اللي مستغنية عن الخدامة و متحكمة بشغلها برة البيت و داخله اتدش

[Sa7aBa]

اهو صج تعب بس راحة نفسية
مع التنظيم والتعود خلاص راحةتصير سهالات
بس باسال البنات اللي عندهم الدش ووشر
شلونها معاكم
وشلون طريقتها يعني وين تطلع الوصخ اللي بالصحون؟
جنه عندي بالشقه اللي بروح لها بس مافكرت اني اغسل فيها احس مادري
وريحة المواعين شلون تطلع؟
ياليت تفيدويني

 

[Melazlaza]

صباح الحب والورد الاحمر مع فنجان قهوة بتغريد العصافير

شلونكم جميعا

امس كنت تعباااااااانة اخذت كولد اند فلو ورحت بسابع نومة
والحين شكله احسن من امس

امس نظفت حمام داري بالكلوركس الي حطيت صورته لكم صار يلق
وهجمت عالغرفة نفظت الغبار ونظفت الدرايش ولمعت الجام بسبراي وجريدة
والمطبخ نظيف لان نفس ماقتلكم اول باول احط الصحون بالدش ووشر فمايتراكم شي واذا في شي امسح عالطاير وانا واقفة

ولكم للمنظمات الجدد نورتوا الموضوع والله
ونتر عظم الله اجركم حبيبتي ومثواه الجنه ان شالله


سحابه الدش ووشر بس نفظي الصحن بالصينيه عالجريدة ودخليه داخلها ولها صابون وملح وزيت للتنظيف والتلميع وفيها نظام تعقيم يطلعون حارين ماتقدرين تمسكينهم وريحتهم منعشه
ولها تمديدات مثل غسالة الملابس تبدل ماي وكل شي بروحها
يعني مجرد تشترين صابونها كل جم شهر
يعني تساعد عالتوفير وايد

باجي البنات شلووونكم تجمعنا صاير اينن قصص وحزاوي وحكم بصراحة يستاهل التثبيت

يلا جميعاً طالبوا بالتثبيت
بوبا الرأس المدبر يا لامة شملنا
شسويتي عالخدامة

 

[ليمون ونعناع]

اسأل امي من وين شاريتها واقول لكم

صج موضوع يستاهل التثبيت

بنات ادعولي الله يهدي ريلي ويبعد عن الشياطين ويسخره لي

 

[PuPa^^SWeeT]

ليمون و نعناع


ترا مثل ما الناس ماتفهم رغبتج بعدم استقدام

ممكن خالتج نفس الشي


لاتفكرين انها بتعاندج


ساعات الانسان يبي يريح و يفرض راايه على غيره و نيته اتكون شرييفة




اخذي الامور برحاابة صدر


و ريلج بيقتنع اذا ماتبين خدامة قولييله ناخذ راحته ومن هالحجي



بس شييلي من بالج اتناقشين ويا خالتج عن الموضوع لأنه الخدامة يبتييها ولا ما يبتييها


حتى لو يبتييها بتقعد شهر 6 اشهر سنة سنتين و اترووح

وانتي اللي بتبتلشين لو كبرت المواضيع على سبة خدامة راحت ولا ييت خدامة



ديري بالج





<<< انا حماامة سلام و ماحب النزاعات

 

[سوسو حبيبتى]

هالووا ياحلوووين

جمعه مباركه عليكم

الشعب يريد تثبيت الموضوع

 

[*kim*]

السلام إليكم شبكت من اللاب عشان احط صور وكتبت ورتبت الموضوع الا الكلام طائر
طريقتي في غسيل الحمام او شي اطلع كل شي برا من سلة ملابس وطقم الحمام كل شي برا ارش مائ ع الحمام واحط كلوركس طبعا الكلوركس مو كل مره بس تقريبا كل سبوعين بالتنظيف العميق واجيب بروش صغير وافرك بين الفتحات وارش بماي لين يروح الكلوركس واجيب جف سائل وافرك الحمام عقب بالمخمه العاديه الخشنه وعقب احط ديتول وامسح المرحاض بصابون البرتقالي هاربيك اهو خاص للمراحيض وعجيب ريحه ونظافه والمغسله بجف طبعا تحافظ على اللون ولمعه وعلى طول احط معطرات بالحمام

 

[سوسو حبيبتى]

كيم عافيه ع السنعه

مشكورة ع الطريقه

 

[ليمون ونعناع]

صح كلامج بوبا

انا ما أناقشها بس انا اقول حق ريلي واهو الله يهداه كل شي يقولها واهي تتدخل اكيد في بالها انها تريحنا واهي حبوبه وتساعدنا وانا ترى بعد حمامه سلام هههههه

