أسبوع لمحو أمية الطبخ

[أميرة الحور]

طبعا العيش يحتاج لحم ومرق
علشان جذي بحطلكم خطوات اعداد مرق اللحم مع الخضار ​

طريقة طبخ المرق باللحم​

مقادير المرق :​

-- كمية لحم تكفي لشخصين ​

-- أنواع من الخضار المختارة
( 4 طماطات كبار - حبة كوسا - حبة بطاطا كبيرة -باميا- فليفلة خضرا )
واللي يحب يغير ممكن نضيف جزر وممكن قرع .. المهم حسب الخضروات اللي تحبونها​

-- أنواع من البهارات الصحيحة ( غير مطحونة ) :
3 اعواد دارسين - 5حبات هيل - ورقتين غار - حبات فلفل اسود -حبتين لومي أسود ​

-- أنواع من البهارات المطحونة : ملعقة طعام كركم - ملعقة صغيرة دارسين - ملعقة طعام بزار او كمون
ملعقة صغيرة هيل - ربع ملعقة صغيرة مسمار​

-- بصلتين متوسطات + حبتين ثوم ​

-- نص شدة كزبرة + اكليل الجبل ​

-- ملعقة طعام ملح
______________________________________________​

- نحضر كمية اللحم اللي تكفي لشخصين ونغسلها زين
v

- نضع اللحم بجدر على النار ونصب عليه ماي يغطيه شوي ونتركه عشر دقايق لحد ما تطلع الرغوة على السطح والدهن الزايد ( وجذي نتخلص من الزفر ) .. بعدين نشيله من على النار ونتخلص من الماي
v

- نجهز البصل ونقطعه ..والثوم ونهرسه او نقطعه .. والخضروات ونقطعهم
v​

 

[أميرة الحور]

نرجع للحم
- نضع اللحم بعد ازالة ماي الزفر عنه في الجدر على النار ونضيف له البصل ونحرك ونقلب
اللحم مع البصل دقيقة
v

​

-ونضيف البهارات الصحيحة ونحرك ونقلب اللحم دقيقتين
v ​

- ونضيف الطماطم ونحرك لحد ما تذوب
v

- ونضيف الثوم ونقلب
v

-ونضيف ملعقة بزار او كمون وملعقة كركم ونص ملعقة دارسين
ونص ملعقه هيل وربع ملعقة صغيرة مسمار
v

-ونضيف اللومي الأسود بعد أن نسوي شقوق بالسكين مثل الصورة
v

​

- نضيف ماي يغطي اللحم ونتركه يطبخ لمدة نصف ساعة وكل ما نقص الماي وتبخر
نزيده

- نضيف البطاط ونترك المرق يطبق ربع ساعة
v

​

- بعد ربع ساعة نضيف الخضروات الثانية
( الكوسا - الباميا - الفلفل الأخضر - الكزبرة- اكليل الجبل )
كثروا من الكزبرة واكليل الجبل لاني حاطه شوية
v

- نضيف ملعقة طعام معجون طماط
v

​

- نتركه يطبخ ربع ساعة وبعدها نضيف ملعقة طعام ملح .. يعني بعد ساعة من طبخ اللحم
( انتبهوا الملح ما تحطونه في الاول لان اذا حطيتوه من البداية ما ينضج اللحم )
v

-نتركه ونغطيه ونخليه نص ساعة يطبخ لحد ما يستوي اللحم والخضار
مع ملاحظة ان الماي كل ما تبخر ونقص نزيده
وهذا شكله بعد مانضج اللحم والخضار
v

​

وبجذي يكون استوى اللحم والخضار
نطلع اللحم ونحطه على العيش بعد ما ننجبه ونحط المرق في وعاء التقديم
v

​

 

[أميرة الحور]

