{ ...الدكتورة رشا الصفي تجيب على استفسارتكم ..} استضافة اسبوعية

[د. رشــا الصفــي]

السلام عليكم
دكتورة
لدي ثلاث بنات 8 سنوات ثلاث سنوات والصغرى ستة اشهر عندهم الربوا وراثي حسب ما قال الطبيب ولكنة خفيف والحمد لله يعني بالسنة مرة وما لاحظ آثار تعب عندهم لما يلعبوا او يركضوا لكنهم وقت النوم واحياننا عند استيقاضهم يكحوا .
دكتورة هل كل ما كح الاطفال يجب ان استخدم البخار ام انة قد يكون اعراض برد وكيف افرق بينهم
كم الجرعة لكل منهم علما باني كنت اعطيهم فينتولين مع اتروفين مع نورمل سيلان
شكرا لكي مقدما دكتورة

اول شي الله يخليلج بناتج و يبارك لج فيهم

ثاني شي الكحة بالليل احيانا تكون عرض من اعراض الحساسية البسيطة او الخفيفة

و مو كل مرة يكح فيها الطفل يحتاج كمام الفنتولين

المفروض انه يسمع صدرهم الطبيب و هو يحدد اذا محتاجين ولا لأ و المدة المطلوبة

و الطبيب اهو بس اللي يقدر يفرق بين كحة البرد العادي و كحة الربو من خلال السماعة

و بالنسبة للجرعات فوق 3 سنوات واحد مل فنتولين و 3 محلول

و تحت 3 سنوات نص مل فنتولين و 3 مل محلول

و ماله داعى الاتروفينت

 

[د. رشــا الصفــي]

مشكوووره و جزاج الله خير دكتوره
الله يسلمج الدكتور ما سوى حق بنتى لا فحوصات و لا شئ .. و قالي اعطيها vital iron plus
على اي اساس اعطيها و اهو ما يدري اذا عندها نقص معين او لا؟؟!
عموما من بعد كلامج انا ما قمت اعطيها خفت الصراحه جزااج الله خير و ما قصرتى حبيبتى و ربي يوفقج ان شاء الله

تسلمين حبيبتي و ما تشوف شر البنت

بس انتي احسن سويلها تحاليل اذا تبين تتطمنين اكثر

و اذا ما فيها نقص معين بأي شي

لا تعطينها أدوية ماله داعي

عوضيها بالأكل الطبيعي احسن وايد

 

[مهره شيوخ]

السلام عليكم يعطيج الف عافيه وماتقصرين والله :ggdw: يا عمري انا بنتي ولدتها اهني بامريكا والحين عمرها سنه وشهرين وفيها اكزيما بوجهها تحكه حييييييييييييل وخدودها يا قلبي كلها حبوب حمرا ومن كثر ما تحك يطلع دم احيانا والله انها كاسره خاطري مسكينه ياربي تعور القلب واهني عطاني دكتورها كريم وغسول يعني والله مو فايدها وايد يختفي يومين بس ويرد وتبدا عاد تحك ابي شي يخليه يروح وابد مايطلع لها يعني اسماء كريمات او خلطات طبيعيه انا اسويها لها يا عمري هي ياليت فيني ولا فيها

 

[د. رشــا الصفــي]

السلام عليكم يعطيج الف عافيه وماتقصرين والله :ggdw: يا عمري انا بنتي ولدتها اهني بامريكا والحين عمرها سنه وشهرين وفيها اكزيما بوجهها تحكه حييييييييييييل وخدودها يا قلبي كلها حبوب حمرا ومن كثر ما تحك يطلع دم احيانا والله انها كاسره خاطري مسكينه ياربي تعور القلب واهني عطاني دكتورها كريم وغسول يعني والله مو فايدها وايد يختفي يومين بس ويرد وتبدا عاد تحك ابي شي يخليه يروح وابد مايطلع لها يعني اسماء كريمات او خلطات طبيعيه انا اسويها لها يا عمري هي ياليت فيني ولا فيها

و عليكم السلام و رحمة الله و بركاته

اهم شي بالنسبة للأكزيما الترطيب

لازم ما يكون الجلد جاف ابدا ابدا

اول شي الغسيل بماي و غسول خاص للأكزيما و ما يكون يحتوي على الصابون

ثاني شي اذا استعملتي الكورتيزون يكون لمدة يومين او 3 لما تختفي المناطق الحمرا الخشنة

