكل ما صار عندها مبلغ ركبت كم شتر اهم شى الصندوق موجود

 

[مرتاحة البال]

مشكووره حبيبتي sara3

حطيت اعلانات والله يوفق الجميع

 

[اخت فروحه]

جزاكي ربي كل خير اخت فروحة
والله يباركلج في اولادك وصحتك واسعدك الله في الدارين
حافظك ربي من كل شر

اللهم امين
ياحياتي مشكورة على هالدعوة

ولك مثلها

 

[دموع ألماس]

الله يعطيكم العافية استفدت من هالموضوع
انا وريلي من نخلص من التهيكل الاسود وبندخل مرحلة السيراميك والصبغ وغيره
ما عندي شيء اضيفه لان البنات ما قصروا

بس أقول لكم اللي تبي ديكورات وورق جدران تلقونها في حولي شارع تونس
حتى امطابخ الحلوووووة موجودة بحولي
مجمع كامل كله مطابخ واسعرهم زينة المتر فوق وتحت 70 دينار ويصمممون لج المطبخ حسب ما تبين

وانصحكم تحطون ورق جدران بالغرف يهبل بس طوفة او طوفتين والباقي صبغ سادة من نفس لون ورق الجدران.
والله يسهل على الجميع

 

[لا تغرك ضحكتي]

رفع

 

[اخت فروحه]

الله يعطيكم العافية استفدت من هالموضوع
انا وريلي من نخلص من التهيكل الاسود وبندخل مرحلة السيراميك والصبغ وغيره
ما عندي شيء اضيفه لان البنات ما قصروا

بس أقول لكم اللي تبي ديكورات وورق جدران تلقونها في حولي شارع تونس
حتى امطابخ الحلوووووة موجودة بحولي
مجمع كامل كله مطابخ واسعرهم زينة المتر فوق وتحت 70 دينار ويصمممون لج المطبخ حسب ما تبين

وانصحكم تحطون ورق جدران بالغرف يهبل بس طوفة او طوفتين والباقي صبغ سادة من نفس لون ورق الجدران.
والله يسهل على الجميع

حياج الله حبيبتي :

ومشكورة عالافادة

 

[sara3]

مساء الخير

اشلونكم بنات طيبووووووووووووون:ada:

 

[sara3]

صباح الخير

اكمل لكم موضوع الاخ طارق 55نكمل معاكم .. الان .. نظام دفعات بنك التسليف .. تكون .. 8.500 الاف في البدايه .. وبعدها 5.500 دينار علي كل مرحله .. اول مرحله صب الشناجات .. وبعدها صب الارضيه .. وبعدها بعد الدور الاول وبعدها بعد صب الدور الثاني وبعدها صب الدور الثالث .. طبعا علي الاسود .. يكملولك ال 30.000 علي الاسود كله .. المفروض انك تسوي الاسود بهالمبلغ .. انت عاد قسم مع المقاول دفعاته .. وهذا عند توقيع العقد كان تقوله .. اول شئ اعطيك 1000 وبعدها بالمرحله الثانيه ايضا 1500 وبعدها بالمرحله الثالثه 2000 المهم تخلص البنيان مع المقاول وهو يبي منك مبلغ معين .. ضروري .. لان المقاول أو أي عامل اذا عطيته زياده عن حقه يقدر يتركك .. لانه مو محتاج للفلوس ولكنه لو كان مأخذ أقل من حقه يظل هو يطاردك وتلقاه موجود علي طول .. ثانيا وأنا هنا اتكلم عن الشخص الي ماعنده افلوس بس ال70 مالت الحكومه .. أصلا أنت ماتقدر تعطيه كل حقه الا ان قللت من مكان ثاني .. تعرفون أغلب الفلوس ويثن تروح ؟؟ علي المقاول والخرسانه .. أهمه الي يأكلون 80 % من ال 30.000 مالت الاسود .. والباقي ماكو شئ .. شئ بسيط .. اما الدفعات الكبيره الي بالالاف تروح علي هالاثنين .. ولهذا حاول توفر بالصبه الايرانيه اوفر .. بس تكون بشروطها مثل ماوضحت لكم .. وخذها قاعده .. سدد للخرسانه وقلل علي المقاول .. أذا عندك مبلغ معين والأثنين يطالبونك .. أعطي للخرسانه وقلل علي المقاول .. ودائما أمشي علي خطه أنت دارسها ..

