{ ...الدكتورة رشا الصفي تجيب على استفسارتكم ..} استضافة اسبوعية

[د. رشــا الصفــي]

السلام عليكم دكتوره .. كل عام وانتي بخير
بس حبيت اسأل متى ابرة التطعيم الثانيه للبيبي انا بنتي صارلها 3 ايام من كملت شهرين وانا ا1كر انه بشهر 12 عندها تطعيم بس ماذكر اي يوم !! انا ولدت يوم 3-10
؟؟؟؟؟

و عليكم السلام

و انتي بخير و صحة و سلامة

التطعيم الثاني لما بعد شهرين بالضبط من تاريخ التطعيم الأول

يعني اذا تطعم البيبي يوم 3 اكتوبر يكون التطعيم الثاني 3 ديسمبر

و اذا تطعم 4 او 5 اكتوبر

يكون التطعيم الثاني 4 او 5 ديسمبر

و سامحيني اذا كان الرد متأخر

بس انا غالبا اكون موجودة الجمعة بس

 

[د. رشــا الصفــي]

السلام عليكم دكتوره بس حبيت اعرف شنو فوائد المهاد حق الاطفال انا ولدي عمره 3 شهور بس ماكنت امهده بس الفه عادي عن الهوى هل هذا له تاثير على العظم ؟

و عليكم السلام و رحمة الله و بركاته

حبيبتي المهاد ماله تأثير عالعظام

بس فايدته انه يلم البيبي بطريقه تحسسه بالأمان خصوصا لما تلفين ايدينه

فينام احسن و يكون اهدى شوي

بس انا اتكلم عن المهاد بدون تربط

تلفينه بس التربط مو زين خصوصا صوب الحوض ممكن لو كان الطفل عنده استعداد خلع بالحوض الرباط صوب الحوض يزيده

 

[د. رشــا الصفــي]

السلام عليكم دكتورة
و كل عام و انتي بخير
عيدج مبارك

اقول ابي اسال عن ابرة الظهر ..

انا بجر وحدي خايفة من الولادة ..

ابي اعرف حزة الولادة متى لازم اروح المستشفى عشان الابرة لانه مابي اروح و اخر شي يقولولي خلاص مافي فايدة من الابرة و ربي طبيعي؟ يعني الرحم لازم يكون مفتوح كم سانتي؟

و عليكم السلام و رحمة الله و بركاته

و انت بخير و صحة و سلامة

الله يهون عليج و يرزقج الطفل السليم المعافى

تروحين حبيبتي المستشفى اذا صار شي من اللي بقول لج عليه :

نزل عليج ماي الراس

او حسيتي بآلام منتظمة متكررة كل 5 دقايق

او نزل عليج مادة هلامية مثل الافرازات الثقيلة شفافة و تكون مخلوطة بدم

او لا سمح الله نزول دم كثير او الاحساس بقلة حركة البيبي عن المعدل المعتاد

و بالنسبة للأبرة ما منها خوف ان شاء الله

و اذا تحتاجينها ولا لأ او في وقت تاخذينها ولا لأ هذا قرار الدكتور في ذاك الوقت

لا تنسين انا طبيبة اطفال فقط

تحياتي

 

[د. رشــا الصفــي]

دكتوره ماقصرتي عساج للجنه يارب تفرجين هم هالامهات

سؤالي بنتي عمرها 5 شهور وفيها اكزيما بكلام الدكاتره وعطوها كريمات وكورتيزيون ماكو فايده تصفى البشره وترجه الحساسيه كان حليبها ابتاميل وقالولي غيريه حطيت سيميلاك الحين واشوفه حبته ووقف الترجيع هل صحيح ان الحساسيه من الحليب ؟؟ واحس بجسمها خشونه وحبوب بيض هذي الحبوب تبع الحساسيه او شنو ؟؟؟ عسى الله يدخلج الجنه بلا حساب ولا عذاب


سؤال : العاب الاطفال مثل الدرايه من اي عمر وعنديي لعبه فيها نفس كرسي الدرايه بس اهيا لعبه مو درايه عادي تقعد بالكرسي هذا او توها عمرها 5 شهور

الله يجزاك خير على هالدعاء الحلو

بصراحة فرحتيني

بالنسبة للأكزيما طبيعي انه تروح مع الكورتيزون و من توقفينه ترد بس انتي لما توقفين الكورتيزون حطيلها كريمات مرطبة على طول لا تخلين جلدها يجف