و بعدين تحطين الكريم المرطب على طول

لا تخلين خدودها تنشف ابدا

و هدومها غسليهم بصابون خالي من الكيماويات

مادري انتي بأمريكا تحصلين الصابون الطبيعي بزيت الزيتون مثل الصابون المبشور الموجود عندنا هني بالكويت

و سلامتها

 

[مهره شيوخ]

هلا والله مشكوره ماقصرتي والله -- بالنسبه للصابون الطبيعي اللي بزيت الزيتون لا والله ما في اهني انا اغسل ملابسها ب تايد

 

[~ام خالد~]

السلام عليكم ورحمة الله وبركاته
الله يعطيج العافيه دكتوره
حبيت اسأل عن فايدة الحلبه وطريقة استخدامها للاطفال
لعلاج الكحه والبلغم .. لانه وايد نصحوني فيها

 

[فروحة الكويتية]

بغيت أسأل متي نبدي نوكل الرضيع؟

شنو نعطيه من الأكل بالبداية؟

 

[د. رشــا الصفــي]

هلا والله مشكوره ماقصرتي والله -- بالنسبه للصابون الطبيعي اللي بزيت الزيتون لا والله ما في اهني انا اغسل ملابسها ب تايد

هلا جهراوية

حبيبتي التايد ممكن مسببلها الحساسية

اذا ما لقيتي الصابون اللي قلت لج عنه

اخذي لها صابون خاص بملابس الأطفال موجود اكيد بكل السوبرماركت

و حق جسمها سيباميد ممتاز

 

[د. رشــا الصفــي]

السلام عليكم ورحمة الله وبركاته
الله يعطيج العافيه دكتوره
حبيت اسأل عن فايدة الحلبه وطريقة استخدامها للاطفال
لعلاج الكحه والبلغم .. لانه وايد نصحوني فيها

والله ما اعرف عنها الا انها زينة للصدر و البلغم من خلال قراءاتي بالنت

بس شلون تنفع و طريقة استخدامها ما عندي فكرة

ممكن يفيدونج البنات المتخصصين بالأعشاب احسن مني بهالموضوع

 

[د. رشــا الصفــي]

بغيت أسأل متي نبدي نوكل الرضيع؟

شنو نعطيه من الأكل بالبداية؟

هلا حبيبتي

تكلمنا وايد عن الأكل

و هذا احد الردود

تقدرين تسوين بحث عن البقية بالموضوع

http://www.q8yat.net/showpost.php?p=5783139&postcount=486

 

[احساس طفلهـ]

السلام عليكم ورحمه الله وبركاته

شلونج حبيبتى
حبيبت شنو احسن نوع حليب اطفال

انا بنتى عمرها 4 شهور مولوده شهر 9 يعنى

وهى تشرب حليب نيوشور للخدج وزونها حيل شوى لما ودلاتها كانت 2.200 كيلو

واحسن ما منه فايده للحين ضعيفه وابى اغير حليبها

شنو احسن سيميلاك او اس 26 او غيره

انا ودى تصير متختخه

ومتى اعطيها الاكل وبشنو ابدا معاها؟؟

وشكرا

 

[د. رشــا الصفــي]

السلام عليكم ورحمه الله وبركاته

شلونج حبيبتى
حبيبت شنو احسن نوع حليب اطفال

انا بنتى عمرها 4 شهور مولوده شهر 9 يعنى

وهى تشرب حليب نيوشور للخدج وزونها حيل شوى لما ودلاتها كانت 2.200 كيلو

واحسن ما منه فايده للحين ضعيفه وابى اغير حليبها

شنو احسن سيميلاك او اس 26 او غيره

انا ودى تصير متختخه

ومتى اعطيها الاكل وبشنو ابدا معاها؟؟

وشكرا

هلا اختي

أولا :