( تكنيك المقاول ) !!
المقاول يبيله تكتيك .. اول شئ .. دائما أدعي بالفقر .. مو تجيله بمرسيدس وتتأمر .. يقول هذا شبعان ويقعد يسحب منك دفعات .. تعاله بأردي سياره عندك .. هذا اولا .. ثانيا اقعد معاه في البدايه وقوله .. تري صراحه أنا ماعندي الا ال70.000 مالت الحكومه .. وعلشان جذيه انا ابي منك أنك تتعاون معاي بالشغل .. أنت تبي البيت يكمل وتأخذ افلوسك والا البيت يوقف وماتأخذ أفلوسك ؟؟ بالطبع بيقول لا بتعاون معاك .. قوله طيب .. أنا كمالك القسيمه أذا انقصتني 100 دينار راح يوقف البيت ( وهالكلام صحيح تري مو كذب ) ولهذا راح اعطيك دفعات أقل شوي من الي اتفقنا عليها .. وأبي أشوف الشغل .. وأذا كفت الفلوس راح اكملك المبلغ قبل الشيك الجاي .. لاني ماأقدر اغامر وأعطيك كل المبلغ واقعد امفلس والشغل يوقف .. طبعا هالكلام مو من اول دفعه .. خلها الدفعه الثالثه استعمل هالطريقه .. وهو من ناحيته عنده تكتيك ثاني بحسب خبرته .. راح يدعي بالفقر .. ويقولك العمال يبون افلوس .. والله الشغله مابتوفي معاي .. من وين اجيب خشب ومن هالكلام .. بس ماعليك .. قدر انت الامور حسب فطنتك وذكائك .. لاتكون شديد وماسك ايدك وايد ولامسرف .. قدر للامور قدرها .. لانه فعلا احيانا المقاول تخلص افلوسه .. بس هم لاتعطيه وتقصر علي باقي الاشخاص .. أنت عندك اكثر من ورشه راح تشتغل بوقت واحد .. يعني خلنا نأخذهم بالترتيب .. أول شئ المقاول يبي منك نقول 1000 دينار .. بعدين الكهربائي يبيله 100 دينار عند توقيع العقد .. الصحي يبيله 100 دينار .. ويبيله في الدفان مواد ب 500 دينار بايبات العدساني للصرف الصحي .. يبيلك حديد الدفعه لل15 طن 11250 دينار .. يبيلك تشتري طابوق .. وأذا حطيت طابوق ابو بحص يطلع عليك ال 1000 طابوقه ب 250 دينار .. ويبيلك في الدور الواحد 5 الالاف طابوقه يطلع حسابهم قريب الف دينار .. وهلم جرا .. وهم يبيلك اغراض من هنا واهناك .. بس مثل ماقلت الي يكسر الظهر اكثر شئ حساب المقاول وحسان الخرسانه .. نسق بيناتهم .. ووفر مع الصبه الايرانيه .. ومن حسن التصرف .. أن تجلس مع المقاول وتقوله .. تعال ياابوفلان .. الان خلينا نخطط للمرحله هذي الي احنا فيها كمثال عندي خمسه الاف شنو ورانا من مصاريف ؟؟ وأهو يحسبها بالدينار .. ويقولك الي تحتاجونه للمرحله هذي ( قبل ) لاينزل الشيك القادم ... وزيد انت من عندك حساب الصحي والكهربائي لانه مايعرف عنهم شئ لانه هذا حسابهم عندك انت بس وهو ماله شغل فيهم بتاتا .. الان نكمل تكتيك المقاول .. اولا لاتسمعون كلام الناس الي بنت من قبل .. يقولولك أنا صارخت علي المقاول .. والي يقول انا طقيته .. تري كله كلام اغلبه غير دقيق .. لازم تسويلك تكتيك مع المقاول .. اولا المقاول اشرط عليه شروطك .. وبعدين صادقه .. وخله مثل الرفيج .. لكن لاتسكت علي الخطأ .. ودائما اشعره انك فاهم الشغل .. ولاتتنازل علي شروطك .. وذكره فيهم قبل الشغل بيوم .. كمثال بكره الصبه .. تقول ها هالله الله بكره بالعمال الوايد مو تجيب لي 2 وتيجي تركض !! جيب لي اقل شئ 4 عمال .. او تقوله مو تنسي الهزاز .. ومن هالكلام .. لكن دائما تكلم عن حقك بالكلام العادي بدون صراخ .. ولكن ان شفت منهم تجاهل .. لا أهنيه الوضع مختلف .. ايضا العمال .. لاتحتك فيهم وايد وتناجرهم .. وأي ملاحظه أذا كانت سريعه وعاجله نبههم عليها ولو بالصراخ اولا .. وبعدها كلم المقاول .. لاتنزل نفسك للعامل .. التعامل كله يصير عن طريق المقاول .. ولكن ايضا من التكتيك .. الصراخ اولا مع العمال وبعدها ايضا مصادقتهم .. ليش ياشباب الواحد لازم يكون له تكتيك ؟؟ لان مصيرك بأيدهم .. يمكن تسألون كيف ؟؟ اقولكم سالفه ابوعلي جار اخوي .. ابوعلي .. يظن نفسه عنتر زمانه .. داخل القسيمه يصارخ وخارج منها يصارخ .. انتقموا العمال منه .. بأن وضعوا اكياس بحجم قيضه اليد او اكبر شوي وفيها سمنت داخل انابين الصرف الصحي .. طبعا بغفله منه .. ولما خلص شغلهم .. وعند التشطيب هم اخذوا افلوسهم وراحوا .. جاء يسكن اخر شئ لقا ان حماماته كلها طافحه .. لان الماء بعدين يحوش الاسمنت الي في الانابيب يقوم ييبس الاسمنت ويسكر مجري الماء داخل الانابيب .. وهذوله يكونون تحت صبه الارضيه .. كيف يعالجهم ؟؟؟ هل يقوم يكسير الارضيات من جديد ولا كيف ؟؟ المهم هذي قصه ابوعلي .. وماأدري اش صار علي اخره هالقصه .. عموما .. لاتخلي العمال او المقاول يكرهك .. عامله باللين لكن لالاتنازل عن شروطك .. وبالنهايه احنا بشر .. لكن ان ماعجبك اي عامل منهم وشفت منه تلاعب وانه يضحك عليك .. بكل بساطه قوله الحين .. الحين ابيك تطلع بره قسيمتي ولاعاد اشوفك فيها ... وكلم المقاول وقوله هالعامل ماأبي اشوفه عندي بالقسيمه .. وحاول قدر المستطاع انك لاتنفعل .. ولاتعصب لانه وراك بلاوي بالبنيان وأذا بتعصب علي كل شئ بتشيب ويجيك سكري الله يكافينا الشر .. هذي نصيحه واحد من الربع .. يقول كل من بني بنيان جاه سكري من الانفعال .. ولهذا حتي لو يتطرد احد من العمال لاقدر الله سوها وأنت أخر برود وروقان علشان صحتك بس .. عموما الي اتذكره الان .. ولاتنسي النصيحه الاخيره .. دائما وأبدا .. خلك ذيـــب وصاحي !!!



