ما تبين بنتج تتزوج ؟! :\

[MiSs_CRaZya]

صباح\مساء الخير خواتي كويتيات ( حسب التوقيت )


بقولكم موقف غريب صار ذكرني بموضوع يستحق النقاش فعلا !

قبل جم يوم يتلنا وحده نعرفها .. مره كبيره بالسن يعني تبي تخطب حق ولدها

الولد له شروط صعبه و الام مسكينه تتحلطم تقول تعبت و انا افتر من بيت لي بيت و لا وحده عاجبته شروطه حيل محدده

على فكره الولد هم معروووف و مشهووود له بديانته و اخلاقه عشان جذي يبي بنت بسن عمريه محدده و متدينه و من هالشغلات

المهم اختي قالت في وحده اعرفها فيها كل المواصفات الي تبينها من صوب اهل ريلي .. المهم عطتها الرقم و ما ندري شصار بعدها ..

لين امس امي تقول المره دقت على ام البنت و ام البنت رفضت قبل لا تعرف هالصبي حتى منو ! و قالت بنتي ما تبي تتزوج !

مع العلم البنت مو صغيره عمرها 24 سنه و مخلصه دراستها و تشتغل


فسمعت اختي تقول ان صج امها قاعده تمنع عنها الرياييل ! و البنت انا اعرفها شخصيا على نياتها حيل و ما تتكلم و ست بيت يعني تطبخ و تشتغل و تقوم بالواجب مو كمخه نفسنا ما نعرف شي

شنو السبب الي يخلي بعض الامهات يتصرفون بهالطريقه ! قاعدين يوقفون نصيب البنت و حرام الريال وايد زين !

انا ما اقول قطي بنتج بس شوفي الريال خل البنت تقعد معاه !


مادري استغربت من تصرف الام ! انتوا شرايكم ؟
​

 

[روزي الصغيرة]

مساء الخير.

حبوبة لا تستغربين امي الى الان تسوي نفس السالفة مع ان عمري وصل الى 32 سنة كنت أشوف البنات بالجامعة يتزوجون ويعيلون واقول ماعندي جمال مثلهم.. مع العلم ان اي زواج احضره تشوفين يجون عندي حريم يسالوني من بنته والاسئلة المعهودة اول يبدون عندك عيال اقول لا ماني متزوجة بعدها كم عمرك شنو دارسة والله مايقومون من جنبي الا ماخذين رقم البيت ورقم امي.. واوقات من بعيد يسالون ليما يعرفون الرقم من الحريم اللي معنا على الطاولة...
وصل عمري 28 سنة وكنت مرة بحضر زواج اتجهز كالعادة الا طلبني خالي ونزلت له جلس يتكلم فجأة دخل بموضوع الزواج قال بسالك شنو شايفة بنفسك زيادة عن عيال الناس انا وجهي صار كله علامات مو تعجب الا علامات الترقيم كلها قلت له وش فيني زيادة قال كم واحد ترفضين متى ناوية توافقين انا انصدمت قلت انا ارفض قال احرجتيني صديقي تو خاطبينك لولد اخته ورفضتيه السبب انك ماتبين الا من مستواك العلمي قلت له انا وفلان وفلان وجلس يعدد لي والله اذا هم 30 شاب شوية و من عوايل معروفة وبين عوايلنا نسب .
ناديت امي وقلت لها خالي يقول كذا كذا وهو جالس وقتها عرف ان امي ترفض اي شخص يتقدم بدون ماتقول لي . مالي راي هي واخواني يرفضون وطبعا لا حصل وتورطت مع ابوي وسألها عن اللي جايين تقول ماردو خبر شكلهم مايبون بنتك.