بالنسبة لحليب الأطفال

جميع الأنواع مكوناتها تخضع لمقاييس عالمية

من حيث الدهون و الحديد و البروتينات

يعني باختصار كلهم نفس الشي

يبقى السؤال ليش الطفل يمتن على هالحليب و ما يمتن على الثاني

هذا يعتمد على الطفل نفسه و تقبله للحيب

يعني نفس الحليب ممكن يمتن طفل و ما يمتن الثاني حسب طبيعة جسم الطفل ما يعتمد عالحليب نفسه

ثانيا :

حليب نيوشور يحتوى على سعرات حرارية عالية اكثر من انواع الحليب العادية مثل اس 26 و سيميلاك و ابتاميل و غيرهم و غيرهم

نيوشور يحتوي على 100 سعرة تقريبا في ال 100 مل

بينما الأنواع الأخرى تحتوي على 76 سعرة في ال 100 مل

معنى الكلام ان نيوشور المفروض انه يسمن اكثر

ثالثا :

ممكن تقولين لي جم وزن بنتج علشان اقول لج اذا وزنها طبيعي ولا لأ

مو بالضرورة يكون الطفل متين و متختخ علشان تكون صحته زينة

وايد اشوف بالمستشفى اطفال متان و متختخين على قولتنا و تكون نسبة دمهم نازلة و عندهم مشاكل وايد

كلمة أخيرة :

الله يخليلج بنتج و يبارك لج فيها

اهم شي تكون صحتها زينة مو مهم المتن :eh_s(6):

و بالنسبة للأكل راجعى الرد الي قبل هذا


تحياتي

 

[نـــــ أم ـــــور]

السلام عليكم ورحمة الله وبركاته

دكتورة انا بسافر بعد شهر وبخلي بنتي عند امي 4 ايام وبوقت سفرتي بنتي بيكون عمرها سنه وشهر

بس المشكله ان بنتي ماتشرب الى حليب صدري حتى حليب النكهات ماتشربه الى اذا خلطته مع الاكل

بغيت اعرف عادي اخلي امي تحطلها مع اكلها حليب كي دي دي اللي بنكهات الفراولة والموز والكاكاو

وجم ملي لازم البيبي يشرب بهالعمر باليوم وجم مره

يعني يكفيها 250 مل من حليب النكهات يعوضها عن حليبي


ودكتورة بنتي ليلحينها ماحبت ولا مشت ولاسننت حتى ماتوقف بس تمشي بالدراية ماشالله تلعب وحركيه بس احسها ضعيفة وزنها يمكن 7.5 او 8 كيلو عادي

مع اني اوكلها 3 الى 4 مرات باليوم واوكلها وجبه عيش واحط داخله خضار ودياي او لحم

بس الاكل لازم يكون مهروس عدل اكل وحده عمرها 6 اشهر اليهال بعمرها يوكلونهم اكل البيت العادي شسوي انا حتى البطاط لازم انعمه لانها ماتقدر تاكله
وهي الحين عمرها تقريبا سنه
ولا تعرف تشرب بالعود وماتحب السوائل وايد شسوي
وكله فيها امساك حتى لما تخرج يطلع دم وقلبي يتقطع اغصبها على السوائل ماترضا

والله يجزاج كل خير

 

[مسوكه^^]

مرحبا دكتورة
انا بنتي عمرها شهرين ومن 14 يوم دزها اخوها الصغير وانتفخ عندهاا اليافوخ ولما وديتها طبيب قال معها نزيف داخلي واللحين لها عشر ايام ومراضي يصغر احس كل ماله ينتفخ وبعرض مع العلم انهم سوو لها اشعه مقطعيه وما عطوني علاج ولا شي بس قالوو راقبيهااا؟؟؟


وهم عندي بناتي الكبار وحده عمرها 5 سنين وثانيه 4 سنين ما ينطقون الكلام صح وناس دايم يحرجونهم ويضحكون عليهم وهــ شي يحرجهم
وبنتي الكبيرة سنه الجايه اولى ابتدائي فمادري شلون اساعدهم او وين اديهم؟؟؟

مع العلم اني احول اعلمه شلون ينطقون واشتري لهم كرسات عشان يتعلمون وسي ددي الاحرف ؟

فاتمن انج تردين علي بسرع وقت...
ومشكورة

 

[الغــ مرت ــالي]

