اهلا3سهلا والله ريحانه وينك هالغيبه من غير شر
1-في موقف تعرضنا له مع يويو وداه ابوه مطعم يبي يعشيه الرومي بس ما عجبه ولا شي شوربه-شورما واللي اصلا ماياكلها-وظل زعلان وابوه يلح عليه تبي اي شي اكل لا تزعل ما في فايده طبعا اهو يفضل الوجبات السريعه-وقيصر باختصار هل يدخل هالشي بالروتين لطفل التوحد ولا شي عادي؟
2-هل يعتبر علاج الaba نفس علاج وطريقة مركز الكويت للتوحد وهي التيتش؟
نورينا
هلا فيج حبيبتي مشاعل .. مشكورة على سؤال ياقلبي .. والله مع الحمال شوي تعبانة وعندي المشيمة شوي نازلة .. يالله السلامه
وبالنسبة حق يوسف الله يسلمج طبعا هالشي بالنسبة حق عمره شي طبيعي لأن غالبية الأطفال يفضلون الوجبات السريعة لكن مع الأطفال تقدرين مثلا تقنعينهم بفوائد الخضروات والأكل إللي تطبخينه بالبيت بشكل أسرع .. ومع يوسف لازم تستخدمين طريقة التدريج معاه .. راح يتعبج في البدايه لكن بعدين راح ترتاحين وايد ..
شلون ؟؟؟
أول شي تهيئينه .. أهم شي بالنسبة للطفل التوحدي التهيئة قبل ماتروحين لأي مكان جديد عليه .. وحتى لو ماكان مثلا جديد أيضا مهم إنج تهيئينه لأنج بالمكان الفلاني راح تطبقين معاه خطه معينه إنتي حاطتها فبالج .. والتهيئة راح تساعدج في إنه يتقبل المكان إللي بتودينه له ووالأشياء إللي راح يشوفها وإللي راح يلمسها هناك ..
كيفية التهيئة ؟؟
تكونين لج ألبوم صور لكل مكان ( قتلك بالبداية فيها شوية تعب لكن مع الوقت بتحسين بالراحه
ألبوم صور يتضمن الخطوات إللي بتسوينها معاه هناك مثلا :
1- صورة لج وله ولأبوه وإنتوا راكبين السيارة ( حتى لوكانت صور ترسمينها بالإيد توفي بالغرض مافي أي مانع المهم صور لأن ذاكرة الطفل التوحدي ذاكرة بصرية / وبالكلام فقط صعب إن تخزنين كل التعليمات بذاكرته فالصور أفضل )
2- الصورة الثانية وإنتوا داشين المطعم
3- الصورة الثالثه مثلا إنتوا قاعدين على الطاولة وكل واحد فيكم يختار شنو يبي
4- الصورة الرابعه إنتوا قاعدين على الطاولة وتاكلون ( ومهم جدا إن صور الأشخاص الموجودين يكونون مبتسمين تعبيرا عن السعاده )
5- الصورة الخامسة تاكلون حلويات مثلا أو تروحون لمحل آيس كريم وتاكلون آيس كريم
6- لصورة السادسه وإنتوا راجعين البيت ومعالم الفرح مرسومه على وجوهكم
هذا بالنسبة لتهيئة الطفل قبل أي مكان يروحله علشان يتقبله .. لأنه أحيانا يجهل أهو وين رايح ووين متوجه فيتكون بداخله صراع نفسي خفيف لأنه مقدم على مكان مجهول .
================
الحين نيي للخطه إللي تبين تطبقينها معاه علشان يترك الفاست فود ويتقبل الأكل العادي ...
عندج هني كذا طريقة وتقدرين تنوعين فيهم بشكل إسبوعي .. يعني استخدمي كل طريقة لمدة إسبوع وشوفي النتايج وشوفي أي طريقه تقبلها أكثر إمشي عليها ...
الطريقه الأولى :
تحطينله بصحن مقسوم وخاص بالأطفال وعلى شخصيات كرتونية يحبها ( سبايدر مان / باتمان ) وتحطينله بالصحن نصف صمونة فاست فود ( ويفضل إن الصحن يكون مقسم ) والقليل القليل من الأكل إللي تبينه يتعود عليه .. بالإضافة إلى الفرينج فرايز ( بطاط شيبس ) لأن معروف غرام الأطفال كلهم فيه ..
وتحطين يم الصحن نوع من المعزز وهو عبارة عن لعبه أو نوع من الحلوى أو أي شي أهو يحبه ( لكن بطريقه إنه مايقدر ياخذه ويمشي تكونين إنتي مسيطرة عليه )
وتقولينله .. أول شي يوسف حبيبي ياكل إللي بالصحن وبعديييين نعطيه لعبه .. خلي تعليماتج اللفظة له تكون بجمل قصيرة وواضحه مع الإشارة بإصبعج لصحن الأكل واللعبه ( علشان أيضا تكون عنده مفاهيم لفظيه )
ولما ياكل نص الصمونة ومايبي يكمل ولا ياكل الأكل إللي إنتي حاطته له ويبي اللعبه تقولينله : لأ .. لعبه مافي .. أول يوسف يخلص الصحن وبعدين ياخذ لعبه ..
وإذا مثلا بس مسك الأكل إللي عطيتيه له وحاول يحطه بحلجه .. إبتسميله وشجعيه : واااااو يوسف شاطر .. يوسف راح ياخذ لعبه
لكن في البدايه تحطين كميه قليله وتستمرين عليها يومين مثلا أو ثلاث .. على حسب تقبله أو عدمه للمأكولات اليديده إللي عارضتها عليه .
وبعدها تزيدين كمية الأكل إللي يتعودينه عليه وتخففين أكثر الفاست فود
لين توصلين للمقدار إللي تبينه ياكله ... لكن التشجيع المستمر مهم جدا وأيضا المعزز لاتنسينه .
لأن إحنا كلنا كأفراد نحتاج المعزز بحياتنا اليومية وبكل لحظة ..
بالدوام لما ننجز نحتاج بونس أو كلمة شكر وتقدير من المسؤول أو المدير أو هدية مميزة
بالبيت لما نشتغل ونغسل ونطبخ نحتاج كلمة شكر أو تقدر أو ( الله يعطيج العافيه يا أم فلان ) من أزواجنا
فما بالج بالطفل التوحدي ؟؟؟
يحتاج المعزز أكثر من غيره
==============================
أما الطريقه الثانيه وإهي الممتعه .. إنج تعرضينله الأكل بأشكال وصناديق محببه إلى قلبه ..
مثلا تقدمينله بيتزا أو صمونة التوست مع الجبن والزيتون والخيار على شكل وجه مرح ( التوست الوجه / الزيتون العيون / الخيار أو قطعه طماطه الفم / الجزر المبشور الشعر ) وراح يحب هالشغله وايد
وكل بين فترة وفترة تفنتقين له شوي بشكل جديد ووجه جديد وبأنواع مأكولات جديده .. ومع الوقت راح يستمتع إنه مو بس ياكلها لأ .. راح يستمتع إنه يحضرها معاج
وهذا شي ينفعه لي بعدين ( زيادة قدراته الفرديه والمهنية )
===============================
وبالنسبة لطريقه مركز التوحد مع الأطفال إهي كانت الخطط التعليمية لتنمية المهارات السبع توضع للطفل بشكل فردي ( one to one )
فما أدري إذا كانت إهي نفسها الـ aba أو لأ
==========================
إقري الموضوع براحتج عزيزتي وأي استفسار حياج