بعد بفترة تقدموا لي ناس وأول مرة بحياتي ينقال لي شرايك انا تورطت قلت مدري انتو شنو شايفين قالوا ماعليه كلام قلت خلاص توكلت على الله. فترة والا الموضوع ماعاد له طاري مع العلم انهم كانو يتصلون بشكل شبه يومي يبون يعرفون رايي وشنو شروطي ولو ابي اشوف الرجال اجلس معاه . الا تقول لي هذا وحدة من اقاربهم تقول انهم مايبونك قالوا حنا ماعجبتنا بس قلنا نخطبها لأن دخلنا البيت مانبي يقولون تفرجنا ومشينا وانا بداخلي اقول هم مو مرة داخلين بيتنا يعني يعرفونا من قبل وحتى يوم يطلبون رسمي قالوا كنا خايفين انها راحت علينا. والا تقول لي بعدك صغيرة عمري 28 سنة قلت لها بتزوجين اخوي وجالسة تخطبين له من بيت لبيت وعمره 22 وخطبتي له وحدة عمرها 17 سنة هذي مو صغيرة؟

من يومها سهلت على امي الموضوع قلت لها دام انتي تقولين اهم شي اولادك تزوجوا وعيلوا اي وحدة تتصل تسأل عني قولي ماعندي بنت بهالاسم. وصرت ماادخل اذا حد جانا من احس ان امي حركتها مو طبيعية بالبيت اعرف ان في خطاب. اخر موقف بعيد رمضان اللي طاف ساكنين جيران جدد جنب بيتنا دقت الام وامي ماتعرف رقمهم قالت لها بنجي بعد المغرب هي فكرت ناس بيخطبون يوم جاو هدات شوي جات قالت جيرانا زايرينا تبين تدخلين قلت لها هم متصلين فيك من الظهر يعني اقلها قلتي لي عشان اتجهز انا حتى الزيت حاطة بشعري ... قالت فكرت ناس بيخطبون قلت وناس بيخطبون تخليني ادخل عليهم بزيتي وماسك بوجهي؟!!

واللي أزيد عن هالشي كل ماشافت حد قالت بنتي مجننتني كله تغار من حريم اخوانها لدرجة وصلت فيها قالت لوحدة من جاراتنا انا مااكل من يد بنتي اخاف تسممني اذا التقيت بجاراتنا وقالوا ليش ما نشوفك طلعي تعالي زوري البنات اقول لهم مااطلع من البيت فعلا انا صرت مااطلع تخيلوا من زواج بنت خالي بشهر 8 ماطلعت من البيت الا لتجهيز العيد. شي ثاني ممنوع واذا قلت لهم مليت قالو تاكلين وتشربين وعندك تلفزيون ونت شنو تبين زيادة.. قبل اسبوع قلت لابوي ابي بيت وعيال ابي احس اني موجودة بنات العايلة اصغر مني كنت اشيلهم وهم صغار تزوجو وصار عندهم عيال أمنتو على اولادكم وهم رجال وكل واحد ماسك وظيفة وانا لمنو تاركيني بعد عمر طويل ؟

 

[روزي الصغيرة]

ادري طولت عليكم وتعذرني صاحبة الموضوع بس تعرفون احساس الحرمان من الامومة امي تدري ان عندي الياف بالرحم والطبيب اللي هي تثق فيه قال لها حاولي تزوجينها تجيب لك عيال وبعدين تسوي العملية لان مواقع الالياف عندها خطرة وهالكلام من 9 سنوات
قبل سنة كنت انزف وخذتني الطبيب قال لها خلاص الالياف خذت جزء كبير من الرحم مانقدر نشيلها وحتى الحمل صار صعب ولو حصل مستحيل يستمر . هنا احس تطمنت صار فترة سافرت مع اخواني وانا مع ابوي بالديرة الا اتصل ولد عم ابوي وقال له زميل زوج بنتي مهندس يشتغل بشركة النفط مطلق ويبي وحدة بنت حلال اي شي تبيه بيسويه لها وسمعته زينة بين الناس ابوي فاجاني انه طلب الرجال مقابلة وانا ماادري قال يالله استعدي اليوم بيجي البيت يشوفك زارنا وكنا بالبيت انا وابوي لحالنا المهم طلع من البيت الا دق ولد عم ابوي قال الرجال مستعجل وترى كل شي جاهز بس هي توافق وتسوي التحاليل معاه قال ابوي مو مشكلة بس امها واخوانها لازم يدرون امي عرفت من هنا قطعت سفرتها ومن وصلت سوت لي مشكلة مالها اول من تالي ليش تخلي الرجال يشوف بنتي وانتي ماتستحين رجال جا على طول قلتي اشوفه ومن هالكلام اللي يونس.وكل يوم تروح الطبيب وهي تعبانة ومرضتيها يابنتها قلت لها زين رجال جا يخطب وزين عنده عيال لأن مستحيل يجي رجال عاقل توه بشبابه اهله يبون يشوفون ذريته انا مااقدر اعطيه عيال لو ولدك ترضين تزوجينه وحدة ماتجيب عيال وهو توه شباب وماعنده عيال من قبل.

