التجمع الثاني (قروب passion اقوي قروب اراده حديديه) من 4\4 لغاية .................

[passion.666]

صباح الخير

كان وزني :75

الحين : 73

ممتازه الله يتتم عليج

 

[passion.666]

بسم الله الرحمن الرحيم

اليوم موعد الميزان

كيكة توفي

-2 نازله كيلوين​

باشن

-1.800 كيلو و800 جرام​

ناطره اوزانكم يالله​

 

[عليـاء]

هلا بنات شلونكم
صباح الخير حبايبي
امس بالليل المنتدى كان تعيس

وزنت اليوم
وزني ماتغير
73
73
مانزلت ولا زدت
في اول اسبوع نزلت ورجعت اكل وايدج
من بكرة لازم ابدا نظام جديد واسكر على نفسي
نفسيتي زفتتتتتتتت والحمدلله يارب على كل حال

يارب نضعف بصحة وعافية
ومبروك
كيكة وباشن
على النزول ويارب دوم حبايبي انتو

 

[Brounzi_girlly]

صباح الخير انا توني مبلشة وياكم ماعتقد اوزن هالأسبوع
انا لي لحين احس اني متينة يمكن بس اطوف عالم السيتينات اشم ريحة الرشاقة
فطوري المعتاد نسكفيه ماي كب+بسكوت دايجستف
الغدا مافكرت لي الحين
مع التحية..............

 

[ملكة زماني]

صباح الخير بنات

مبروك الاوزان اليديد
وانشالله بالسالب ليما توصلون الوزن المثالي بصحة وعافيه

سامحوني انا راح انسحب من القروب
بس راح اكون موجوده على المدرج اشجعكم

 

[عليـاء]

اهلين برونزاج
بالعافية اكلج

ملكة
ليش حرام انت ملتزومة ليش بتنسحبين
عسى ماشر يارب مانكون زعلناج ويارب مافيج الا كل خير ياقلبي

 

[BiiShOoO]

مساااء الخير


انا كتبت مشاركتي الصبح بس كالعادة المنتدى معلق

ريوقي كان صمونه لبنه و زعتر و زيتون و عصير برتقال فرش

و السناك كان قهوة نركية و قطعة شوكلات


و غداي صدر دياية و سلطة


قبل امس وزنت و طلعت نازلة 800 غرام

بس باجر بمر الصيدلية بيتاكد اكقر من وزني


عوافي عليكم اكلكم و مبروك النزول كيكة و باشن


علياء انشالله المرة الياية تكونين نازلة بقوة

ملكة عسى ماشر

 

[كيكه توفي]

مبروك النزول باشن وLoooo

علياء انشالله تكونين نازله المره اليايه

ملكة زماني ليش عسى ماشر

Brounzi_girlly بالعافيه عليج اكلج انتي و Loooo

 

[كيكه توفي]

يومي

الريوق : تفاحه خضرا + نسكافيه

الغدا : نص خبزه سمره + شاورما لحم انا مسويته بالبيت

العشا : تفاحه خضرا + روب قليل الدسم

بس الحمدلله

 

[سيلينا]

مرحبااا

سوري على التآخير

وزني بالبدايه كان 56.5اليوم وزني




يعني نازله 700 جرام الحمدالله

كيكه توفي وباااشن ولووو الف مبرووك النزووول تستاهلون كل خير

ملكه زماااني ليش عسى ماشر ليش تنسحين كنتي حيل ملتزمه من بدايه التجمع حرام والله راجعي نفسج

علياء ماعليه لا تتضايقين يمر وقت الجسم يحتاج صدمه بالاكل خربطي يوم كااامل ودري للرجيم ثاني يوم ان شاء الله ينفع

تصبحوون علي الف خير مع السلامه

 

[passion.666]

بسم الله الرحمن الرحيم

مبروك سيلينا ويعطيج العافيه

وكيكة توفي يعطيج العافيه ومبروك

علياء حبيبتي جدامج اسبوعين علشان تنزلين من وزنج لأن هذي اخر فرصه لج
لاتزعلين مني بس علشان مصلحتج

ملكة زماني ما تشوفين شر اهم شي صحتج وحطي بالج على روحج بس دخلى معانا وشاركينا برايج

مدرسه طفشانه

وينج مسكينه اكيد لاهيه مع الريل والعيال

وباقي البنات وينكم​

 

[passion.666]

حبايبي هلأسبوع مابي لعب وخرابيط
ابي جديه

انا علي الدوره ولما وزنت نازله واليوم لي رابع

يعني الدوره ما لها علاقه حتى لو تزيد وزنج بس مو وايد اذا كنت فعلا نازله

بس خلاص لي متى منتو خايفين على روحكم المسأله مو رشاقه

الصحه يابنات انتو اعماركم صغيره

وانتو شايفين الحين وسامعين عن الأمراض الي سببها السمنه السكر والضغط وألم المفاصل
اللي اتصيب الغير قبل كبير

