~¤ô¦ô¤~ دوانية رشيقات المستقبل ~¤ô¦ô¤~الجزء الثاني

[عنيّد]

مكعبات ماجي - كبتات بشريه

آل ايه ، يعني برايفسي !

مو كافي ساطرين مكاتبنا بالممر ، مسوين هالحركه عشان يزيدون الخنقه

اطالب بوجود جرس

 

[mn.mn]

باك من بعد الحصة اسولف معاكم شوي تالي بروح حق زوزو

ياربي ابي اقعد ساعتين على الكرسي ما اتحرك ماكو مجال

زيون إي والله ياحلو الفنطاس وبوحليفة الحين شوي شوي قاعدة تتسنع واللوية والزحمة فيها اخف من الديرة والسالمية

عاد انتي طقي بريك لي هني وبس مو توصلين عريفجان وموخوش الخبر بخصوص الكورس وان شاء الله معوضة

عنيد ذكرتج ببيتزا قيصر يا حسرتي لا يكون إستاثمت فيج وشيشتج على الانحراف الرجيمي وعلى اليمعة وين المكان اللي يناسبج عطينا أمثلة

اثمان أنا ما أحب السمج بس الربيان اوكي ما عدا المشوي عاد الحين بحاول أدخل الفيليه بقائمتي الغذائية

 

[mn.mn]

عنيد ميرسو على موجز الأرصاد الجوية

والله يعينكم على الكبتات أحس شعوركم بالضيج اهو اللي مأزمكم كل ما حركتي ريلج بتحوشين الكبت

حشا العم وحيد لووووول

وعندي لج سؤال وجية بما انج من الفيروزيات القدامى >>> يعني ربع فيلا فيروز

جربتي فرع الافنيوز شلون قعدته حلوه ولا نتم على فرع الشعب وطاولتنا اللي ورا العمود

 

[عنيّد]

منمن ،، ولكم باك ، اعطيج ساعتين من السجن الي انا فيه وتعطيني ساعتين اتمشى بساحة المدرسه ؟
بالنسبه للمكان ، عادي اي مكان داخل السور ، ويفضل مايكون متأخر المهم متى ماصارت النيه انا عندي الي اضبط معاها وتكون حلقة وصل بينا ونعم حلقة الوصل الروشيه :eh_s(3):
بس صبركم علي اروح موعدي باجر ، ماكنت بقول الا بعد ما انصدم بالذات ان وصلني الموعد قبل يومين
المهم باجر موعدي عند طبيب الاسنان ، بكمل تقويم الاسنان الي وقفته من ٣ سنين :cxxxp:
ومادري شبيكون وضعي ، يعني مو معقوله بنطلع وبتاكلون وانا بتطمش عليكم ، تغصون يعني :eh_s(20):
عاد انا شوي مستانسه من هالتقويم ، يقولون الواحد مايتهنى بالاكل لما يحطه ، مع اني لما حطيته كان وضعي عادي وآكل كلشي

 

[زيـنـه]

رد : ~¤ô¦ô¤~ دوانية رشيقات المستقبل ~¤ô¦ô¤~الجزء الثاني

منمن الله يعينج على دوامج
اعرف وحده تقول لو تخلص كل الوظايف بالعالم ما اشتغل لا خدامه و لا مدرسه
صج الله يعينكم

عنيد
كسرتوا خاطري بس اخذي الجانب الايجابي بالخصوصيه و خلي الكيوبيل مالج يعبر عنج
فكره حطي لج فازه صغيره فيها ورده فرش تغير لج الجو يا ربي من فكرته هذه ؟؟؟؟؟ لوووول

 

[mn.mn]

لووووووول عنيد لا لا راح تطبين بالخمس معانا وخلاص خلي وكيلة روشيه تضبط معاج احسن من نشر الغسيل هني

وضحكتيني على سالفة التمشي بساحة المدرسة عاد تدرين الناظرة مسوية لنا ممشى ورا شحلوه لي برد الجو

زيون إي والله نجاهد لو بس نفتك من اللي يقررون بدالنا واهم مرتاحين بالمكاتب جان احنا بخير

وأنا صج أتلحطم على التدريس بس ما أنكر المميزات اللي فيه بعد الحمد الله على حال وما فيه أحد مرتاح على قولة بو بكر سالم

يا حسرتنا من الاسبوع الياي كل ثلاثا نطلع الساعة 2 إلا خمس

 