السلام عليكم

دكتوره فتره بنتي مرضت وعطيتها مضاد حيوي والحمدالله صارت زينه

الحين احس لمن تتنفس في خرخره بصدرها شنو معناها ؟؟
اخاف ان ليلحين البلغم بصدرها
علما ان عطوني تحاميل حق البلغم

 

[^kloOot^]

قوه دكتوره شلونج

بالنسبه لبنتى شهر الياي انشالله تكمل سنه
بس للاسف ماسننت؟؟ ولا سن طلعلها

ولا تحبى ؟
هل هالشي طبيعي ؟؟
وهل اغير الحليب لانه حاليا استخدملها حليب نان
وشنو احسن حليب برأيج
ويعطيج الف عافيه

 

[love_ak]

السلام عليكم دكتورة رشا وبارك الله فيكي ولك بكل الجهد الرائع اللي تقومين فيه.

اختي العزيزة ولدي عمره الله يخليكي 4 شهور ويومين ومنذ ان ولدته انا ارضعه طبيعي بس من شهر تقريبا رجعت للشغل انتهت اجازة الوضع واضطريت استعمل له حليب صناعي اللي هو سيميلاك منذ الولادة وتقريباً ياخذ في النهار رضعتين الى ثلاث رضعات وباقي اليوم انا ارضعه مني طبيعي وحبيبي دايماً عنده غازات استعملت ماء غريب ما فيه فايدة واخر شي استعملت دواء نوع ثاني ناسية ايش اسمه برضه أعشاب احسه احسن شوي بس مو كثير وانا من بعد الولادة بعملية قيصرية وبطني مليان غازات مع اني أكل كثير امتنعت عنه منه حتى الحليب ومشتقاته من لبن وبعض الأجبان ومسكين يا حيبيبي بالليل يصير يبكي كتير على صوت واحد من المغص وأشربه يانسون تقريباً مرة في اليوم ومرات اخلط يانسون مع ميرامية بس نفس الشي وقلبي يعورني عليه بالله عليكي اذا في حل ساعديني لأني حزينة على وضعه.

ومن فترة صار عنده انفلونزا وامس كانت حرارته عالية 38.3 ووديته المستوصف واعطاني ادول ومضاد حيوي. والكحة ذابحته وكنت موديته طبيب خاص من كم يوم اعطاني بونستان للكحة واعطاني بعد مضاد حيوي اوجم--- مش عارفة اسمه المهم عطيته منه وطلع على جسمه حبوب صغيرة المهم وقفته لأنه قال لي الطبيب اذا طلع حبوب على جسمه وقفيه ووقفته بس للحين الكحة مستمرة معه وقرأت عن الشفاط ممكن اتوضحين لي أكثر كيف شكله انا عندي زي شفاطة صغيرة تشفط الوصخ إلي في انفه بس هاذي تستعمل للشفط البلغم ما اعرف ووضحيلي بالضبط كيف اشفط البلغم انا ام جديدة وما اعرف وعنده هو بلغم احس صدره يخرش يطلع صوت.

اسفة على الإطالة وجزاكي الله خير...

أختك ام عمر

 

[love_ak]

السلام عليكم اختي

اختي ولدي عمره 4 شهور ويومين واعطيه حليب صناعي سيميلاك بسبب ظروف شغلي ياخذ من 2-3 رضعات 120 مل يومياً ولما ارجع من الدوام ياخذ مني المهم هو دايما عنده غازات انا كمان قالولي لأني والدة بقيصرية بس للحين ما راحت الغازات ومسكين حده يتألم وخاصة باليل انصحيني شنو اسوي كثير تعبان اعطيه ماء غريب ما فاده والحين اعطيه دواء اعشاب من هيميلايا ما اعرف اسمه ساعديني الله يخليكي شو تنصحيني

وقبل كم يوم صابه انفلونزا وكحة وصدره في بلغم وانا قرأت في ردودك انه في طريقة عن طريق الشفاط ممكن تشرحيلي اكثر الله يخليكي انا عندي شفاط مال الأنف اللي يشفط الوصخ مال الأطفال هذا اللي تقصدينه وإذا هو كيف الطريقة بالضبط شرح مفصل لأني ام جديدة ما اعرف وخاصة انه وايد عنده بلغم واعطيه دواء بونستان للكحة وبعد اعطيه قطرة الماي والملح الله يخليكي ساعديني انا مالي غير ربنا وانتي