وهذا الشكل النهائي للعيش مع مرقة اللحم:rerrerek:
v​

:eh_s(7):​

_______________________
وفيه ملاحظة بالنسبة للخضار : أنا حطيت البطاط في الأول قبل الخضرة الثانية بسبب انه يتحمل الطبخ أكثر
والخضرة الثانية تكفي نص ساعة علشان تستوي
ولو كثرنا طبخها جان ذابت وتفتتت​

اتمنى تكون الطريقة واضحة وسهلة
وحبيت أقول إن بنفس الطريقة ممكن تسوون مرق بالدجاج بس الفرق ان الدجاج ما يطبخ أكثر من ساعة​

 

[أميرة الحور]

انتظروني في طريقة طبخ العيش مع الدجاج مع الدقوس


وأي طبخة في خاطركم تتعلمونها كتبوها وأحط لكم خطواتها
وترى يا خواتي أنا علمتكم طريقة الطبخ القديمة الاساسية مالت جداتنا علشان تمشون على أساس
أصيل وترسخين البنية التحتية في أساس التعلم :rerrerek:

بس علشان تعرفين الاساسيات الاولى حق العزايم او حق سفرة رمضان وضيوف الديوانيات

لكن بعدين اعلمكم شغل حق تمشية الحال كل يوم وعلى السريع حق الزوج وبس
وحقج بعد اذا مالج خلق تسوين وتبين شي على السريع

وخلو هالموضوع مرجع لكم كل ما توهقتوا وانا بطلب من المشرفة تنسق الطبخات في الصفحة الاولى علشان ما تدورون في الصفحات

_______________________________________________
اي شي في خاطركم تتعلمونه قولولي وابشروا من عيوني :eh_s(7):

 

[Ms.Roon]

وانا ودي اتعلم من قلب
لانه كل ما اطبخ ما يضبط معاي

 

[q8ya زقرتية]

السلام عليكم انا بعد وياكم و الله حدة عجبني الموضوع تسلم ايدج

 

[يحبنى الله *]

يهبل شرحك صج حق المبتدئين مثلى

 

[دانة سامح]

معاكم وبقوووووووة
:ggdw:​

 

[دانة الدنيا@]

مشكوره

 

[((نبض الغلا))]

يماااااال العافية ,, في ميزان حسناتج يا قلبي

ان شاء الله بحاول اطبق .,.,.

 

[أحلى همبه كويتية]

عساك على القوة حووووووووووووووووووور
حبيبتي مشكورة
وشرحك ما شاء الله حلو وسهل

الله يوفقكم واتصيرون احسن الطباخات ​

 

[angelofpinkworl]

مبادرة رائعة

 

[أحلى همبه كويتية]

تم تثبيت الموضوع بقسم المطبخ

الأخت حور تبذل مجهود كبير وبالصور
يعطيك ألف العافية حبيبي
يالله شدوا حيلكم
رمضان ياييكم بالطريق
ربي يبلغنا الشهر الفضيل وياكم

 

[78MariMar78]

ماشاءالله الموضووووووووع قمه في الروعه

تسلم يمناكِ أميرة الحور

ويعطيكِ الف عااافية

 

[78MariMar78]

وألف مبروك على تثبيت الموضوع لأنه يستاهل

 

[غلاتي الكويت]

ماشالله

الله يعطييج العافييه

 

[أحلى همبه كويتية]

ويييييييييييييييييينكم ؟؟؟؟

 

[الحراير]

يعطيج العافيه

 

[D.asmaa]

واااي صج يااه بوقته لا توقفين حبيبتي ياريت تقوولين شنو البهارات الاساسيه اللي لازم تكون عندنا بالمطبخ واشكثر نفووح الدياي واللحم حق المجبوس والربيييان والسمج وكل حااااااااجه والعيش اشكثر ننقعه والعدس والماش الاساسيات يعني

 

[NaYoob]

توني اشوف امضوع انا معاكم ابي اتعلم انا اعرف اطبخ بس مجابيس ما اعرف وبتعلم