السلام عليكم

اخواني الاعزاء يشرفني جيرتكم والله يوفقكم بالبنيان ويسهل امركم ..
جاني سؤال من اخونا خسران جدا عن تكلفه البناء .. وأنا اولا اشكره علي هالثقه الغاليه وارجوا ان اكون قدها .. بس للاسف اخواني انا الي الان لم ادخل مرحله التشطيبات ..ولاأعرف اسعارها الي الان ولكني جلست وتناقشت كثيرا مع من قام بالبناء .. الاسعار للاسف مكلفه .. لسبب .. أنك كأنسان تريد ان تبني بيتك .. لازم وحتما تريد افضل المواد .. وهناك مواد رخيصه ومواد غاليه .. فالاكيد لن تتساهل بأمور وراح تحط الاغلي .. كمثال .. راح تسأل عن مواد ( عزل الحمامات ) تكرمون .. راح يقولولك فيه مواد غاليه واجود من غيرها وفيه الرخيص .. للاكيد راح تقول عطوني الغالي .. مالي خلق بعدين وانا قاعد في الديوانيه وفوقي حمام ( كمثال ) يقعد سقف الديوانيه يخر علي الماء !! .. وهكذا دواليك .. راح تقط من حيث لاتشعر وتزيد .. راح يطلعلك عمود في نصف الصاله .. تكلفه نقله 700 دينار .. تجيك الافكار .. أنا باني بيت العمر استخسر 700 دينار علي راحتي .. وبعدها راح تقرر تزيد هالمبلغ علشان نقل العمود .. وهكذا تشوف نفسك شوي شوي تقط زياده .. ويزيد المبلغ عليك .. عموما انا قلت في مشاركه سابقه الرقم تقريبيا لما سألني الاخ خسران جدا عن التكاليف :