[عنيّد]

منمن ،، لا داعي لا داعي طبعا انا فيروزيه مخضرمه واكيد جربت فرع الافنيوز :eh_s(20): وباقيلي فرع الكوت بس شكلي ماراح اجرب لانه صج بره السور
المهم قعدة الافنيوز لبنانيه اكثر ، المكان اوسع شوي والسقف اعلى و القعده فيه للغدا برايي احلى من بليل لانه واجهته زجاج والنافوره جدامج يعني حليوه اما بليل ماجربتها بس احسها ظلمه (عاد عندي الصور بس مادري وين حاذفتهم ، اذا لقيتهم بحطهم لج)

وهو مكان واحد بس عاليمين التدخين واليسار بدون تدخين ، لكن ماعجبني لانه الشيشه احسها بتتسرب لنا دام المكان واحد بدون اي فواصل ، يعني بفيلا فيروز الاولي مع ان فيه باب وشوي معزولين بس هم الريحه مرات توصل
المهم شخصيا مازلت اقول ان فيلا فيروز المجكنم رومانصي اكثر :wqedqw: وبعده بالرومانصيه إيي فرع ٣٦٠ صباح ومسا
بس الرئيسي ماحبيت غيره صراحه وماكو على طاولة العامود خخخخخخخخخخ
هم الصوب المظلم بعد حليو قعدت فيه مرتين كتغيير وكان مقبول

يعني باقي الافرع اجربهم من باب التغيير + اثبات الوجود بجميع الافرع

 

[mn.mn]

لوووووووول عنيد اهم شي اثبات الوجود وعلى فرع الكوت ميجانا حليو بس مو نفس الشعور الفيروزي

وفرع 360 لا تحاتين حاطته بالحسبة بس ناطرة أدبر لي نحشة ثانية من الياهال خلال الاسبوع

ودام فرع الافنيوز في احتمال تتسرب ريحة الشيشة عيل ديليت لانه ريلي يتعكر مزاجه من ريحتها

ياربي كل ماله وهالمطاعم يزيدون والتجربة لابد منها الله يكون بالعون

 

[عنيّد]

زيون ،، انا مزينه المكتب بـ ويني ذا بوووه

 

[mn.mn]

أنا أخليكم الحين بروح آخذ زوزو كوانوزو أوديها البيت وبمر الفرع

وتالي برد المدرسة عندي حصة سابعة

أطل عليكم بليل ان شاء الله

 

[عنيّد]

منمن ،، والله انا جربته عالغدا فماكان اكو شيشه الحمدلله ، بس كانوا مسطرين الشيشه ، عاد ديكور ولا صج مادري !!
احتمال اروح يوم اليمعه الافنيوز ، انشالله اذكر واسالهم اتاكدلج :icon30:
ودررررب السلامه

زيون ،، هالفكره الله يسلمج عشان بعض البنات الي مكاتبهم تصير جدام غرفة الاجتماع ، والرياييل وايد طالعين وداخلين ، فيبووون خصوووصيه :botetoo: :nbptr: خخخخ
بس هذي سوبر خصوصيه :flower:

 

[اثمان]

رد : ~¤ô¦ô¤~ دوانية رشيقات المستقبل ~¤ô¦ô¤~الجزء الثاني

عنيد مشكور ه على النشره الجويه

انتى الحين بالدوام

زيون الله يعينج على اولى ابتدائى

السنه اللى طافت اطلعت اعيونى

 

[عنيّد]

اثمان ،، يس انا بالدوام ، والدوام لله ;\

 

[just-me]

يعني و بعدين هالنت الزفت مال الوزارة >>> حمدي ربج عنج نت

والله شي ينرفز قاعدة بس اسوي رفريش شهالحالة ماعلينا

زيون شهالملاقة دوامج طرارة و عين اهلها فيها ؟؟ يالله شنسوي احنا الطبقة الكادحة بهالمجتمع

عنيد الله يعينج على الحبس الانفرادي و عشانج نتعشى المغرب ماعندنا مانع الساعة 5 مثلا ؟؟؟

أثمان اشوه انج ماتحبين المطاعم بس عيل وين تطلعين مع اليهال و رفيجاتج واهلج الكويت

ما فيها الا المطاعم؟؟؟

منمن عجبتني نحشة عن اليهال و عليه عاد انت ناوية تكنسلين الافنيو عيل شوفي لهم بديل