و بعدين الصابون استعملي المبشور الخالي من الكيماويات

و الخشونة تبع الحساسية طبعا

الدراية من عمر 6 شهور تقريبا و اللعبة اللي قلتي عنها عادي تقعد فيها بس مو وايد يعني 10 دقايق بالكثير مرتين باليوم

 

[د. رشــا الصفــي]

السلام عليكم ورحمه الله وبركاته
وكل عااام وانتم بخير
ويعطيج العافيه دكتوره
انا ولدي عمره اربع سنوات واربع شهوروفيه اكزيما حاااااااااده لدرجه انه ملابسه كل فيهم دم وكل يحك في جسمه خصوصااا الجزء السفلي من الخصر الي الرجلين وانا دايما استخدم له كرتوزون وفي الشهر استخدم ست او سبع عبوات مرهم \\الكوم او الكون
وقبل اسبوع طلبت الدكتوره تحاليل وسويت التحاليل وطلعت النتائج
نسبه الهموجلوبين8
ونسبه عددالكريات الدم الحمراء10
ونسبه صيغه الترسبات مرتفعه جداا39ونص
ووزنه 14ونص
واهو لون بشرته صفراء
وقالت لي الدكتوره استخدمي مقويات له واترك علاج الاكزيمااا من مراهم وغيره بس فازلين
وسويت له تحاليل بول وبراز يكرم القارى
دكتور ابي نصيحتج لي وبكون لج شااااااكره
وما هي الاطعمه التي تحتوي على نسبه الحديد
والمشكله مايرضه يشرب دواء واذا غصبته يرجع وغرشة الدواء \\فروز\\ماشرب منها ولا مره
وتحياتي
حنان جذاب

الله يعينج و يعينه على الاكزيما

بصراحة مشكلة كبيرة و مزعجة

بس حطي في بالج انها مشكلة مؤقته و تخف مع مرور الوقت بإذن الله

بالنسبة للدم

بصراحة نسبة دمه وايد قليلة

لازم توكلينه لحوم حمراء و كبدة و خضروات ورقية اللي يكون لونها اخضر غامق

و معاها عصير برتقال او كيوي او جوافة
لأنها فيها فيتامين سي يساعد على امتصاص الحديد بشكل اكبر

الدوا لازم ياخذه بأيط ريقة حتى لو تغيرين الدوا الى نوع ثاني يتقبل طعمه شوي

بس عموما ادوية الحديد يكون فيها طعم الحديد شوي و هذا اللي يلوع الجبد فيها

حاولي تحطينه له بعصير البرتقال يمكن يضيع طعمه شوي

و ابتعدي عن الحليب و الحديد مع بعض

واحد يخرب الثاني

لا يستفيد من الحليب ولا الحديد اذا اجتمعوا مع بعض

الترسبات ما تعتبر مرتفعة جدا لالا مرتفعة بس مو وايد

ممكن تكون بسبب التهاب معين يبين بالفحص اذا عنده حرارة او شي

عموما اذا دكتورتج بالمستوصف تابعي معاها شخصيا و لا تروحين عند اكثر من دكتور

و اذا خاص هم خليج معاها لا تلفين على اكثرمن دكتور ترى تضيعين

لأنه الآراء ساعات تختلف فيضيع المريض حرام

فانتي خليج مع دكتور واحد بس يكون متخصص بالأطفال احسن

 

[د. رشــا الصفــي]

السلام عليكم ~شخبارج دكتوره وكل عام وانتي بخير ~ ولدي عمره ست سنوات والحمدلله مايتبول وهو نايم بس لاحظت من اسبوع صاير يتبول بالفراش واحيان مرتين في اليوم وبنت اختي عمرها تسع سنوات ومن كانت صغيره ليلحين تتبول بالفراش هذا طبيعي في سنها وهي تقول تعرضها على طبيب واش المشكله ممكن المساعده وجزاج الله خيرا

و عليكم السلاو و رحمة الله

بالنسبة لولدج اذا توها المشكلة بادية معاه سويله تحليل بول تكرمون عادي و مزرعة يمكن يكون عنده التهاب او شي و هذا اللي يخليه يتبول

