خاص بأطفال التوحد

[غلاي غير]

يارب يشافيهم ويقلل من نسبة التوحد في تزايد مستمر وخاصه بالكويت

قولوا امين

 

[ريحانة_14]

يارب يشافيهم ويقلل من نسبة التوحد في تزايد مستمر وخاصه بالكويت

قولوا امين

الله يسمع منج حبيبتي غلاي غير
وعلى حسب آخر إخر إخصائية سمعتها إن في أكثر من 400 حالة توحد بالكويت

الله يشافيهم ياااااااارب

ومشكورة عالمرور يالغاليه

 

[ريحانة_14]

ماقصرتي خووووووووووووووووووووشششششششششش معلومات
بحاول أراجع طريقتي وياه وأعطيج خبر

بالنتظارج بعد قلبي وضوحه :33_1185028183:

 

[ILUV SMW Autism]

السلام عليكم،
أنا عضوة جديدة بالمتدى وبصراحة هذي أول مرة أشارك بمنتدى بعد ما شفته بالصدفة ، ما كنت أعتقد إن عندنا مشاركات فعالة بالمنتديات مثل المنتديات الغربية، اللي ودي أعلق عليه على كلام الأخت المجتهدة الله يعطيعا العافية على مشاركاتها القيمة بصراحة، إن بروتين القمح يضر أطفال التوحد بشكل كبير سواء كان أبيض أو أسمر، وأهم شيئ قبل لا نبدئ نهتم بتعليم طفل التوحد إن نهيئه من خلال تنظيم أكله بالدايت وتغذيتة بالمكملات الغذاية اللي تعوض النقص الغذائي وتنشط المخ وأقول هالكلام عن تجربه شخصية أنا أم لطفل توحدي واتبعت كل ما هو متاح ومستخدم لعلاج التوحد إلى اليوم والحمد الله النتائج ايجابية جدا، المهم تجنب بروتين القمح وبروتين الحليب والسكر والألوان الصناعية والمواد الحافظة.

أول شي أختي الكريمة كرزة .. عرضي وإن شالله تعالى يكون باستطاعتي أقدملج شي يفيدج

==============
ناني سيكرتس ... إنتي يبيلج موضوع كامل بروحج

شوفي ... أول شي وبشكل عام بحالة التدريب على أي شي كل ما استخدمتي حواسه كلها ووجهتيها ناحية تدريبه على شغله معينه كلما ركزت في باله أكثر ..

يعني .. تبين تعلمينه الضمائر .. وشلون يقول أنا .. لما يقولج ماما عطي يوسف .. تروحين تييبينله قلاص الماي وتمسكين إيده وتوجهينها عليه وتقولينله ... ماما عطيني ماي ... تتكلمين كأنج إنتي يوسف وتبين ماي ( لأنه كان متعود يردد )
وطبعا ما تعطينه الماس إلا لما يقولج الجمله إللي تبينها ... ولما يقولها لازم يكون في معزز فوري .. إللي أهو يا إما تصفقينله وتحيينه .. أو give me five مع إبتسامه طبعا أو الدغدغه .. يعني أي تعزيزات من هالنوع تبينله إنه قام بإنجاز كبير .. ولو كان في نوع من المبالغه في المعزز يكون أحسن بعد .. هييييييييي شااااااااطر يووووووووووووووسف ... وديه عند أبوه والا أخوانه .. بابا إسمع يوسف .. وعلى هالوزن تستمرين معاه ( والمعزز الفوري ضروري )
أما إذا بتعلمينه الضمائر .. تيبينله صور رياييل وحريم .. وصورتج إنتي وأبوه .. وتسوينله نشاط شلون ؟؟؟

تعرفين ألواح الفلين ؟

تييبين لوحة فلين بس صغيرة بحجم إيطار صور بحيث يكفي لصورتين ( قلت حق إيمانوفا إني مستعدة أسويلكم دورة بتطبيقات عملية لكيفية عمل الأنشطة التعليمية )

