تجمع امهات الحضانه 2011/2012

[moonflower]

انا ولدي بحضانه ستبس اكاديمي

اول يوم مابجى ثاني يوم بجى شوي والحين يبجي وايد

 

[ipink]

كل وحده ياليت تقولنا الحضانه والاسعار وشرايكم فيها عشان نعرف يمكن عيالنا يكونون مع بعض

انا بنتي اسمالله عليها عمرها سنتين توني دخلتها من سبوعين صارلها حضانه كاسكيد بالعدان بريطانيه اهيا ووايد قويه وزينه عجبتني وبنتي طبعا بجي كل يوم ابوها كان يوديها بس ساعتين لي سبوع الحمدلله الحين تاقلمت نوعا ما بعد سبوعين حنه قامت تبجي بس الو مايهدها ابوها بعدين عادي ادق يقولولي تلعب ومنطلقه وياهم الحمدلله وحضانتها ماعندهم يونيفورم فاول ايام عبالها مسكينه بتطلع وتستانس كل يوم لبس وابوها يوديها الجمعيه بعدين يوديها لا ما ابي سكول وتبجي بس يهدها بس عادي الوضع طبيعي
الحمدلله بعد سبوعين تاقلمت
والحين تلبس بامبرز بس حولت عل pull ups عشان اعلمها عالحمام ويقولون اهما يعلمون وانا اكمل عليهم بس اهيا عنييده وراسها يابس ماتخليني كل نص ساعه كله ماكو ماكو وتعاند مو قادره عليها اللي عندها حل بهالشي ياليت تفيدني
مرات احاول اعطيج ككاو وادش غصب بس مايصير كل مره جذي
والحلو انه حضانتها وايد اجانب وماكو وايد يهال بس شوي تعتبر غاليا سعرها بالكورس 650 من شهر 9 لي 12

وعالاكل كل يوم احطلها شوي عنب وحليب ككاو وكرواسون صغير او مرات توست ولبنه وزعتر لانه تحت وايد لبنه وزعتر ومرات صمون يعني انوعلها ويا كيك سارالي وبسكوت عل دورا ماخذتلها وبس هذا اكلها

 

[jaaanooo]

انا بنتي حضانة السلام .. بمنطقة الروضة
بداية التسجيل 10 د.ك
وسائل تعليمية يا انتي تجيبينهم ولا تدفعين 15 د.ك
اذا الياهل يلبس بامبرز تدفعين 10 د.ك وتحطين له بامبرز عشان يغيرون له
رسوم الكورس الأول 380 د.ك
تدفعين كل شهر 80 د.ك
.............

يستقبلون اليهال من عمر سنتين لين 4 سنين .. يلبسون يونفورم كحلي وابيض ( بنات واولاد)
بس بصراحة تدريسهم حلوو ويعلمون اليهال مو مسأل نووم ولعب وبس ... انا قاعده افرق على بنتي
وامس سائلتهم قالت للحين نستقبل تسجيل الطلبات ...

 

[^ دانة الزين^]

صباح الخير

شلونكم وشلون عيالكم مع الحضانه؟؟

 

[:: Diva ::]

علي للحين بجي
دخلنا الاسبوع الثالث !


تعلم الحين كلمة ( صمونه ) ههههههههههههههههههه
و يايب لي قلم و يشخبط على ريلي و ايدي يبي يسوي لي ( ستار )


الاربعا عندهم رحله
تقول لي ابلته ولدج يحب يستعرض و يسوي حركات تونس
لا اله الا الله تبارك ربي الله يحفظه
بس يغار عليها و مايرضا اي ياهل يروح صوبها


كل ما بنطلع
يسألني سكول ؟
مااابي


بيبي ؟
مااابي


شسوي ؟

 

[jaaanooo]

ههههههههههههههههههههه(( :: Diva :: )) يحلوه اسم الله عليه شكل ولدج يونس اسم الله عليه ... ربي يحفظهم .. انا كل يوم تقول البوز شبر جدام ما ابي ماما school ابي اناااام انا نعسانة .. اقولها قومي بدلي ونام بالسيارة .. شسوي والله اتذكر لما كنا نقوم الصبح حق المدرسة صج اذيه

 

[ipink]

صباح الخير
انا بنتي الحمدلله تاقلمت وانا ما اقدر اوديها ابوها الحين اجازه اهوا يوديها وتقوم الحمدلله لانه حضانتها تبدي 8 اهيا ثمان تقوم عل ماتلبس وتريق بالبيت وتروح عال9 والنفسيه حلوه بس اول ماتقوم يبيلها مساحل باللبس بعدين عادي
شلون عيالكم محد ويا بنتي بحضانته