علي حسب ماتقط بالبيت .. بس انا راح احسبلك المتوسط

الخريطه 1000 دينار .. بيت دورين ونصف تسويه صبه ايرانيه يطلع عليك ب 27 الف دينار أذا كنت تبنيه عن طريق ارض وقرض لانه فيه اسمنت مدعوم مع طابوق ابيض مدعوم مع حديد مدعوم .. هذا علي الاسود بس .. أحسب المساح نقريبا 1200 دينار .. شبابيك 3000 دينار .. ابواب 1200 دينار تكييف 6000 دينار .. صحي 3000 دينار .. كهربائي 3000 دينار .. ارضيات وسيراميك .. قول 2000 دينار .. حمامات .. قول 3000 هذا أنت مبالغ بعد .. صبغ 2000 دينار .. 1400 اسقف جبسيه .. شنو بعد ؟؟ اي ماي تنكر ماي رايح وجاي قول 1000 دينار .. حارس 1000 دينار .. مكالمات بالتلفون جيب وودي وحط وشبل 500 دينار .. 1000 دينار درابزين .. 1500 ابواب حديديه خارجيه كشخه .. وحط 5000 دينار متفرقات .. كم صار ليلحين ؟؟ تقريبا 65 الف .. هذا تكلفه البيت دورين ونصف .. وأحسب انت عاد الباقي .. قول السرداب يكلف 20 الف لانه صبه خرسانه وفيها حديد وايد مكلف .. بس طال عمرك .. احسبها انت بروحك .
-----------
هذا علي اعتبار البيت عادي ومافيه هوردي .. في ناس يزيد عندها مبني الهوردي في البيت الي 3000 تقريبا في كذا دور .. والان الاسعار تختلف للتشطيبات ايضا من وقت لي وقت ..

الاخ سألني عن :

بخصوص البنيان اخوي...بعرف كم تكلفته؟ يعني انا مفكر اشتري ارض وابنيها...بس بعرف كم تكلف؟
خل نقول 400 متر وابيها بنيان سنع والخارجي مو مشكله لو كان سيجما...و دورين و نص و سرداب كم تكلف؟ وابي الاسعار وايهو احسن لو احط سرداب والا دور ثالث؟

وجوابي أخوي .. بشكل تقريبا لانه مثل ماقلت لك كمثال .. البورسلان او الرخام اسعارهم مختلفه وانت بيدك هذا الامر .. اعرف شخص حط الصالات الرئيسيه رخام ب 15 دينار المتر .. وغيره حاط سيراميك ب 1.5 للمتر .. واحسب الفرق .. الاول تقريبا كلفته الصالات 1500 دينار وغيره ماكلفه الا 200 دينار .. اعرف شخص حتي الدرج الي في وسط الصاله حاطه سيراميكة من امغره .. بس يقول لي انا لي خلق في عز الظهر اروح وارجع علي امغره .. وغبار ولويه وتعب .. بس لي خلق ادابج وهلم جرا ..
أما عن سؤالك .. حط في بالك السرداب يكلف تقريبا 20 الف زياده بسبب ان السرداب يبيله عوازل .. وهو في النهايه كله صبه خرسانه تأكل من الحديد والخرسانه كله دار مداره .. لكن الدور الثالث مايكلف شئ .. يعني تقريبا يكلفك الدور 10 الالاف او اقل بعد .. عموما .. راجع لكم قاتل الله العجله ..