 

[المـــاســــة]

السلام عليكم

لمحت اسم الموضووووع ودخلت طيرااان

انا يااعزيزاتي
زوجــْة. واام لطفلين اقل من ثلاث سنوات وووووووموظفة


وماعندي خدامة

جربتهم شكثررر ماحبهم ماارتاح الا لما اسوي شغلي بنفسي احب اسووي كل شي فبيتي بايدي


للمطبخ عندي دش ووشر ومريحتني للطباخ استخدم الطرق اللي تسهل وتسرع الطبخ

عيالي الصبح حضانة


وبعد الظهر انومهم ساعه عشان بالليل ينامون مبجررر

بيتي احافظ على نظافته وماحب احد يدخل علي فجاة خصوصا من اهل الزوج ((( ياحبهم للتصيد ))) الا وبيتي يلق وانا اااالق وعيالي بعد



من ناحية التعب اهو تعب ومجهووود بس فالبدايه لكن لما تتعودين علي برنامج معين تتسهل بس والله يابنات يااازين البيت بدونهم



واذا وحده تبي تعرف شلون منظمة وقتي انا حااضرة

وشكرااا*

 

[Melazlaza]

يعطيج العافيه كيم
احسج سعيدة بدون خدامة الله يديمها عليج سعادة


ليمون زين تسوين لا تناقشينها ووصي ريلج مايقولها عساس لا تصير سوالف
والله يهديها لج


الماسة حيااااج الله نورتي تجمعنا
وكلامج يونس ماشالله منظمة وقتج
عفية عليج

وعدل والله بالتعود والتنظيم نقدر
بس اغلب حريم مجتمعاتنا تعودوا عالخدم والا لو يجربون الراحة النفسية بدونهم ما يفكرون فيهم


ومادري منو هني قريت كاتبة ان الاجانب والمصريات عايشين بدون خدم
اهوا الاجانب ممكن
لكن خواتنا المصريات والله ماعمري طلعت الا واصادف معاهم خدم لا واغلبهم فلبينيات
توني رادة من مركز سلطان وحدة معاها طفلة وحدة بس ووراها فلبينية والله شكلها مريب الخدامة ونظراتها مقززة بس المرة مو هامها
وريلها مهتم بالببيبي واهيا تتمشى
فمووووو مقياس الجنسية ابداً
كا سوسو فديتها هبة ريح وام السنع

اعتقد هالشي يعتمد على شخصية كل وحدة والا انتوا شرايكم؟

 

[Melazlaza]

صج الماسة نبي يومياتج بلا خدم ومشاعرج قبل وبعد الخدامة

 

[PuPa^^SWeeT]

حياج الله الماااسة



مكانج و موضوعج


عطينا تحفييز لانه انا ودي صراحة







سوسو


ياحلوو الشعب وناااسة بصير من ذوات المواضيع المثبتة




ملزلزة ايي صاجة اغلبهم عندهم




وجم جريمة قتل صارت لهم


واذكر كانت عندي مرتجعة


اتقولي صاحبتها وافدة ماني ذاكرة الجنسية


تخيلي يوم واحد جان يدق المكتب المرة تبي فلوسها


يقولها ريلي ماجربناها



رديناها المكتب


شنو شدعوااا


عاد كانت اثيوبية و يايبها ريلي غصب غني



بعدها بشهر ولا نسمع عن وحدة نفس الجنسية ذابحتها الخدامة




سييدة قلنا

يمكن اهيا


هههههه




الله يستر



ليموون ونعناع احسن شي اتسوي

اذا ما يه منج خير مايي منج شرر


جذي تكبرين بعين ريلج








>>>>. بقى احد ماردينا علييه





المهم



الشعب





يريد




تثبيت





الموضوووووع






عجبتني الفكرة
<<< ماتنعطى ويه

 

[*kim*]

ملزلزه اكيد.سعيده من غير خدامه ليش اجيب عله في بيتي تراقب وتحسد وتبوق وتطق اليهال شحادني عليها حتى لو كانت زينه يكفي غريبه في بيتي وتقارن حياتها في حياتي لانها انثى بشر مو خدامه
والله كان عندي سيلانيه مدلعتها اخر دلع واعبي لها رصيد واشتري لها كل شي من وراي تطق بنتي تخيلو السبب شنو لما سألت خدامه امي قلت شنو اللي مضايقها عشان تطق بنتي قالت ماما هذي مخ مو زين تقول انا كبر ماما وماعندي بيت وزوج شوف الحقد وهي جدامي حليوه ومن وراي لعينه وجارتي اللي يمي بالشقه اهي اللي نبهتني قالت انتي من تروحين بنتج بس تبجي انا اسمع صوت الكعب لما تنزلين من الدرج وبنتج تشتغل صياح

 

[سوسو حبيبتى]

ملزلزة فدييتج حبيبتي ع الكلام الحلوو .. انزين تعالى شوفي بقطر الاجانب كلهم ماشيين وراهم خدم ههههههه

رييلي اول مايشوف واحدة يقول والله عيشنا وشفنا ..