 

[سيدة السلام]

ياحلوكم وياحلو عيالكم

انا بنتي بحضانة الانجلش بلاي قروب اللي بكيفان عمرها سنتين ونص

اول يومين معافر وتسوي روحها ترجف وتمثل كل وحالتنا حاله اقعد مده عند باب الحضانة افكر ارد اخذها بعدين جمدت قلبي

اهيا اسم الله عليها تحب الستيكرات والبالونات رحت طيور الجنة وكودت لها استيكرات وتفافيخ
ثالث يوم قعدتها وعطيتها بالونات وقلت لها هذي هدية لج عشان انتي بنية حلوة وماتبجين

وطول مانغسل ونلبس نهيىء ونقول البنات الحلوين مايبجون

طلعت من البيت وخذيت بجنطتي ستيكرات وانا بالطريج احط لها فقرة الاطفال على المرينا وبعدين فقرة الاطفال على البرنامج الثاني ونغني طول الطريج وانا بقلبي ادعي ان ربي يهديها ويصلحها وماتبجي وصلت الدوام بصمت ولا رفيجتي يايبة لها هدية طبعا بنتي حدها استانست طرنا على الحضانة لما يو ياخذونها مني مابين الصدمة والصمت بسرعة قبل ماتبجي طلعت الستيكرات وقلت لها عشان انتي بنت شاطرة ومابجيتي هذي ستيكرات لج

وهي ولا كلمة

والحمد لله
الامور قامت تمشي

ترى مبدا الثواب والعقاب وايد ينفع والمكافئة شي حلو الياهل يحبه بس الاهم كل ام تعرف شنو طفلها يحبه واذا امسكت هالنقطة وايد ترتاح

قبل كنت اكافئها بالعاب بس احس تلعب شوي وتقطها وترد للشي اللي مابيه لحد ماطحت على موضوع الستيكرات والبالونات


الله يهديلكم عيالكم ومايقطعون قلبكم ببجيهم كل صبح *

 

[Miss.tota]

بنات ولي عافيكم...ابي حضانه زينه...بالعدان...او القرين...او القصور..او مبارك....
ابي مستوى ممتاز. ...بنتي عمرها سنه ونص...ودي ادخلها الكور ثاني...فيدوني...

 

[ipink]

مس توتاا
دخليها كاسكيد بالعدان قطعه 6 وايد حلوه بريطانية وقويه وعدد اليهال فيها قليل وادارتها كلها بريطانيه بنتي وايد مستانسه والحمدلله تاقلمت معاهم سوي سيرج بقوقيل شوفي تلقين سايتهم فيهم كل شي انا برايي انها احسن حضانه بالقرين اذا وحده تبي شي بريطاني وقوي وياخذون من سنه ونص

 

[:: Diva ::]

ههههههههههههههههههههه(( :: Diva :: )) يحلوه اسم الله عليه شكل ولدج يونس اسم الله عليه ... ربي يحفظهم .. انا كل يوم تقول البوز شبر جدام ما ابي ماما school ابي اناااام انا نعسانة .. اقولها قومي بدلي ونام بالسيارة .. شسوي والله اتذكر لما كنا نقوم الصبح حق المدرسة صج اذيه

:eh_s(16)::eh_s(16)::eh_s(16):
حبيبي من دخل الحضانه تغيرت حياتي !
من آخذه ما اقيل و اقعد وياه احاول اخليه مصحصح
و اموت من التعب الله يخليه و يحفظه
لين 7 تبدي الحنه و الرنه
8 مأساة و نفسيه و يبي يطلع
فأما أوديه الجمعيه او اوديه بالسياره افرفره لين يدوخ
9 وشي الى 11 ينام
من ينام تنتهي حياتي !


يضيق خلقي
ما احب البيت و اهو نايم و لا مو موجود
:eh_s(11):
قمت انام معاه مبجر




اليوم ما وديته الحضانه
باجر ما ادري
بس الاربعا بيودونهم حولي بارك
اليوم بودي ملابسه الخياط اغيرها اسوي له شورت و تيشيرت
بدال اليونيفورم الي يضايقه
يمكن لعل و عسى نفسيته تصير احسن شوي






وااااااااي نفسيتي تعبت
من بجيته كل يوم الصبح :eh_s(11):

 

[^ دانة الزين^]

ليش تغيرين اليونيفورم ؟؟؟
خليه يتعود عليه واهو شايف ان كل اليهال اللي معاه هذا لبسهم ماله داعي تغيرينه
وترا يمكن ممنوع تغيرينه

انا ولدي كل يوم يبجي بجي بسبة اليونيفورم واخليه يلبسه غصب لا تعطينه ويه

ادري انهم يعورون القلب بس شنسوي مايصير نطاوعهم على كل شي يبونه

 

[[كـالا]]

واااي يعني مو بس بنتي اللي تسويلي فلم كل يوم الصبح

يوم قريت كلامكم ارتحت شوي حسيت ان الوضع طبيعي

....