وتحددينها بإيطار من التييب الملون بس بلون واحد وتقسمينها أيضا بالتيب تسوينها نصفين .. وتثبتين صورة أبوه بأعلى القسم الأول وصورتج بأعلى القسم الثاني .. وتثبتين أضرف ( تقدرين تستخدمين أضرف المكاتيب ) تحت كل صورة .. ويكون عندج مجموعة صور حق صبيان وبنات .. ممكن صور أفراد الأسرة وممكن صور أطفال عاديين .. ويبتدي يصنف مع توجيه تعليمات منج له ... وتركزين على كلمة هذه وو هذا ( الضمائر ) هذا بصوت عالي بابا ( وهذي ماما) ( هذي بنت ) هذا ولد ... وطبعا ما تنتقلين من صورة لي صورة إلى لما تكررين وتخلينه يقول وراج .. ولما يقول وراج تعطينه ( معزز فوري ) دغدغة .. شاطر يوسف مع إبتسامه .. ولما يخلص كل الصور تكونين حاطتله معزز ( مادي ) جدام عينه ( حلاوة ) (لعبه يحبها) أي شي يحبه بس يكون بحجم صغير علشان لا يفقد تأثيره مع الوقت

واستخدام الإطارات في النشاط لسبب واضح .. وأهو إن الطفل التوحدي تركيزه ضعيف .. والإطار يساعده على إنه يحدد ويوجه تركيزه لناحية العمل إللي ينجزه .

بخصوص إستخدام الأدوات الدقيقة ... نشاط شك الخرز يساعده وايد على تقوية عضلاته الدقيقة .. لكن نبدأ بالتدريج بخرز كبير الحجم على أعمدة ثابته ( نقدر نسوي هالنشاط مع بعض إذا قررتوا نلتقي بالدورة إلى أن نوصل معاه على شك الخرز الصغير الحجم باستخدام خيوط ( الحداق ) خيط الدبارة وبتصنيف الألوان وتسميتها

نشاط إستخدام المقص .. هذا النشاط كنت أعتبره جدا مهم لطلبتي وأدربهم عليه بشكل مكثف وباليوم الواحد 3 مرات وحتى أثناء فترات الاستراحه ...

تييبين صندوق من الفلين وتقسمينه ثلاث أقسام .. قسم فيه المقص .. وقسم فيه عدد 5 أوراق مقصوصه بطول 10 سم وعرض 2 سم .. وبنص الورق تكونين راسمه خط عريض بشكل عامودي بالمنتصف .. وتدخلين أصابعه بالمقص وتساعدينه في البدايه بمساعدة ( جسدية ) إيدج على إيده وتقصين الورقة بمساعدتج إنتي بحيث إن بحركة وحده بس يقدر يقطع الورقة إلى نصفين ومايحتاج يرجع يفتح المقص ويسكره مرة ثانيه لأ بمجرد حركة وحده من المقص تنقطع الورقه .. ( ولاتنسين المعزز اللفظي بعد الإنتهاء من قص كل ورقة ) والمعزز المادي ( المحطوط جدام عينه ) بعد الإنتهاء من النشاط كله .. وإذا حسيتي إن مافي تقدم ومو قادر ينجز النشاط بروحه .. زيدي عدد الأوراق وخلي الخط العامودي إللي بالمنتصف 1 سم وزيدي سماكته .. لكن مدام إنه أسبيرغر راح يتقنه بسرعه بإذن الواحد الأحد ..

ولاتزيد مساعدتج الجسدية له أكثر من إسبوع على أقصى حد .. وتالي تكون مساعدتج له بنموذج .. يعني تقصين الورقة جدامه وتعطينه المقص تخلينه أهو يتولى قص الورقة الثانيه .. وتالي تساعدينه لفظيا ( يوسف يقص الورقة ) ولما يقصها .. واااااااااو اللــــــــــــه شاطر يوووووسف ( لأنه بالنهاية طفل ويحتاج لعبارات تشجيعيه )

وبالتدريج لما تلاحظين إنه أتقن قص الورقة تزيدين سماكة الورقة إلى 3سم وتضعفين الخط المرسوم لأنج تبينه يقص على الخط صح ؟؟

==============

بخصوص التركيز .. الاستاذ وليد العيسى عضو بشركات أرض الطبيعه أو صاحبها ماني عارفه .. ينصح باستخدام الطحين الأسمر والخبز الأسمر المدعم بالنخاله لأطفال التوحد لأن الطحين الأسمر يساعد على زيادة التركيز ... وجربتها مع بنتي بصراحه لما كان عمرها 1ونص فظيعه فظيعه فظيييييييييييعه كانت ولاحظت عليها إن كل ما أتكلم معاها تنتبه وتركز معاي بأي شغله نسويها أنا معاها .. بس لما كبرت عنفصت علي