اذا طلع التحليل سليم سوي هالأشياء ( طبعا الكلام له و لبنت اختج )

منع الطفل من السوائل 3 ساعات قبل النوم

دخول الحمام للتبول بعد تناول العشاء

و مرة قبل النوم

و عند صلاة الفجر تصحونهم من النوم تدخلونهم الحمام تكرمون

منع الطفل من تناول المشروبات المدرة للبول مثل الشاى و القهوة و المشروبات الغازية خصوصا مساءا

اذا صارت النتايج زينة خلاص ما يحتاجون شي

و اذا استمرت المشكلة لازم تراجعون طبيب الأطفال يوصف لهم علاج معين اسمه مينيرين يوقف هالمشكلة

 

[ســــراب]

كل عام وانتى بخير دكتورة ..


حبيت اسالك انا بنتى عمرها شهرين ونص وفيها عنقز ياحياتى .. وعندها تطعيم تاريخ 23-12-2008
عن الدرن بس اخاف مايطعمونها ..عشان العنقز هو الحين صار له اسبوع بضبط ومدة حضانة العنقز اسبوعين يعنى جاها 4-12-2008
..


وحبيت اسالج دكتورة انا اعطى بنتى حق الغازات ماى التمر مع ينسون .. 60ملي كل يوم .. واعطيها بونيسان1ملي قبل لاتنام (يقولون احسن من ماى غريب )
السؤال ..
عادى بهالعمر اعطيها تمر وينسون .. مع انى بنتى ماتشرب رضعتها كامله كل ساعتين تشرب فقط 60ملى ..حليب بنتى سميلاك


وبعرف دكتورة شنو المكيال الصحى لرضاعه بعمر ثلاث شهور ..

جزاج الف خير وآسفه على الإطاله ؟

 

[المجره]

السلام عليكم دكتوره كل عام وانتى بخير
لو سمحتى ولدى عنده خمسه شهو ر و عطيه صدري وحليب سميلاك بس صارة له فتره مايحب يرضع من صدرى بس بلليل وهونايم يشرب منه وبالنهار يرفضه ولو سمحتى شنو اعطيه مثل ماى التمر وابى شى ملين لبطنه ومشكووووره مقدما

 

[om hmni]

الله يعطيج الصحه والعافيه
دكتورة ولدي عمرة 20 يوم و اليوم وانا ابدله ثبت ان بطنه يااااااابس وما كنت امثبته بصراحه هالشي من قبل
اهوا يابس مثل البلونه المسموته حييييل بس حجمة عادي مافرق معاي والحمدلله يبجي طبيعي مو زياده ومعاة غازات بس عاديه ومرات وايد يطلعها وخروجه طبيعي ولين

هل كل اليهال ابطونهم مسموته ويابسه او بس ولدي

 

[شمرية مزيونة]

حبيبتي افضل انج تعرضينها على طبيب اطفال يشوف مشكلة الوزن القليل مع الأمساك

و اعتقد انه السبب واحد

اقصد ان قلة الشهية و ضعف الوزن و الإمساك أشياء مسببها مرض او مشكلة وحدة

ما تشوف شر البنوتة بس لا تخلينها وديها احسن

دكتورة تتوقعين اسملة عليها يعني شنو حالتها وانتي دكتورة اكيد مرت عليج مثل هذي الحالة
شنو اسويلها
من فحوصات

 

[المشاركه]

هلا ولله بدكتوره رشا
ابي استفسار بسيط
انا عندي بنتي الوحيده عمرها 6 اسنين ونص .جسمها ضعيف ومو طويله مثل اللي في سنها و خايفه عليها حيل ارجو الافاده

 

[malak_alroo7]

السلام عليكم
شلونج دكتورتنا ان شاء الله طيبه .. الف شكر لج على مساعدتج لنا ..جزاج الله كل خير
حبيت اخذ رايج بخصوص شغله اللي اهي الله يسلمج بنتى توها كملت سنتين بس صار لها فتره ما تاكل كلش و اذا ياعت كلت يمكن لقمة عيش بس او روبه ..
المهم الدكتور قالي السبب انه صدرها تعبان علشان جذي ما لها نفس تاكل و قالي اعطيها كمام جلسه وحده الحين عشان يريحها (( و بنتى فيها كحه و زادت الكحه بعد الكمام )
و بعد قالي اشتريلها vital iron plus
2.5 ml
هل الفيتامين هذا مناسب حق عمرها؟
و عادي اخلطه مع العصير لانها ما قدرت تتقبله المسكينه