مرة شفت واحدة شكلها يمكن روسيه ومعاها تلات بنات وخدامه امبييه الخدامه استغفر الله العظيم احلي منها وكاشخه ههههههه

والى يقهرك ان المدام راكبه سياره بورش ههههه موطبيعي

ماسه نظفتي يااحلي ميوووسه ناطرين يومياتك ياعسل

كيم ابشري .. نظفت الحمام عدددل تنظيف عميق والبركه فى تشجيعك

والمطبخ ..وغرفه نومي ع السريع

وابو الشباب كان عند اخوة

صج الموضوع كل ماادخله باخد بوووش واقوم انظف

انا بسمي تجمعنا ( السنعه عندنا ولا حد زينا )

 

[*kim*]

وبنات في شغله ملاحظتها لما اودي عيالي الالعاب تلقى الخدامه كاشخه وجنز وذيل حصان شعرها وماسكه الياهل وتلعبه والام والابو وراها اولا وين احساس الطفل بالمتعه هذا جو عائلي لازم انتي يالام تاخذينه بأيدج وتاعبينه وخلي الخدامه وراج لابغيتي مساعده او شي مو اهي الخدامه قايمه بدور الابو وألام وبعدين على ابس الخدامه شخليتي للمعزبه صج استغربت من هالحركات

 

[بقلبي انت]

السلام عليكم يا سنعات
انا ام لاربع اطفال وزوجي الخامس
اكبرهم بنتي عمرها 11 واصغرهم بنتي عمرها سنه ونص والمتوسطين بنتي عمرها 10 وولدي عمره5 <<<صارت معادله حسابيه
ماعندددددددددي خدامه ولله الحمد صارلي سنه وللعلم من تزوجت صارلي 11 سنه الخدم ماقعدوا عندي إلا وحده قعدت
سنتين وراحت سيلانيه كانت ماتفهم بس والله حبوبه علمتها علي ايدي والثانيه كانت اندونيسيه قعدت سنه وسافرت بسسسسس
وطول هالسنين الباقيه بدون خدامه انا كنت اجيبهم لحملت وبس تخلص اقامتها اسفرها وما اجيب غيرها لين احمل مره ثانيه
اول وثاني حمال ماكانت عندي خدامه بس بولدي جبت الاندونيسيه وبعدين السيلانيه

طبعا انا فيني هاجس النظافه احب اشوف كل شي مرتب ونظيف يمكن عشان جذي الخدم مايقعدون عندي وحااااره عصبيه
والله يابنات من انظف وارتب الصاله ادخل غرفتي شوي وبس اطلع الاقيها وصخه مو مرتبه اسوي
اعصار بالبيت والضحايا بناتي يرتبون وينظفون طبعا ولدي عمره 5 سنين وكل ما اقوله رتب غرفتك ورتب فراشك او
شيل هذا يقولي انا مو بنيه اشتغل وبناتي اعلمهم علي الشغل وقت العطله يغسلون الحمامات ويكنسون الغرف والصاله ويمسحون
الغبار والتلفزيون والمكتبه ويغسلون المواعين بس وقت المدارس لا انا اسوي كل شي
والله البيت بدون خدامه راحة وهدوء وماتحاتين شي ولا تخافين من شي صج انها تشيل عنج الشغل والكرف بس والله ماترتاحين لها
مهما كانت زينه واحنا ما ندري شنو بقلوبهم وبعقلهم وخاصه للبستي شي حلو والا حطيتي ميكب طارت عيونهم

نسيت اقولكم انا ساكنه بشقه مكونه من 3 غرف وصالتين نفس مقاس الغرف وحمامين ومطبخ وحوش عالسطح

بس انا الحين افكر اجيب وحده نص دوام تجيني بالاسبوع مرتين او ثلاث مرات للغسيل والكوي وغسيل المطبخ يعني تنظيف شامل
بس مو محصله للحين ورمضان جاينا بعد بيصير علينا ضغط كبير

الحين قلتلكم قصة حياتي باختصار لان اصابعي تعبت وانا اكتب لكم

المايك لكم

 

[ام تمارا]