بالإضافه إلى الكشمش ( الزبيب الأسود ) ياخذ منه 7 حبات مغسوله بماي الورد كل يوم صباحا على الريق لزيادة الحفظ والتركيز لأن ورد فيه أحاديث كثيرة عن النبي محمد ( صلى الله عليه وآله وسلم ) في أغلب الكتب إللي تتكلم عن الطب الشعبي .. ولييييي اليوم أنا وبتني وزوجي يوميا 7 حبات كشمش أسود عالريج

==================

التدريب على مسك القلم .. نشاط كتابة الخط داخل حدود الفلين

أبي أريح شوي وأرجع أكمل أوكي .. المعذرة

 

[m0nm0n]

يعطيج العافية اخت ريحانة واللة يجزاج خير ان عندي بنتتي فيها جم صفة من التوحد وعطوني حقها تحويل حق الطب التطوري وحق السمع والنطق وبصراحة عندي وايد ظروف وماوديتهااللة يسلمج بنتي عمرها 6 سنوات في أولى ابتدائي وماكنت ملاحظة هلمشكلة لأن عندي غيرها بنتين وولد وهي ترتيبها الثالثة لاحظت انها انطوائية في وايد احيان وحساسة وخجولة ومترددة والي اكدلي هشي لما دخلت الأبتدائي وبسبب ظروفي ماكانت تداوم وايد بروضة وكانت لما تداوم تنام بصف وبنتي وايد حركية وتخرب وتستحي حتى مني احيان وماتنام عدل وايد تحرك ومشكلتها الحين بلكتابة ماتمسك القلم عدل وتتعب وايد تطيح حتى وهي واقفة ولا تمشي مافي وزن وعلى طول تبي تاكل حتى اخوانها موحيل معاها ومايحبونه تشاركهم بشي وحتى بصفها ماعندها صديقات وهي حاسة انها منبوذة وللة تعور قلبي وايد لأنه صج فرق عن اخوانها ومشكورة بعد قلبي ياريت تفيديني وانشاللة بميزان حسناتج ( موفقة)

 

[ريحانة_14]

هلا حبيبتي

الحمدلله رب العالمين حسيت من كلامج إن توحدها خفيف نوعا ما .. مو نوعه إلي مصاحب للتخلف .. وغالبية أطفال التوحد عندهم الإحساس الشبع ضعيف .. فإنتي لازم تسوينلها كنترول على أكلها وتعلمينها متى تاكل ومتى توقف عن الأكل ..

ومسألة الضعف لازم تتقوى بالفيتامينات وحاولي يكون نظامها الغذائي فيه أنواع مأكولات مفيده وتعطيها سعرات حرارية شوي عاليه يعني مو وايد علشان لايزيد نشاطها ..
مثلا صبع واحد كتكات باليوم .. الكاكاو معروف يزيد النشاط .. لكن لو تعرضينها على دكتورة عبير عوض طبعا إهي أفهم بهالأمور

وبالنسبة للكتابة .. أنا حاطه فوق طرق التدريب بالتفصيل الممل ياريت تاخذينلج فرة عالموضوع بالصفحات قبل بتلاقين طرق تدريب الطفل التوحدي على الكتابه وراح تفيدج وايد بإذن الله .. وأهم شي التدرج بالتدريب من خلال أنواع المساعدات علشان يسهل عليها الموضوع

بالنسبة لعلاقتها بأخوانها ...

أول شي لازم تقعدين بجلسة خاصة مع الأخوان بروحهم وتفهمينهم ظروف أختهم .. وإنها مو ناقصه والا أقل منهم لكن الله سبحانه وتعالى عطانا ياها جذي لأنها نعمه وكلنا راح نحافظ عليها وندير بالنا عليها ونحبها علشان نساعدها وتصير مثلنا ..