لعن الله هالعجله ماتخليك تكمل لنا هالدرر لوبيدي احط مسمار بطريجك وبنجرلك هالعجلة وخليك قاعد يمنه اتسولف
الغالي بوطرووق اسعار الصبه الخرسانية الجاهزة من كلامك اغلى من الايرانية لكن المشهور انها اضمن لانها معموله تحت اختبارات وقياسات ومعايير ومضمونه من الشركة

وذكرت انه الصبة الايرانية قوية و 100%
بس شنو مشاكل الجاهزة برايك؟؟؟؟؟



السلام عليكم

الاخ عذبي 71
اخوي .. تبي شنو أكثر شي يكرهه المقاول ؟؟ اقولك .. اولا يكره المقاول الصبه الايرانيه .. والشئ الثاني يكره المقاول أذا بتسوي بيتك ( سيجما ) !! ليش اقولك .. اولا الصبه الايرانيه تطول بالنسبه للسقف .. تقريبا 8 ساعات .. تخيل المقاول والعمال قاعدين فوق في الشمس يشتغلون لمده 8 ساعات .. هذي تأخذ لها بالنسبه للصبه الخرسانيه الجاهزه تقريبا ساعتين فقط !! ثانيا الصبه الايرانيه يتحمل مسؤوليتها المقاول .. لانه بيده يتحكم بقوتها .. وهو الي راح يكتب تعهد في البلديه علي نفسه انه يظمن جودتها .. ولهذا هو يكرهها .... لكن مع هذا كله .. المقاول الي عندي جزاه الله خير ( من هذه الناحيه ) هو من نصحني فيها .. بل يصر عليها علشان يوفر علي المصاريف .. وهو علي كلامه انا شفت بيوت كثيره صابينها خرسانه جاهزه عليها مشاكل كثيره .. في بيوت صار فيها انهيار ورفعت قضايا في المحكمه .. ومنهم بيت شيخ في الجابريه يسولفون عنه .. وعلي ذمه مقاولي ايضا الي الان ماشفت بيت واحد صبوه ايراني وفيه مشاكل .. ولابيت لحد الان !! شوف اخوي .. في مثل كويتي يقول ( ناصحكم فاضحكم ) ومعناه هالايام لاأحد ينصح .. لانه تنصح ناس تبي مصلحتهم باجر يجونك يلومونك او حتي يشتمونك ولسان حالهم : كله منك نصحتنا ووهقتنا !! صحيح والله اخاف انصحكم تصير مشكله بتقولون كله من طارق وهقنا .. بس ياجماعه انا اقولكم تجربتي كما هي .. بدون زياده ولانقصان .. الايرانيه اقوي اقوي اقوي .. لاني صبيت الخرسانه الجاهزه من شركه الغانم ( وماراح اقول اسمها الكامل ) وبعدين طلعت العمدان لونها فاتح .. وبعد صبتي بالايراني زدت الاسمنت .. طلع لونها قامج .. وهذا دليل قونها لان الاسمنت زايد فيها .. وبعدين هما لما يمدحون الخرسانه الجاهزه يقولون فيها مواد .. طيب نسأل السؤال الي بعده .. المواد حق شنو ؟؟ يقولون حق سرعه تماسكها وقوتها !! طيب التماسك مانبيه .. بدال ماتتماسك بعد يومين خلها للاربعه ايام .. والماي عليها يسرسح يزيد من قوتها .. وتصير اقوي .. اما عن قوتها فأنا اتحدي اي شخص يقول هالكلام .. رش الماي علي الاثنتين وشوف النتيجه الايرانيه تنقع الماي فيها ولاينزل تحت .. والخرسانه الجاهزه تقول دوش ماء ينزل منها والكل يعرف هالشئ صدقوني اعملوا الايرانيه بشروطها .. أنك انت تقعد تجابل العمال والخشب نظيف وطيب وفيه في الزوايا الربل الاسود علشان مايصير ( تثريم ) للعمدان .. وايضا استعمال الهزاز .. خلاص الاكيد 100 % راح تصير الصبه ممتازه .. اما بالنسبه الخرسانه الجاهزه .. هي تجي من المصنع ولاأحد يدري بالضبط كيف خلطوها وماهي مكوناتها .. يحكيلي الموظف الي في قسم الفحص علي العينات ان هناك الكثير من التلاعب ظبطوها بالنسبه للخرسانه الجاهزه .. منها قوتها .. ونسبه الماء الي فيها .. عموما .. هذا رأي واحترم ارائكم .. والي عنده افلوس زايده يسوي الجاهزه .. والي يبي التوفير يسوي الايرانيه والله يوفق الجميع ( اعيد وأكرر هذا رأي مو باجر يجيني واحد يقول وهقتني لاسمح الله تري ماني مسؤول : )