اقولكم على شغله

بنتي الكبيره نوعية جسمها قابل للسمنه عمرها 12 سنه بس اللي يشوفها يقول عمرها 15 لأنها طويله وجثله عظمها عريض لما اخذها من المدرسه البنات يقولون لها هذي منو فهي مستانسه اتقولهم هذي امي والله يبنات اتقولي بنتي صديقاتي حاطين ابالهم انج اختي ويقولون واشلون انت امتن من امج امج ضعيفه
والله يابنات من يومها قالت لي ابي اروح حق دكتور علشان اسوي رجيم
وديتها قسم النغذيه في مستشفى الصباح للأطفال
ودخلتها نادي صحي خاص للبنات اللي بالجابريه مس جامبينز كل يوم رياضه من 5 الى8 ما عدى الخميس مخلينه للعب
مع وجبه لمدة شهر واسبوع زياده وكرت 30 دينار حق الألعاب
قامت اتحاسب على اكلها حت الحلاو والكاكاو والبطاط قامت تاكل مره وحده بالأسبوع اللي هو السبت طلعتنا مع العيال
هذي صغيره وحسة على روحها تبي اتسوي رجيم
عيل شنو انقول حق الكبار
شوفو انتو حرين انا علي من نفسي اني التزم واكتب يومياتي ان شاءالله
وانتو حرين ما اقدر اساعدكم اذا انتو ماساعتو نفسكم انا اراقب نفسي بس ما اقدر اراقبكم اذا انتي ماساعتي نفسج ماراح احد يساعدج
وانتو حررين​

 

[passion.666]

اليوم قعدت من النوم 7:30
شربت 2 قلاص ماي
وكوب شاي مع سكرين سبليندر​

 

[عليـاء]

هلا بنات شلونكم
يارب كلكم بخير
واوعدج باشن بعد اسبوعين اكون نازلة
فديتكم كلكم سيلينا وكيكة وملكة وستايلش ولوو ومدرسة وكل الحلوات
انا عندي ظروف وايد صعبة في البيت ووالله اني ادخل وأشارك وحتى لو ملخبطة لأن
ادري انكم بتشجعوني
من اليوم بديت نظام جديد وان شاء الله باستمر فيه 12 يوم وبابلغكم بالنتايج ياحلوات
وبكرة ان شاء الله بيجيبون لي جهازي مال المشي وسويت له سعه في غرفتي عشان امشي دايما
وشغالتي ايام وبتروح يعني باكرف شوي
الحمدلله على كل حال

باشن
ماشاء الله على بنوتج ويارب تضعف بصحة وعافية
وبدينا التحدي هههههههههههههههههه باحاول هالمرة ان نفسيتي ماتأثر على اكلي
اليوم وزنت نازلة 200 جرام ههههههه
يعني اليوم وزني 72.800 الحمدلله على كل حال .

 

[عليـاء]

ريوقي
- شربت قلاصين ماي
- توست اسمر مع جبنة دايت
- شاي بسكر اسبليندا

الحمدلله على كل حال

 

[passion.666]

حبيبت قلبي

لاتزعلين مني علياء
والله حتى انا ظروفي صعبه
عيال تدريس وانا ادرس الماجستير في البحرين
وخدامتي جديديه سارلها شهر يعني ما اقدر اعتمد عليها
وبنتي عمرها 8 شهور
وقول الحمدالله على الصحه والعافيه

انا مابي احد يزعل علي او يتضايق
انا ما اقولج لاتخربطين الصراحه النفس تشتهي بس موعلى طول تخربط
انا متاكده بعد اسبوعين راح اتكونين نازله​

 

[passion.666]

على الساعه 9:30
بلشت اكل برتقاله وحده
والساعه 10
10:15 شربت شوربة خضار​

 

[BiiShOoO]

صباح الخير بنات شلونكم شخباركم


ريوقي كان صمونه حلوم و زعتر و عصير برتقال


شربت قهوة فرنسية


و ماراح اتغدى بروح النادي على طول

 

[سيلينا]

مساء الخير بناااات اشلووونكم؟؟؟؟

طبعا انا فوق قصدي كان وزني ٥٦.٥ والحين ٥٥.٨

باشن معاج حق انا بعد امس اول يوم دوره ووزنت وطلعت نازله الحمدالله بس هم في اجسام تفرق يعني يصير عندهم احتباس سوائل

يووومي الحمدالله تماااام

الصبح ،،، نسكافيه + سيريال بار ( ٨٢ كالوري )
الريوق ،،،، سيزر سالاد + كراكت (٢٠ كالوري) + جبنه سلفايد (٢٧ كالوري) + شاي مع سبلندا

الغدا،،،، ٥ تمرات + شوربه كنور عدس (٦٠ كالوري) + شابوره ٣ حبات (٦٠ كالوري تقريبا )

وبس هذا يومي لحد الان

 

[عليـاء]

فديتج باشن ياقلبي
من قال اني زعلانة ؟ بالعكس والله انا زادت عزيمتي والله
ويكفي اني مصرة من دخلت هالقسم اني انزل ولا ابتعدت في يوم الحمدلله
الله يوفقج بدراستج ياقلبي والله يخلي لج عيالج
انت لاتضايقين واوعدج بالنزول .

بنات ادعوا لي بكرة عندي منظار قولون
اخر وجبة كانت على الوحدة اكلت سندويش وعصير اناناس وكيوي
وبعدها كله سوائل العصر شربت شوربة بس شوي وعصير كوكتيل ماخلصته
والحين اشرب عصير اناناس
وكل ساعتين ابلع في حبوب المسهل
الحمدلله على كل حال

سيلينا ولووو
بالعافية أكلكم