وسويلهم ألعاب جماعيه .. إنتي أشرفي على لعبهم كلهم مع بعض لعبيهم كلهم بمن فيهم أختهم التوحديه وشجعيها .. حتى لو كانت ألعاب بسيطة .. وعطيها مثلا لعبه أو قلم أو أي شي محبب للأخوان عطيها وقوليلها أو حالي بأي طريقه إنها تعطيه لأخوانها .. وطبعا هذا يكون بوجودج وتعقبين على تصرفها وتقولين للأخوان : اللــــــــه شوف شلون أختك تحبك وعطتك اللعبه إهي تحبك وااااااااايد وتحب تساعدك

عطي للأخوان إيحاءات إن أختهم هذي تحبهم وما تكرههم

وإذا كانوا كبار ويتفهمون إذا عرضتي عليهم صور مثلا .. راويهم صور أطفال معاقين .. وعلميهم حكمة الله سبحانة وتعالى من وجود إنسان معاق عندنا أو بينا .. وإنهم نعمة للناس لأنهم راح يدشون الجنة .. وإللي يساعدهم ويحبهم هم بعد راح يدش الجنة معاهم ..

إللي أقصده حبيبتي .. حاولي تقربين العلاقات مابينهم وتفهمينهم مشكلة البنت

وأتمنى إني أكون قدمتلج ولو شي بسيط يفيدج حبيبتي


تحياتي لج

 

[@شمس الضحى@]

السلام عليكم
ريحانه شلونج ياقلبي شخبارج

 

[داون سندروم]

يستاهلون أمهات التوحد هالخبرهدية مني



مركز التوحد افتتح باب التسجيل في موسمه الثقافي السنوي






اعلنت موجهة البرامج بمركز الكويت للتوحد خزنة الحضرمي عن فتح باب التسجيل في الموسم الثقافي السنوي الذي يقيمه المركز بالتعاون مع جامعة كولومبيا ومكتب هيئة الامم المتحدة.

واشارت الحضرمي في تصريح تلقته «الوطن» ان الموسم يتضمن العديد من الانشطة والبرامج التي من اهمها ورشة عمل حول اعاقة التوحد وتتكون من ثلاثة مستويات، منوهة بان المستوى الاول يستعرض فهم التوحد من منظور سلوكي والثاني حول كيفية تحليل السلوك وصعوبات الجداول (abc) وتطوير الخطط الايجابية.

اما المستوى الثالث فيتعلق بالتدخل السلوكي الايجابي للتوحد.

واوضحت الحضرمي اننا نهدف من خلال هذه الورشة الى نشر التوعية بالمجتمع وتدريب المختصين في هذه الاعاقة لافتة الى ان من يرغب في التسجيل ولمعرفة المزيد من التفاصيل مراجعة مقر المركز.




تاريخ النشر 01/02/2009

 

[ريحانة_14]

السلام عليكم
ريحانه شلونج ياقلبي شخبارج

هلا حبيبتي أسوم شلونج حياتي ؟

وشلون أسومه ؟

 

[ريحانة_14]

مشكورة حبيبتي داون سندروم

وإن شالله الأمهات يستفيدون

 

[@شمس الضحى@]

هلا حبيبتي أسوم شلونج حياتي ؟

وشلون أسومه ؟

الحمدلله بخير ياقلبي
انتي شلونج شخبارج
مشكوووره ع الموضوع والمجهود الله يعطيج العافيه

 

[شقرديـه عالطل]

يستاهلون أمهات التوحد هالخبرهدية مني



مركز التوحد افتتح باب التسجيل في موسمه الثقافي السنوي






اعلنت موجهة البرامج بمركز الكويت للتوحد خزنة الحضرمي عن فتح باب التسجيل في الموسم الثقافي السنوي الذي يقيمه المركز بالتعاون مع جامعة كولومبيا ومكتب هيئة الامم المتحدة.

واشارت الحضرمي في تصريح تلقته «الوطن» ان الموسم يتضمن العديد من الانشطة والبرامج التي من اهمها ورشة عمل حول اعاقة التوحد وتتكون من ثلاثة مستويات، منوهة بان المستوى الاول يستعرض فهم التوحد من منظور سلوكي والثاني حول كيفية تحليل السلوك وصعوبات الجداول (abc) وتطوير الخطط الايجابية.