ثانيا نكمل نقطه ليش المقاول يكره السيجما .. لانه في هالحاله راح تطلب منه تشكيل القسيمه من الخارج بالكثير من البراويز او الاشكال بالبناء وراح تتفنن في البيت وهذا تكلفه بالنسبه للنجار عنده .. ويوميه اكثر للعمال .. ولهذا دائما يفضل المقاول ان تقوله بيتي ابي اسوه ميزاييك احسن له واوفر له .. وأريح له ..


شفت بيوت سيجما روعه
بس ماني عارف
اشلون السيجما بالكد
كم سعر متر السيجما؟؟
شنو انواع السيجما ودرجاتها
ولازم الشبك ولا لا



السلام عليكم

في المشاركه رقم 56 أعتقد كنت احسب حساب تكلفه البناء .. وسقط سهوا التكسيه النهائيه للقسيمه .. وهذا يكلف تقريبا 5000 الاف دينار للميزاييك .. ويكلف اكثر بالسيجما .. يمكن 6000 الاف وفوق بعد .. أذا كنت تبي تحط شئ ممتاز مو أي كلام .. وجذيه يصير حسابنا للبيت ال دورين ونصف 70 الف كامله .. غير قيمه الارض وقيمه الكهرباء ..

 

[اخت فروحه]

يعطيج العافية سارونه على هالمعلومات القيمة


صار لي مدة مارحت القسيمة الجو كلش مايساعد


الالومنيوم سعره نازل احسن من الاول

 

[وصايف لو]

بارك الله فيج خيتوه ساره على هالمعلومات المفيدة
والحمد لله لقيت شركة شتر جودة وسعر هي شركة البيت الكويتي بركب بس صناديق على قولتج اختي لحقين خير

 

[مرت حمد]

اختي ساره مشكوره على المعلومات الحلوه الصراحه وايد استفدت منج ومن الخوات

حبيبتي انا شاريه بيت بس ارضي ودور اول ودي بني دور ثاني بس ماني عارفه اشكثر اكلف

ياليت تعطيني فكره تقريبا جم راح اكلف

مشكوره

 

[الفووز]

طريقة ترتيب غرفة النوم الادراج

 

[الفووز]

طريقة ترتيب غرفة النوم

 

[الفووز]

طريقة ترتيب غرفة النوم

 

[حلا القادسية]

الصراحة افدتموني بكلامكم الحلو جزاكم الف خير

 

[حلا القادسية]

انا تري توني يديدة علي المنتدي والصراحة حبيتكم معاكم حلا القادسية

 

[ريناد9]

مرحبا ....
شخباركم

ماشاء الله عليج سارة ما قصرتي حبيبتي ..

 

[ضحاوي...]

السلام عليكم خواتي انا متابعه قديمه للمنتدى بس هاذي اول مره اشارك معاكم انا توني شاريه بيت يديد والحمدالله انه يديد ومانسكن بس غيرت كرمكم الله الحمامات شسوي فسقانه وبعض الارضيات المشكله الي اعاني منها الحين اهي الصبغ ارجوووووووووووو المساعده

 

[Jna3iya]

حبيباتي أبي مساعدتكم
انا اثاثي لونة رصاصي فاتح ومسند مال الظهر في نقشات سوده وخاطري احط ول بيبير مادري اي لوون محتارة
ابي ادخل لون حلو عليه شنوو ؟؟ اللي اتعرف اتقولي بالخاص هاليوميين لازم احط ومادري شنو