مرحـــــــــــــــــــــبااااااااا

كيييييفكم جميعااااا ؟

انا عندي اربعه اطفال الاول يدرس في سنه ثاني ابتدائي والثانيه تمهيدي ولدي الثالث ايه ثااااااانيه وشغل لحاااله الله يصلحه ويهديه بالحييييل شيطووون ودي اجيب شغاله له لحاااله هع والرابعه بنوووتتي عيوووشه فديتها هاديه حيييل عمرها سنه بس انشاءالله ماتقلد اخوها اللي اكبر منهاا باللقااافه

شغالتي ســـــافرت :eh_s(11):من 3 شــهور والحمدالله الوضـــع تمااام بس بصراحــه تجيني حالات يكفينا شرهااا اعصب ع البيت كله اذا تعبت وارهقت من الشغل
حاولت اعود عيالي ع الترتيييب لانهم كانو معتمدين ع الشغاله بكل شي
اصحى بدري اسوي الفطور واجهز ملابس المدرسه واخلصهم ويروحون للمدارس ارجع اكمل نومتي لين 12 بعدها اقوم افطر اطفالي واركب الغداء واحوس في الييت والملابس يجي زوجي احط الغداء وبعدها قيلووله ومعووودهـ اطفالي ع النومه بعد الغذاء ريحتني شوي من الوقفه معااهم وكماان اعطي زوجي حقه وبعدين ع المغرب ادرسهم وع صلاه العشاء اعمل عشاء خفيف وينااموون والحمدالله زوجي مو حق استراحه ولا يتاخر برا البيت يمكن لانه ملتزم الحمدالله

مااقولكم موو فااااقدهـ الشغاله بالعكس فاااقدتها بقـــووووهـ وخاصــــــــه وقت الطلعااات ابلش فيهم وبقووووهـ حلاتك تطلعين لحالكك للعازيم والقهاااوي لاني تعودت ع كذاااا بس الحمدالله ع كل حال وتاقلمت ع الوضــع غصب عنـــي :eh_s(15):

 

[سوسو حبيبتى]

امبيييه كيم

حسبي الله على كذي اشكال

فكرتيني بخدامتي صججج يغاروا

كانت اكبر مني لووول

 

[سوسو حبيبتى]

بقلبي انت تمارا ..نورتوا التجمع ..ماشاء الله كل يوم بنزيد وعددنا بيكبر اللهم زيد وبارك ف العاقلات السنعات

بس لاتحرمونا من مشاركاتكم وتشجعيكم

كيم شوفي على سالفه الخدامه لماتتطلع مع العائله

صج صج منظر مستفز

يعني ماادري الام ليش تحرم نفسها من متعه انها تلعب مع عيالها؟؟ والله متعه

ااخخ لو تشوفوني وانا طالعه ع النطاطه اتنطط مع سوسو واقول لها هييييييه لووول بتقولوا مين الهبله دي ههههه

والا لما نروح لعبه المغاره وتتدخلني جوة المواسير واتحشر هههههههههه

بس بكرة تكبر وتبقا صاحبتي وحبيبتي وكل حاجة فى حياتي

ربنا يخليها لى ياااااااااارب

 

[Melazlaza]

والله صدقتي سوسو
انا كل يوم اكتشف اننا متشابهين

انا شكلي يضحك بالالعاب تشوفون راسي من بين روس الخدامات لووووووووول
العب ويا ولدي والله ولا يهمني خوووو هذي اجمل سنوات عمرنا مع عيالنا والله حرام تضيع


بنات الخدم عندهم عقدةالنقص باختلاف جنسياتهم وزينة او شينة كلهم يحسون بالم وترى دايما يقولون ليش الله عطاكم وما عطانا!!
فاي تصرف غير مستغرب منهم

مشكلتنا نتوقع منهم الحسنى
يعني نكرمهم ونتوقع منهم عدم الجحود
المفروض نكون كلنا قناعة ان هذي شعوب حاقدة علينا ومن الطبيعي تكرمينهم و تلاقين منهم الحقد والغل


مروا علي خدم والله ذوقوني المر
وحدة منهم من كثر ما اني مراعيتها
كنت اقولها هاج هذا كرسي قعدي عليه وانتي تسوين اوتي عشان لا تتعبين
واخذلها وجبة قبلي
وستاربكس الي ماكانت تعرفه اخليها تنقي الي تشتهيه
وطبعا عندي وسواس مستحييييييل تجيس ولدي

اخرتها تغافلتني وطلعت حرتها فيه
عيل شلون الي يتركون عيالهم مع الخدم!!

الله يعطينا الصحة والعافية يارب ولا يحوجنا لخدم

خل اضحكم اخوي يقوللي وايد متعبه روحج مع ولدج لي كبر بينساج
قتله شغلتين الله لا يحوجني لهم
الخدم
والعيال
ان شاءالله من حيلي لي قبيري