اخرها طلع ولد العم مثل طريقة اخواني قال للرجال البنت رفضت وقال لابوي الرجال هون مايبي بنتكم هي يوم عرفت ان الموضوع تفركش عيدت

سامحوني والله بس مدري شفيني الموضوع هذا خلاني اطلع جزء من اللي بداخلي.

 

[قمر بيت أبوها]

أنا أمي ارفضت كثير
كل مره اسكت لاني كنت ادرس ومومهتمه لزواج ولماتخرجت ترفض
بالاخير تقول أبيك لعيال خوالك
وبالاخير قلت مافي زواج قرابه من الاخير ووافقت علي مضض ومازالت تفتح هالموضوع معاي كل ماجت فرصه
الله يرزق كل البنات بالازواج الصالحين ويهدي امهاتهم

 

[كرز ~]

أمبيهـ موضوع يقهررر ‘
خآصهـ عقب سآلفة الأخت روري الصغيره !!!!!

صرآحهـ مَ عندي شي بقوولهـ بس متآبعهـ :eh_s(2)::eh_s(2):



،

 

[miss $_$ semsem]

انا امي مو راضية اتزوج الا بعدين لووووووووول وقطتها بويهم

بس من ناحيتي انا مو حابة فكرة الزواج حاليا فمن جذي ساكتة فيمكن اهيه هم تلقينها ساكتة مو بس لأن امها مثلا مانعة الرياييل عنها بس يمكن اهيه بعد تشوف انها صغيرة

 

[عادت ذكرياتي]

الله يهدي هالنوعية من الامهات ...

 

[سفييره الكويت]

الام والابو مالهم دخل بموضوع الزواج ممكن ينبهون على شغله او يعطون النصايح لكن انا فقط اختار من اريد لا احد يجبرني

وهذا المفروض يصير من الكل

 

[حكايا احساس]

روزي الصغيره جعل الله لك من كل هماً فرجاً ومن كل ضيقاً مخرجاً

والله العظيم ان كلامك اتعب قلبي وجرح فؤادي ولاكن عسي ان تكرهو شياً ويجعل
الله في خيرا

اسال الله العظيم رب العرش العظيم ان يعطيك حتي يرضيك
لاتنسين قوله تعالي (ولسوف يعطيك ربك فترضى)

استعيني بالصبر والصلاه ولا تغضبي والدتك ناقشيها بالحسنى
موفقه يارب *

 

[Patcholli]

دور الام والابو انهم يشوفون الريال صالح ولا مو صالح ويسئلون عن اخلاقه وسمعته ودينه عند الناس

غير جذي مالهم حق الصراحه يقولون تبي ولا ماتبي بدون مايسئلون عن الولد حتى ..!!

روزي الصغيره عورتي قلبي والله العظيم حرام عليهم والله ذنبج برقبتهم ..!!

 

[روزي الصغيرة]

روزي الصغيره جعل الله لك من كل هماً فرجاً ومن كل ضيقاً مخرجاً

والله العظيم ان كلامك اتعب قلبي وجرح فؤادي ولاكن عسي ان تكرهو شياً ويجعل
الله في خيرا

اسال الله العظيم رب العرش العظيم ان يعطيك حتي يرضيك
لاتنسين قوله تعالي (ولسوف يعطيك ربك فترضى)

استعيني بالصبر والصلاه ولا تغضبي والدتك ناقشيها بالحسنى
موفقه يارب *

مشكورة.. حبابة تعرفين الحمدلله رب العالمين انا مو من النوع اللعاب حتى بالنت اقرأ اشياء تفيدني وتجدد معلوماتي ماسويت مثل باقي البنات انتقمت منهم بطريقة غبية علاقات وغيره استغفر الله العلي العظيم..