شكراً اختي

اختك ام عمر

 

[د. رشــا الصفــي]

السلام عليكم ورحمة الله وبركاته

دكتورة انا بسافر بعد شهر وبخلي بنتي عند امي 4 ايام وبوقت سفرتي بنتي بيكون عمرها سنه وشهر

بس المشكله ان بنتي ماتشرب الى حليب صدري حتى حليب النكهات ماتشربه الى اذا خلطته مع الاكل

حاولي تعودينها من الحين يمديج شهر

بغيت اعرف عادي اخلي امي تحطلها مع اكلها حليب كي دي دي اللي بنكهات الفراولة والموز والكاكاو

عادي بس الأفضل بعد انها تشرب حليب ضروري

وجم ملي لازم البيبي يشرب بهالعمر باليوم وجم مره

لازم تاخذ اقل شي 3 رضعات باليوم و كل رضعة اقل شي 150 مل بالإضافة للوجبات


يعني يكفيها 250 مل من حليب النكهات يعوضها عن حليبي

اذا تاخذ 3 او 4 باليوم يكفي

ودكتورة بنتي ليلحينها ماحبت ولا مشت ولاسننت حتى ماتوقف بس تمشي بالدراية ماشالله تلعب وحركيه بس احسها ضعيفة وزنها يمكن 7.5 او 8 كيلو عادي

وزنها عادي و شيليها من الدراجة و راح تحبي و تمشي بعد ان شاء الله

الدراية تأخر الحبي و المشي عند الأطفال

مع اني اوكلها 3 الى 4 مرات باليوم واوكلها وجبه عيش واحط داخله خضار ودياي او لحم

بس الاكل لازم يكون مهروس عدل اكل وحده عمرها 6 اشهر اليهال بعمرها يوكلونهم اكل البيت العادي شسوي انا حتى البطاط لازم انعمه لانها ماتقدر تاكله
وهي الحين عمرها تقريبا سنه
ولا تعرف تشرب بالعود وماتحب السوائل وايد شسوي

لازم تعودينها حبيبتي
ما تخلينها تتحكم فيكم
بالتدريج علميها تاكل الأكل العادي بس حاول انه ما يكون صلب وايد
لا تنسين اهي ما عندها اسنان بعد

وكله فيها امساك حتى لما تخرج يطلع دم وقلبي يتقطع اغصبها على السوائل ماترضا

لازم سوائل يا قلبي

والله يجزاج كل خير

حياج الله

 

[د. رشــا الصفــي]

مرحبا دكتورة
انا بنتي عمرها شهرين ومن 14 يوم دزها اخوها الصغير وانتفخ عندهاا اليافوخ ولما وديتها طبيب قال معها نزيف داخلي واللحين لها عشر ايام ومراضي يصغر احس كل ماله ينتفخ وبعرض مع العلم انهم سوو لها اشعه مقطعيه وما عطوني علاج ولا شي بس قالوو راقبيهااا؟؟؟

ألف سلامة عليها و ما تشوف شر

النزيف ما يعطون له علاج

بس يلاحظن اذا صار معاها ترجيع وايد او تغيرت درجة الوعي عندها او صار معاها لا سمح الله تشنجات تودينها على طول

بس لالا تتوقعين انه بيروح خلال يومين او 3 لا يطول شوي

بس اذا حاسة انه قاعد يزيد وديها لهم مرة ثانية افضل

وهم عندي بناتي الكبار وحده عمرها 5 سنين وثانيه 4 سنين ما ينطقون الكلام صح وناس دايم يحرجونهم ويضحكون عليهم وهــ شي يحرجهم
وبنتي الكبيرة سنه الجايه اولى ابتدائي فمادري شلون اساعدهم او وين اديهم؟؟؟

مركز النطق و المسع بالصباح

مع العلم اني احول اعلمه شلون ينطقون واشتري لهم كرسات عشان يتعلمون وسي ددي الاحرف ؟

فاتمن انج تردين علي بسرع وقت...
ومشكورة

العفو

و سوري عالتأخير بالرد
انا اجيك الموضوع الجمعة بس