و مشكووووره حبيبتى

 

[{NoNa}]

يعطيج العافية دكتورة.....ودي اسألج ما عليج أمر
أنا ولدي عمره 8 شهور و نص (23\12\2008 يكمل 9 شهور) و اكله الصبح بسكوته (فيرليز) كامله مع الحليبه والغداه خضروات مع دجاج او لحم والمغربية بعد ما يقعد من النوم محلبية داناو أو فاكه اليهال المعلبة أو عصير وبالليل أخر شي قبل لا ينام حليبته (الحليب ماركت سيميلاك), سؤالي هل هذا النظام الغذائي جيد ولا في شيء ناقصه؟؟؟؟
أمي تقول ليش ما تعطيه سيريلاك أو ميلوبا؟؟؟؟
يريت تفيديني جزاج الله خير......وشكرا

 

[الاخلاص]

دكتووووووووووووره بلييييييييييز ولدي عمره سنه واربع شهور وبغير حليبه النوفلاك وبعطيه بدياشور لان ولدي قصير ووزنه زين ماشاء الله شلون انتقل من حليب الي حليب

 

[om hmni]

السلام عليكم دكتورة انا ولدي عمرة 25 يوم
سؤالي الاول : انا قاعده اعطية دوا اسمة bebecal من لبنان جان سامعه عنه مكتوب بورقة الارشادات انه يزيل اوجاع الامعاء والمغص ويساعد على الهضم ويزيل توتر اعصاب الرضيع عند الوجع وعند ظهور الاسنان كما يحسن نوم الرضيع والجرعه من عمر صفر الى شهرين 2.5 ملل مرة واحده باليوم
والحمدلله احس ان ولدي مرتاح عليه والغازات قاعده تطلع بس حبيت اتطمن اكمل علية او لاء واذا ايه ليه متى اكمل عليه او ليه اي عمر و استخدمه على طول او عند اللزوم ؟

السؤال الثاني :انا ارضع ولدي 30% طبيعي والباجي صناعي بس ماني قادرة انظم وقت الرضعات اسم الله عليه اذا نام وطول بالنوم يقعد يوعان اعطية مثلا رقمين من كثر ما اهوا دايخ يشرب رقم واحد وينام احاول اقعده ما يقعد ويكتفي بهالرقم وينام ... ومرات لمن احاول اقعده علشان يكمل الرضعه يقعد عقب ربع او نص ساعه ويرضع اشوي ومايكمل الرضعه ويرد ينام وبعدها بنص ساعه بعد يقعد يوعان ويرد ينام وما يكمل الرضعه وجذية دخلنا على الرضعه إلي بعدها ويضل على هالحال طول النهار احس انه ما يشبع وعلى طول يبي يرضع بس احس ان شبعن ومنغث بنفس الوقت يعني طول ما اهوا قاعد او يبي ينام يبي يشرب حتى اضطريت اعطية مصاصة قلت يمكن اقدر ارتب رضعاته مرات اقدر اقص عليه بالمصاصه واحس ان اهوا بس يبي يمص علشان ينام ومرات لا ما تعجبة ويعصب عليها ويبي صج الحليب
شسوي استمر على إللي انا فيه او في حل ثاني او ادخل ميلوبا بين الوجباتن .... وبالنسبة للميلوبا متي انسب عمر ااعطيه انا ماشية على كلام الدكتورة بالمستشفى يوم ولدت قالت لي لا تعطينه اي شي غير الحليب حتى ماي ما يحتاج ليه عمر ثلاث شهور

آسفة طولت عليج ودخلت بمواضيع وايد ... والله يعينج علينا وعلى شغلج بالاساس .... والله يعطيج الصحه والعافيه ويخلي لج اعيالج

 

[asOola_21]

السلام عليكم دكتوره ويعطيج الف عافيه الصراحه وجودج واايد فادنا احنا الامهات ..و حبيت استفسر عن شغله ثانيه بخصوص بنتي ,, عمرها شهرين ونص ومن فتره بدا يطلع بويهها حبوب حمر صغار وجافين مادري من شنو امي تقول يمكن لأني انومها على بطنها !!