بطه وينج ؟؟ انا من راي البنات مو الا مطعم سويه له بارتي بالصالة و كملوها بالدار طووووووووط >الرقابة اشتغلت

اليوم ماراح اتغدا بس باكل سلاته اه اه اه

و العشا يمكن طوسط و جبن او بيض

 

[just-me]

كلنا بالهوا سوا الدوام لله

 

[just-me]

يعني يوم قرب يخلص الدوام و رحتوا بيوتكم تعدل النت ؟؟؟

يالله ماعليه

ان شاء الله اطل عليكم من البيت

سلام

 

[عنيّد]

تقرير الحلقة الثالثة ٢٨/٩/٢٠١٠
من برنامج سعرات في لحظات للدكتور عبدالله المطوع

ارد واقول ، ان هالحلقه كان حولي للاسف مصدر ازعاج ماخلاني اركز فيها عدل بس انشالله اكتب لكم الي اذكره



يقول الدكتور

- استخدام الرجيم بشكل خاطئ يسبب امراض منها السكر وارتفاع ضغط وامراض القلب والاكتئاب

- الانسولين هو هرمون بالجسم وهو نعمه ولكنه يبقى العدو اللدود ، بحيث اذا توقف من البنكرياس يصاب الانسان بمرض السكر

- تكلم الدكتور عن شي اسمه Glycemic Index وهو قياس سرعة ارتفاع السكر بالدم مقارنة بالطعام المأكول ، وذكر الدكتور بعض الاكلات فيه وقال ان لازم الواحد ياكل من ٦٠ ونازل ، وطلب ان كل واحد يدخل النت ويبحث عن جدول الاكل الي يحتويه (للاسف مصدر الازعاج الي يمي ماخلاني اركز بهالمعلومه اليديده بالنسبه لي )
المهم دورت بالنت ولقيت هالكلام عنه "يعرف مؤشر السكر «Glycemic Index” بأنه الرقم الذي يعطى لكل نوع من الغذاء المحتوي على الكربوهيدرات، ويتم تحديد هذا الرقم بمقدار متوسط الزيادة في مستويات الجلوكوز بعد تناول الانسان لطعام معين. وهو يقيس سرعة هضم وامتصاص السكر وسرعة انتقاله إلى الدم. وبناءً عليه تم تقسيم الأطعمة إلى ثلاثة أنواع: ذات مؤشر سكر مرتفع وذات مؤشر سكر متوسط وذات مؤشر سكر منخفض." المصدر

- السكر الابيض والاسمر ماكو فرق بينهم ، هو صحيح ان الاسمر بكل شي افضل ولكن هذا بحال الاكل مثل الخبز والتوست والعيش .... ، ولكن مع السكر فهو نفس الشي وكلهم تحت الــ ٦٠

- الكورنفليكس الابيض بكل انواعه مامنه اي فايده ، والاصح هو الاسمر

- من اسباب توقف نزول الوزن عدم تغيير النظام الغذائي ، يحتاج الجسم لتغيير النظام الغذائي وكسر الروتين حتى يستمر بالنزول

- النوم مهم جدا لنزول الوزن ، وعلميا الشخص الي ينام اقل من ٦ ساعات متواصله باليوم فجسمه يزيد بالسنه ٧ كجم

- عرض الدكتور كتاب لواحد يساعد الانسان انه يبتعد عن الاكل الي يحبه ، مثلا اذا الواحد اشتهى شي معين فيتخيل معاه شي مايحبه ، والدكتور عطانا مثال بالحلقه ، ياب ككاو هو يحبه ، وحط عليه خردل الي هو مايحبه ، يقول بهالشكل لازم الواحد يتخيل الاكل الي يحبه والي مايحبه ، وبجذي اذا حطهم بباله بهالصوره تلقائيا راح يبتعد عنه وتروح شهوته له ، ويقول انه جرب هالشي مع نفسه ومع بعض المراجعين عنده ونجحت هالتجربه





قبل وبعد الرجيم

طبعا مثل ما كان الاعلان الي نزله الدكتور ان هالحلقه بيكون فيها مفاجأه وهم شخصين سووا رجيم مع الدكتور ووصلوا لوزنهم المثالي

