أسبوع لمحو أمية الطبخ

[أميرة الحور]

بنات انا كنت اقترحت نبدي يوم السبت بس غيرت رايي
أقترح عليكم
نبدي يوم الجمعة ونسوي قهوة العصر
لان القهوة مهمة واللي فيكم تعرف القهوة مافيه مانع تستفيد وتشوف طريقتي لان القهوة عند كل قبيلة او قولي عند كل بيت غير

ويوم السبت بنسوي بيض مفيوح وبيض قرص مع تشكيلة ريوق معتاد

الأحد بنسوي بيض طماط مع بيض عجة مع تقديمهم مع ريوق معتاد

الأثنين بنسوي شغلات ثانية للريوق اعلمكم عليها في وقتها
االثلاثاء ممكن نخليه راحة
الأربعاء بنسوي عيش بروحه مع حشوة بسيطة
الخميس بنسوي عيش ولحم ومرق
الجمعة عيش ودجاج ودقوس
______________________________________________________________
طبعا فيه أغراض لازم تكون متوفرة
مثل انواع البهارات
- بزار ( تلقونه عند الحواج او في المطحنة )
- كركم (في الجمعية )
-دارسين "
- مسمار ""
- هيل ""
- لومي اسود ""
- فلفل ابيض مطحون ""
- زعفران
اتمنى ما نسيت شي
.......................
ماي ورد ( انتبهوا ترى ماي الورد غير عن ماي الزهر ) لأن فيه بنات أعرفهم على بالهم نفس الشي
ماي الورد نضيفه للطبخ والعيش والجاي يعطي نكهة وممكن نضيفه للحلويات
بس ماي الزهر حق الحلويات بس وطعمه غير عن ماي الورد
....................................................................

لا تخافون كل شي راح انبهكم عليه قبله بوقت كافي واذا صار عند اي وحدة مشكلة تكتبها لنا واحاول احلها لها
____________________________________________________________________

أبي منكم الحين كل وحدة تكتب نوعية القهوة اللي تستخدمونها في بيتكم
فيه ناس يحمسون القهوة في البيت وفيه ناس يشترون القهوة جاهزة
وفيه ناس يشترون القهوة الحب الخضرا ويودونها للمحمصة يحمسها ويطحنها لهم
أنا عن نفسي قهوتنا نحمسها في البيت
ومرات نشتريها من فرع بالجمعية للمكسرات والقهوة ولا مرة اشتريت قهوة جاهزة اللي بقواطي
اشوفهم عند محلات التمور في الشويخ بس ما جربتهم
بس لعيونكم راح اجربهم لاني ابي اسهل عليكم بروح اشتري الانواع اللي يمدحونها البنات وبسويها واشوف طعمها واقارن مع قهوتنا

 

[اشواق2010]

راح اشتريها جاهزه مطحونه وحنا قهوتناا يسمونها شقرا مو سوده ويحطون عليها كافي ميت وهيل في المطاره

 

[فتاة حالمة]

انا ولامرة سويت القهوة لأنو ما أشربها ولا زوجي يشربها

لكن حابة اتعلمها

الكل يمدح قهوة امي كانت تستخدم قهوة القطان جاهزة

لكن الآن تشتري وزن و تضيف لها اشياء ثانية مثل الهيل و غيره

راح اجرب طريقتها و طريقتك

__________

بالنسبة للسؤال اعرف اسوي البيض لكن في بعض الشغلات تختلف من مكان للثاني

مثل الشكشوكة و هيك شغلات

ممكن اضيف اللي عندي كل يوم بيومه و استفيد منك

متابعه بجدية

 

[حساسة مصر]

روووعة عايزة اشارك معاكم يا بنات

 

[thahb_q8]

انا متـــــابعه معاكم عجبني الموضوع ولازم اتابع اعرف اسوي شغلات بس ماعندي نفس

 

[أميرة الحور]

اعذروني خواتي على التأخير
صارت عندي مشكلة في تحميل الصور لاني أنقل الصور من الآيفون لإيميلي وانزلهم على موقع للتحميل
ونص الصور وصلت وباقي جم صورة ما وصلت
من قبل العصر سويت القهوة وشربناها ومن الساعة 4 وانا انزل الصور

اذا حليت المشكلة بنزلهم ان شاء الله

وحيا الله خواتي thahb_q8 _ حساسة مصر وفتاة حالمة وكل خواتنا الغاليات

 

[Mo7aSbChia]

انا كان عبالي راح نبدي السبت و كنت داشه اجيك شنو مقادير باجر

توني تفاجأت ان من اليوم باديين (لو دازه رساله خاصه افضل)

المهم...بخصوص القهوه ما فهمت شلون الطريقه؟؟

ما حطيتيها (مو الصور الطريقه نفسها)

