اهم الشغلات إلي تجهزينها حق البيبي والمستشفى خل نستفيد

[مزيونة الهيلا]

في شغلات بعد ماحطيتيها مثل سليب باج والجنطة والكفر ومقياس الحرارة والمخدة والقبعات وتقريبا كل شي القاه بسينتر بوينت (جونيورز)ما عدا الامهادات اشتريهم من الاسواق الشعبية

 

[mrs_sugar]

موضوع روعة و مفيد

بالنسبة لي هذا مو اول بيبي .. عندي خبرة الحمدلله

اول شي البيجامات

احسن نوع و عن تجربة من ماركس و سبنسر ما يختربون مع الغسيل و اسعارهم حلوة .. اشتري 9 بجامات ( عيالي طبعهم يرجعون )

التبانات معاهم هم 9 - 12 وحدة طقم مع البيجامات

المهادات من سنتر بونيت او لاند مارك اخذهم مناسبين للأوان البيجامات احتاج تقريبا 6 الى 9

بطانيات مذركير وايد حلوين بطانياتهم للإستعمال العملي و حق الكشخة اسوي لعيالي بروحي اطقم حياكة

فوط صغيرة 6 - 12 بدل الصداري لأنها مو عملية للبيبي تلبسينه كل شوي صدرية

الحين معلومة خطيرة :
ما اشتري رضاعات للحليب علشان ارضع البيبي غصبن علي :eh_s(22):

اخذ ثنتين صغار للأعشاب بس

ما احتاج دلاقلات و لا دسوس البيجامات فيها

المخدة المحفورة من النص

شفاطة الحليب ماركة ميدلا عجيبة ( موجودة صورتها الصفرة اللي بالنص بالصفحات السابقة )

عدة النظافة : الشامبو و الشارو باث و البودر و خلافه

شراشف من دارلنجز للتغيير عليها تستعمل اكثر من مرة ليما تتوسخ و تكرمون ممكن استعملها حقي اول ايام النفاس علشان ما يتدمر سريري

هذا الل اتذكره الحين

هالمرة ما شريت شي ليما الحين

مفكرة اطلب من النت نفس الأسعار و اريح لي .. اكره الطلعة

و الطقم ما بلشت فيه ليما الحين ودي اعرف نوع البيبي اول علشان اختار لون مناسب

اذا ذكرت شي مريتكم​

 

[هوى الدار]

يسلموووو خوش موضوع وذكرتونا بشغلات ناسيتها

 

[بنات حواء2]

عطيكم العافيه و شكرن على المرور و إنشااله أكون فعلن وفيت اما لمسألت الاحباط فهذي مسأله طبيعيه لأني تحبطت وايد بعد مثلكم شنسوي بعد لازم نجهز هلأغراض كلها و يعطيكم العافيه

 

[بنات حواء2]

و مشكور إخت مس شوقر
و أتمنى إلي عندها معلومات اكثر تفيدنا و من وين تنصحوني آخذ ملابيس البيبي غير مارك سبنسر

 

[زوغه طلال]

مشكوووره حبيبتي على الموضوع المفيد

بصراحه ريحتيني وساعدتيني على تحديد احتياجاتي الي ناقصتني
والله اتمم انشاء الله على كل الحوامل​

 

[mrs_sugar]

و مشكور إخت مس شوقر
و أتمنى إلي عندها معلومات اكثر تفيدنا و من وين تنصحوني آخذ ملابيس البيبي غير مارك سبنسر

كل مكان تحصلين فيه بيجامات للبيبي بس انا اكلمج عن النوعية

ما لقيت احسن من سبنسر يمكن دبنهامز حلوين بعد بس مو مثل سبنسر

جربت :
مذركير ( بسرعة تتمطط الرقبة )
نكست ( تصير ملحة مع الغسيل )
ادمز ( نفس نكست )
لاندمارك ( ماشي حالهم بس يتمغطون شوية لازم تديرون بالكم تاخذنو اللي مسكرين عدل من الرقبة و الأكمام )
الأسواق الشعبية ( مو عمليين كلش و احس البيبي مو مرتاح فيهم )

ما عجبني منهم شي من ناحية تحمل الغسيل و اللون و الراحة بالنسبة للبيبي

يقولون شركة الإتحاد ماركة كارتر وايد زينة بس شوي غالية اذا تعرفين تطلبين من النت تحصلينها وايد ارخص​

 

[بنات حواء2]

كلامج صحيح و بضبط مس شوقر لأنه إختي جربت كل هذي الأسواق بالملابس و قالتلي مثل الكلام يعطيج ألف عافيه بس انا خايفه شكلي باخذ وقت طويل على ما آخذ هلأغراض بس بليز منو ممكن يساعدني شنو اهم الاغراض إلي لازم أجهزه حق المستشفى تراني بكر و ضايعه بطوشه

و يعطيج ألف عافيه مس شوقر تراج ما قصرتي

 

[MaYoOoma]

انا ليلحين مابديت اجهز ماشريت الا بجامتين ودلاقات قبل شهرين تقريبا

طبعا انتي ماقصرتي حطيتي كل الشغلات المهمه وماعندي شي اضيفه

وعلى العدد انا احب اكود ^_^ احس باستمتاع بس تعلمت ما اروح الا مع امي لان محد يمسكني حزة المشترى الا اهيا لو راده على ريلي جان شرينا اللي بالسوق كله