سألهم الدكتور اذا كانوا متقيدين بالرجيم ، فكان الجواب لا ، حتى بالطلعات عادي يطلعون ولكن الكميه كانت اقل من العاده ، وممارسة الرياضه بالذات اذا خربطوا بالاكل
وانهم واجهوا كلام الناس مثلا ويهك صار مو حلو ، وتعودنا عليك متين ، وشنو هالاكل سلطات ...الخ يعني الاكل الصحي بشكل عام
قتيبه قال انه وصل لوزنه المثالي بسنه واربع اشهر ، وعمر قال انه دايم يسوي رجيم جم يوم ومايستمر فكان عنده اهم شي الاراده


وهذي صورهم قبل وبعد ، لا تنسون تذكرون ربكم ، ماشالله تبارك الرحمن الله يهنيهم بالصحه والعافيه ويديم ارادتهم :weight_lift:

عمر

قتيبه


:lolo:


الضعف حلو ها والله انه يطلع الواحد بعمره واصغر من عمره بعد :rerrerek:

هذا الي عندي وسلامتكم وتعشيون
:balo:

​

 

[المتميزة دائما]

رد : ~¤ô¦ô¤~ دوانية رشيقات المستقبل ~¤ô¦ô¤~الجزء الثاني

السلام عليكم حبايبي رواد الدوانية عساكم دووم بصحة وعافية وعسااكم دوووم رشيقات يارب

عنيد حبيبتي مشكوووووووورررررررررررررررررة .. الله يعطيج العافية والله جهودج فعلا طيبة ما تقصرين .. انا وحدة ما احب التلفزيون وما اطالع مالي خلق وهالمعلومات حلوة

بالنسبة لباقي الرواد اقولهم شخباركم وعسى اموررركم طيبة

انا هالايام مو خوش وحدة ريجيميا ما ادري اشفيني صج صايرة care less حدي .. غير مكترثه نهائيا بس قاعد يضيق خلقي على روحي وكل اشوي اوقف جدام المنظرة واخصر النفنوف علشان اشوف اشصار على جسمي ( خو في اختراع اسمه ميزان لوووول) ما ابي اوزن علشان لا انصدم .. الحمد الله على كل حال

تصدقون بنات انا اليوم من ساعتين او 3 ساعات واحاول اشبك مو راضي كمبيوتري علق وزعل ما ادري اشصار فيه بس صلحته وعدلته بس طول معاي .. وقبل اشوي شبكت من كمبيوتر البيت طليت عليكم بس ما شاركت

ستلا .. حبيبتي العفو ياعمري ما سويت شي تستاهلين الخير .. والله كلكم حبايب وتستاهلون كل خير .. بطوطة .. جسووت .. اثمان.. وشششو.. وزيووون.. منمن.. ام منوله.. عنيد .. زاجل.. صبووحة.. ريووم.. دامعية.. تمتومة.. ام فجورة.. همبوشة .. واللي نسيته يسامحني حبايبي

ودمتم ..سالميييين

 

[mn.mn]

مسااااااااااااااااااء الخير

شلونكم ؟؟؟؟

جسوت وي حساااافة ما لحقت عليج عاد باجر احتمال ما اطل الصبح عندي حصة أولى وبعدين بطلع وماني رادة المدرسة

وعلى النحشة من الياهال أنا بسويها أيام المدارس أنومهم واروح ولا بالويك اند لا ما يطاوعني قلبي لازم أطلعهم معاي

وعلى الافنيوز بطلقه هالسبت بس احتمال أروح له السبت الياي أبي اغراض من ايكيا بس هالسبت أكيد بوديهم ألعبهم

ريلي من غير شر مسافر اليمعة والسبت بطوله فاضين ماراح استحمل قعدة البيت بعد الريوق بشيل عمري وعيالي

ونروح لنا اي مكان يلعبون ونتغدى تالي مشوار الجمعية على ما أرد البيت بس اجيك على الجناط واسبحهم واعشيهم وننام

عنيد ميرسو وايد عالتقرير عاد أمس يوم قال العبد ييبوا ورقة وقلم قالي ريلي قومي ييبي قلت له ما يحتاي مراسلة الديوانية ما تقصر

مميزة عادي لا يضيق خلقج اخذي لج فترة راحة وتالي ردي التزمي

أنا اليوم طايحة بالبريد جربت بريد تويكس لان شوشو سألت عنه اذا حلو ولا لا >> بالشة البنية شكو لووول

عموما ما عجبني سنيكرز واااااايد أحلى

 

[mn.mn]

حسافة محد طل

بسكر الحين تصبحون على خير