اما المستوى الثالث فيتعلق بالتدخل السلوكي الايجابي للتوحد.

واوضحت الحضرمي اننا نهدف من خلال هذه الورشة الى نشر التوعية بالمجتمع وتدريب المختصين في هذه الاعاقة لافتة الى ان من يرغب في التسجيل ولمعرفة المزيد من التفاصيل مراجعة مقر المركز.




تاريخ النشر 01/02/2009

السلام عليكم ورحمة الله وبركاته

هذي اول مشاركة لي اهني مااقول الا يعطيكم العافيه وربي يشافي عيالكم

اليوم انا رحت للمركز وسألت عن هالدوره

هي تبدأ من 17\2 لي نهايه شهر 3 ورسومها 90 دينار

كل اسبوع يوم وطبعا بتكون 4 ساعات

لكن اللي يضيق الخلق شوي انها بالانغلش

وانا يعني مع الانغلش

وماادري متردده اسجل او لا

شتشيرون عليّ بنات والله ودي اسجل بس خايفه ع من اللغه اخاف اكون مثل الاطرش بالزفه :eh_s(6):​

 

[ناني سيكرتس]

رييييييييييييييييييييييييييييييحانه اشلونج وشخبارج, والله فقدت خبري فيج بس يوم اتصلتي علي, وعقبها مسجاتج الي تهبل, عسى الله يوفقج وايسرلج امورج..

عموما انا صارتلي ضروف الله يعلم فيها , الحمد لله على كل حال..
عندي سؤال حبيبتي: في حاله قالتي الدكتوره عبير عوض يمكن تكون اهي حاله ولدي, الحاله اسمها مو متاكده بالضبط من الاسم شي جيلو اكس ساندروم او شي جذيه, يعن شنو هالحاله وشنو الفرق بينها وبين الاسبرغر..؟

الدكتور لما سالتها بالمراجعه شنو بالضبط حالت ولدي ابلة ولدي بالمدرسه تقولي ولدج مافيه فرط نشاط ولا من فئه بطيئي التعلم ولا من الاسبرغر تقولي انا وايد محتاره معاه, يوسف بالصف وايد شطر وبسرعه قاعد يتعلم وايد شغلات وتقولي ان اهو احسن واحد بالصف عشان جذيه ماهي عارفه باي حاله يصنف. لما قلت حق دكتورته بالمرجعه قالتلي صح ولدج يحير عشان جذيه خل نسويله فحص كروموسومات ونعرف بالضبط اي حاله اهو, ويمكن اهو من فئه الاكس ساندروم ..

بليز بليز بليز ابي معلومات عن الاكس ساندروم هذا..
مشكوره وسامحيني عالقطاعه..

 

[داون سندروم]

أختي ناني سيكرتس التشخيص مهم جدا
روح كل مكان لما تعرفين بالضبط تشخيص ولدج
علشان نعرفين تتعاملين معاه وتطورينه صح وبسرعه
أتمني التوفيق لك طمنيا عزيزتي

 

[ناني سيكرتس]

أختي ناني سيكرتس التشخيص مهم جدا
روح كل مكان لما تعرفين بالضبط تشخيص ولدج
علشان نعرفين تتعاملين معاه وتطورينه صح وبسرعه
أتمني التوفيق لك طمنيا عزيزتي

والله كل مكان رحت حتى اني فكرت اني اوديه برا الكويت بس كنت ناطره تشخيص ثاني ..

 

[مشاعل الشمري]

السلام عليكم اختي ريحانه 14 ماشاء الله عليج والله يحميك انا يديده بالمنتدى ويشرفني اكون معاكم انا شاركت وكتبت عن ولدي يوسف بركن خلونا نجتمع الباب الثاني شان زين تقرينه وتردين علي واللي ماقلته عن يوسف انه حنون وايد وصدقيني يفهم ويعرف اغلب امور الحياه اللي احسه فيه انه ببعض الاوقات ان ماعنده تركيزولازم يدور حوالين نسه باليوم لو مره وحده وشوي اتحسين لاتكلم ات في ثقل بلسانهودي اتعرف عليك اكثر وييبه لج اتشوفينه لاني محتاره وايد بحالته عرضت على اكثر من اختصاصي ويردون علي انه مو توحدي وانه مخه ملخبط وفيه وايد شغلات

 

[ناني سيكرتس]

ريحانه وينج ...