 

[أميرة الحور]

آسفة يا Mo7aSbChia ماعليه انشغلت بالصور
بس ماعليه الطريقة سهلة والحين بحط شرح بالصور اللي قدرت انزلها​

مقادير عمل القهوة العربية :
- ماي كثر ما يملي المطارة ( تقريبا قلاصين ونص ) + قلاص ماي زيادة ​

- 2 فنجان قهوة محموسة ومطحونة ماصار لها اسبوع ( أكثر من اسبوع ماتطلع حلوة او تقل نكهتها )​

- ملعقة طعام هيل ( يفضل يكون توَه مطحون و نخليه شوية خشن مثل الصورة )​

- شوية زعفران ​

- ملعقة طعام مبيض القهوة - أو حليب بودرة ​

_____________________________________________
طريقة عمل القهوة ​

- نحضر الدلة او غوري مثل هذا

ونحط كمية الماي اللي ذكرناها في المقادير ( وقلت لكم لازم قلاص زيادة من الماي .. والسبب علشان لما نطبخ القهوة ونصبها تبقى بقايا القهوة المطحونة في شوية الماي الزايد
وما تنزل في المطارة وتصير قهوتنا مو صافية ​

- نشب النار على الغوري ونحط فنجانين قهوة مطحونة وشوية زعفران

ونخليها لحد ما ترتفع وتفور وبعد ما تفور نخفف النار ونخليها تطبخ لمدة عشر دقايق
- بعدين ننزلها من على النار ونخليها تخدر 10 دقايق ​

ونحط في المطارة الهيل والمبيض وشوية زعفران بعد​

بعدها نصب القهوة بعد ما خليناها 10 دقايق
في المطارة وما نشربها الا بعد نص ساعة على الاقل
والسبب علشان تاخذ نكهتها من الهيل وتكبر قطع الهيل وتبقى بالقاع ولما نصبها ما تنزل القطع الصغيرة وتصير القهوة مو صافية
__________________________________________​

وبالعافية عليكم
اتوقع الشرح سهل وهذي طريقتي
وفيه ناس يحبون يضيفون شوية مسمار وناس ثانيين يحبون يضيفون زنجبيل
وفيه ناس يحبون القهوة ثقيلة حيل ومرة
وانا مرات احب اضيف ملعقة صغيرة من القهوة سريعة الذوبان أخر شي قبل ما اطفي النار تعطيها طعم حلو يعدل الراس :eh_s(15):
وهذي قهوة المطيرية أميرة الحور
ما اعرف قهوة العجمان ولا قهوة الهواجر والسموحة منكم​

_____________________________​

 

[الناصرة]

جزاج الله خير اميرة الحور يلا انا عليمية بالطبخ وياكم

 

[Mo7aSbChia]

يصير نستخدم نسكافيه؟؟؟

 

[أميرة الحور]

خواتي اعذروني حابة أغير الجدول
وهذا الأسبوع راح يكون شرح مني وتطبيق بالصور وهذا ياخذ مني وقت فحابة آخذ وقتي في تنزيل الصور وتنسيقها والشرح والتطبيق من غير ما تطبقون أي شي بس تتابعون معاي لحد ما أنزل كل شي مرة وحدة
وبعدها يكون السبت تطبيقكم ويكون كل شي موجود شرحه بالموضوع
علشان لو واجهني تأخير في تنسيق الصور وتنزيلها على النت أو أي ظرف طاريء خاص ما تنطروني
طول هالأسبوع انا بروحي بطبق وانزل اللي خلصت منه ويوم الجمعة تكون كل الأطباق واضحة بمكوناتها وشرحها كاملة في الموضوع وتحضرون أغراضكم وتبدون

وترى مو مطلوب منكم تصوير شي بس طبقوا وقولوا رايكم بعد التطبيق
وان شاء الله راح اعيد شرح القهوة أحسن من الشرح السابق مع كامل الصور الليلة

السموحة منكم واعذروني لأن صج صج الصور تاخذ وقت في التنزيل والتنسيق والشرح

 

[أميرة الحور]

Mo7aSbChia يا عمري لا مايصير نسكافيه لانها سودة وطعمها غير عن قهوتنا

حطي فنجانين من قهوة عربية تلقينها عند المطحنة ولا عند بياعين التمور في الشويخ او بعض الجمعيات فيها أقسام يبيعون فيها مكسرات وقهوة عربية
بس ممكن تضيفين آخر دقيقة ملعقة صغيرة
من هالقهوة سريعة الذوبان

تلاقينها في الجمعيات قسم القهوة

 

[Mo7aSbChia]

بعد عمري والله اخذي راحتج والله يعينج عالتنزيل

 