بالنسبة حق اكل بنتي انا يا احطلها كرواسون او توست + عصير + تفاح + روب فواكة

بخاطري احطلها كورنفلكس وايد تحبه بس مادري شلون عالصحن والقفشة

تهقون احطلها طاسة وقفشة خاصين فيها بالجنطة؟

 

[قمري]

انا بنتي بعدها ماكملت سنتين بس ودي ادخلها حضانه ابيها تستفيد وتتعلم اليوم ان شاء الله بفر على جم وحده بالجابريه بشوف شنو يقولون لي

 

[A boss]

il jabreya shofe kuwait mentssory waid zaina

 

[^ دانة الزين^]

واااي يعني مو بس بنتي اللي تسويلي فلم كل يوم الصبح

يوم قريت كلامكم ارتحت شوي حسيت ان الوضع طبيعي

....

بالنسبة حق اكل بنتي انا يا احطلها كرواسون او توست + عصير + تفاح + روب فواكة

بخاطري احطلها كورنفلكس وايد تحبه بس مادري شلون عالصحن والقفشة

تهقون احطلها طاسة وقفشة خاصين فيها بالجنطة؟

كل اليهال لازم يسوون فلم الصبح
انا ولدي ما يحب الا الكورن فلكس شاريتله صحن بلاستك يكون مع مغطاته و القفشه تتركب على المغطاه شكله وايد حلو و كل يوم احطله كورن فلكس داخله واحطله قوطي الحليب لصار وقت الاكل الابله تحط الحليب على الكورن فلكس
تقريبا هذا شكله

 

[^ دانة الزين^]

صباح الخير

شلونكم و شلون عيالكم مع الحضانه؟؟

قمري اذا انتي مو ساكنه بالجابريه لا تفكرين تحطينه فيها لان الجابريه صايره تلوع الجبد زححححححمه مو طبيعيه و كلها حفريات فالشوارع الصبح كله مصكره

 

[:: Diva ::]

صباحوووو




انا كلمتهم على اليونيفورم و وافقوا
اصلا يقولون لو ولدج استعسر عادي خليه بالبجامه
حتى لو نايم شيليه مثل ما اهو عليه



طبعا الحبيب ما وديته اليوم
الاخ ما نام الا الساعه 12 و شي !!

و اكيد لو انا افحط ماراح يقوم !!
امممممم ورحلة باجر ما راح اخليه يروح

وليدي اسم الله شيطون
انا امه و اطفر
اخاف انه يتشيطن يعور نفسه
او يعصبون عليه
او يصير اي شي ..


يما ولدي الوحيد ماعندي غيره اخاف اجازف
لو مع امي و خواتي قلبي يوقف هالدوب ابلات و عاملات لاااا


و القرار الي يضيق الخلق
الاسبوع الياي اخر اسبوع اخليه بالحضانه
لانه ما يبي

بخليه يمارس طفولته
لما يصير عمره 3 سنوات
اوديه و لو يبجي بطقه ههههههههههههههههه
بيكون كبير



بس الحين متازم نفسياً
حتى بالليل يتحلم بالسكول و يبجي مابي سكول مابي سكول
اوف الله يعيني

 

[[كـالا]]

كل اليهال لازم يسوون فلم الصبح
انا ولدي ما يحب الا الكورن فلكس شاريتله صحن بلاستك يكون مع مغطاته و القفشه تتركب على المغطاه شكله وايد حلو و كل يوم احطله كورن فلكس داخله واحطله قوطي الحليب لصار وقت الاكل الابله تحط الحليب على الكورن فلكس
تقريبا هذا شكله

شكله يونس .. خووش فكرة

من وين ماخذته؟

 

[[كـالا]]

ديفا .. شكلج وايد تخافين على ولدج الله يحفظه

شوفي اذا انتي قاعدة بالبيت خليه عندج مولازم الحضانة
بس اذا تشتغلين .. والله الحضانة احسله من البيت .. حتى لو يتعسر في البداية مرده بيتأقلم حتى لو يطول شوي
انا بنتي كل يوم لما اشوف وضعها والبجي والصراخ يضيق خلقي .. بس قاعدة الاحظ انها تحسنت عن اول الايام