 

[wathoo7a]

ريحانه
شلونج
شخبارج
مبروووووك
توني أقره بتوقيعج إنج حامل
يالله يتمم عليج حبوبه
شلون سارونه
وشلونج مع الدوام
فهودي تحسن بللغة وايد
بس وايد
وايد وايد
ضعف
صار عود كلش
وتصدقين مناعته وايد ضعيفة
بسرعة يمرض
بس الحمدلله على كل حال
شصار على كتابج ومشروعج
عساج بنفس الهمة والعزيمة
يلله يوفقج
وناني الحلوة شلونج ؟؟؟؟
خوش خبر إن يوسف ما معاه توحد
حاولي تودينه بره الكويت بالصيف
يعني حطيلج ميزانية له بروحة وتوكلي على الله
ترى هني ما في ذيك الخبرات اللي ينوثق فيها بالذات في مجال الطب التطوري

 

[ناني سيكرتس]

ريحانه
شلونج
شخبارج
مبروووووك
توني أقره بتوقيعج إنج حامل
يالله يتمم عليج حبوبه
شلون سارونه
وشلونج مع الدوام
فهودي تحسن بللغة وايد
بس وايد
وايد وايد
ضعف
صار عود كلش
وتصدقين مناعته وايد ضعيفة
بسرعة يمرض
بس الحمدلله على كل حال
شصار على كتابج ومشروعج
عساج بنفس الهمة والعزيمة
يلله يوفقج
وناني الحلوة شلونج ؟؟؟؟
خوش خبر إن يوسف ما معاه توحد
حاولي تودينه بره الكويت بالصيف
يعني حطيلج ميزانية له بروحة وتوكلي على الله
ترى هني ما في ذيك الخبرات اللي ينوثق فيها بالذات في مجال الطب التطوري

ودي يا وضوح ودي, بشوف اخر تشخيص له عقب فحص الكروموسومات شنو راح يقولولي وبعدين يمكن اوديه برا الكويت..

 

[ريحانة_14]

رييييييييييييييييييييييييييييييحانه اشلونج وشخبارج, والله فقدت خبري فيج بس يوم اتصلتي علي, وعقبها مسجاتج الي تهبل, عسى الله يوفقج وايسرلج امورج..

عموما انا صارتلي ضروف الله يعلم فيها , الحمد لله على كل حال..
عندي سؤال حبيبتي: في حاله قالتي الدكتوره عبير عوض يمكن تكون اهي حاله ولدي, الحاله اسمها مو متاكده بالضبط من الاسم شي جيلو اكس ساندروم او شي جذيه, يعن شنو هالحاله وشنو الفرق بينها وبين الاسبرغر..؟

الدكتور لما سالتها بالمراجعه شنو بالضبط حالت ولدي ابلة ولدي بالمدرسه تقولي ولدج مافيه فرط نشاط ولا من فئه بطيئي التعلم ولا من الاسبرغر تقولي انا وايد محتاره معاه, يوسف بالصف وايد شطر وبسرعه قاعد يتعلم وايد شغلات وتقولي ان اهو احسن واحد بالصف عشان جذيه ماهي عارفه باي حاله يصنف. لما قلت حق دكتورته بالمرجعه قالتلي صح ولدج يحير عشان جذيه خل نسويله فحص كروموسومات ونعرف بالضبط اي حاله اهو, ويمكن اهو من فئه الاكس ساندروم ..

بليز بليز بليز ابي معلومات عن الاكس ساندروم هذا..
مشكوره وسامحيني عالقطاعه..

هلا وغلا ناني حبيبتي شلونج .. وشلون يسافي أنا واااااايد آسفه عالقطيعه .. تلفوني اخترب مايدز مسجات ومع الحمال كله بالفراش ما أتحرك وبس أشغل اللابتوب 5 دقايق يحوشني عوار راس

المهم .. الإكس سيندروم أول مرة أسمع عنه بس راح أسألج خالتي لأنها توها الحين خالصه ماجستير فئات خاصه فأكيد مار عليها .. راح أسأل وأعطيج خبر بإذن الله بأسرع وقت ... وآسفه مرة ثانية على الغيبه