[thahb_q8]

يعطيج العافيه اميره الحور .. بس غريبه احنا مانحط بقهوتنا مبيض! ليش تحطينه بالقهوة العربي؟

 

[فتاة حالمة]

ok بنات انا متابعه و بعدين راح اطبق بالصور

 

[أميرة الحور]

يعطيج العافيه اميره الحور .. بس غريبه احنا مانحط بقهوتنا مبيض! ليش تحطينه بالقهوة العربي؟

الله يعافيج يالغالية .:eh_s(7):. عادي .. مبيض القهوة ( كوفي ميت ) ينحط في القهوة العربية وممكن نحط حليب بودرة
وترى تلاقين كل وحدة وتجربتها بالقهوة وفيه اللي يحطون حليب بوني

انتي جربي طريقتي وقولي رايج :eh_s(7):
________________________________________
فتاه حالمة حياج الله :eh_s(7):

 

[أميرة الحور]

طريقة عمل القهوة العربية

1- نحضر الدلة أو غوري ( مثل الصورة ) ونصب 3 أكواب ونص ماي فيها
v
v

2- نضيف للماي فنجانين قهوة ( بن محموس ومطحون )و شوية زعفران
v

3- نضع الغوري على النار لحد ما تفور القهوة وتغلي ثم نخفف النار ونتركها تغلي 10 دقايق
( ملاحظة : آخر دقيقة قبل ما نطفي النار يمكن إضافة ملعقة صغيرة من القهوة سريعة الذوبان )
v

4- نطفي النار ونتركها تركد لمدة دقايق

5- نضع ملعقة طعام هيل ( يفضل يكون الهيل مطحون في نفس اليوم )​

6-ونضيف للهيل ملعقة مبيض القهوة كوفي ميت - أو حليب بودرة
وشوية زعفران
v

7- نضع الهيل والمبيض والزعفران في المطارة
v

8- ونصب قهوتنا اللي تركناها شوية تركد على الهيل في المطارة ونتركها نص ساعة ونقدمها مع التمر او حلو القهوة​

:rerrerek:
وهني وعافية :eh_s(7):​

 

[أميرة الحور]

طريقة عمل البيض المفيوح

1- عدد البيضات يكون حسب الرغبة
نغسل البيض ونضعه في وعاء مثل الصورة او جدر صغير
v
v

2- نغمر البيض بالماي ونحطه على الجولة ونشب النار ونخليه لمدة ربع ساعة
v
v

http://filaty.com/i/1106/91359/_3_1.JPG

3- الحين استوى البيض نرفعه ونقشره ونقدمه ونقصه بالشكل اللي يعجبنا ويفضل تقديمه مع طماط مقطع
v
v

​

 

[توتاتوتا]

بعطيش العافيه انا اعرف اطبخ بس ما حبيت اطلع و لا اشكرش على الجهد الي تبذلينه للبنات

و اضيف ان بعض الامور البسيطه لها تاثير على الطبخه و المطلوب ان تمشون على تعليمات و خطوات اي طبخه زي ما هو مكتوب و بس مثلا مكتوب ماء حار - ماء فاتر- ماء بارد يفرق حطي بمكان حار - بثلاجه - بفريزر تفرق اتمنى فهمتوني تسلسل الخطوات يفرق و بالتوفيق

 

[أميرة الحور]

خطوات عمل بيض مقلي

1- نكسر البيضات في وعاء
v

2- نضيف ربع ملعقة صغيرة ملح ناعم ( ربع ملعقة طعام صغيرة )
ملاحظة ( الملعقة صغيرة بس مو واضحة في الصورة كأنها كبيرة )
v

3- نقلب البيض لمدة ثواني او دقيقة حتى يختلط الصفار مع البياض مع الملح
v

4- نحضر المقلى ونضعه على النار ثواني ونضع ملعقتين زيت ( اي نوع من الزيت )
v

5- نترك الزيت ثواني يسخن ( لازم يصير حار علشان ما يلتصق البيض في قاع المقلى )

6- نصب البيض على الزيت في المقلى وهي على النار
v

7 - نرفع جوانب قرص البيض بالملعقة ونسمح للبيض بالوسط انه ينزل للجوانب ويخف البيض السائل بالوسط
v

8- بعدها نقلب القرص ( حاولي تقلبينه بالملعقة والشوكة )
هذا أنا قلبته على الوجه الثاني
v

ممكن رش الوجه بجبن موزريلا

وهني وعافية

ملاحظة : اذا لصق البيض بالقاع كملي البيض بتحريكه مو تقطينه
صح ماراح يصير قرص بس ماعليه ينوكل ترى
حركيه لحد ما يستوي لمدة دقايق وقدميه​