اما مسألة ناقشيها بالحسنى مرة جربت اناقشها ما قدرت اكمل كلامي خذتني بشراع وميداف وقلبت السالفة علي صج عصبت بس بعدها حلفت اي شي تسويه لو الطوفة تتحرك انا اتحرك واتأثر

 

[manoooram]

الله يهديها أمها بس .. في أم ما ودها تشوف بنتها عروس !!
شنو مستفيده من اللي قاعده تسويه ببنتها ..
ويعد قلبي روزي الصغيرة صج عورتي قلبي

 

[بطوووطة$بيضة]

في امهات يقعدون بناتهم عندهم علشان يقومون فيهم اذا اكبروا

 

[تحت ظلك]

موضوعك يقهر والله لأنه ع الجرررح
أنا أمي وأبوي وأخواني رافضين حجتهم مايبون أذا توظفت اعطي معاشي الرجال والمشكله أنا مو موظفه والوظيفه بعييييييده عني بحكم نقص الوظائف عندنا ومازلت أدرس رغم اني تجاوزت عمر الدراسه من زمن بس متجمده بمرحله وحده مو قادره اتقدم قدام ولا أنجح لأن ظروف حياتي مو ملائمه للدراسه !
كل مايطلبني أحد منهم مصيره الطرد والرفض ليييييش؟؟
اساسا مو موفرين لي حياة كريمه فليش مقعديني عندهم شيبون فيني ليش مايخلوني أشوف نصيبي!
هذي مشكله والمشكله الثانيه لو يخلوني بالصوره ويقنعوني بأسباب الرفض كان عادي
بس لما يرفضون الشخص بعدين ادري من الناس الي يعايرني والي يستهزئ فيني أموت من القهر !
ليش الأهل كذيه؟؟
خايفين على شنو؟

العمر قاعد يركض ولا أحد مهتم
كل واحد يثبت شخصيته ع الاضعف منه!
مافي عداله ولانصرة حق ولا يطبق الاسلام صح عشان كذيه هذا حالنا
أنا لو لقيت أحد يساعدني بمشكلتي ماصار هذا حالي

ولهذا رساله لكل أم ولكل أب ولكل أخ أذا انحرفوا بناتكم لاتبكون على شرفكم!! أسألوا أنفسكم بأخطائكم

والله لايسامح الظالم.

 

[LiL LiLeY]

في امهات يقعدون بناتهم عندهم علشان يقومون فيهم اذا اكبروا

اي والله :eh_s(10):

الله يهديهم

 

[روانتي 12]

سلام عليكم . .

آلله يهدي هالنوعيه من ألآمهآت . .

روزي الصغيرة : عورتي قلبي . . عسى ان تكرهو شي و هو خيرآ لكم و عسسى ان تحبو شي و هو شر لكم . . الله يهدي أمج . . لكن حاولي ماتتدخل فيج . . الوحده من يكون عمرها 18 سنه هي تتحكم بنفسها وتعرف صح من الخطاء ماله داعي يتحكمون و يرفضون و انتي مالج رآي . . إفرضي رآيج على الكل . .

 

[أعشقه]

بالضبط كنت بقول كذا
الاهل يزوجون بناتهم بس اخر بنت يخلونهااا ليه ولا اول بنت يخلونها عشان تقوم فيهم وتخدمهم
في وحده امها حالفه عليها ماتتزوج الا اذا هي ماتت تقول مابي تخليني
وتتزوجين يعني تبي بنتها تضل
عاد حرام البنت مو كل يوم بيجي لها نصيب واذا راحت الفرصه ماترجع
بس وش نقول وش نسوي
الله يغير هالحال ويزوج كل بنت يارب
الاخت روزي الصغيره والله ضااق صدري بقووه ع وضعك وامك ليه تسوي كذا ماتفكر لقدام بعد عمر طويل وش بيكون وضعك
ومن بيضل لك بعدين
اسال الله الكريم رب العرش العظيم انه ينولك مرادك ويغير حالك ويريح قلبك ويفتح عليك ابواب السعاده ويرزقك من حيث لا تعلمين يارب ياكريم

 

[لمى الهاجري]

انا يتيمة الاب وعمي رافض يزوجني لكن شقول غير حسبي الله ونعم الوكيل

 

[ya al3rosa]

روزى الصغيرة
عورتى قلبى

 

[NO_oNA]

روزي الله يرزقج .. متأكدة إن ينتظرج شيء أجمل مما تتخيلينه .. هالله هالله بأمج لو ايش ماتسوي وابشري بالخير