ممكن تفيديني لأن بس ويهها جسمها مافي شي ؟؟

 

[د. رشــا الصفــي]

كل عام وانتى بخير دكتورة ..


حبيت اسالك انا بنتى عمرها شهرين ونص وفيها عنقز ياحياتى .. وعندها تطعيم تاريخ 23-12-2008
عن الدرن بس اخاف مايطعمونها ..عشان العنقز هو الحين صار له اسبوع بضبط ومدة حضانة العنقز اسبوعين يعنى جاها 4-12-2008
..

لا حبيبتي ما يطعمونها

راح يخولنها قترة معينة تقريبا 3 اسابيع بعدين يطعمونها

وحبيت اسالج دكتورة انا اعطى بنتى حق الغازات ماى التمر مع ينسون .. 60ملي كل يوم .. واعطيها بونيسان1ملي قبل لاتنام (يقولون احسن من ماى غريب )
السؤال ..
عادى بهالعمر اعطيها تمر وينسون .. مع انى بنتى ماتشرب رضعتها كامله كل ساعتين تشرب فقط 60ملى ..حليب بنتى سميلاك

بالنسبة للطفل الرضيع قبل 4 شهور ما نعطيه ولا شي غير الحليب

و اساسا 60 ملى تمر وايد عليها

انا راي تخلينها عالحليب احسن لها


وبعرف دكتورة شنو المكيال الصحى لرضاعه بعمر ثلاث شهور ..

المفروض البيبي بعمر 3 شهور يشرب من 3 - 4 ارقام كل 3 ساعات
جزاج الف خير وآسفه على الإطاله ؟

حياج الله عزيزتي

 

[د. رشــا الصفــي]

السلام عليكم دكتوره كل عام وانتى بخير
لو سمحتى ولدى عنده خمسه شهو ر و عطيه صدري وحليب سميلاك بس صارة له فتره مايحب يرضع من صدرى بس بلليل وهونايم يشرب منه وبالنهار يرفضه ولو سمحتى شنو اعطيه مثل ماى التمر وابى شى ملين لبطنه ومشكووووره مقدما

حبيبتي الطفل كلما تعود على الحليب الصناعي

يرفض صدر الأم

الصناعي طعمه احلى و يشبعه اكثر و الرضاعة من الممية اسهل على البيبي من رضاعة صدر الأم

هذا هو السبب حبيبتي

و غير الحليب تقدرين تعطينه الحين شوية عصير تفاح اة برتقال او ماي التمر مو مشكلة

 

[د. رشــا الصفــي]

الله يعطيج الصحه والعافيه
دكتورة ولدي عمرة 20 يوم و اليوم وانا ابدله ثبت ان بطنه يااااااابس وما كنت امثبته بصراحه هالشي من قبل
اهوا يابس مثل البلونه المسموته حييييل بس حجمة عادي مافرق معاي والحمدلله يبجي طبيعي مو زياده ومعاة غازات بس عاديه ومرات وايد يطلعها وخروجه طبيعي ولين

هل كل اليهال ابطونهم مسموته ويابسه او بس ولدي

اي حبيبتي البيبيات يكون بطنهم يابس مثل ما قلتي

اذا الرضاعة طبيعية و ما فيه ترجيع و الخروج طبيعي

لا تحاتين

 

[د. رشــا الصفــي]

دكتورة تتوقعين اسملة عليها يعني شنو حالتها وانتي دكتورة اكيد مرت عليج مثل هذي الحالة
شنو اسويلها
من فحوصات

مثل ما قلت لج الدكتور اللي راح يفحص و يطلب الفحوصات اللازمة

ممكن اللي عندها بكل بساطة يكون سوء تغذية مو اكثر

ممكن يكون قلة ألياف بنظامها الغذائي

ممكن يكون امساك عادي و مأثر على نفسيتها للأكل

و ممكن

و ممكن

لازم الفحص عزيزتي علشان الواحد يقدر يحدد المشكلة

و على اساسها يطلب الفحوصات اللازمة

عذريني مو كل شي اقدر اشخصه عالنت

في اشياء ما تحتاج الا كلام الأم أعتمد عليه و أقدر اعطيها النصيحة

و في شغلات ما اقدر و احس مسؤؤلية اني اعطي النصيحة بدون ما تنفحص البنت

تحياتي