فـ ان شاء الله اول ما ابدي اجهز اقولكم اول بأول شنو شريت

 

[mrmr mrmora]

موضوع حلو ومهم

أهم شي البجامات القطعه وحده أسهل حق التغير وصج ماركس أند سبنسر نوعيتهم ممتازه 8 بجامات

الأندر وير يبيلج 8 تقريبا

البجامه إللي مفتوحه من تحت حق أول الايام أسهل بس لاتكثرين

هالمهاد ودي أجربه

وهذا سايت تارغيت فيه لسته حق الأشياء إللي تحتاجينها
http://sites.target.com/site/en/spo...=BRFGHJTI3PEFJLARAAVPYAQ?title=baby_checklist

ونسيت بعد شي لأني بأمريكا وعندهم وأنتو بكرامه الزباله يشيلونها مرتين بالأسبوع فراح تكون عندنا مشكله بالحفاظات فبشتري هالزباله

 

[بنات حواء2]

يعطيكم العافيه و إنتي صاجه ياميومه انا ما أحب اروح السوق إلا مع أمي بس ما قلتولي شنو الشغلات إلي أجهزها حق المستشفى

 

[mrmr mrmora]

حق المستشفى
إخذي حق البيبي 4 اندر وير و4 بجامات مهادين
الجيس إللي بتحطين فيه البيبي
بدله حق طلعته من المستشفى
كبوس وله 2 عشان مايستبرد
ونسيت شنو بعد

 

[بنات حواء2]

مشكوره و بنسبه لي انا شنو آخذلي سوري أدري بتقولون غشيمه

 

[MaYoOoma]

اخذيلج قمصان اثنينه
وملابس داخليه
واخذيلج صابون وشامبو حق السباحه بعد الولاده
وفوطه
والشغلات العاديه اللي تستعملينها انتي انا احس ما اقدر افكر بكل شي الحين الا حزة الحزه كلشي اتذكره

 

[بنات حواء2]

يعطيج العافيه و انتي الصاجه إحنه كل شي حزت الحزه و بعدين نتوهق ثلاث ترباع أغراضنا مو كامله

 

[أوكسجين]

ماشالله موضوع مفيد
انا حامل بالبجر
والموضوع صج وااااايد يفيدني

 

[ألوي الكويت]

مشكوره بنات حواء2 علي الموضوع الحلو

بنات انصحكم كله اخذوا من مذركير والشر كات المعروفه لا تاخذون صناعه سوريه لأن بسرعه يوبر من الغسال

 

[Forever & Ever]

موضوووووع وايد حلو الله يعطيج العافيه بنات حواء على الافاده

نصيحه لاتاخذون الملابس مقاس نيو بورن بسرعه يصغرون وماتستفيدون شئ

اخذو 0-3 شهور ولاتكثرون انا اخذ 5 من هالمقاس ( تبانات - بجايم قطعه وحده - و3بدلات للطلعه )
واخذ 3 مهادات ما احب امهد وايد ويقولون ان شد المهاد موزين لحافين من الخفاف البيض
كيس للياهل وجنطه وكبابيس وتسوس عن التشمخ وصداري صغار وفوط صغار وفوطتين للشور وبانيو عندي واحد من مذركير فيه مسداده صغيره وتقدرين تحطينه على المغسله وانتي تسبحين الياهل وايد مريح وتحت ظهره مثل الاسفنج علشان مايزلق البيبي ...

حق المستشفى اخذي زياده غيار عن عدد ايام المستشفى يعني اذا بتقعدين يومين اخذي 3 غيارات اخذيلج نص درزن اندر ويرات احتيااااااااط سبحان الله ماتظمنين الظروف اغراضج الشخصيه لاتنسينها ( صابون معجون فرشه مشط شامبو كريم عطر خفيف موقوي ) لاتنسوووووون شاحن التليفووووووون ؛) واتمنى اكون مانسيت شي !!!

مممممممممممم انتذكرت شئ لي رده على الموضووووووووووع

وسلامات وماتشوووووفون شر والله يقومكم بالسلامه

 

[mrs_sugar]

الموضوع يهبل

حدي مستانسة منه :eh_s(15):

قرقت فيه وايد

المهم نسيتوا شي وايد مهم

اذكركم فيه لأن صار فيني مقلب بحملي الي قبل الأخير ما حطيت حجاب و حماي بغى يدخل و توهقت و لما بغيت اطلع ولا مو حاطة بدلة .. جابوا لي عباية من البيت علشان اقدر اطلع

لا تنسين تحطين لج هدوم حق طلعتج من المستشفى دايما ننسى حزة الطلعة لأن ندخل بهدومنا و بعدين تبدلين و تسلمين الهدوم حق ريلج و تنسين الطلعة و يا ريت تكون من هدوم الحمل لأن مقاسج ما راح يتغير بيومين علشان ما تنصدمين

و اذا كنتي متحجبة حطي لج لفة حلوة تكون اوف وايت على لون القميص و قميص كم طويل يمكن احد من اهلج او اهل زوجج يحب يتحمد لج بالسلامة

و عسى الله يقومنا بالسلامة و نشوف هالبيبيات الحلوين بحضونا سالمين يا رب​

 

[هوى الدار]

مسز شوجر صاجه والوحده تنسى هالاشياء البسيطه

يسلمووو